Menu

extreme weather event

ഡൽഹിയിൽ കനത്ത മഴയും കാറ്റും; ഒരു മരണം, കനത്ത നാശം

ഡൽഹിയിലും ദേശീയ തലസ്ഥാന മേഖലയിലും (എൻ.സി.ആർ) ഇടിയോടെയുണ്ടായ കനത്ത മഴയിലും കാറ്റിലും വ്യാപക നാശനഷ്ടം. ഇന്ന് വൈകിട്ടാണ് മഴയുണ്ടായത്. തെക്ക്, മധ്യ ഡൽഹിയിലാണ് മഴ. താപനില പെട്ടെന്ന് താഴുകയും റോഡുകൾ വെള്ളത്തിലാകുകയും ചെയ്തു. മരങ്ങൾ വീണ് നിരവധി വാഹനങ്ങൾ തകർന്നു. പലയിടത്തും ഗതാഗതക്കുരുക്കുണ്ടായി. ജുമാ മസ്ജിദ് ഏരിയയിൽ 50 കാരൻ ദേഹത്തേക്ക് ചുമരിടിഞ്ഞ് വീണ് മരിച്ചു. കനത്ത കാറ്റിൽ എ.സികളും മേൽക്കൂരകളും തകർന്നു. ഇവ പാർക്ക് ചെയ്ത കാറുകൾക്ക് മുകളിൽ വീണ് കാറുകൾ തകർന്നു. റോഡരികിൽ മരം കടപുഴകി ഓട്ടോകളും കാറും തകർന്നു.
സൗത്ത് എക്‌സറ്റൻഷൻ റിങ് റോഡിൽ കനത്ത ഗതാഗത തടസ്സം ഉണ്ടായി. ഹിമാചൽ ഭവന് സമീപം വൻ മരം കടപുഴകി. കസ്തൂർബാ ഗാന്ധി റോഡിലും വൻ മരം വീണ് റോഡ് ഗതാഗതം തടസ്സപ്പെട്ടു. സി.ജി.ഒ കോംപ്ലക്‌സിനു സമീപത്തെ നിർമാണം നടക്കുന്ന കെട്ടിടം കാറ്റിലും മഴയിലും തകർന്നു. എട്ട് വിമാനങ്ങൾ ജയ്പൂർ, ലഖ്‌നൗ, ചണ്ഡിഗഢ്, അഹമ്മദാബാദ്, ഡെറാഡൂൺ തുടങ്ങിയ വിമാനത്താവളങ്ങളിലേക്ക് തിരിച്ചുവിട്ടുവെന്ന് ഡൽഹി വിമാനത്താവള അധികൃതർ അറിയിച്ചു. മഴയെ തുടർന്ന് താപനില 27.8 ഡിഗ്രിയിലേക്ക് താഴ്ന്നു. മണിക്കൂറിൽ 50 കി.മി വേഗതയിലുള്ള കാറ്റാണ് നഗരത്തിൽ വീശിയത്.

ഉത്തര്‍പ്രദേശില്‍ തീവ്ര ഉഷ്ണതരംഗം, ചൂട് 47 ഡിഗ്രി

ഉത്തര്‍പ്രദേശിലെ പ്രയാഗ് രാജില്‍ പകല്‍ ചൂട് 47 ഡിഗ്രി സെല്‍ഷ്യസിലെത്തി. 20 വര്‍ഷത്തെ ഏപ്രിലില്‍ നഗരത്തില്‍ രേഖപ്പെടുത്തുന്ന ഏറ്റവും വലിയ ചൂടാണിത്. നേരത്തെ 1999 ഏപ്രില്‍ 30 നായിരുന്നു റെക്കോര്‍ഡ് ചൂട് രേഖപ്പെടുത്തിയത്. 46.3 ഡിഗ്രിയായിരുന്നു ഇത്. കഴിഞ്ഞ വര്‍ഷം 44.3 ഡിഗ്രിയും 2020 ല്‍ 43.7 ഡിഗ്രിയുമാണ് നഗരത്തില്‍ രേഖപ്പെടുത്തിയിരുന്നത്. അടുത്ത ഒരാഴ്ചത്തെ കാലാവസ്ഥാ പ്രവചനത്തില്‍ 40 ഡിഗ്രിക്ക് മുകളില്‍ ചൂട് തുടരാനാണ് സാധ്യത. നാളെ മുതല്‍ ചൂടിന് നേരിയ ആശ്വാസം ഉണ്ടാകും. 45 ഡിഗ്രിക്ക് മുകളില്‍ താപനില പോകുമ്പോഴാണ് സാധാരണ ഉഷ്ണ തരംഗം സ്ഥിരീകരിക്കുന്നത്. 47 ഡിഗ്രി കടക്കുമ്പോള്‍ തീവ്ര ഉഷ്ണ തരംഗമായി കണക്കാക്കും. ഹരിയാന, ഡല്‍ഹി, പടിഞ്ഞാറന്‍ ഉത്തര്‍ പ്രദേശ്, മധ്യപ്രദേശ് എന്നിവിടങ്ങളിലും വെള്ളിയാഴ്ച കടുത്ത ചൂട് രേഖപ്പെടുത്തിയെന്ന് കേന്ദ്ര കാലാവസ്ഥാ വകുപ്പിലെ മുതിര്‍ന്ന ശാസ്ത്രജ്ഞന്‍ ആര്‍.കെ ജനമണി പറഞ്ഞു. രാജസ്ഥാന്‍, ഡല്‍ഹി, പഞ്ചാബ്, ഹരിയാന എന്നിവിടങ്ങളില്‍ മെയ് 2 നും നാലിനും ഇടയില്‍ ഇടിയോടു കൂടെയുള്ള മഴക്ക് സാധ്യതയുണ്ടെന്നും താപനില 36 നും 39 നും ഇടയില്‍ തുടരുമെന്നും അദ്ദേഹം പറഞ്ഞു.