വടക്കൻ കേരളത്തിൽ ഒരാഴ്ചയോളമായി തുടരുന്ന കനത്ത മഴക്ക് നേരിയ ആശ്വാസം ലഭിക്കും. തുടർച്ചയായ കനത്ത മഴക്ക് പകരം ഇടവേളകളോടുകൂടിയുള്ള മഴയാണ് ഇനി അടുത്ത രണ്ട് ദിവസം പ്രതീക്ഷിക്കേണ്ടത്. കോഴിക്കോട്, കണ്ണൂർ ജില്ലകളിലാണ് ഇന്ന് വടക്കൻ കേരളത്തിൽ കൂടുതൽ മഴ സാധ്യതയുള്ളത്. പാലക്കാട് മുതൽ മലപ്പുറം വരെയുള്ള ജില്ലകളിൽ ഒറ്റപ്പെട്ട മഴ ലഭിക്കും. കാസർകോട് ഇന്നും കഴിഞ്ഞ ദിവസത്തെ അപേക്ഷിച്ച് അല്പം കുറവാണെങ്കിലും ശക്തമായ മഴ തന്നെ ലഭിക്കും.
മധ്യ, തെക്കൻ ജില്ലകളിൽ
തെക്കൻ കേരളത്തിലും കഴിഞ്ഞ രണ്ടുദിവസമായി സജീവമായ കാലവർഷം ഇടവേളകളുടെ തുടരും . ഇടുക്കി ജില്ലയിൽ ഇന്നും ശക്തമായ മഴയ്ക്ക് സാധ്യതയുണ്ട്. മധ്യ തെക്കൻ കേരളത്തിൽ രാത്രികളിലാണ് മഴ സാധ്യതയുള്ളത്. പകൽ ദീർഘമായ ഇടവേളകൾ പ്രതീക്ഷിക്കാം.
അന്തരീക്ഷ സ്ഥിതി എന്ത്?
മഹാരാഷ്ട്ര തീരം മുതൽ വടക്കൻ കേരളതീരം വരെ ഒരു ന്യൂനമർദ പാത്തി നിലകൊള്ളുന്നുണ്ട്. പാക്കിസ്ഥാന്റെ മുകളിലായി കച്ച് മേഖലയോട് ചേർന്ന് സ്ഥിതിചെയ്യുന്ന ന്യൂനമർദ്ദം കാലവർഷ പാത്തി അഥവാ മൺസൂൺ ട്രഫിനെ അതിന്റെ സ്വാഭാവികമായ തെക്കൻ പൊസിഷനിൽ നിന്ന് അല്പം വടക്കോട്ട് മാറ്റിയിട്ടുണ്ട്. ഇതു കാരണം കേരളത്തിന്റെ വടക്കോട്ടുള്ള മേഖലകളിൽ കൂടുതൽ മഴ അടുത്ത ദിവസങ്ങളിൽ പ്രതീക്ഷിക്കാം. കേരളത്തിലേക്ക് വീശുന്ന കാലവർഷ കാറ്റിന്റെ ഗതിയിലും ഇതു കാരണം മാറ്റം സംഭവിച്ചിട്ടുണ്ട്. അതിനാലാണ് കേരളത്തിൽ മഴക്ക് ഇടവേള ലഭിക്കുന്നത്. അതേസമയം അറബിക്കടലിൽ മേഘ രൂപീകരണവും നടക്കുന്നുണ്ട്. ഇത്തരം മേഘങ്ങൾ കേരളത്തിന്റെ മുകളിൽ എത്തിയാൽ പെയ്തു പോകുന്ന സാഹചര്യമാണ് ഉണ്ടാവുക. അടുത്തയാഴ്ച ബംഗാൾ ഉൾക്കടലിൽ ന്യൂനമർദ്ദം രൂപപ്പെടാൻ ഇരിക്കെ നേരിയതോതിൽ മഴക്ക് ഇടവേള ലഭിക്കുമെന്ന് പറയാനാകും. എന്നാൽ കഴിഞ്ഞ ദിവസത്തെ അപേക്ഷിച്ച് മഴയുടെ അളവിൽ കുറവ് എന്ന് മനസിലാക്കുക. മഴ ഇല്ല എന്നല്ല.
