Menu

south west monsoon

ഉത്തരേന്ത്യയിൽ നിന്ന് കാലവർഷം വേഗത്തിൽ വിടവാങ്ങുന്നു

കാലവർഷം ഉത്തരേന്ത്യയിൽ നിന്ന് വേഗത്തിൽ വിടവാങ്ങുന്നു. ഇന്ന് ബിഹാർ,സിക്കിം, മേഘാലയ മധ്യപ്രദേശ് എന്നീ സംസ്ഥാനങ്ങളിൽ നിന്നും കാലവർഷം പൂർണമായി വിടവാങ്ങി. അസം, ത്രിപുര,ബംഗാൾ തുടങ്ങിയ സംസ്ഥാനങ്ങളുടെ ചില ഭാഗങ്ങളിൽ നിന്നും കാലവർഷം ഇന്ന് ഇവിടെ വാങ്ങി. വിദർഭ , ചത്തീസ്ഗഡ് , മഹാരാഷ്ട്ര, ജാർഖണ്ഡ് എന്നിവിടങ്ങളിലാണ് കാലവർഷം വിടവാങ്ങൽ ഇനി പുരോഗമിക്കാൻ ഉള്ളത്. അടുത്ത രണ്ടു ദിവസത്തിനകം ഇവിടെ നിന്നും കാലവർഷം വിടവാങ്ങും.
അതേസമയം, കഴിഞ്ഞ രണ്ടുദിവസമായി സൂചിപ്പിച്ചതുപോലെ ബംഗാൾ ഉൾക്കടലിൽ ഈ മാസം 18 ന് ന്യൂനമർദ്ദം രൂപപ്പെടും. ന്യൂനമർദ്ദം ദക്ഷിണേന്ത്യയിൽ മഴക്ക് കാരണമാകും. കർണാടകയിലും തമിഴ്നാട്ടിലും കേരളത്തിലുമാണ് കൂടുതൽ മഴക്ക് സാധ്യത. കഴിഞ്ഞ ദിവസങ്ങളിലെ അവലോകനങ്ങളിൽ ഇക്കാര്യം സൂചിപ്പിച്ചിരുന്നു. എന്നാൽ കേന്ദ്ര കാലാവസ്ഥ വകുപ്പ് ന്യൂനമർദ്ദം രൂപപ്പെടുന്ന കാര്യം ഇപ്പോൾ സ്വീകരിച്ചിട്ടുണ്ട്. കേരളത്തിന്റെ കിഴക്കൻ മേഖലകളിൽ ഒറ്റപ്പെട്ട ഇടിയോടുകൂടെയുള്ള ശക്തമായ മഴ ഇന്നും തുടരുകയാണ്. അടുത്ത നാല് ദിവസം കൂടി ഈ രീതിയിലുള്ള കാലാവസ്ഥ തുടരുമെന്നാണ് ഞങ്ങളുടെ നിരീക്ഷകർ പറയുന്നത്. വിശദാംശങ്ങൾക്ക് മെറ്റ്ബീറ്റ് വെതറിന്റെ ഫേസ്ബുക്ക് പേജ് പിന്തുടരുക.

