Menu

Experts Articles

ജോഷിമഠ് : ശാസ്ത്രം നേരത്തെ പറഞ്ഞത് ആരും കേട്ടില്ല; ഇപ്പോൾ അനുഭവത്തിൽ

ഡോ: ഗോപകുമാര്‍ ചോലയിൽ

പരിസ്ഥിതി പഠനങ്ങൾക്ക് ഒരു പഞ്ഞവുമില്ല. മുന്നറിയിപ്പുകൾക്കുമില്ല ക്ഷാമവും. പക്ഷേ, എന്തു വന്നാലും പഠിക്കുകയില്ല എന്ന് നിർബന്ധബുദ്ധി കാണിച്ചാൽ എന്തു ചെയ്യും? വരുന്നത് വരുന്നിടത്തു വച്ച് അനുഭവിക്കുക; അത്ര തന്നെ.. ജോഷിമഠ് ഉൾപ്പെടുന്ന ഭൗമ മേഖല അതീവ പരിസ്ഥിതിലോലമാണെന്നും, വൻ നിർമ്മിതികൾ, തുരങ്കങ്ങൾ എന്നിവ പാടില്ലെന്നും 1976-ൽ മഹേഷ് ചന്ദ്രമിശ്രയുടെ നേതൃത്വത്തിൽ പഠനം നടത്തിയ 18 അംഗ ശാസ്ത്രജ്‌ഞ സംഘം നൽകിയ റിപ്പോർട്ടിൽ കൃത്യമായി നിർദ്ദേശിച്ചിട്ടുണ്ട്.

എന്നിട്ടും ഈ മേഖലയിൽ സ്ഥിതി ചെയ്യുന്ന ബദരീനാഥ് ഉൾപ്പെടെയുള്ള ക്ഷേത്രങ്ങളിലേയ്ക്കുള്ള യാത്രകൾ സുഗമമാക്കുവാൻ ഏകദേശം 900 കിലോമീറ്റർ ദൈർഘ്യമുള്ള ചാർധാം ഹൈവേ നിർമാണം പാരിസ്ഥിതികാഘാത പഠന നിർദ്ദേശങ്ങളെ തൃണവൽഗണിച്ചു കൊണ്ട് തകൃതിയായി മുന്നേറുന്നു; എൻ.ടി.പി.സി യുടെ തപോവൻ ജലവൈദ്യുതി നിലയ നിർമാണം പേരിനു പോലും പരിസ്ഥിതി സൗഹാർദ്ദപരമല്ലെന്ന് സാധാരണക്കാർക്ക് പോലും ആക്ഷേപമുണ്ട്. തീർന്നില്ല.

126 കിലോമീറ്റർ നീളം വരുന്ന ചാർധാം റെയിൽവേ പദ്ധതിയ്ക്കായി തുരങ്കങ്ങൾ അനേകം തുരക്കേണ്ടിവരും. ഭൗമഘടനാപരമായി അതിദുർബലവും, കൂടാതെ, അതീവ പരിസ്ഥിതി വിലോലവുമെന്ന് ശാസ്ത്രം അടിവരയിട്ടാണയിടുന്ന ഒരു പ്രദേശത്തോട് ഇതിലേറെക്കടുപ്പത്തിൽ ചെയ്യാൻ ഇനിയെന്താണ് ബാക്കി? ജോഷിമഠ് ഇടിഞ്ഞു താഴ്ന്നു കൊണ്ടിരിക്കുകയാണ്. 2022 ഡിസംബർ അവസാനം മുതൽ ഏതാണ്ട് പന്ത്രണ്ടു ദിവസങ്ങൾക്കകം ഈ പ്രദേശം താഴ്ന്നത് 5.4 സെന്റിമീറ്റർ ആണ്. 2022 ഏപ്രിൽ മുതൽ നവംബർ വരെയുള്ള കാലയളവിലും ജോഷിമഠ് 8.9 സെന്റിമീറ്റർ താഴ്ന്നിരുന്നു. കെട്ടിടങ്ങൾ വിണ്ടുകീറുന്നതും, ഭൂമി പിളർന്നു മാറുന്നതും അതിന്റെ ബാഹ്യ ലക്ഷണങ്ങളാണ്. നഗരത്തിലെ എഴുന്നൂറിലേറെ വീടുകൾക്കു പുറമേ ഹോട്ടലുകൾ, ആശുപത്രികൾ, റോഡുകൾ എന്നിവയ്ക്കും വിള്ളൽ വീണു. ജീവന് ഭീഷണിയുള്ളതിനാൽ നിരവധിയാളുകളെ വീടുകൾ ഒഴിപ്പിച്ച് മാറ്റിപ്പാർപ്പിച്ചു. ഇവിടം കൊണ്ടും ഈ പ്രതിഭാസത്തിന്റെ ദുരന്ത വ്യാപ്തി അവസാനിക്കുന്നില്ല. ഭൂമി ഇടിഞ്ഞു താഴുന്ന പ്രക്രിയ ഏറെ വർഷങ്ങൾക്കുമുൻപേ ആരംഭിച്ചതാവാം. വീടുകളും മറ്റും നിർമിതികളും വിണ്ടുകീറുന്നത് അതിന്റെ കാഠിന്യം ഏറി വരുന്ന അവസ്ഥയിലാണ്. ഈ പ്രതിഭാസത്തിന്റെ വേരുകൾ ചികയാൻ തുടങ്ങിയാൽ ആ മേഖലയിൽ ഇതിനകം നടത്തിയതും ഇപ്പോൾ നടന്നു വരുന്നതുമായ തികച്ചും അശാസ്ത്രീയമായ ബഹുവിധ നിർമ്മാണ പദ്ധതികളുടെ പരിസ്ഥിതി വിരുദ്ധതയിലാകും അതു ചെന്നെത്തി നിൽക്കുന്നത്.

പഠനങ്ങൾ നോ പറഞ്ഞു: കേട്ടില്ല

പാരിസ്ഥിതിക പ്രത്യാഘാത പഠനങ്ങൾ കണ്ണടച്ച് “No” പറഞ്ഞിടത്തും സാമ്പത്തിക സുസ്ഥിരതാ കാര്യപരിപാടികളും, ദേശീയ സുരക്ഷാ വാദങ്ങളും മുന്നോട്ടു വച്ച് നിയമപരമായ പിൻബലത്തോടെ പരിസ്ഥിതി സംരക്ഷകരുടെ വായ് അടപ്പിച്ചാണ് ഇത്തരം പരിസ്ഥിതി വിരുദ്ധ പദ്ധതികൾ സാക്ഷാത്കാരം തേടുന്നത് എന്നതാണ് ഏറ്റവും നിർഭാഗ്യകരം. ഈ മേഖലയിലേയ്ക് തീർത്ഥാടകരേയും വിനോദ സഞ്ചാരികളേയും ആകർഷിക്കുവാൻ പദ്ധതിയിട്ട് പണിയുവാൻ ഉദ്ദേശിക്കുന്ന 126 കി.മി റെയിൽവേയുടെ നൂറിലേറെ കിലോമീറ്ററുകൾ കടന്നുപോകുന്നത് പർവ്വത നിരകൾ തുരന്നു നിർമ്മിക്കുന്ന തുരങ്കങ്ങളിലൂടെയായിരിക്കും!

