Menu

strong wind in delhi

ഡൽഹിയിൽ കനത്ത മഴയും കാറ്റും; ഒരു മരണം, കനത്ത നാശം

ഡൽഹിയിലും ദേശീയ തലസ്ഥാന മേഖലയിലും (എൻ.സി.ആർ) ഇടിയോടെയുണ്ടായ കനത്ത മഴയിലും കാറ്റിലും വ്യാപക നാശനഷ്ടം. ഇന്ന് വൈകിട്ടാണ് മഴയുണ്ടായത്. തെക്ക്, മധ്യ ഡൽഹിയിലാണ് മഴ. താപനില പെട്ടെന്ന് താഴുകയും റോഡുകൾ വെള്ളത്തിലാകുകയും ചെയ്തു. മരങ്ങൾ വീണ് നിരവധി വാഹനങ്ങൾ തകർന്നു. പലയിടത്തും ഗതാഗതക്കുരുക്കുണ്ടായി. ജുമാ മസ്ജിദ് ഏരിയയിൽ 50 കാരൻ ദേഹത്തേക്ക് ചുമരിടിഞ്ഞ് വീണ് മരിച്ചു. കനത്ത കാറ്റിൽ എ.സികളും മേൽക്കൂരകളും തകർന്നു. ഇവ പാർക്ക് ചെയ്ത കാറുകൾക്ക് മുകളിൽ വീണ് കാറുകൾ തകർന്നു. റോഡരികിൽ മരം കടപുഴകി ഓട്ടോകളും കാറും തകർന്നു.
സൗത്ത് എക്‌സറ്റൻഷൻ റിങ് റോഡിൽ കനത്ത ഗതാഗത തടസ്സം ഉണ്ടായി. ഹിമാചൽ ഭവന് സമീപം വൻ മരം കടപുഴകി. കസ്തൂർബാ ഗാന്ധി റോഡിലും വൻ മരം വീണ് റോഡ് ഗതാഗതം തടസ്സപ്പെട്ടു. സി.ജി.ഒ കോംപ്ലക്‌സിനു സമീപത്തെ നിർമാണം നടക്കുന്ന കെട്ടിടം കാറ്റിലും മഴയിലും തകർന്നു. എട്ട് വിമാനങ്ങൾ ജയ്പൂർ, ലഖ്‌നൗ, ചണ്ഡിഗഢ്, അഹമ്മദാബാദ്, ഡെറാഡൂൺ തുടങ്ങിയ വിമാനത്താവളങ്ങളിലേക്ക് തിരിച്ചുവിട്ടുവെന്ന് ഡൽഹി വിമാനത്താവള അധികൃതർ അറിയിച്ചു. മഴയെ തുടർന്ന് താപനില 27.8 ഡിഗ്രിയിലേക്ക് താഴ്ന്നു. മണിക്കൂറിൽ 50 കി.മി വേഗതയിലുള്ള കാറ്റാണ് നഗരത്തിൽ വീശിയത്.