ദക്ഷിണേന്ത്യയിൽ ഒറ്റപ്പെട്ട മഴക്ക് സാധ്യത

കേരളം ഉൾപ്പെടെ ദക്ഷിണേന്ത്യയിൽ സംസ്ഥാനങ്ങളിൽ ഇന്ന് മുതൽ ഒറ്റപ്പെട്ട മഴക്ക് സാധ്യത. വടക്കൻ തമിഴ്നാട് , ആന്ധ്രപ്രദേശ് തീരം കർണാടക എന്നിവിടങ്ങളിൽ ഇന്നുമുതൽ ഏതാനും ദിവസം ശക്തമായ / ഇടത്തരം മഴയ്ക്ക് സാധ്യതയുണ്ട്. കാസർകോട് ഉൾപ്പെടെയുള്ള വടക്കൻ ജില്ലകളിലും തെക്കൻ കേരളത്തിലെ പത്തനംതിട്ട , കോട്ടയം, കൊല്ലം ജില്ലകളിലും ഒറ്റപ്പെട്ട മഴക്ക് സാധ്യതയുണ്ട്. ഉത്തരേന്ത്യയിൽ കാലവർഷം വിടവാങ്ങുന്നത് പുരോഗമിക്കുന്നുണ്ടെങ്കിലും ദക്ഷിണേന്ത്യൻ തീരത്ത് പ്രത്യേകിച്ച് ആന്ധ്ര തീരത്തോട് ചേർന്ന് രൂപപ്പെട്ട ചക്രവാത ചുഴിയാണ് ദക്ഷിണേന്ത്യയിൽ മഴക്ക് കാരണമാകുന്നത്. കർണാടകക്ക് മുകളിലൂടെ കിഴക്ക് – പടിഞ്ഞാറായി ഒരു ന്യൂനമർദ്ദ പാത്തിയും രൂപപ്പെട്ടിരിക്കുന്നു. വടക്കൻ തമിഴ്നാട്ടിൽ ചെന്നൈ ഉൾപ്പെടെയുള്ള നഗരങ്ങളിൽ ഇന്നുമുതൽ മഴക്ക് സാധ്യതയുണ്ട്. ആന്ധ്രയുടെ തീരദേശത്തും ശക്തമായ മഴ ലഭിക്കാം. ബംഗളൂരു ഉൾപ്പെടെയുള്ള കർണാടകയുടെ ഭാഗങ്ങളിലും ഇടത്തരം മഴക്ക് സാധ്യതയുണ്ട്. ബംഗാൾ ഉൾക്കടലിൽ നിന്ന് കൂടുതൽ ഈർപ്പം കയറുന്നതാണ് മഴക്ക് കാരണമാകുന്നത്. ഇതിന്റെ സ്വാധീന ഫലമായി കേരളത്തിലും ഒറ്റപ്പെട്ട മഴ ലഭിക്കും. വൈകുന്നേരങ്ങളിലോ രാത്രിയോ ആയിരിക്കും കേരളത്തിലെ മഴക്ക് സാധ്യത. ഇടിയോട് കൂടെയുള്ള മഴക്കും കിഴക്കൻ മേഖലകളിൽ സാധ്യതയുണ്ട്. എന്നാൽ ഇത് തുലാവർഷത്തിന്റെ ഭാഗമായുള്ള മഴയല്ല. ഇന്ന് കാലവർഷത്തിന്റെ ഭാഗമായുള്ള മഴയുടെ കണക്കെടുപ്പ് അവസാനിക്കുകയും നാളെ മുതൽ പെയ്യുന്ന മഴ തുലാവർഷത്തിന്റെ കണക്കിലും ആണ് ഔദ്യോഗികമായി ഉൾപ്പെടുത്തുക. എന്നാൽ തുലാവർഷം കേരളത്തിലെത്താൻ ഇനിയും രണ്ടാഴ്ചയെങ്കിലും കഴിയുമെന്നാണ് ഞങ്ങളുടെ വിദഗ്ധരുടെ നിരീക്ഷണം.

കാലവർഷം കണക്കെടുപ്പ് രണ്ട് ദിവസം കൂടി ; 13 % മഴക്കുറവ്

കേരളത്തിൽ (തെക്കുപടിഞ്ഞാറൻ മൺസൂൺ) കാലവർഷത്തിന്റെ ഓദ്യോഗിക കണക്കെടുപ്പ് വെള്ളിയാഴ്ച പൂർത്തായാകും. ഇതുവരെ സംസ്ഥാനത്ത് 13 ശതമാനം മഴക്കുറവാണ് റിപ്പോർട്ട് ചെയ്തത്. സാങ്കേതികമായി ഇത് സാധാരണ മഴയാണ്. ജൂൺ 1 മുതൽ സെപ്റ്റംബർ 30 വരെയുള്ള മഴയാണ് കാലവർഷത്തിന്റെ കണക്കിൽ പെടുത്തുക. ഇന്നുവരെ കേരളത്തിൽ 2001.1 മില്ലി മീറ്റർ മഴയാണ് ലഭിക്കേണ്ടത്. ഇതുവരെ 1735.7 മില്ലി മീറ്റർ മഴ ലഭിച്ചിട്ടുണ്ട്. ആലപ്പുഴ (-29), കൊല്ലം (-20), തിരുവനന്തപുരം (-29) ശതമാനം മഴക്കുറവുണ്ട്. മറ്റു ജില്ലകളിലെല്ലാം സാധാരണ മഴയാണ് ഇതുവരെ റിപ്പോർട്ട് ചെയ്തത്.
കണ്ണൂർ (-10), എറണാകുളം (-17), ഇടുക്കി (-15), കാസർകോട് (-2), കോട്ടയം (-15), കോഴിക്കോട് (-12), മലപ്പുറം (-16), പാലക്കാട് (-5), പത്തനംതിട്ട (-15), തൃശൂർ (-17), വയനാട് (-8) ശതമാനം മഴ ലഭിച്ചു. 19 ശതമാനം മഴ കൂടുതലോ കുറവോ ലഭിച്ചാൽ സാധാരണ മഴയായാണ് കണക്കാക്കുക.