അതീവ ദുർബല ഭൗമമേഖലയായതിനാൽ വൻകിടനിർമ്മാണ പ്രവർത്തനങ്ങൾ ഒട്ടും അരുതെന്ന് ശാസ്ത്രജ്ഞർ ആവർത്തിച്ചാവർത്തിച്ച് മുന്നറിയിപ്പ് നൽകുന്ന ഇത്തരം ഇടങ്ങളിൽ പർവ്വതങ്ങൾ തുരന്ന് ആയിരക്കണക്കിനാളുകൾ സഞ്ചരിക്കുന്ന റെയിൽവേ പണിയുവാൻ ഏതായാലും പരിസ്ഥിതി വിരുദ്ധത മാത്രമല്ല, ഒട്ടും ചെറുതല്ലാത്ത ചങ്കൂറ്റവും കൂടി വേണം റോഡ്, റെയിൽവേ എന്നിവയുടെ നിർമ്മാണത്തോടനുബന്ധമായി നടത്തുന്ന ശക്തമായ സ്ഫോടനങ്ങൾ പർവതങ്ങളെ ദുർബലമാക്കുകയും ഇളക്കംതട്ടിക്കുകയും ചെയ്യുന്നു. പദ്ധതി നടന്നുകൊണ്ടിരിക്കുമ്പോഴോ, പൂർത്തീകരിച്ചതിനു ശേഷമോ ഈ മേഖലകളിൽ ശക്തമായ മഴപ്പെയ്ത്തുണ്ടാവുകയാണെങ്കിൽ ദുരന്ത സമാനമായ മണ്ണിടിച്ചിൽ ഉറപ്പാണ്. പർവതങ്ങൾ തുരന്ന് തുരങ്കങ്ങൾ ഉണ്ടാക്കിയിട്ടുള്ള ഇടങ്ങളിലും, പാറമടകൾ പ്രവർത്തിക്കുന്ന ഇടങ്ങളിലുമൊക്കെ മണ്ണിടിച്ചിലും ഉരുൾപ്പൊട്ടലും രൂക്ഷതയാർജ്ജിക്കുവാനുള്ള കാരണമിതാണ്. കാലാവസ്ഥാ വ്യതിയാന പശ്ചാത്തലത്തിൽ അതിതീവ്ര മഴകളും, മേഘ വിസ്ഫോടനങ്ങളും അതിസാധാരണമാകുന്ന സാഹചര്യത്തിൽ അസ്ഥിര ഭൗമഘടനയുള്ള പർവത നിരകൾ അത്യന്തം ആപത്കാരികളാവുമെന്ന് പറയേണ്ടതില്ലല്ലോ.
പർവതങ്ങളിലെ പാറക്കെട്ടുകൾക്കുള്ളിൽ കാണുന്ന വിടവുകളിലും അതിബൃഹത്തായ അറകളിലുമാണ് പാറകൾക്കിടയിലൂടെ ഊർന്നിറങ്ങുന്ന മഴവെള്ളം വൻതോതിൽ സംഭരിക്കപ്പെടുന്നത്. കനത്ത ഭൂഗർഭജലശേഖരമുള്ളവയാണ് ഈ നീരുറവകൾ അഥവാ “ജലഭൃതങ്ങൾ ” ( aquifer ). സ്ഫോടനം വഴി പർവതങ്ങൾ തുരക്കുമ്പോൾ ജലഭൃതങ്ങളുടെ ഘടനയിൽ ഭംഗമുണ്ടാകുകയും, അവയിലെ സംഭരിത ഭൂഗർഭജലം പുറത്തേക്കൊഴുകി നഷ്ടപ്പെടുവാനിടയാക്കുകയും ചെയ്യുന്നു. ഗണ്യമായ തോതിൽ ഭൂഗർഭ ജലശോഷണത്തിനിടയാക്കുന്ന ഈ പ്രവർത്തനം മൂലം തത്പ്രദേശം സ്ഥിരമായോ, നീണ്ട ഒരു കാലയളവിലോ അതിരൂക്ഷമായ ജലക്കമ്മി നേരിടേണ്ടിവന്നേക്കാം. അത്തരം ഒരു സ്ഥിതിവിശേഷം പ്രദേശവാസികളുടെ വെള്ളം കുടി മുട്ടിക്കുമെന്നതിനു പുറമേ, അവിടുത്തെ സവിശേഷ ആവാസ വ്യവസ്ഥകളുടെ ഭംഗത്തിനും ഇടവരുത്തും. മാത്രമല്ല, ഇത്തരം നീരറകളിൽ നിന്നും ഭൂഗർഭജലം ലഭിച്ചു കൊണ്ടിരുന്ന,ആ പ്രദേശത്തും പരിസര പ്രദേശങ്ങളിലുമുള്ള നീരുറവകൾ ക്രമേണ ക്ഷയിച്ച് ഇല്ലാതാവുകയും ചെയ്യും. ചുരുക്കത്തിൽ, ഉർവ്വരവും, ജലസമ്പന്നവുമായ ഒരു പ്രദേശം രൂക്ഷമായ ഊഷരതയിലേക്ക് കൂപ്പുകുത്തും. ജോഷിമഠിന് സമീപത്തുള്ള തപോവൻ വിഷ്ണു ഗഡ് ജലവൈദ്യുതപദ്ധതി മൂലം സംഭവിച്ചത് ഇതു തന്നെയാണ്. പദ്ധതിയുടെ ഭാഗമായ തുരങ്ക നിർമാണ ഘട്ടത്തിൽ ജോഷിമഠിന്റെ നീരുറവയായിരുന്ന വലിയൊരു നീരറയിൽ വിള്ളൽ വീഴുവാനിടയായി. ആ നീരുറവയിൽ നിന്ന് പൊട്ടിയൊലിച്ച് നഷ്ടമായത് ജോഷിമഠ് മേഖലയിലെ ഭൂഗർഭജലശേഖരത്തെ പരിപോഷിപ്പിച്ചു കൊണ്ടിരുന്ന അളവറ്റ ജലസമ്പത്താണ്. 2009-ൽ ആണ് ഇതു സംഭവിച്ചത്. ഇതിന്റെ പരിണത ഫലമായി, ജോഷിമഠ് മേഖലയിലെ നീരുറവകൾ ക്രമേണ ക്ഷയിക്കുമെന്നും, ജോഷിമഠ് ഇടിഞ്ഞു താഴുമെന്നും 2010-ൽ , “കറന്റ് സയൻസ് “എന്ന ഒരു ജേണലിൽ പ്രസിദ്ധീകരിക്കപ്പെട്ട ഒരു ലേഖനത്തിൽ സൂചിപ്പിക്കപ്പെട്ടിരുന്നു. അത് എത്ര കിറുകൃത്യമായി സംഭവിച്ചിരിക്കുന്നു!

ജോഷി മഠ്ൽ മാത്രമല്ല, ഹിമാലയ മേഖലയിലെ മറ്റു അനേകം നീരുറവകളുടെയും മരണമണി മുഴങ്ങുമെന്നതാണ് ജല വൈദ്യുത പദ്ധതിയ്ക്കു വേണ്ടി നടത്തിയ തുരങ്ക നിർമ്മാണത്തിന്റെ പ്രത്യാഘാതവ്യാപ്തി. ഇപ്പോൾത്തന്നെ ഉത്തരാഖണ്ഡ് അടക്കമുള്ള പല മേഖലകളിലും നീരുറവകൾ ശോഷണോന്മുഖമായി വരുകയാണ്. ഭൂഗർഭജലശോഷണമാണ് മണ്ണിടിച്ചിൽ എന്ന പ്രക്രിയയ്ക്ക് കാരണമാകുന്ന പ്രധാന ഘടകങ്ങളിലൊന്ന്. മണൽത്തരികൾക്ക് കൂട്ടിപ്പിടുത്തം ഉണ്ടാകുന്നത് മണ്ണിൽ ഈർപ്പ സാന്നിദ്ധ്യം ഉണ്ടാകുമ്പോഴാണ്. കൂട്ടിപ്പിടുത്തം ഉള്ളപ്പോൾ മണ്ണിന് ദൃഢതയും ഉണ്ടാകും. ഭൂഗർഭ ജലശേഖരം സമ്പന്നമായിരിക്കുമ്പോൾ മണ്ണിൽ ഈർപ്പ സാന്നിധ്യമുണ്ടാകും. ഭൂഗർഭജലം തീരെ ഇല്ലാതാകുമ്പോൾ മൺതരികൾ ഉണങ്ങിവരളുകയും പരസ്പരമുള്ള കൂട്ടിപ്പിടുത്തം നഷ്ടപ്പെട്ട് അയഞ്ഞ അവസ്ഥയിലാവുകയും ചെയ്യുന്നു. ഈ അവസ്ഥയിൽ മണ്ണ് ഇടിയാൻ സാദ്ധ്യത വളരെ ക്കൂടുതലാണ്. മാത്രമല്ല, ഭൂഗർഭജലവിതാനം താഴ്ന്ന് മണ്ണിൽ ഈർപ്പം ഇല്ലാതാവുമ്പോൾ മണൽത്തരികൾക്കിടയിലെ വിടവ് ചുരുങ്ങി അവ കൂടുതൽ ഒതുങ്ങുന്നു. ഈ ഘട്ടമാണ് ഉപരിതലം ഇടിഞ്ഞു താഴുവാനും ഭൂമിയിൽ വിള്ളലുകൾ സൃഷ്ടിക്കുവാനും ഇടയാക്കുന്നത്. ( കെട്ടിടങ്ങളുടെ ഭിത്തിയിൽ വിള്ളൽ ഉണ്ടാകുന്നത് കെട്ടിടത്തിനു താഴെയുള്ള മണ്ണ് ഇത്തരത്തിൽ ഒതുങ്ങുമ്പോഴാണ്. ഭിത്തികളിൽ വിള്ളൽ കാണുമ്പോൾ” ഭൂമി ഇരുന്നതാണ് ” എന്ന് പഴമക്കാർ പറയാറില്ലേ..) ഭൂമിയിലെ ഇതര പർവ്വതങ്ങളെ അപേക്ഷിച്ച് ഹിമാലയ പർവ്വത നിരകൾ ഇപ്പോഴും വളർച്ചാഘട്ടത്തിൽത്തന്നെയാണ്. നാൽപ്പതു ലക്ഷത്തോളം വർഷങ്ങൾ മാത്രമാണ് ഹിമാലയ നിരകളുടെ പ്രായം. ഇന്ത്യ, യൂറേഷ്യ ഭൂവത്ക ഫലകങ്ങൾ തമ്മിൽ കൂട്ടിയിടിച്ചതിന്റെ (collision)ഫലമായി രൂപം കൊണ്ടവയാണീ പർവത നിരകൾ. ഇന്ത്യൻ ഫലകം ഇപ്പോഴും ചലനാവസ്ഥയിലാണ്. നിരന്തരം ക്രിയാത്മകാവസ്ഥയിലുള്ള ഭൗമ സവിശേഷതകളാണ് ഈ മേഖലയിലെ ഭൂമിശാസ്ത്രപരമായ അസ്ഥിരതയ്ക്കു കാരണം. വളർച്ചാഘട്ടങ്ങളിലുള്ള പർവതങ്ങൾക്ക് പൊതുവേ ഒരു അസ്ഥിര പ്രകൃതം ഉണ്ടാകും. ഹിമാലയ മേഖലയിൽ പലപ്പോഴും ഭൂചലനങ്ങളുണ്ടാവുന്നതിന്റെ കാരണവുമിതാണ്.

ആഗോള താപനവും വെല്ലുവിളി

ഭൂമിശാസ്ത്രപരമായ പ്രത്യേകതകൾ മാത്രമല്ല ഹിമാലയ മേഖലകളെ അപകടകാരികളാക്കുന്നത്. ആഗോള താപനവും ഹിമാലയമടക്കമുള്ള ഹിമഭൂമികളെ ആപത്കാരികളാക്കുന്നു. താപനം ഏറുന്ന സാഹചര്യത്തിൽ ഹിമാലയത്തിലെ അതിബൃഹത്തായ ഹിമാനികൾ അതിവേഗത്തിൽ ഉരുകിയൊലിച്ചു കൊണ്ടിരിക്കുകയാണ്. ധ്രുവമേഖലകൾ കഴിഞ്ഞാൽ ഏറ്റവുമധികം ശുദ്ധജലം ഉറഞ്ഞ് ഹിമരൂപത്തിൽ സ്ഥിതി ചെയ്യുന്ന ഇടമാണ് ഹിമാലയം. മുൻ സൂചിപ്പിച്ചതു പോലെ, അനാരോഗ്യകരമായ മനുഷ്യ പ്രേരിതഇടപെടലുകൾ വഴിയുള്ള ഭൂഗർഭ ജലശോഷണം ഹിമാലയ മേഖലയിൽ ഭൂമിയ്ക്കടിയിലെ ദജലസമ്പത്തിനെയും, ആഗോളതാപനം ഭൂതലത്തിനുമുകളിലെ ജല സമ്പത്തിനെയും ക്ഷയിപ്പിക്കുകയാണ്. ആഗോള താപനവും ഒരർത്ഥത്തിൽ മനുഷ്യരുടെ പ്രവർത്തന ശൈലികളുടെ ഉപോത്പന്നം തന്നെയാണല്ലോ. ഹിമാലയത്തിന്റെ ചങ്കുതുരന്നെടുക്കുന്ന വിധത്തിലുള്ള നിർമ്മാണ പ്രവർത്തനങ്ങൾ നിറുത്തിവയ്ക്കുകയും, നിയമം വഴി കർശനമായി നിരോധിക്കുകയും ചെയ്യുക എന്നതാണ് നിലവിൽ ജോഷിമഠ് മേഖല അഭിമുഖീകരിക്കുന്ന പാരിസ്ഥിതികവും സാമൂഹികവുമായ രണ്ടു പ്രശ്നങ്ങൾക്കും സ്വീകാര്യമായ പൊതുപരിഹാരം. നിർമ്മാണ പ്രവർത്തനങ്ങളും വികസനപദ്ധതികളും വിഭാവനം ചെയ്യുമ്പോൾ അവ ഒരു തരത്തിലും പദ്ധതി പ്രദേശങ്ങളിലെ തനതു പരിസ്ഥിതിയെ അലങ്കോലപ്പെടുത്തുകയോ അസ്വസ്ഥമാക്കുകയോ ചെയ്യുന്നില്ല എന്ന് ഉറപ്പു വരുത്തേണ്ടത് കാലഘട്ടത്തിന്റെ ആവശ്യമായിത്തീർന്നിരിക്കുന്നു. ഇല്ലെങ്കിൽ, ഭൂമിയിലെ ഓരോ മനുഷ്യരും ഓരോരോ പ്രകൃതി ക്ഷോഭങ്ങളുടെ മേൽവിലാസത്തിൽ അഭയാർത്ഥിത്വം പേറുന്നവർ മാത്രമാകുന്ന കാലം വിദൂരമല്ല.

