Kerala weather 04/03/25: തെക്കൻ ജില്ലകളിൽ മഴ തുടരും, വടക്ക് ഒറ്റപ്പെട്ട മഴ
കൊടുംചൂടിൽ നിന്ന് ആശ്വാസം നൽകി തെക്കൻ കേരളത്തിൽ ഞായറാഴ്ച ശക്തമായ മഴയായിരുന്നു ലഭിച്ചത്. തിരുവനന്തപുരം, കൊല്ലം, പത്തനംതിട്ട ജില്ലകളിൽ കനത്ത മഴ പെയ്തു. തിരുവനന്തപുരം നഗരത്തിൽ ശക്തമായ മഴ പെയ്തതോടെ പല പ്രദേശങ്ങളിലും വെള്ളക്കെട്ട് രൂപപ്പെട്ടു.
അടുത്ത അഞ്ച് ദിവസത്തേക്ക് ഈ മേഖലയിൽ മഴ തുടരുമെന്ന് പ്രതീക്ഷിക്കുന്നു. വടക്കൻ കേരളത്തിൽ നേരിയ മഴ മാത്രമേ ഉണ്ടാകാൻ സാധ്യതയുള്ളൂ. തിങ്കളാഴ്ച കേരളത്തിലെ ഒറ്റപ്പെട്ട സ്ഥലങ്ങളിൽ സാധാരണയേക്കാൾ 2-3 ഡിഗ്രി സെൽഷ്യസ് കൂടിയ താപനില ഉണ്ടാകുമെന്ന് ഐഎംഡി മുന്നറിയിപ്പ് നൽകി.
രാവിലെ 10 മുതൽ 3 വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. ആയതിനാൽ ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.
പുറം ജോലികളിൽ ഏർപ്പെടുന്നവർ, കടലിലും ഉൾനാടൻ മൽസ്യബന്ധനത്തിലും ഏർപ്പെടുന്ന മൽസ്യ തൊഴിലാളികൾ, ജലഗതാഗതത്തിലേർപ്പെടുന്നവർ, ബൈക്ക് യാത്രക്കാർ, വിനോദസഞ്ചാരികൾ, ചർമ്മരോഗങ്ങളുള്ളവർ, നേത്രരോഗങ്ങളുള്ളവർ, കാൻസർ രോഗികൾ, മറ്റ് രോഗപ്രതിരോധശേഷി കുറഞ്ഞ വിഭാഗങ്ങൾ തുടങ്ങിയവർ പ്രത്യേകം ജാഗ്രത പാലിക്കണം.
പകൽ സമയത്ത് പുറത്തേക്ക് ഇറങ്ങുമ്പോൾ തൊപ്പി, കുട, സൺഗ്ലാസ് എന്നിവ ഉപയോഗിക്കാൻ ശ്രമിക്കുക. ശരീരം മുഴുവൻ മറയുന്ന കോട്ടൺ വസ്ത്രങ്ങൾ ഉപയോഗിക്കുന്നതായിരിക്കും ഉചിതം.
യാത്രകളിലും മറ്റും ഇടവേളകളിൽ തണലിൽ വിശ്രമിക്കാൻ ശ്രമിക്കുക.
മലമ്പ്രദേശങ്ങൾ (high altitudes), ഉഷ്ണമേഖലാ പ്രദേശങ്ങൾ തുടങ്ങിയവയിൽ പൊതുവെ തന്നെ UV സൂചിക ഉയർന്നതായിരിക്കും. മേഘങ്ങളില്ലാത്ത തെളിഞ്ഞ ആകാശമാണെങ്കിലും ഉയർന്ന UV സൂചികയുണ്ടാവാം. ഇതിന് പുറമെ ജലാശയം, മണൽ തുടങ്ങിയ പ്രതലങ്ങൾ അൾട്രാവയലറ്റ് രശ്മികളെ പ്രതിഫലിപ്പിക്കുന്നതിനാൽ ഇത്തരം മേഖലകളിലും UV സൂചിക ഉയർന്നതായിരിക്കും. Uv index 11നു മുകളിൽ എത്തിയാൽ ഏറ്റവും ഗുരുതരമായ സാഹചര്യം കണക്കിലെടുത്ത് റെഡ് അലർട്ട് പ്രഖ്യാപിക്കും. നിലവിൽ പത്തനംതിട്ട ജില്ലയിൽ പത്തും, മലപ്പുറം, കൊല്ലം, പാലക്കാട്, ഇടുക്കി ജില്ലകളിൽ യു വി ഇൻഡക്സ് എട്ടുമാണ് രേഖപ്പെടുത്തിയത്.
അതേസമയം വരും മണിക്കൂറിൽ മലപ്പുറം കോഴിക്കോട് ജില്ലകളുടെ വിവിധ പ്രദേശങ്ങളിൽ ഒറ്റപ്പെട്ട മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പ് മുന്നറിയിപ്പ് നൽകുന്നു.