കാലവർഷം പിൻമാറ്റം കേരളത്തിലെത്തിയില്ല
മൺസൂൺ മഴയുടെ കണക്കെടുപ്പ് രണ്ടു ദിവസം കൊണ്ട് അവസാനിക്കുമെങ്കിലും കേരളത്തിൽ മൺസൂൺ വിടവാങ്ങാൻ ഇനിയും 15 ദിവസമെങ്കിലും എടുക്കും. ഒരാഴ്ചയോളമായി മൺസൂൺ വിടവാങ്ങൽ രാജസ്ഥാനിൽ തന്നെ തുടരുകയാണ്. മധ്യ ഇന്ത്യയിൽ ഇപ്പോഴും മഴ ലഭിക്കുന്ന സാഹചര്യമാണുള്ളത്. ഖജുവാല, ബീകാനീർ, ജോധ്പൂർ, നാലിയ എന്നിവിടങ്ങളിലാണ് ഇപ്പോൾ കാലവർഷം പിൻവാങ്ങിയത്. 2-3 ദിവസത്തിനു ശേഷം മധ്യ ഇന്ത്യയിലെ കൂടുതൽ പ്രദേശങ്ങളിലേക്ക് കാലവർഷം വിടവാങ്ങൽ പുരോഗമിക്കും. ബംഗാൾ ഉൾക്കടലിന്റെ മധ്യപടിഞ്ഞാറൻ മേഖലയിൽ ആന്ധ്രാപ്രദേശ് തീരത്തായി അന്തരീക്ഷത്തിന്റെ താഴ്ന്ന നിലയിൽ ചക്രവാതച്ചുഴി തുടരുന്നതിനാൽ തമിഴ്‌നാട്ടിലും ആന്ധ്രാപ്രദേശിലും കർണാടകയിലും മഴ അടുത്ത ദിവസങ്ങളിലുമുണ്ടാകും. കേരളത്തിൽ ഒന്നോ രണ്ടോ പ്രദേശങ്ങളിൽ മഴ ലഭിക്കാം. ഒക്ടോബർ ആദ്യവാരം ബംഗാൾ ഉൾക്കടലിൽ ന്യൂനമർദം രൂപപ്പെടാനും സാധ്യതയുണ്ട്.

18 ഓടെ വീണ്ടും ന്യൂനമർദ്ദ സാധ്യത

ബംഗാൾ ഉൾക്കടലിൽ ഈ മാസം പതിനെട്ടാം തീയതിയോടെ മറ്റൊരു ന്യൂനമർദ സാധ്യത. കഴിഞ്ഞ ദിവസം രൂപപ്പെട്ട ന്യൂനമർദ്ദം കരകയറി മധ്യപ്രദേശിന് മുകളിൽ തുടരുകയാണ്. ഈ ന്യൂനമർദ്ദത്തിന്റെ ഭാഗമായി കേരളത്തിൽ മഴ കുറയാനാണ് സാധ്യത. വടക്കൻ ജില്ലകളിൽ പ്രത്യേകിച്ച് കോഴിക്കോട്, കണ്ണൂർ, കാസർകോട് ജില്ലകളിൽ ഒറ്റപ്പെട്ട മഴ തുടരും . മട്ടിടങ്ങളിലും രാത്രിയും പുലർച്ചെയും ഒറ്റപ്പെട്ട മഴക്ക് സാധ്യതയുണ്ട്.
ഈ മാസം പതിനെട്ടോടെ രൂപപ്പെട്ടേക്കാവുന്ന ചക്രവാതച്ചുഴി ആണ് ശക്തിപെട്ട് ന്യൂനമർദ്ദമാകാൻ സാധ്യതയുള്ളത്. ഈ സിസ്റ്റം കേരളത്തെ കാര്യമായി ബാധിച്ചേക്കില്ലെന്നാണ് ഞങ്ങളുടെ നീരീക്ഷകരുടെ പ്രാഥമിക നിരീക്ഷണം. കേരളത്തിൽ മഴ കുറയുമെങ്കിലും ഭാഗികമായി മേഘാവൃതമായ സാഹചര്യം പലയിടത്തും രണ്ടു ദിവസം കൂടി അനുഭവപ്പെടും. ഉച്ചക്കുശേഷം ഇന്നും നാളെയും മണിക്കൂറിൽ 40 കിലോമീറ്റർ വരെയുള്ള കാറ്റിനും കിഴക്കൻ മേഖലയിൽ സാധ്യതയുണ്ട്.