(കാലാവസ്ഥ ശാസ്ത്രജ്ഞനും കോളമിസ്റ്റുമാണ് ലേഖകൻ)

മേഘങ്ങൾ കൂട്ടിയിടിച്ചാണോ ഇടിമിന്നൽ ഉണ്ടാവുന്നത് ?

ദീപക് ഗോപാലകൃഷ്ണൻ

ചെറുപ്പകാലത്ത് പറഞ്ഞുകേട്ടിട്ടുള്ളതാണ്, വലിയ മേഘങ്ങൾ കൂട്ടിയിടിച്ചാണത്രേ ഉഗ്രങ്ങളായ ഇടിമിന്നലുകളുണ്ടാവുന്നത്! സത്യമാണോ, എങ്ങനെയാണ് ഇടിയും മിന്നലും ഉണ്ടാവുന്നത് ?

ഈർപ്പം കലർന്നവായു താഴെനിന്ന് ഉയർന്നുപൊങ്ങി തണുത്തുറഞ്ഞാണല്ലോ മേഘങ്ങൾ ഉണ്ടാവുന്നത്. വളരെ ചെറിയ ജലകണങ്ങളും, ഐസുകഷങ്ങങ്ങളും മറ്റും ചേർന്നതാണ് ഓരോ മേഘങ്ങളും. ഇവയെല്ലാം മേഘത്തിനകത്ത് നിരന്തരം മുകളിലേയ്ക്കും താഴേക്കും നീങ്ങിക്കൊണ്ടിരിക്കും. കൂട്ടത്തിൽ ഭാരം കൂടിയവ താഴേയ്ക്ക് നീങ്ങുമ്പോൾ, ഭാരം കുറഞ്ഞവ മേഘങ്ങൾക്കകത്തെ കാറ്റിനൊപ്പം മുകളിലേയ്ക്ക് പായുന്നു. ഇങ്ങനെ നീങ്ങുന്നതിനിടയിൽ ഇവ തമ്മിൽ ഉരസുകയും ചെറിയ ചാർജ്ജ് രൂപപ്പെടുകയും ചെയ്യുന്നു. ഭാരം കുറഞ്ഞവയ്ക്ക് മിക്കവാറും +ve ചാർജ്ജും ഭാരം കൂടിയവയ്ക്കെല്ലാം -ve ചാർജ്ജും ഇത്തരത്തിൽ ലഭിക്കുന്നു. ഇങ്ങനെ മേഘങ്ങളുടെ മുകൾഭാഗം ഭാരം കുറഞ്ഞ കണങ്ങൾ വഹിക്കുന്ന +ve ചാർജ്ജും അതിനുതാഴെ ഭാരം കൂടിയ കണങ്ങൾവഴി -ve ചാർജ്ജും കൊണ്ട് നിറയുന്നു. ഒരു പരിധിയിലധികം ചാർജ്ജ് ഇതുവഴി കുമിഞ്ഞുകൂടുമ്പോൾ ഒരു ഇലക്ട്രിക്കൽ ഡിസ്ചാർജ്ജ് സംഭവിക്കുന്നു. ഇതാണ് നാം മിന്നലായി കാണുന്നത്. ഇത്തരം ഡിസ്ചാർജ്ജുകൾ മൂന്നു വിധത്തിലുണ്ട്. മേഘത്തിനുള്ളിൽ തന്നെ (intra-cloud) നടക്കുന്നവ, രണ്ടോ അതിലധികമോ മേഘങ്ങൾ തമ്മിൽ (inter-cloud) നടക്കുന്നവ, പിന്നെ മേഘത്തിൽ നിന്നും ഭൂമിയിലേയ്ക്ക് (cloud to ground) സംഭവിക്കുന്നവ. ഏകദേശം 80% ഡിസ്ചാർജ്ജുകളും മേഘങ്ങൾക്കുള്ളിലോ അല്ലെങ്കിൽ വിവിധ മേഘങ്ങൾ തമ്മിലോ ആയിരിക്കും. ചെറിയൊരു ശതമാനം മാത്രമേ താഴേക്കു പതിക്കുന്നുള്ളൂ.

ഐസ് രൂപപ്പെടുന്ന കുമുലോനിംബസ്
(cumulonimbus) മേഘങ്ങളിലാണ് പൊതുവിൽ മിന്നലുകൾ രൂപമെടുക്കുന്നത്. ഇത്തരം മേഘങ്ങൾ 10-14 km വരെ ഉയരത്തിൽ വളരുന്നവയാണ്. മാത്രമല്ല, ഇവയ്ക്കകത്തും, മുകളിലേയ്ക്കും താഴേയ്ക്കുമുള്ള ശക്തമായ വായുപ്രവാഹം (updrafts and downdrafts) കാണാം. ഇവയോടൊത്തുനീങ്ങുന്ന ഐസുകണികകൾ തമ്മിലുരസിയാണ് ചാർജ്ജ് രൂപമെടുക്കുന്നത് എന്ന് പറഞ്ഞുവല്ലോ. കൂടുതൽ ഉയരത്തിലേക്ക് വളരുന്ന മേഘങ്ങൾ ആവുമ്പോൾ ചാർജ്ജ് രൂപപ്പെടുന്നതിന്റെ നിരക്ക് കൂടുതലായിരിക്കും. അതിനാൽ തന്നെ ശക്തമായ ഡിച്ചാർജ്ജ് സംഭവിക്കാൻ സാധ്യത വലിയ മേഘങ്ങളിലാണ്. ഒരു ഡിസ്‌ചാർജ്ജിന്റെ സമയത്ത് ആ ഭാഗത്തെ താപനില ഏതാണ്ട് 30000 ഡിഗ്രി സെൽഷ്യസോളം ഉയരുന്നു! ഇത് സംഭവിക്കുന്നത് സെക്കന്റിന്റെ ചെറിയൊരംശം സമയത്തിനുള്ളിലാണ്. വായു ചൂടാക്കിയാൽ വികസിക്കുമല്ലോ. അപ്പോൾ, ഇത്ര വലിയതാപനിലയിൽ ഒരു ഇലക്ട്രിക്കൽ ഡിസ്ചാർജ്ജ് കടന്നുപോകുമ്പോൾ, ആ ഭാഗത്തെ വായു പൊടുന്നനെ വികസിക്കുന്നു (sudden expansion). ഇതിന്റെ ഫലമായുണ്ടാവുന്ന തരംഗങ്ങളാണ് – shock waves – ഇടിയായി (thunder) നാം കേൾക്കുന്നത്.

ഒരു മിന്നൽ സംഭവിക്കുന്നത്
പലഘട്ടങ്ങളിലൂടെയാണ്. ഇതിന്റെ ഒരു രേഖാചിത്രം കമന്റിൽ ചേർത്തിട്ടുണ്ട്. ആദ്യം മേഘത്തിന്റെ താഴെനിന്നും -ve ചാർജ്ജോടുകൂടിയ stepped leader എന്നൊരു branch ആയിട്ടാണ് തുടങ്ങുന്നത്. ഈ stepped leader ഭൂമിയിൽ, ഉയരം കൂടിയ മരത്തിലോ മറ്റോ ആദ്യം ഒരു ബന്ധം സ്ഥാപിക്കുന്നു. തൊട്ടടുത്തനിമിഷം ഉഗ്രപ്രകാശത്തോടെ മുകളിലേയ്ക്ക് ഒരു return stroke. ഇതാണ് നാം മിന്നലായി കാണുന്നത്. താഴേയ്ക്ക് വരുന്ന stepped leader പലപ്പോഴും അനേകം ശാഖകളായി പിരിഞ്ഞാണ് കാണപ്പെടാറ്. പക്ഷെ, തിരിച്ചുള്ള return stroke പ്രധാന branch ൽ മാത്രം ഒതുങ്ങിനിൽക്കും. സാധാരണഗതിയിൽ മിന്നൽ ഇങ്ങനെ ഒരൊറ്റ stroke ൽ അവസാനിക്കില്ല. Stepped leader വന്നതുപോലെ, അതേ വഴിയിലൂടെ dart leader എന്ന പേരിൽ അടുത്തൊരു branch ഉം താഴേക്കു വരികയും വീണ്ടും return stroke സംഭവിക്കുകയും ചെയ്യും. ഇത് പലകുറി ആവർത്തിക്കുന്നു.

