ന്യൂനമർദം ഇന്ന് ശക്തമാകും ; വിവിധ ജില്ലകളിൽ മഴ സാധ്യത
വടക്കു പടിഞ്ഞാറൻ ബംഗാൾ ഉൾക്കടലിൽ രൂപപ്പെട്ട ന്യൂനമർദ്ദത്തെ തുടർന്ന് കേരളത്തിൽ ഇന്ന് മഴ സാധ്യത. വടക്കൻ ജില്ലകളിലാണ് കൂടുതൽ മഴ ലഭിക്കുക. മറ്റു ജില്ലകളിലും ഒറ്റപ്പെട്ട മഴ ലഭിക്കും. കോഴിക്കോട്, മലപ്പുറം, വയനാട്, കണ്ണൂര്, കാസർകോട്, ഇടുക്കി, എറണാകുളം ജില്ലകളിൽ ഒറ്റപ്പെട്ട ശക്തമായ മഴയോ ഇടത്തരം മഴയോ പ്രതീക്ഷിക്കാം.
കാലാവസ്ഥ വകുപ്പ് ഇന്ന് 9 ജില്ലകളിൽ മഞ്ഞ അലർട്ട് പ്രഖ്യാപിച്ചിട്ടുണ്ട്. ന്യൂനമർദ്ദം ഇന്നോ നാളെയോ കൂടുതൽ ശക്തിപ്പെടും. ഒഡീഷ തീരത്താണ് ന്യൂനമർദ്ദം ഇപ്പോൾ നിലനിൽക്കുന്നത്. ഇന്നലെ വൻ മണ്ണിടിച്ചിൽ ഉണ്ടായ താമരശ്ശേരി ചുരത്തിൽ രാത്രി വൈകി ഗതാഗത നിരോധിച്ചു. ചുരത്തിന്റെ സുരക്ഷാ പരിശോധന നടത്തുമെന്ന് വയനാട് ജില്ലാ കലക്ടർ അറിയിച്ചു. തുടർന്നാണ് ഗതാഗതത്തിന് അനുമതി നൽകുക.
താമരശ്ശേരി ചുരം വഴിയുള്ള ഗതാഗതം നിരോധിച്ചു
താമരശ്ശേരി ചുരത്തിൽ കൂടുതൽ മണ്ണിടിച്ചിൽ ഉണ്ടാകാനുള്ള സാധ്യത പരിഗണിച്ച് ഇതുവഴിയുള്ള ഗതാഗതത്തിന് താൽക്കാലിക നിരോധനം ഏർപ്പെടുത്തിയതായി കോഴിക്കോട് ജില്ലാ കലക്ടർ സ്നേഹിൽ കുമാർ സിംഗ് അറിയിച്ചു. വാഹനങ്ങൾ കുറ്റ്യാടി ചുരം വഴിയോ നാടുകാണി ചുരം വഴിയോ തിരിഞ്ഞു പോവേണ്ടതാണെന്ന് അറിയിപ്പിൽ പറയുന്നു.
കുറ്റ്യാടി ചുരത്തിൽ ഗതാഗത കുരുക്ക്
താമരശ്ശേരി ചുരത്തിൽ ഗതാഗത നിയന്ത്രണം ഏർപ്പെടുത്തി തിരിച്ചുവിട്ട
വാഹനങ്ങൾ കുറ്റ്യാടി ചുരത്തിൽ എത്തിയതോടെ ഇന്ന് പുലർച്ചെ
വലിയ രീതിയിലുള്ള ഗതാഗത കുരുക്ക് അനുഭവപ്പെട്ടു.
തൊട്ടിൽപ്പാലം പൊലിസും, ചുരം ഹെൽപ് ഡസ്ക് വളണ്ടിയേഴ്സും ചുരം സംരക്ഷണ സമിതി പ്രവർത്തകരും രാത്രിയിൽ ഉടനീളം പുലർച്ചെ വരെ പ്രയത്നിച്ചാണ് വാഹനങ്ങൾ കടത്തിവിട്ടത് നിലവിൽ കർണാടകയിലേക്കും വയനാട്ടിലേക്കും
കെ.എസ്.ആർ.ടി.സി ബസ് ഉൾപ്പെടെയുള്ള വാഹനങ്ങൾ കുറ്റ്യാടി ചുരം വഴി കടന്നു പോകുന്നു.
പുലർച്ചയോടെ വലിയ രീതിയിലുള്ള
ഗതാഗത കുരുക്ക് അവസാനിച്ചെങ്കിലും
രാവിലെ 8.30 ഓടെ ഇടയ്ക്കിടെയുള്ള സമയങ്ങളിൽ മേലെപൂതംറയിൽ
ഉൾപ്പെടെ ഏറെനേരം വീണ്ടും
ഗതാഗതക്കുരുക്ക് അനുഭവപ്പെട്ടു.