ന്യൂനമർദ്ദം ശക്തിപ്പെട്ടില്ല; കേരളത്തിൽ മഴ തുടരും

ബംഗാൾ ഉൾക്കടലിൽ കഴിഞ്ഞദിവസം രൂപപ്പെട്ട ന്യൂനമർദ്ദം ശക്തിപ്പെടാതെ ഒഡീഷ തീരത്ത് തുടരുന്നു. നേരത്തെയുള്ള ഞങ്ങളുടെ പോസ്റ്റ് പ്രകാരം ഇന്ന് ന്യൂനമർദ്ദം ശക്തിപ്പെടുമെന്നായിരുന്നു നിരീക്ഷണം. എന്നാൽ ന്യൂനമർദ്ദം അടുത്ത 24 മണിക്കൂറിലെ ശക്തിപ്പെടാൻ സാധ്യതയുള്ളൂ എന്നാണ് കേന്ദ്ര കാലാവസ്ഥ വകുപ്പിന്റെയും മറ്റ് സ്വകാര്യ ഏജൻസികളുടെയും നിഗമനം. ന്യൂനമർദ്ദം ശക്തിപ്പെട്ട ശേഷം ഒഡീഷ ആന്ധ്ര തീരങ്ങൾക്ക് സമീപത്തേക്ക് നീങ്ങാനാണ് സാധ്യത.

കേരളത്തിലെ മഴ സാധ്യത ഇങ്ങനെ
ദക്ഷിണേന്ത്യയിൽ അടുത്ത ദിവസങ്ങളിലും വ്യാപകമായി മഴ ലഭിക്കാനുള്ള അന്തരീക്ഷ സ്ഥിതിയാണ് നിലവിലുള്ളതെന്ന് Metbeat Weather ലെ നിരീക്ഷകർ പറയുന്നു. മൺസൂൺ മഴപ്പാത്തി എന്ന മൺസൂൺ ട്രഫ് തെക്ക് അതിൻറെ സാധാരണ നിലയിലാണ്. കൊങ്കൺ മേഖലയിൽ നിന്ന് ന്യൂനമർദ്ദ മേഖലയിലേക്ക് ഒരു ന്യൂനമർദ്ദ പാത്തിയും രൂപപ്പെട്ടിട്ടുണ്ട്. കഴിഞ്ഞദിവസം തെക്കൻ ഉൾനാടൻ കർണാടകയിൽ തുടർന്നിരുന്ന ചക്രവാതചുഴി ദുർബലപ്പെട്ടെങ്കിലും ഈ ന്യൂനമർദ്ദ പാത്തിയുടെ സ്വാധീനംമൂലം വടക്കൻ കേരളത്തിൽ ഇടവിട്ടുള്ള മഴ ഇനിയും തുടരും . കൂടാതെ അറബിക്കടലിൽ ശക്തിപ്പെട്ട കാലവർഷക്കാറ്റ് ബംഗാൾ ഉൾക്കടലിലേക്കും സ്ട്രീം ചെയ്യപ്പെടുന്നുണ്ട്. ഇതിനാൽ മേഘങ്ങൾ അറബിക്കടലിൽ നിന്ന് കേരളത്തിന് മുകളിൽ എത്തുന്ന മുറക്ക് മഴ പെയ്യാനുള്ള സാഹചര്യമാണ് അടുത്ത 48 മണിക്കൂറിൽ ഉള്ളത്. അറബി കടലിൽ താരതമ്യേന മേഘരൂപീകരണം കുറവായതിനാലാണ് കേരളത്തിൽ തുടർച്ചയായ ശക്തമായ മഴ ഇപ്പോഴത്തെ അന്തരീക്ഷ സാഹചര്യത്തിൽ ലഭിക്കാത്തത് . മധ്യകേരളത്തിലോ വടക്കൻ കേരളത്തിലുമാണ് കൂടുതൽ മഴ പ്രതീക്ഷിക്കുന്നത്. കിഴക്കൻ മേഖലകളിലും ശക്തമായ മഴ വൈകുന്നേരങ്ങളിലും രാത്രിയിലും പ്രതീക്ഷിക്കാം. ഈ സാഹചര്യം തിങ്കളാഴ്ച വരെ തുടരാനാണ് സാധ്യത എന്നും ഞങ്ങളുടെ നിരീക്ഷകർ പറയുന്നു. കൂടുതൽ വിവരങ്ങൾക്ക് മെറ്റ്ബീറ്റ് വെതർ ഫേസ്ബുക്ക് പേജ് ലൈക്ക് ചെയ്യുക.