എന്താണ് മിന്നൽ രക്ഷാചാലകം ചെയ്യുന്നത് ? ഭൂമിയിലേയ്ക്ക് -ve ചാർജ്ജുകൾ ഒഴുകുന്നതിന് ഒരു എളുപ്പവഴി ഒരുക്കുകയാണ് ഇവയുടെ ജോലി. നല്ല രീതിയിൽ എർത്ത് ചെയ്ത ഇത്തരം റോഡുകൾ മേഘത്തിൽ നിന്നും താഴേക്ക് പതിക്കുന്ന stepped leader നെ പിടിച്ചെടുക്കുന്നു. അതുവഴി വീടിനോ മറ്റു കെട്ടിടങ്ങൾക്കോ കേടുപാടുകൾ ഉണ്ടാക്കാതെ ഡിസ്ചാർജ്ജ് പൂർണ്ണമായും മിന്നൽ രക്ഷാചാലകത്തിലൂടെ സംഭവിക്കുന്നു.

ചുരുക്കി പറഞ്ഞാൽ, മേഘങ്ങൾ കൂട്ടിയിടിച്ചല്ല, ചെറിയ മേഘകണങ്ങൾ തമ്മിലുരസിയുണ്ടാവുന്ന ചാർജ്ജ് കുമിഞ്ഞുകൂടി, ഒരു പരിധികഴിയുമ്പോൾ ഉണ്ടാവുന്ന ഡിസ്ചാർജ്ജ് ആണ് മിന്നൽ.
(കാലാവസ്ഥ ശാസ്ത്രഞജനും സെൻട്രൽ മിഷിഗൺ യുനിവേഴ്സിറ്റിയിലെ ഗവേഷകനും ആണ് ലേഖകൻ)

കടൽ ഉൾവലിയൽ: നെഗറ്റീവ് സർജും വേലിയിറക്കവും കാരണമാകാമെന്ന് വിദഗ്ധർ

കോഴിക്കോട് നൈനാംവളപ്പിൽ കോതി ബീച്ചിനടുത്ത് ശനിയാഴ്ച വൈകിട്ട് കടൽ ഉൾവലിഞ്ഞത് രാത്രിയോടെ പൂർവ സ്ഥിതിയിലായി. രാത്രി 11 ഓടെ തിര തിരികെ വന്നു തുടങ്ങി. വേലിയേറ്റത്തോടെ കടൽ പൂർണമായും പൂർവസ്ഥിതിയിലേക്ക് വന്നുവെന്ന് പരിസരവാസികൾ പറഞ്ഞു. തൊട്ടടുത്ത പ്രദേശങ്ങളിൽ തിരയടിക്കുന്ന കടൽ ഉള്ളപ്പോഴാണ് നൈനാംവളപ്പ് ഭാഗത്ത് മാത്രം കൗതുകം നിറഞ്ഞ ഈ കടൽ കാഴ്ച ഉണ്ടായത്. ഇന്നലെയും ഇന്നുമായി വിദൂരസ്ഥലങ്ങളിൽ നിന്നടക്കം നൂറുകണക്കിന് ആളുകളാണ് നൈനാംവളപ്പ് ബീച്ച് സന്ദർശിച്ചത്.

കടൽ ഉൾവലിഞ്ഞ പ്രദേശം തുറമുഖം പുരാവസ്തു വകുപ്പ് മന്ത്രി അഹമ്മദ് ദേവർകോവിൽ സന്ദർശിച്ചു. പ്രദേശവാസികളോട് സംസാരിച്ച മന്ത്രി ആശങ്കപെടേണ്ട സാഹചര്യമില്ലെന്നും മന്ത്രി പ്രദേശവാസികളോട് പറഞ്ഞു. ആശങ്കാജനകമായ സാഹചര്യമില്ലെങ്കിലും കടലിൽ ഇറങ്ങരുതെന്നും ജാഗ്രത പുലർത്തണമെന്നും മന്ത്രി പറഞ്ഞു.

ആശങ്ക വേണ്ടെന്ന് വിദഗ്ധർ
ഇത് പ്രാദേശിക പ്രതിഭാസമാകാനാണ് സാധ്യതയെന്നും ആശങ്ക വേണ്ടെന്നുമാണ് കടൽ കാലാവസ്ഥ വിദഗ്ധർ പറയുന്നത്. കടൽ ഉൾവലിയലിന് സുനാമിയുമായി മാത്രമല്ല, പ്രാദേശിക തലത്തിൽ കടൽ മേഖലയിലെ കാറ്റ്, മർദ്ദ വ്യതിയാനം തുടങ്ങിയവയും കാരണമാകാറുണ്ടെന്നും ശക്തമായ ഭൂചലനം ഇല്ലാതെ സുനാമി സാധ്യത ഇല്ലെന്നും മെറ്റ്ബീറ്റ് വെതറിലെ ഓഷ്യനോഗ്രഫർ ഡോ. സി.പി അബ്ദുല്ല പറഞ്ഞു.
കടൽ ഉൾവലിയലിന് വേലിയിറക്കവും നെഗറ്റീവ് സർജ് എന്ന പ്രതിഭാസവും കാരണമാകാറുണ്ടെന്ന് റോയൽ ബെൽജിയം ഇൻസ്റ്റിട്ട്യൂട്ട് ഓഫ് നാച്ചുറൽ സയൻസിലെ റിസർച്ച് സയന്റിസ്റ്റ് ഷഹീദ് പുത്തൻ പുരയിൽ അഭിപ്രായപ്പെട്ടു. പുറം കടലിലെ അസാധാരണ കാറ്റാണ് നെഗറ്റീവ് സർജ് അഥവാ തിരമാല എതിർ ദിശയിൽ ഉൾവലിയലിന് കാരണമാകുക. ഇന്നലെ ചെറിയ രീതിയിൽ കടലിൽ വിന്റ് സർക്കുലേഷനും ദൃശ്യമായിരുന്നു. നെഗറ്റീവ് സർജും വേലിയിറക്കവും ഒന്നിച്ച് വരുന്ന ഇടങ്ങളിൽ ഇത്തരം സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.

താപനിലയിലെ വർധനവും രണ്ടാം വിള കൃഷിയും

കൃഷി ഇനി കാലാവസ്ഥക്ക് അനുസരിച്ചാകാം – 2

ഡോ. ഗോപകുമാർ ചോലയിൽ
അന്തരീക്ഷ താപനിലയിൽ ഉണ്ടാകുന്ന വർധവ് നേരിട്ട് ബാധിക്കുന്നത് രണ്ടാംവിള കൃഷിയെയാണ്. താപനിലയിലുണ്ടാകുന്ന ഒരു ഡിഗ്രി സെന്റിഗ്രേഡ് വർധനവ് ഗോതമ്പുത്പാദനത്തിൽ നാല് മുതൽ അഞ്ച് ദശലക്ഷം ടൺ വരെ കുറയാൻ കാരണമാകുന്നു. ഓരോതരം വിളകളിലും സമ്മിശ്ര പ്രതികരണമാണ് കാലാവസ്ഥ മാറ്റം വഴി പ്രകടമാകുന്നത്. മഴയുടെ ലഭ്യതക്കനുസരിച്ച് ജലലഭ്യത കൂടുകയോ കുറയുകയോ ചെയ്യാം. താപനിലാ വർധനവ് ആഗോളതലത്തിലും പ്രാദേശിക തലത്തിലും വർധിച്ചു വരുന്ന ഭക്ഷ്യാവശ്യം നിറവേറ്റുന്നതിനും ആവശ്യമായ ഭക്ഷ്യസുരക്ഷ കൈവരിക്കുന്നതിനും വെല്ലുവിളി ഉയർത്തുന്നുണ്ട്.
കേരളത്തിലെ പ്രകൃതിജന്യ സസ്യജാലങ്ങൾ ആർദ്രോഷണ മേഖലാ കാലാവസ്ഥക്ക് അനുയോജ്യമായ പ്രകൃതത്തോട് കൂടിയവയാണ്. സമൃദ്ധമായ സൂര്യപ്രകാശം, ഉയർന്ന ആപേക്ഷിക ആർദ്രത കേരളത്തിലെ പ്രകൃതിജന്യ സസ്യജാലങ്ങൾ ആർദ്രോഷണ മേഖലാ കാലാവസ്ഥക്ക് അനുയോജ്യമായ പ്രകൃതത്തോട് കൂടിയവയാണ്. സമൃദ്ധമായ സൂര്യപ്രകശം, ഉയർന്ന ആപേക്ഷിക ആർദ്രത, ഉയർന്ന അന്തരീക്ഷ ഊഷ്മാവ്, കനത്ത വർഷപാതം എന്നിവ ആർദ്രോഷണ മേഖലാ പ്രദേശങ്ങളുടെ പ്രത്യേകതയാണ്. ഈ പ്രദേശത്തെ തനതു സസ്യജാലങ്ങളായ റബ്ബർ, കാപ്പി, കൊക്കോ, വാഴ, കരിമ്പ്, നെല്ല് എന്നിവ ഇവിടെ സമൃദ്ധമായി കൃഷി ചെയ്യാം. കേരളത്തെ പോലെ യഥേഷ്ടം ജലം ലഭിക്കുന്ന ആർദ്രോഷ്ണ പ്രദേശങ്ങളിൽ മേൽപറഞ്ഞ വിളകളെ കൂടാതെ തെങ്ങ്, കവുങ്ങ്, കുരുമുളക്, തുടങ്ങിയ വിളകളും സമൃദ്ധമായി വളരുന്നു. കേരളത്തിന്റെ പ്രകൃതിക്കനുസരിച്ച് വിളവിന്യാസവും വ്യത്യാസപ്പെട്ടിരിക്കുന്നു.
സമുദ്രനിരപ്പിൽ നിന്നുള്ള ഉയരം, അന്തരീക്ഷ താപനിലയിലെ ഏറ്റക്കുറച്ചിലുകൾ, എന്നിവയനുസരിച്ച് വിവിധ സ്ഥലങ്ങളിൽ കൃഷി ചെയ്യുന്ന വിളകളിൽ വ്യത്യസമുണ്ട്. ഉയർന്ന താപനിലയോട് ആഭിമുഖ്യം പ്രകടിപ്പിക്കുന്ന വിളകളാണ് തെങ്ങ്, നെല്ല്, കശുമാവ് എന്നിവ. കേരളത്തിലെ താഴ്ന്ന പ്രദേശങ്ങളിൽ ( സമുദ്രനിരപ്പിൽ നിന്ന് ഏകദേശം 7.5 മീറ്റർ ഉയരം വരെ) കൃഷിചെയ്യാൻ പറ്റിയ വിളകളാണിവ. മിതോഷ്ണം അനുഭവപ്പെടുന്ന ഇടനാട് പ്രദേശങ്ങളിലും (7.5 മീറ്റർ മുതൽ 75 മീറ്റർ വരെ ) തെങ്ങ്, കവുങ്ങ്, റബ്ബർ, കശുമാവ്, കുരുമുളക്, എന്നീ വിളകൾ സമൃദ്ധമായി കൃഷി ചെയ്യുന്നു. എന്നാൽ, മിതമായ അന്തരീക്ഷ ഊഷ്മാവിനോട് പ്രതിപത്തിയുള്ള വിളകൾ താരതമ്യേന ഉയരമുള്ള പ്രദേശങ്ങളിലാണ് കൃഷി ചെയ്യുന്നത്. ഈ പ്രദേശങ്ങളിൽ (75 മീറ്റർ മുതൽ 700 മീറ്റർ വരെ ഉയരം ) പൊതുവെ താപനില മിതമായതോ കുറവോ ആയിരിക്കും. ഉയരം കൂടുന്നതിനനുസരിച്ച് ഇത്തരം പ്രദേശങ്ങളിൽ അന്തരീക്ഷ താപനില കുറയുന്നു.