ചൂടിനിടെ ഡൽഹിയിൽ കനത്ത മഴ, കാരണം അറിയാം

കനത്ത ചൂടിനും ഉഷ്ണ തരംഗത്തിനും പിന്നലെ ഡൽഹിയിലും സമീപ പ്രദേശത്തും കനത്ത മഴയും കാറ്റും തുടരുന്നു. ഇന്ന് പുലർച്ചെ ശക്തമായ കാറ്റിനൊപ്പം പെയ്ത കനത്ത മഴയെത്തുടർന്ന് ഡൽഹിയുടെ വിവിധ ഭാഗങ്ങളിലും സമീപപ്രദേശങ്ങളിലും വൈദ്യുതി മുടങ്ങി. അടുത്ത മണിക്കൂറുകളിൽ ഡൽഹി ദേശീയ തലസ്ഥാന പ്രദേശത്ത് മഴക്കും കാറ്റിനും സാധ്യതയുണ്ടെന്ന് കാലവസ്ഥ നിരീക്ഷണ വകുപ്പ് പറയുന്നത്.
ഡൽഹി വിമാനത്താവളത്തിന്റെ പ്രവർത്തനത്തേയും മഴ ബാധിച്ചു. വിമാനങ്ങൾ മോശം കാലാവസ്ഥയെ തുടർന്ന് വഴിതിരിച്ചുവിടുകയും ചിലത് മുടങ്ങുകയും ചെയ്തു. വിമാനങ്ങളുടെ പുതുക്കിയ സമയക്രമത്തിനായി ബന്ധപ്പെട്ട വിമാനകമ്പനികളുമായി ബന്ധപ്പെടാൻ യാത്രക്കാരോട് വിമാനത്താവള അധികൃതർ അറിയിച്ചു. മോശം കാലാവസ്ഥമൂലം വിമാനങ്ങൾ വൈകാനോ വഴിതിരിച്ചുവിടാനോ സാധ്യതയുണ്ടെന്ന് ടാറ്റയുടെ എയർ ഇന്ത്യയും അറിയിച്ചു.
ദുർബലമായ കെട്ടിടങ്ങൾക്കും വീടുകൾക്കും ഇടിമിന്നലിലും കാറ്റിലും കേടുപാടുകൾ സംഭവിക്കാമെന്നും ഗതാഗത തടസങ്ങൾക്ക് സാധ്യതയുണെന്നും കാലാവസ്ഥ വകുപ്പ് മുന്നറിയിപ്പ് നൽകി. അടുത്ത മണിക്കൂറുകളിൽ 60-90 കിലോമീറ്റർ വേഗത്തിൽ കാറ്റുവീശിയേക്കുമെന്നും ഇടിമിന്നലോടുകൂടിയ മഴ തുടരുമെന്നും മുന്നറിയിപ്പുണ്ട്.

മഴക്ക് കാരണം എന്ത്?
വേനൽ കത്തുന്നതിനിടെ പെയ്ത മഴ വേനൽ മഴയല്ല. കഴിഞ്ഞ ദിവസങ്ങളിൽ ചൂട് 47 ഡിഗ്രി വരെ ഡൽഹിയിൽ രേഖപ്പെടുത്തിയിരുന്നു. ഇതിനു പിന്നാലെ മെഡിറ്ററേനിയൻ കടലിൽ നിന്നുള്ള കാറ്റായ പശ്ചിമവാതം (western distrubance) ശക്തമായി. ഇത് ഇറാൻ, അഫ്ഗാനിസ്ഥാൻ, പാകിസ്താൻ വഴി ഇന്ത്യയിലെത്തി. വടക്കു പടിഞ്ഞാറൻ രാജസ്ഥാൻ, പാകിസ്താൻ മേഖലകളിൽ ചക്രവാത ചുഴിയും രൂപപ്പെട്ടു. ഇതോടു ചേർന്ന് കിഴക്ക് – പടിഞ്ഞാറൻ ന്യൂനമർദ പാത്തിയും ഉണ്ട്. ഇവയെല്ലാം കനത്ത മഴക്കും കാറ്റിനും കാരണമായെന്നാണ് മെറ്റ്ബീറ്റ് വെതറിന്റെ നിരീക്ഷണം. ഈർപ്പമുള്ള കാറ്റ് പാകിസ്താൻ വഴി എത്തുമ്പോൾ തന്നെ ഇന്ത്യയുടെ കരഭാഗത്തെ വരണ്ട കാറ്റും സംഗമിക്കുന്നത് ശക്തിയേറിയ ഇടിമിന്നൽ സാധ്യത വർധിപ്പിക്കുന്നു. അതിനാൽ ജാഗ്രത തുടരണമെന്നും മെറ്റ്ബീറ്റ് വെതർ ആ മേഖലയിലുളളവരോട് നിർദ്ദേശിക്കുന്നു.