കേരളത്തിൽ വീണ്ടും മഴ തിരികെ എത്തുന്നു

കേരളത്തിൽ ഒരിടവേളക്ക് ശേഷം മഴ തിരികെ എത്തുന്നു. നാളെ മുതൽ എല്ലാ ജില്ലകളിലും സാധാരണ മഴ പ്രതീക്ഷിക്കാം. വ്യാഴം വരെ മഴ ഇടവിട്ട് ലഭിക്കും. വെള്ളി, ശനി ദിവസങ്ങളിൽ മഴക്ക് കുറവുണ്ടാകും. തിങ്കൾ മുതൽ വീണ്ടും മഴ ലഭിക്കും. ഇപ്പോൾ പെയ്യേണ്ട പ്രതിദിന ശരാശരി മഴക്കേ ഇപ്പോൾ സാധ്യത ഉള്ളൂ എന്നും സെപ്റ്റംബർ ആദ്യ വാരത്തോടെ എം.ജെ. ഒ എത്തുന്ന തോടെ മഴ ശക്തിപെട്ടേക്കുമെന്നും മെറ്റ്ബീറ്റ് വെതർ നിരീക്ഷകർ പറഞ്ഞു. കേരളത്തിൽ ജൂൺ ഒന്നു മുതൽ ഇന്ന് വരെ 21 ശതമാനം മഴ കുറവാണ്. കണ്ണൂർ, കാസർകോട്, പാലക്കാട് ,തൃശൂർ, വയനാട് ജില്ലകളിലാണ് സാധാരണ മഴ ലഭിച്ചത്. മറ്റു ജില്ലകളിലെല്ലാം മഴ കുറവാണ് രേഖപ്പെടുത്തിയത്.

കേരളത്തിൽ ശക്തമായ മഴ എത്രദിവസം വരെ തുടരും ?

കേരളത്തിൽ ശക്തമായ മഴ രണ്ടു ദിവസം കൂടി തുടരും. വെള്ളിയാഴ്ച മുതൽ കിഴക്കൻ മേഖലയിൽ മഴ തുടരുമെങ്കിലും ഇപ്പോഴത്തെ തീവ്രതയുണ്ടാകില്ലെന്നാണ് മെറ്റ്ബീറ്റ് വെതറിന്റെ നിരീക്ഷണം. ബുധൻ, വ്യാഴം ദിവസങ്ങളിൽ ജാഗ്രത തുടരണം. വടക്കൻ കേരളത്തിലും മധ്യ കേരളത്തിലെ കിഴക്കൻ മലയോരത്തും ശക്തമായതോ അതിശക്തമായതോ ആയ മഴ തുടരും. വലിയ തോതിൽ പ്രളയത്തിലേക്ക് നീങ്ങുന്ന സാഹചര്യം ഉണ്ടാകാനിടയില്ലെന്നാണ് ഏറ്റവും പുതിയ കാലാവസ്ഥാ അവലോകനം. സംസ്ഥാനത്തെ മിക്ക മേഖലകളിലും ഇന്നു പകൽ കഴിഞ്ഞ ദിവസത്തെ അപേക്ഷിച്ച് മഴ കുറഞ്ഞിരുന്നു. നദികളിൽ ജലനിരപ്പ് വലിയതോതിൽ കൂടിയതുമില്ല. ഡാമിലേക്ക് നീരൊഴുക്ക് വർധിക്കുന്നുണ്ടെങ്കിലും തുറക്കേണ്ട സാഹചര്യത്തിലല്ല മേജർ ഡാമുകൾ.

കേരളത്തിനു സമാന്തരമായി നിലകൊള്ളുന്ന ബംഗാൾ ഉൾക്കടലിലെ ചക്രവാതച്ചുഴി അടുത്ത ദിവസങ്ങളിൽ വടക്കോട്ട് നീങ്ങാൻ സാധ്യതയുണ്ട്. അതിനൊപ്പം മഴയും കർണാടക, ഗോവ മേഖലയിലേക്ക് നീങ്ങും. ഇന്നും കർണാടകയിൽ കനത്ത മഴ ലഭിച്ചിരുന്നു. കർണാടകയിലെ മഴ വടക്കൻ കേരളത്തെ സ്വാധീനിക്കുമെങ്കിലും വടക്കൻ ജില്ലകളിൽ അസാധാരണ സാഹചര്യം ഉണ്ടാകാൻ ഇടയില്ല. കിഴക്കൻ മലയോര മേഖലകളിലെ ജാഗ്രത കേരളത്തിലെ എല്ലാ മേഖലകളിൽ ഞായറാഴ്ച വരെയെങ്കിലും തുടരുന്നതാണ് സുരക്ഷിതം. പൊതുജനങ്ങൾ സർക്കാർ ഏജൻസികൾ നൽകുന്ന നിർദേശം അനുസരിക്കുക. ഔദ്യോഗിക, സ്വകാര്യ കാലാവസ്ഥാ ഏജൻസികൾ നൽകുന്ന വിവരങ്ങൾ മനസിലാക്കി വയ്ക്കുക. മാറിത്താമസിക്കാൻ നിർദേശം ലഭിച്ചാൽ അമാന്തിച്ച് നിൽക്കരുത്. സുരക്ഷക്ക് മുൻതൂക്കം നൽകുക.
ശ്രദ്ധിക്കുക- അപ്‌ഡേഷനുകൾ അറിയാൻ ഞങ്ങളുടെ Metbeat Weather, weatherman kerala എന്നീ ഫേസ്ബുക്ക് പേജുകളും യുട്യൂബ് ചാനലുകളും metbeat.com, metbeatnews.com എന്നീ വെബ്‌സൈറ്റുകളും LIKE ചെയ്തും Subscribe ചെയ്തും പിന്തുടരുക.

