ശ്രീലങ്കയിൽ ഇത്ര വലിയ മോശം കാലാവസ്ഥ അപൂർവ്വം, കേരളവും തമിഴ്‌നാടും ഭയക്കണം

ഡിറ്റ് വാ ചുഴലിക്കാറ്റ് ശ്രീലങ്കയ്ക്കും ബംഗാൾ ഉൾകടലിനും മുകളിൽ ശക്തി പ്രാപിക്കുന്നു. വടക്കൻ ശ്രീലങ്കയിലും തെക്കൻ തമിഴ്നാട് തീരത്തും ഇപ്പോഴും കനത്ത ജാഗ്രത തുടരുകയാണ്.

ശ്രീലങ്കയിൽ ഇത്ര വലിയ മോശം കാലാവസ്ഥ അപൂർവം

ശ്രീലങ്കയിൽ നിലവിൽ മൺസൂൺ കാലമാണ്. എന്നിരുന്നാലും ഇത്രയും രൂക്ഷമായ കാലാവസ്ഥ ദ്വീപിൽ ഉണ്ടാകുന്നത് അപൂർവമായിട്ടാണ്. ഈ നൂറ്റാണ്ടിൽ ശ്രീലങ്കയിലെ ഏറ്റവും വലിയ വെള്ളപ്പൊക്കം 2003 ജൂണിൽ ആയിരുന്നു. അന്ന് 254 പേർ കൊല്ലപ്പെടുകയും ലക്ഷക്കണക്കിന് ആളുകൾക്ക് വീടുപോലും നഷ്ട്ടമാവുകയും ചെയ്തിരുന്നു.

മരണസംഖ്യ ഇനിയും കൂടാൻ സാധ്യത

ഇത്തവണ മഴ തുടങ്ങി ഒരാഴ്ച പിന്നിടുമ്പോൾ തന്നെ 50 ലധികം മരണങ്ങളാണ് സ്ഥിരീകരിച്ചത്. 20 ലേറെ പേരെ കാണാതായതും അപകടത്തിൻ്റെ വ്യാപ്‌തി കൂട്ടിയിരിക്കുകയാണ്. ഉരുൾപൊട്ടലും ശ്രീലങ്കയെ പിടിച്ചുകുലുക്കി. പട്ടണങ്ങളിൽ വെള്ളം ഉയരുകയും നിരവധി വീടുകൾ ഒലിച്ചുപോവുകയും ചെയ്തു. നദികളിലെ ജലനിരപ്പ് ഉയർന്നുകൊണ്ടേയിരിക്കുകയാണ്. അപകടം മനസ്സിലാക്കി പ്രദേശവാസികളോട് സുരക്ഷിത സ്ഥലത്തേക്ക് മാറാനായി ആവശ്യപ്പെട്ടിരിക്കുകയാണ് അധികൃതർ.

അടുത്ത 48 മണിക്കൂറിനുള്ളിൽ കേളനി നദിയുടെ സമീപമുള്ള താഴ്ന്ന പ്രദേശങ്ങൾക്ക് റെഡ് ലെവൽ വെള്ളപ്പൊക്ക മുന്നറിയിപ്പ് പുറപ്പെടുവിച്ചിരിക്കുകയാണ് ജലസേചന വകുപ്പ്. ശ്രീലങ്കയുടെ തലസ്ഥാനമായ കൊളംബോയിലും ഭീതി പരന്നിരിക്കുകയാണ്. ഇവിടെ അപകട സാധ്യതയുള്ള പ്രദേശങ്ങൾ ഉൾപ്പെടുന്നു.

റോഡുകൾ അടച്ചു, ഗതാഗതം സ്തംഭിച്ചു

പ്രവിശ്യങ്ങളെ കൂട്ടിയിണക്കുന്ന പ്രധാന റോഡുകൾ അടച്ചിട്ടുണ്ട്. ഇന്ന് രാവിലെ 6 മണി മുതൽ ചില അവശ്യ സർവീസുകൾ ഒഴികെയുള്ള എല്ലാ ട്രെയിനുകളും റദ്ദാക്കി. രാജ്യത്തുടനീളം ദുരിതാശ്വാസ-രക്ഷാപ്രവർത്തനങ്ങൾക്കായി ഏകദേശം 20,500 സൈനികരെ വിന്യസിച്ചിട്ടുണ്ട്. നിലവിൽ മേഘങ്ങൾ ശ്രീലങ്കയിലും തമിഴ്നാട്ടിലുമായി വ്യാപിച്ചു കിടക്കുകയാണ്. വടക്കൻ തമിഴ്നാട്, പുതുച്ചേരി, ആന്ധ്രാ തീരങ്ങളിൽ ചുഴലിക്കാറ്റ് രണ്ടാം ഘട്ട മുന്നറിയിപ്പ് പുറപ്പെടുവിച്ചിട്ടുണ്ട്. ഒരു പക്ഷേ കേരളതീരത്തെത്താനുള്ള സാധ്യത തള്ളികളയാനാവില്ല.

English Summary: Devastating floods have claimed over 50 lives in Sri Lanka, with more than 20 missing. Authorities urge residents to evacuate to safer areas as rivers rise.