റബ്ബർ, തേയില, കാപ്പി, കുരുമുളക്, തെങ്ങ്, എന്നീ വിളകൾക്ക് അനുയോജ്യമായ പ്രദേശമാണിത്. എന്നാൽ, ഹൈറേഞ്ചിൽ (700 മീറ്ററിൽ കൂടുതൽ ഉയരം) പൊതുവെ താഴ്ന്ന താപനിലയോട് പ്രതിപാതിയുള്ള ഏലം, കാപ്പി, തേയില തുടങ്ങിയ വിളകളാണ് കൃഷി ചെയ്യുന്നത്. ഓരോ സസ്യവും പ്രത്യേകമായ ഓരോ കാലാവസ്ഥയിൽ വളരുന്നവയാണ്. കാലാവസ്ഥക്കനുസരിച്ച് മാത്രം കൃഷി ചെയ്യുന്ന കാലിക വിളകളുമുണ്ട്. സമുദ്രനിരപ്പിൽ നിന്നുള്ള ഉയരം മിക്കപ്പോഴും കാലാവസ്ഥയിൽ മാറ്റം വരുത്തുകയും അതനുസരിച്ച് തനത് സസ്യജാലങ്ങൾക്ക് മാറ്റം വരുകയും ചെയ്യുന്നു. ധാരാളം മഴലഭിക്കുന്ന ഇടങ്ങൾ നിബിഡ വനപ്രദേശങ്ങളാണ്. മഴ കുറഞ്ഞ് വരുംതോറും പുൽപ്രദേശങ്ങൾ, കുറ്റിച്ചെടികൾ, മരുഭൂമികൾ എന്നിവയിലേക്ക് ക്രമേണ പ്രകൃതമാറ്റം കാണപ്പെടുന്നു. (തുടരും)

(കാലാവസ്ഥാ ഗവേഷകനും കാലാവസ്ഥാ കോളമിസ്റ്റുമാണ് ലേഖകൻ)

കൃഷി ഇനി കാലാവസ്ഥക്ക് അനുസരിച്ചാകാം


ഡോ. ഗോപകുമാർ ചോലയിൽ

കാർഷിക മേഖലക്ക് കാലാവസ്ഥയുമായി അഭേദ്യമായ ബന്ധമാണുള്ളത്. അതുകൊണ്ടുതന്നെ തന്നെയാണ് കാലാവസ്ഥാ മാറ്റത്തിന്റെ അനന്തരഫലങ്ങൾ ഏറ്റവും പെട്ടെന്ന് കാർഷിക മേഖലയിൽ പ്രതിഫലിക്കുന്നതും. ഹരിതഗൃഹവാതകങ്ങളുടെ അന്തരീക്ഷ സാന്ദ്രതയനുസരിച്ച് അന്തരീക്ഷതാപന സാഹചര്യങ്ങൾ വ്യത്യാസപ്പെട്ടിരിക്കുന്നു. ജനങ്ങൾക്ക് ഭക്ഷ്യസുരക്ഷിതത്വം വാഗ്ദാനം ചെയ്യുന്ന ഒരു മേഖലയെന്ന നിലയിൽ മാത്രം ഒതുങ്ങുന്നതല്ല, കാർഷിക മേഖലയുടെ പ്രാധാന്യം. മറിച്ച്, ജനലക്ഷങ്ങൾക്ക് പ്രത്യക്ഷമായും പരോക്ഷമായും തൊഴിൽ നൽകുന്ന ഒരു വ്യവസ്ഥിതികൂടിയാണത്.
കാലാവസ്ഥാ വ്യതിയാനത്തിന്റെ പ്രകട ലക്ഷണങ്ങൾ അന്തരീക്ഷതാപനിലാ വർധനവ്, മഴയിൽ അനുഭവപ്പെടുന്ന ക്രമരാഹിത്യം, വരൾച്ചാവേളകൾ, പ്രളയം, അസാധാരണ കാലാവസ്ഥാ പ്രതിഭാസങ്ങൾ എന്നിങ്ങനെ പലരൂപത്തിലും ഭാവത്തിലും അനുഭവപ്പെട്ടുകൊണ്ടിരിക്കുന്നു. കാലാവസ്ഥയിലെ ഇത്തരം പ്രകൃത്യാലുള്ള മാറ്റങ്ങളെല്ലാം തന്നെ ഏറ്റവുമധികം പിടിച്ചുലക്കുന്നത് കാർഷിക മേഖലയെയാണ്. മഴയുടെ അളവ്, അന്തരീക്ഷ താപനില, വിളകൾ, മണ്ണ്, പരിചരണ മുറകൾ എന്നിവ വിവിധ സ്ഥലങ്ങളിൽ വ്യത്യസ്തമായതിനാൽ കാലാവസ്ഥയിലെ മാറ്റങ്ങൾ കാർഷിക മേഖലയെ പൊതുവെ എപ്രകാരം ബാധിക്കുമെന്ന് തിട്ടപ്പെടുത്തുക ദുഷ്‌കരമാണ്. കാലാവസ്ഥ വ്യതിയാനത്തിന്റെ പ്രകടവും പ്രത്യക്ഷവുമായ ലക്ഷണമാണ് അന്തരീക്ഷ താപനിലാ വർദ്ധനവ്. അന്തരീക്ഷതാപത്തോട് വ്യത്യസ്ത വിളകൾക്ക് വ്യത്യസ്തമായ പ്രതികരണ സ്വഭാവമാണുള്ളത്‌. ലോകജനസംഖ്യയുടെ സിംഹഭാഗവും ഉഷ്ണമേഖലയിൽ ആയതിനാലും അവിടങ്ങളിലെ ജനസംഖ്യയുടെ മൂന്നിൽ രണ്ട് ഭാഗവും കാർഷിക വൃത്തിയിൽ ഏർപ്പെട്ടിരിക്കുന്നതിനാലും കാലാവസ്ഥാ വ്യതിയാനം ഇവിടങ്ങളിൽ കടുത്ത പ്രത്യാഘാതങ്ങൾ ഉണ്ടാക്കിയേക്കാം. മാറുന്ന കാലാവസ്ഥാസാഹചര്യങ്ങളിൽ അതിജീവനം തേടുന്നതോ, വ്യാപകമാകുന്നതോ ആയ കൃമി-കീട-രോഗബാധകൾ, കളകൾ, മണ്ണിന്റെ വൃദ്ധിനാശം, നിയന്ത്രണാധീതമായ ജനസംഖ്യാ വര്ധനവ് തുടങ്ങിയ ഘടകങ്ങൾ ഉഷ്ണമേഖലാ രാജ്യങ്ങളുടെ കാർഷിക മേഖലയെയും അതുവഴി അവിടുത്തെ ജനജീവിതത്തെയും സാരമായി ബാധിക്കും.
വിത്ത്, വളം, പരിചരണം തുടങ്ങിയ കാലാവസ്‌തേതര ഘടകങ്ങൾ അനുകൂലമായാൽ പോലും കാലാവസ്ഥാ സാഹചര്യങ്ങൾ പ്രതികൂലമാണെങ്കിൽ അത് വിളവിൽ ഗണ്യമായ കുറവ് വരുത്താറുണ്ട്. കാലാവസ്ഥയിലെ അസാധാരണവും പ്രവചനാതീതവുമായ മാറ്റങ്ങൾ ഭക്ഷ്യസുരക്ഷയെ സംബന്ധിച്ചിടത്തോളം നിർണ്ണായകമാണ്. ഉദാഹരണമായി, 2007 ലെ ശക്തമായ കാലവർഷം മൂലം കേരളത്തിൽ പല സ്ഥലങ്ങളിലും വെള്ളപ്പൊക്കമുണ്ടായി. സംസ്ഥാനത്തിന്റെ നെല്ലറയെന്ന വിശേഷിപ്പിക്കുന്ന കുട്ടനാടൻ പാടശേഖരങ്ങൾ വെള്ളത്തിനടിയിലായി. സാധാരണ ഹെക്ടറിന് അഞ്ച് ടൺ വരെ വിളവ് ലഭിക്കാറുണ്ടായിരുന്ന കൃഷിയിടങ്ങളിൽ നിന്ന് അത്തവണ ഹെക്ടറിന് ശരാശരി മൂന്ന് ടൺ വിളവ് മാത്രമാണ് ലഭിച്ചത്. നീണ്ട് നിന്ന് പെയ്ത മഴ രണ്ടാം വിള ഇറക്കുന്നതിനും കാലതാമസം വരുത്തി. 2018, 2019 വർഷങ്ങളിൽ ഉണ്ടായ പ്രളയങ്ങളും കേരളത്തിന്റെ കാർഷിക മേഖലക്കേൽപ്പിച്ച ആഘാതങ്ങൾ വലുതാണ്. നെൽകൃഷിമേഖല പാടെ നശിപ്പിക്കപ്പെടുകയാണ് ഇത്തരം സാഹചര്യങ്ങളിൽ. 2021 ജനുവരി മാസത്തിൽ പെയ്ത അസ്വാഭാവികമായ മഴ ചിലയിടങ്ങളിൽ നെൽകൃഷിയെയും ഇടുക്കി ജില്ലയിലെ വട്ടവട പ്രദേശത്തെ പച്ചക്കറി കൃഷി, മറയൂരിലെ കരിമ്പ് കൃഷി എന്നിവയ്ക്ക് ഗണ്യമായ തോതിൽ ആഘാതമേല്പിച്ചു.
പ്രധാനമായും കാർഷികാധിഷ്ഠിത സമ്പത് വ്യവസ്ഥയാണ് ഭാരതത്തിന്റേത്. ജനസംഖ്യയുടെ 52 ശതമാനത്തോളം, കൃഷിയും അനുബന്ധ മേഖലയുമായി ബന്ധപ്പെട്ടാണ് ജീവിക്കുന്നത്. ഗ്രാമീണ മേഖലയിൽ കാര്ഷികവൃത്തിയുമായി ബന്ധപ്പെട്ട് ജീവിക്കുന്നവർ 76 ശതമാനത്തോളമാണ്. കാലാവസ്ഥയിൽ ഉണ്ടാകുന്ന മാറ്റങ്ങൾ സ്വാഭാവികമായും ഭൂരിഭാഗം വരുന്ന ജനങ്ങളുടെ ജീവനോപാധിയെ നേരിട്ട് ബാധിക്കുമെന്നതിന് സംശയമില്ല. കാരണം, കാർഷികോല്പാദനം, അന്തരീക്ഷ താപനില, മൺസൂൺ മഴ എന്നിവയാൽ നിയന്ത്രിതമാണ്. ഉത്തരേന്ത്യയിൽ രണ്ടാം വിളക്കാലത്താണ് അന്തരീക്ഷ താപനിലയിൽ വർദ്ധനവ് പ്രകടമാവുന്നത്. അന്തരീക്ഷ താപനിലയിൽ ഉണ്ടാകുന്ന വർദ്ധനവ് നേരിട്ട് ബാധിക്കുന്നത് രണ്ടാംവിള കൃഷിയെയാണ്. താപനിലയിലുണ്ടാകുന്ന ഒരു ഡിഗ്രി സെന്റിഗ്രേഡ് വർദ്ധനവ് ഗോതമ്പുത്പാദനത്തിൽ നാല് മുതൽ അഞ്ച് ദശലക്ഷം ടൺ വരെ കുറയാൻ കാരണമാകുന്നു. ഓരോതരം വിലകളിലും സമ്മിശ്ര പ്രതികരണമാണ് കാലാവസ്ഥ മാറ്റം വഴി പ്രകടമാകുന്നത്. (തുടരും)
(കാലാവസ്ഥാ ഗവേഷകനും കാലാവസ്ഥാ കോളമിസ്റ്റുമാണ് ലേഖകൻ)