കേരള തീരത്ത് ജൂലൈ 4 വരെ മത്സ്യബന്ധന വിലക്ക്

കേരള-ലക്ഷദ്വീപ് തീരങ്ങളിൽ ഇന്ന് മുതൽ അടുത്ത മാസം 4 വരെയും, കർണാടക തീരങ്ങളിൽ രണ്ടാം തിയതി വരെയും മത്സ്യബന്ധനത്തിന് (fishing) പോകാൻ പാടുള്ളതല്ലെന്ന് കേന്ദ്ര കാലാവസ്ഥ വകുപ്പിന്‍റെ (IMD) മുന്നറിയിപ്പ് (warning).

കേരള-ലക്ഷദ്വീപ് തീരങ്ങളിലും കർണാടക തീരങ്ങളിലും മണിക്കൂറിൽ 40 മുതൽ 50 കിലോമീറ്റര്‍ വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാലാണ് മൽസ്യബന്ധനത്തിനായി കടലിൽ പോകാൻ പാടില്ലെന്ന നിർദേശം നൽകിയത്.

നിർദേശങ്ങൾ ഇങ്ങനെ

29-06-2022 മുതൽ 01-07-2022 വരെ: കന്യാകുമാരി തീരം, ഗൾഫ് ഓഫ് മാന്നാർ അതിനോട് ചേർന്നുള്ള  തെക്ക് പടിഞ്ഞാറ്  ബംഗാൾ ഉൾക്കടലിലും  മണിക്കൂറിൽ 40 മുതൽ 50 കിലോമീറ്റര്‍ വേഗതയിലും ചില അവസരങ്ങളിൽ 60  കി. മീറ്റർ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത.

29-06-2022 മുതൽ 02-07-2022 വരെ:  മധ്യ കിഴക്കൻ അറബിക്കടൽ, തെക്ക് പടിഞ്ഞാറ് അറബിക്കടൽ,  എന്നിവിടങ്ങളിൽ മണിക്കൂറിൽ 40 മുതൽ 50 കിലോമീറ്റര്‍ വേഗതയിലും ചില അവസരങ്ങളിൽ 60  കി. മീറ്റർ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത.

29-06-2022 : ആന്ധ്രാപ്രദേശ് തീരത്തിലും  അതിനോട് ചേർന്നുള്ള മധ്യ പടിഞ്ഞാറ്  ബംഗാൾ ഉൾക്കടലിലും  മണിക്കൂറിൽ 40 മുതൽ 50 കിലോമീറ്റര്‍ വേഗതയിലും ചില അവസരങ്ങളിൽ 60  കി. മീറ്റർ വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യത.

മേൽപ്പറഞ്ഞ പ്രദേശങ്ങളിൽ മുന്നറിയിപ്പുള്ള തീയതികളിൽ മല്‍സ്യബന്ധനത്തിന് പോകാന്‍ പാടുള്ളതല്ല.

ഉയർന്ന തിരമാല ജാഗ്രത നിർദ്ദേശം

കേരള തീരത്ത് (വിഴിഞ്ഞം മുതൽ കാസർഗോഡ് വരെ) 29-06-2022 രാത്രി 11.30 വരെ 3 മുതൽ 3.2 മീറ്റർ വരെ ഉയരത്തിൽ തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം (INCOIS) അറിയിച്ചു.

മൽസ്യത്തൊഴിലാളികളും തീരദേശവാസികളും ജാഗ്രത തുടരുക

1. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം.  

2. മൽസ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മൽസ്യബന്ധന ഉപകരണങ്ങളുടെ സുരക്ഷ ഉറപ്പാക്കണം.

3. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണ്ണമായും ഒഴിവാക്കണമെന്നും കാലാവസ്ഥ വകുപ്പിന്റെയും സംസ്ഥാന ദുരന്തനിവാരണ അതോറിറ്റിയുടെയും അറിയിപ്പിൽ പറയുന്നു.