കേരളത്തിൽ ആകെ മഴ കുറയുന്നു; വരൾച്ചയിലേക്ക്?

കേരളത്തിൽ അതിതീവ്ര മഴ കൂടുന്നുണ്ടെങ്കിലും കാലവർഷ സീസണിൽ ലഭിക്കുന്ന മൊത്തമായ മഴ കുറയുകയാണെന്ന് കണക്കുകൾ. ഇതുകൊണ്ട് വെള്ളപ്പൊക്കവും വരൾച്ചയും ഒരേ വർഷം തന്നെ സംഭവിക്കുന്നുവെന്ന് കാലാവസ്ഥ ശാസ്ത്രഞ്ജനും ഗവേഷകനുമായ റോക്സി മാത്യു കോൾ പറയുന്നു.
1950 മുതൽ 2021 വരെ കാലവർഷ മഴയിൽ മൊത്തത്തിലുണ്ടായ മാറ്റമാറ്റത്തെ കുറിച്ച് അദ്ദേഹത്തിന്റെ നിരീക്ഷണങ്ങൾ .

കാലാവസ്ഥ വ്യതിയാനം: ആഗോളതാപനത്തിന്റെ വ്യക്തമായ ഒരു സൂചനയാണിത്. ചൂടുള്ള വായു കൂടുതൽ ഈർപ്പം കൂടുതൽ നേരം പിടിച്ചുവയ്ക്കുന്നു. അത് കൊണ്ട് ദീർഘ കാലയളവിൽ മഴ പെയ്യാതിരിക്കുകയും പിടിച്ചുവച്ച ഈർപ്പമെല്ലാം രണ്ടോ മൂന്നോ ദിവസങ്ങൾ കൊണ്ടോ മണിക്കൂറുകൾ കൊണ്ടോ പെയ്തു തീർക്കുകയും ചെയ്യുന്നു. കുറഞ്ഞ കാലയളവിൽ കൂടുതൽ മഴ ലഭിക്കുന്നു. മൺസൂൺ കാറ്റുകളിൽ വന്ന വ്യതിയാനവും ഇതിന് കാരണമാകുന്നുണ്ട്.

പുഴകൾ:
വളഞ്ഞൊഴുകുന്ന പുഴകളുടെ അതിരുകളും തിട്ടകളും ഇല്ലാതാകുമ്പോൾ പരന്ന് ആഴ്ന്നിറങ്ങാനുള്ള സംവിധാനമില്ലാതെ പോകുന്നു. അങ്ങനെ സമീപ പ്രദേശങ്ങളെ പ്രളയത്തിലാഴ്ത്തുന്നു. മണൽ വാരി ആഴം കൂട്ടിയാൽ ഈ പ്രശ്നം തീരില്ല. കുറച്ചു വെള്ളം അതിവേഗത്തിൽ കുത്തിയൊലിച്ച് പോകും. വെള്ളം പരന്ന് ഇറങ്ങാത്തത് കൊണ്ട് വരൾച്ചയും പെട്ടെന്ന് വരുന്നു.

സമുദ്രനിരപ്പ്:
വേറൊരു പ്രശ്നവും ഉണ്ട്. പുഴ വെള്ളം കടലിലേയ്ക്കാണ് ഒഴുകി പോകേണ്ടത്. പക്ഷേ ഓരോ വർഷവും സമുദ്രനിരപ്പ് കൂടുന്നതോടൊപ്പം ഒഴുക്ക് കുറയുകയും ഉപ്പുവെള്ളം തിരിച്ച് കയറുകയും ചെയ്യും.

എന്ത് ചെയ്യാം?
ജല സുരക്ഷ: മൊത്തത്തിലുള്ള മഴയുടെ അളവ് കുറഞ്ഞെങ്കിലും കേരളത്തിന് ഇപ്പോഴും ഒരു പാട് മഴ കിട്ടുന്നുണ്ട്. Water is more of a management issue than a climate change issue. കാലാവസ്ഥ വ്യതിയാനത്തെക്കാളും ജല സുരക്ഷയെ ബാധിക്കുന്നത് ജലം നമ്മളെങ്ങനെ കൈകാര്യം ചെയ്യുന്നു എന്നുള്ളതാണ്.

പദ്ധതികൾ:
മഴയുടെയും വെള്ളത്തിന്റെയും പ്രശ്നങ്ങൾ തരണം ചെയ്യാൻ വിജയിച്ച പദ്ധതികൾക്ക് തുടർച്ചയുണ്ടാക്കുക. മഴപ്പൊലിമ (groundwater recharging), ജലവർഷിണി (ponds/lakes revival), പുഴ പുനർജനി (river rejuvenation) ഇവയെല്ലാം ചിലവു കുറഞ്ഞ, വിജയിച്ച പദ്ധതികളാണ്. നമ്മുടെ തൊഴിലുറപ്പ് പദ്ധതിയോടൊപ്പം ചേർത്ത് ഇവ എവിടെയും ചെയ്യാവുന്നതാണ്.
പശ്ചിമഘട്ടം: വനസംരക്ഷണം നിർബന്ധമാക്കുക. കാടുകൾ കാർബൺ വലിച്ചെടുക്കുന്നതിനെക്കാൾ, സസ്യ-ജല ബാഷ്പീകരണം (plant evapotranspiration) വഴി ജലം നിലനിർത്തി വീണ്ടും മഴ പെയ്യിക്കുകയും (recycled rainfall), അതേസമയം മണ്ണൊലിപ്പ്‍ തടയുകയും ചെയ്യുന്നുണ്ട്.
തമിഴ്നാടിന് വരെ ഓരോ വർഷവും കിട്ടുന്ന മഴയുടെ 25-50% വരെ പശ്ചിമഘട്ടത്തിലെ സസ്യജല ബാഷ്പീകരണം വഴിയാണെന്ന് അറിയുമ്പോൾ ഇതിന്റെ പ്രാധാന്യം വളരെയേറെയാകുന്നു.
പൂനെയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപിക്കൽ മീറ്റിയറോളജിയിലെ ക്ലൈമറ്റ് ശാസ്ത്രഞജനും IPCC ലീഡ് ഓതറുമാണ് മലയാളിയായ റോക്സി.

മധ്യ കേരളത്തിൽ തീവ്ര മഴ കൂടുന്നു: റോക്സി മാത്യു കോൾ

കേരളത്തിൽ അതിതീവ്രമഴ കൂടുന്നുവെന്ന് നിരീക്ഷണം. കാലാവസ്ഥാ ശാസ്ത്രജ്ഞൻ റോക്സി മാത്യു കോൾ ആണ് ഇക്കാര്യം അറിയിച്ചത്. 1950 മുതൽ 2021 വരെയുള്ള കണക്ക് പ്രകാരമാണിത്. മധ്യ കേരളത്തിലാണ് അതിതീവ്ര മഴ പ്രധാനമായും കൂടുന്നത്. കാലാവസ്ഥ വ്യതിയാനമാണ് ഇതിന് പ്രധാന കാരണം. വരും വർഷങ്ങളിൽ അതിതീവ്രമഴയുടെ എണ്ണവും ശക്തിയും വ്യാപ്തിയും വർദ്ധിക്കുമെന്നും അദ്ദേഹം പറയുന്നു.
ഇതുവരെയുള്ള കണക്ക് അനുസരിച്ച് അതിതീവ്രമഴ ഏറ്റവും കൂടിയിരിക്കുന്നത് മദ ധ്യ കേരളത്തിലാണ്. ഇടുക്കി, കോട്ടയം, എറണാകുളം, പത്തനംതിട്ട, ആലപ്പുഴ ജില്ലകളിൽ ഇത്തരം എക്സ്ട്രീം ഇവന്റുകൾ വർധിച്ചതായി കാലാവസ്ഥ വകുപ്പിന്റെ കണക്കുകൾ പറയുന്നു.
തൃശൂർ, പാലക്കാട്, മലപ്പുറം ജില്ലകൾക്കിടയിലുള്ള പ്രദേശങ്ങളിലും കണ്ണൂർ ജില്ലയിലും അതിതീവ്ര മഴ കൂടിയിട്ടുണ്ടെന്നും കണക്ക് സൂചിപ്പിക്കുന്നു. കൂടുതൽ അറിയാനും പരിഹാരമാർഗങ്ങൾ തേടുവാനും ഈ വീഡിയോ കാണുക.

ഉരുകി തീരുമോ ഉറഞ്ഞ മണ്ണിടങ്ങൾ - 2

ഡോ.ഗോപകുമാർ ചോലയിൽ
മഞ്ഞുമണല്‍ ഉരുകുന്നു
മണ്ണിലടങ്ങിയിരിക്കുന്ന നൈട്രജന്‍ സംയുക്തങ്ങള്‍ വിഘടിച്ച് അന്തരീക്ഷത്തില്‍ എത്തുന്നതുവഴിയും അന്തരീക്ഷത്തില്‍ നൈട്രസ്ഓക്സൈഡിന്റെ അളവ് ഏറുന്നു. ഇതിന്റെ അനന്തരഫലമെന്നോണം അന്തരീക്ഷത്തില്‍ ഏറ്റവും കൂടുതല്‍ അടങ്ങിയിരിക്കുന്ന ഹരിതഗൃഹവാതകങ്ങളില്‍ നൈട്രസ് ഓക്സൈഡ് മൂന്നാം സ്ഥാനത്തെത്തിയിരിക്കുന്നു. കൂടാതെ, അതിശീതാവസ്ഥയില്‍ ഉറഞ്ഞ നിലയില്‍ കാണുന്ന ഹിമമണല്‍ മിശ്രിതത്തിലെ ഹിമാംശം ചൂടേറുന്ന അവസ്ഥയില്‍ ഉരുകുമ്പോഴും നൈട്രസ്ഓക്സൈഡ് വിമോചിതമായി അന്തരീക്ഷത്തില്‍ എത്തുന്നു. ഇതും ആഗോള താപന പ്രക്രിയക്ക് ആക്കം കൂട്ടുന്നു. സമീപകാലംവരെ, കാര്‍ബണ്‍ഡയോക്സൈഡ്, മീഥേന്‍ എന്നീ രണ്ട് ഹരിതഗൃഹവാതകങ്ങളെയാണ് ആഗോളതാപനഹേതുവായി പ്രധാനമായും കരുതിപ്പോന്നിരുന്നത്. അളവില്‍ മൂന്നാം സ്ഥാനത്ത് നില്‍ക്കുന്ന നൈട്രസ്ഓക്സൈഡിന്റെ പങ്ക് അവഗണിച്ച് തള്ളൂകയായിരുന്നു. നൈട്രസ് ഓക്സൈഡ് ഉത്സര്‍ജനം ‘നാമമാത്രം’ എന്ന വിഭാഗത്തിലാണ് ഉള്‍പ്പെടുത്തിയിരുന്നത്. എന്നാല്‍, ഇപ്പോഴാകട്ടെ, മുന്‍കാലങ്ങളില്‍ ഉണ്ടായിരുന്നതിനേക്കാള്‍ ഏകദേശം 12 ഇരട്ടിയോളം വരും ഈ വാതകത്തിന്റെ നിലവിലെ ഉത്സര്‍ജനതോത് എന്ന് അടുത്തയിടെയാണ് തിരിച്ചറിഞ്ഞത്. മാത്രമല്ല, ഈ വാതകത്തിന്റെ അന്തരീക്ഷ സാന്ദ്രതയിലുണ്ടാകുന്ന സൂക്ഷ്മമായ വര്‍ധനവിന്‌പോലും കാര്‍ബണ്‍ഡയോക്സൈഡിന്റെ ഭീമമായ അന്തരീക്ഷസാന്ദ്രതക്ക് കാലാവസ്ഥയില്‍ സൃഷ്ടിക്കാനാവുന്ന അതേ പ്രഭാവങ്ങള്‍ ഉളവാക്കാനാവും. താപനപ്രക്രിയക്ക് ആക്കം കൂട്ടുന്നതില്‍ കാര്‍ബണ്‍ഡയോക്സൈഡിനെ അപേക്ഷിച്ച് ഉദ്ദേശം 300 ഇരട്ടിയോളം ശക്തിയേറിയതാണ് നൈട്രസ്ഓക്സൈഡ്. തന്മൂലം ആര്‍ടിക്പ്രദേശങ്ങളിലെ മാത്രമല്ല, ആഗോളകാലാവസ്ഥ തന്നെ അപകടകരമായ താപന പ്രത്യാഘാതങ്ങള്‍ അഭിമിഖീകരിക്കേണ്ടി വരും.
നൈട്രസ്ഓക്സൈഡിന്റെ മാത്രമല്ല, കാര്‍ബണിന്റെയും സമ്പന്ന സ്രോതസാണ് ഉറഞ്ഞ ഹിമമണല്‍ (പെര്‍മാഫ്രോസ്റ്റ്). ചൂട് കൂടുന്ന അവസ്ഥയില്‍ മണ്ണിലെ സൂക്ഷമജീവികള്‍ പ്രവര്‍ത്തനനിരതരാവുകയും മണ്ണിലടങ്ങിയിരിക്കുന്ന ജീര്‍ണ്ണാവസ്ഥയിലുള്ള സസ്യാവശിഷ്ടങ്ങളെ വിഘടിപ്പിച്ച് കാര്‍ബണ്‍ഡയോക്സൈഡ്, മീഥേന്‍ എന്നീ വാതകങ്ങള്‍ വന്‍തോതില്‍ പുറംതള്ളാന്‍ ആരംഭിക്കുകയും ചെയ്യുന്നു. ഈ വാതകങ്ങളോടൊപ്പം നൈട്രസ്ഓക്സൈഡിന്റെ സാന്നിധ്യവും കൂടി ചേരുമ്പോള്‍ അന്തരീക്ഷതാപന പ്രക്രിയ ദ്രുതഗതിയിലാവുന്നു.
മണ്ണും ഉറഞ്ഞ മഞ്ഞും കൂടിച്ചേർന്ന മിശ്രിതം ഒരു ശീതീകരണി എന്ന പോലെ സസ്യങ്ങൾ, ജന്തുക്കൾ എന്നിവയുടെ മൃതാവശിഷ്ടങ്ങളെ സംരക്ഷിക്കുന്നു. എന്നാൽ, ഈ മിശ്രിതത്തിലെ ഹിമാംശം ഉരുകുന്നതോടെ സൂക്ഷ്മജീവികളുടെ വിഘടന പ്രവർത്തനം ആരംഭിക്കുന്നു. എന്നാൽ, ഈ പ്രക്രിയയുടെ പ്രഹരശേഷിയെപ്പറ്റി ഭിന്നാഭിപ്രായങ്ങളാണുള്ളത്. മാരകപ്രത്യാഘാതങ്ങളുള്ള ഒന്നാണ് ഉറഞ്ഞ മണ്ണിൽ നിന്ന് വിമുക്തമാകുന്ന ഹരിതഗൃഹ വാതകങ്ങൾ എന്ന ഒരു വിഭാഗം ശാസ്‌ത്രകാരന്മാർ ഉൽക്കണ്ഠാകുലരാകുമ്പോൾ വളരെ ചെറിയ തോതിലുള്ള ഹരിതഗൃഹവാതകഉത്സർജനം മാത്രമേ മഞ്ഞുരുകുമ്പോൾ ഉറഞ്ഞ മണ്ണിൽ നിന്ന് പുറത്തുവരാനിടയുള്ളു എന്ന് മറ്റൊരു പക്ഷം ഗവേഷകർ സമാശ്വസിക്കുന്നു. എന്നാൽ, ഈ രണ്ട് ധാരണകളും പൂർണ്ണമായും ശരിയല്ല. ഹിമമണൽ മിശ്രിതത്തിൽ നിന്ന് വൻ തോതിൽ ഹരിത ഗൃഹവാതകങ്ങൾ അന്തരീക്ഷത്തിലേക്ക് പുറന്തള്ളപ്പെടും എന്ന് വിശ്വസിക്കുവാൻ മതിയായ കാരണങ്ങൾ നിലവിലില്ല. എന്നാൽ, നിലവിലെ ആഗോളതാപന സാഹചര്യങ്ങളെ നിസ്സാരവൽക്കരിച്ച് കാണാനുമാവില്ല. ഇപ്പോൾ തന്നെ ജർമനി പ്രതിവർഷം പുന്തള്ളപ്പെടുന്ന ഹരീതഗൃഹവാതകഉത്സർജനത്തിന് തുല്യമായ വാതകപുറന്തള്ളല് ഉറഞ്ഞ മണ്ണ് ഉരുകുന്നതുമൂലം ഉണ്ടാകുന്നുണ്ട്. മാത്രമല്ല, അടുത്ത രണ്ട് നൂറ്റാണ്ടുകളുടെ അവസാനത്തോടെ ആയിരക്കണക്കിന് ബില്യൺ മെട്രിക് ടൺ കാർബൺഡയോക്‌സൈഡിന് സൃഷ്ടിക്കാവുന്ന അതെ പ്രഭാവം ഉറഞ്ഞ മണൽ ഉരുകുമ്പോൾ പുറന്തള്ളപ്പെടുന്ന വാതകങ്ങൾക്ക് സൃഷ്ടിക്കാനാവും. തണുത്തുറഞ്ഞ് കിടക്കുന്ന ഇടങ്ങളിലെ ഹിമമണൽ മിശ്രിതത്തെ ആവരണം ചെയ്യുന്ന മഞ്ഞ് പാളികളും മഞ്ഞ് കട്ടകളും ഉരുകിയൊലിക്കുമ്പോൾ തത് പ്രദേശം കൂടുതൽ കൂടുതൽ ഇരുണ്ടനിറം കൈവരിക്കുന്നു. പ്രതലങ്ങൾ വളരെപ്പെട്ടെന്ന് ചൂടാകും എന്ന് മാത്രമല്ല മഞ്ഞ് പാളികളുടെ വെണ്മ കുറയുന്നതോടെ താപവികിരണങ്ങൾ പ്രതിഫലിപ്പിക്കുവാനുള്ള ശേഷിയും പ്രസ്തുതപ്രതലങ്ങൾക്ക് കുറയുന്നു. ഈ രണ്ട ഘടകങ്ങളുടെയും സമ്മിശ്ര പ്രഭാവം ഭൂമിയുടെ കാലാവസ്ഥ തന്നെ തിരുത്തികുറിക്കുവാൻ കാരണമായേക്കാം.
(കാലാവസ്ഥ ശാസ്ത്രജ്ഞനും കോളമിസ്റ്റും കാർഷിക സർവകലാശാലയിലെ സയന്റിഫിക് ഓഫീസറും ആണ് ലേഖകൻ)

ഭാഗം ഒന്ന് വായിക്കാം.