കാലവർഷം സജീവമാകും , എങ്ങനെ എന്നറിയാം

ഒരിടവേളയ്ക്ക് ശേഷം തെക്കുപടിഞ്ഞാറൻ മൺസൂൺ (കാലവർഷം) പതിയെ സജീവമാവുകയാണ്. ആഗോള മഴപ്പാത്തി എന്ന് വിശേഷിപ്പിക്കപ്പെടുന്ന എം.ജെ. ഒയുടെ സാന്നിധ്യം പടിഞ്ഞാറൻ അറബിക്കടലിലും ബംഗാൾ ഉൾക്കടലിലും എത്തുന്നതാണ് കേരളത്തിൽ വീണ്ടും കാലവർഷം സജീവമാവാകാൻ കാരണം. മെയ് അവസാന വാരത്തോടെ കേരളത്തിൽ കാലവർഷക്കാറ്റ് എത്തിയെങ്കിലും പിന്നീട് ദുർബലമാവുകയായിരുന്നു. സാധാരണ കാലവർഷത്തെ സ്വാധീനിക്കുന്ന നിരവധി ഘടകങ്ങളിൽ ഒന്നായ MJO യുടെ അഭാവമാണ് കാലവർഷ കാറ്റിനെ കേരളത്തിൽ ദുർബലമാക്കിയിരുന്നത്. MJO ഏഴിലും എട്ടിലും (മാരിടൈം, അറ്റ്ലാന്റിക് സമുദ്രത്തിൽ ) ഒരു മാസത്തോളമായി തുടരുകയായിരുന്നു. MJO വീണ്ടും രണ്ട് , മൂന്ന് ഫേസുകളിലേക്ക് മാറുകയാണ്. അതായത് ഇന്ത്യൻ മഹാസമുദ്രത്തിൽ എം.ജെ ഒയുടെ സാന്നിധ്യം അടുത്ത ആഴ്ചകളിലും ഉണ്ടാകുമെന്ന് അർത്ഥം. ഇതിനാൽ മൺസൂൺ കേരളത്തിൽ ശക്തിപ്പെടാനും കൂടുതൽ മഴ ലഭിക്കാനു കാരണമാകുമെന്ന് ഞങ്ങളുടെ വെതർമാൻ പറയുന്നു. കൂടാതെ ജൂലൈ ആദ്യവാരത്തിന്റെ അവസാനത്തോടെ ന്യൂനമർദ്ദത്തിനും സാധ്യതയേറി. ബംഗാൾ ഉൾക്കടലിലാണ് ന്യൂനമർദ്ദം ഉണ്ടാവുക. MJO ബംഗാൾ ഉൾക്കടലിൽ എത്തുമ്പോഴാണ് ന്യൂനമർദ്ദം ഉണ്ടാകാൻ സാധ്യതയുള്ളത്. തുടർന്ന് തെക്കൻ ചൈന കടലിലേക്കും എം.ജെ. ഒ സഞ്ചരിക്കും. ആ സമയം പസഫിക് സമുദ്രത്തിൽ ശക്തിയേറിയ ചുഴലിക്കാറ്റുകൾ (ടൈഫൂണുകൾ) രൂപപ്പെടുകയും കേരളത്തിലും മഴ ശക്തിപ്പെടുകയും ചെയ്യും. ഇതിന്റെ സൂചനകൾ ഇപ്പോൾ പസഫിക് മേഖലയിൽ നിന്ന് ലഭിക്കുന്നുണ്ടെന്ന് മെറ്റ്ബീറ്റ് വെതറിലെ ഓഷ്യാനോഗ്രാഫർ പറഞ്ഞു. പസഫിക് സമുദ്രത്തിലെ ടൈ പൂണുകളുടെ സ്വാധീനം കേരളത്തിൽ ശക്തമായ മഴ ലഭിക്കാൻ കാരണമാകും എന്നാണ് നിരീക്ഷണം. ജൂലൈ മാസത്തിൽ സാധാരണയിൽ കുറവ് മഴയാണ് കഴിഞ്ഞ മാസങ്ങളിൽ പ്രവചിച്ചിരുന്നതെങ്കിലും ഇപ്പോഴത്തെ സാഹചര്യത്തിൽ ജൂലൈയിൽ സാധാരണതോതിൽ മഴ ലഭിക്കാനുള്ള സാധ്യതയാണ് കാണുന്നതെന്നും ഞങ്ങളുടെ നിരീക്ഷകരുടെ പാനൽ വിലയിരുത്തുന്നു.

മഴ പതിയെ സജീവമാകും

ഗുജറാത്ത് തീരത്ത് ചക്രവാത ചുഴി ദുർബലമായതോടെ കഴിഞ്ഞ 48 മണിക്കൂർ ആയി കേരളത്തിൽ കാലവർഷക്കാറ്റ് അനുകൂലമായിട്ടുണ്ട്. മിക്ക ജില്ലകളിലും സാധാരണ തോതിലുള്ള മഴ ഈ സമയം റിപ്പോർട്ട് ചെയ്തിട്ടുണ്ട്. ഇന്നും നാളെയും കേരളത്തിൽ എല്ലാ ജില്ലകളിലും പരക്കെന്നോണം മഴ ലഭിക്കും. വെള്ളിയാഴ്ചയ്ക്ക് ശേഷം മഴയിൽ നേരിയ കുറവ് അനുഭവപ്പെടുമെങ്കിലും ജൂലൈ ആദ്യവാരം തന്നെ വീണ്ടും മഴ ശക്തിയായി ലഭിക്കും. ന്യൂനമർദ്ദം രൂപപ്പെട്ടാൽ കേരളത്തിൽ കൂടുതൽ മഴയ്ക്ക് സാഹചര്യമൊരുങ്ങും എന്നാണ് ഇപ്പോഴത്തെ നിഗമനം. ജൂലൈ രണ്ടാം വാരത്തിലും കേരളത്തിൽ മികച്ച മഴ പ്രതീക്ഷിക്കാം.

ഉയർന്ന തിരമാലകൾക്ക് സാധ്യത

കാലവർഷക്കാറ്റ് സജീവമായതോടെ കടലിൽ കാറ്റിനും ഉയർന്ന തിരമാലകൾക്കും സാധ്യതയുണ്ട്. മത്സ്യത്തൊഴിലാളികൾ കേന്ദ്ര കാലാവസ്ഥാ വകുപ്പിന്റെ (IMD) മുന്നറിയിപ്പുകൾ പാലിച്ചു മാത്രമേ കടലിൽ പോകാവൂ. കേരളതീരത്ത് മൂന്നു മീറ്റർ വരെ ഉയരമുള്ള തിരമാലകൾക്കാണ് അടുത്ത ദിവസങ്ങളിൽ സാധ്യത. കാറ്റിന്റെ വേഗത 45 – 50 കി.മി. വരെ ആയേക്കും. തീരദേശത്ത് താഴ്ന്ന പ്രദേശങ്ങളിൽ വെള്ളം കയറാനും കടൽക്ഷോഭത്തിനും സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം. തൽസമയ കാലാവസ്ഥാ വിവരങ്ങൾക്കും മറ്റും Metbeat Weather, Weatherman Kerala ഫേസ് ബുക്ക് പേജുകളും വിശദമായ വായനക്ക് metbeatnews.com, metbeat.com വെബ് സൈറ്റുകളും യു ട്യൂബ് ചാനലുകളും പിന്തുടരുക. ഔദ്യോഗിക കാലാവസ്ഥ പ്രവചനങ്ങൾക്ക് IMD, KSDMA വെബ് സൈറ്റുകളും പിന്തുടരുക.

രണ്ടു ദിവസം മഴ സജീവമാകും; കടൽ പ്രക്ഷുബ്ധമായേക്കും

കേരളത്തിൽ നാളെ (വെള്ളി) മുതൽ തിങ്കൾ വരെ കാലവർഷം നേരിയ തോതിൽ സജീവമാകും. വടക്കൻ കേരളത്തിൽ ഒറ്റപ്പെട്ട ശക്തമായ മഴക്കും മധ്യകേരളത്തിൽ ഇടത്തരം മഴക്കും തെക്കൻ കേരളത്തിൽ ഒറ്റപ്പെട്ട ഇടത്തരം മഴക്കും സാധ്യതയുണ്ട്. കാലവർഷക്കാറ്റ് അറബിക്കടലിൽ സജീവമാകുന്നതാണ് മഴക്ക് കാരണം. കേരളത്തോടൊപ്പം പടിഞ്ഞാറൻ തീരത്ത് ഗുജറാത്ത് വരെയുള്ള ഭാഗത്തും ശക്തമായ തോ ഇടത്തരമോ ആയ മഴ പ്രതീക്ഷിക്കാം. തമിഴ്നാട്ടിലും കേരളത്തിന്റെ കിഴക്കൻ മേഖലകളിലും ഇടിയോടു കൂടിയുള്ള മഴക്കും സാധ്യതയുണ്ട്. അറബിക്കടലിൽ കാറ്റിന്റെ ഗതി ശക്തിപ്പെടുത്തുന്നതിനാൽ ജാഗ്രത പാലിക്കണം. ഉയർന്ന തിരമാലകൾ ക്കും കടൽക്ഷോഭത്തിൽ സാധ്യതയുണ്ട്. ഒമാനിലെ സലാലയിലും കൂടുതൽ മഴ ലഭിക്കാൻ അനുകൂല സാഹചര്യമാണ് നിലവിലുള്ളത്.

ഉയർന്ന തിരമാല സാധ്യത

കേരള തീരത്ത്  (വിഴിഞ്ഞം മുതൽ കാസർകോട് വരെ) 25-06-2022  രാത്രി 11.30 വരെ 2.8 മുതൽ 3.1 മീറ്റർ വരെ ഉയരത്തിൽ തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം (INCOIS) അറിയിച്ചു. മൽസ്യത്തൊഴിലാളികളും തീരദേശവാസികളും ജാഗ്രത തുടരുക.
കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം.  മൽസ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മൽസ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണ്ണമായും ഒഴിവാക്കണമെന്നും ജാഗ്രതാ നിർദ്ദേശത്തിൽ പറയുന്നു.