ഉരുകിത്തീരാൻ വിടരുത് ഉറഞ്ഞ മണ്ണിടങ്ങളെ

ഡോ.ഗോപകുമാർ ചോലയിൽ

കാലഘട്ടത്തിലൂടെയാണ് ലോകം കടന്നുപോകുന്നത്. മനുഷ്യനടക്കമുള്ള ജൈവസമൂഹം ഇടപെടുന്ന വിവിധ മണ്ഡലങ്ങൾ, ആഗോള കാലാവസ്ഥ, പരിസ്ഥിതി എന്നിങ്ങനെ എല്ലാ മേഖലകളിലേക്കും കാലാവസ്ഥാവ്യതിയാന പ്രഭാവം പിടിമുറുക്കുന്നു. വിവിധ മണ്ഡലങ്ങളിൽ കാലാവസ്ഥാമാറ്റത്തിന്റെ പ്രഭാവവും ഋണാത്മക (negative) പ്രത്യാഘാതങ്ങളും എന്തെല്ലാമെന്നും അവ എങ്ങനെ പരിമിതപ്പെടുത്താമെന്നും ലോകം തല പുകയ്ക്കുന്നു. ഭൂമിയിൽ മഞ്ഞുറഞ്ഞു കിടക്കുന്ന പ്രദേശങ്ങളുടെ ഭൂതാവസ്ഥയും, താപനസാഹചര്യങ്ങളിൽ ഭാവിയിൽ അവിടങ്ങളിൽ സംഭവിക്കാനിടയുള്ള വ്യതിയാനങ്ങളും പഠനവിധേയമാക്കപ്പെട്ടിട്ടുണ്ട്. ഈ വിഷയത്തിൽ ഉരുത്തിരിയപ്പെട്ട നിഗമനങ്ങൾ എല്ലാം വിരൽ ചൂണ്ടുന്നത്, താപനകാരികളായ ഹരിതഗൃഹവാതകങ്ങളുടെ ഉത്സർജനത്തിൽ അടിയന്തിരമായി ഗണ്യമായ വെട്ടിക്കുറച്ചിൽ വരുത്തുകയെന്ന ഒരേയൊരു പരിഹാരമാർഗ്ഗത്തിലേക്കാണ്.
ഭൂമിയുടെ ആകെ ഉപരിതല വിസ്തീർണത്തിന്റെ ഏകദേശം 10 ശതമാനത്തോളം വരും ഉറഞ്ഞ മണ്ണിടങ്ങൾ (permafrost). ഉത്തരാർദ്ധഗോളത്തിലാണ് ഹിമവും മണലും സമ്മിശ്രമായി നിലകൊള്ളുന്ന ഉറഞ്ഞ മണ്ണ് കൂടുതൽ തോതിൽ കാണപ്പെടുന്നത്. വേനൽ മാസങ്ങളിൽ ഉപരിഭാഗത്തുള്ള മണ്ണിലെ ഹിമാംശം ഏതാനും സെന്റിമീറ്റർ താഴ്ച വരെ ഉരുകുന്നു. അതിനും താഴെയുള്ള ഭാഗങ്ങളിൽ ഹിമം ഉരുകാതെ നിലകൊള്ളുന്നു. താപനം ഏറുമ്പോൾ, ഇപ്രകാരം ഹിമാംശം കലർന്ന ഉറഞ്ഞ മണ്ണ് കടുത്ത ഭീഷണിയാണ് നേരിടുന്നത്. ആഗോള ശരാശരി താപനിലയിലുണ്ടാകുന്ന വർദ്ധനവിനെക്കാൾ ഇരട്ടി വേഗത്തിലാണ് ഭൂമിയുടെ ഉപരിതലതാപനില ഉയരുന്നത്. തന്മൂലം കരഭാഗത്തേയും കരഭാഗത്തേയും സമുദ്രമേഖലയിലെയും സ്ഥിതിഗതികൾ അപ്രതീക്ഷിത വേഗത്തിൽ വ്യതിയാന വിധേയമാവുകയും ചെയ്യുന്നു. വളരെ വിപുലമായ പ്രത്യാഘാത പരമ്പരകൾക്കാണ് ഈ പ്രക്രിയ വഴിവയ്ക്കുന്നത്. കാലാവസ്ഥ, മനുഷ്യജീവിതം ജൈവവൈവിധ്യം തുടങ്ങി ഒരു വിധം എല്ലാ മേഖലകളും തന്നെ ഇത്തരം പ്രത്യാഘാതങ്ങൾ ഏറ്റുവാങ്ങുകയും ചെയ്യുന്നു. ഭൂമിയുടെ ഉത്തരാര്‍ധ ഗോളത്തിലെ നാലിലൊന്നോളം ഭാഗം തണുത്തുറഞ്ഞ അവസ്ഥയിലാണ് – ഏതാണ്ട് 23 ദശലക്ഷം ചതുരശ്ര കിലോമീറ്റര്‍. അന്തരീക്ഷത്തില്‍ വര്‍ധിച്ചു വരുന്ന ഫോസില്‍ ഇന്ധന ഉത്സര്‍ജനങ്ങള്‍, വ്യവസായശാലകളില്‍ നിന്നുള്ള മാലിന്യനിക്ഷേപങ്ങള്‍, വാഹനങ്ങളില്‍നിന്നുള്ള മലിനീകരണം തുടങ്ങിയവ വഴി പൊതുവെ അന്തരീക്ഷത്തിന് ചൂടേറുമ്പോള്‍ അതിന്റെ ചുവട് പിടിച്ച് ആര്‍ട്ടിക്‌ മേഖലയിലെ കാലാവസ്ഥയിലും ചൂടേറിവരികയാണ്. തണുത്തുമരവിച്ച ഉത്തരധ്രുവത്തില്‍ ഇപ്പോള്‍ കുറ്റിച്ചെടികളും ചെറിയ മരങ്ങളും വളരാന്‍ തുടങ്ങിയിരിക്കുന്നു എന്നത് ഇതിന്റെ സൂചനയാണ്. ഹരിതസസ്യങ്ങള്‍ നൈട്രജന്‍ ആഗിരണം ചെയ്യുമെന്നതിനാല്‍ ഇവയുടെ സാന്നിധ്യം മൂലം ആര്‍ട്ടിക് മേഖലയിലെ നൈട്രസ്ഓക്സൈഡ് സാന്ദ്രതയില്‍ കുറവ് ഉണ്ടാകുമെന്നത് മറ്റൊരു വശം. (തുടരും)
(കാലാവസ്ഥ ശാസ്ത്രജ്ഞനും കോളമിസ്റ്റും കാർഷിക സർവകലാശാലയിലെ സൈന്റിഫിക് ഓഫീസറും ആണ് ലേഖകൻ)

കാലാവസ്ഥ പ്രവചിക്കുന്നത് എങ്ങനെ എന്നറിയേണ്ടെ? വിശദമായി വായിക്കാം

കാലാവസ്ഥാ പ്രവചനം നടക്കുന്നത് എങ്ങനെ. അതിനു പിന്നില്‍ പ്രവര്‍ത്തിക്കുന്ന കാര്യങ്ങള്‍ എന്തെല്ലാം. കാലാവസ്ഥാ ശാസ്ത്രജ്ഞനും ബ്രസല്‍സിലെ റോയല്‍ ബെല്‍ജിയന്‍ ഇന്‍സ്റ്റിറ്റ്യൂട്ട് ഓഫ് നാച്വറല്‍ സയന്‍സസിലെ റിസര്‍ച്ച് സയിന്റിസ്റ്റായ സഹീദ് പുത്തന്‍പുരയില്‍ എഴുതുന്നു.

ഇന്ത്യന്‍ കാലാവസ്ഥ പ്രവചനവും സങ്കീര്‍ണ്ണതകളുമെന്തെല്ലാം എന്ന് പരിശോധിക്കാം.
നമ്മുടെ രാജ്യത്ത് രണ്ടു കാലാവസ്ഥ നിഗമന സിസ്റ്റങ്ങള്‍ ആണ് ഉള്ളത് ;
1. ഇന്ത്യന്‍ മീറ്റിയരോളജിക്കല്‍ ഡിപ്പാര്‍ട്ട്‌മെന്റ്, IMD യുടെ GFS
2. National Center for Medium Range Weather Forecasting NCMRWF nte NCUM
ഈ രണ്ടു കാലാവസ്ഥ നിഗമന സിസ്റ്റങ്ങള്‍ക്കും വേണ്ട initial conditions (ഒരു ദിവസത്തെ കാലവസ്ഥ പ്രവചനം തുടങ്ങുമ്പോള്‍ നിലവില്‍ ഉള്ള ഭൗമ അന്തരീക്ഷകടല്‍ അവസ്ഥ) ഉണ്ടാക്കുന്നത് NCMRWF ആണ് !
ഈ initial conditions ഉണ്ടാക്കുന്ന പ്രോസസിന്റെ തുടക്കം ഭൗമ അന്തരീക്ഷത്തെയും കടലിനെയും നിരന്തരമായി വീക്ഷിച്ചു കൊണ്ടിരിക്കുന്ന ഉപഗ്രങ്ങള്‍, കപ്പലുകള്‍, യാത്രാ വിമാനങ്ങള്‍, കരയിലും കടലിലും സ്ഥാപിതമായ കാലാവസ്ഥ സ്റ്റേഷനുകള്‍ എന്നിവ ശേഖരിക്കുന്ന നൂറു കണക്കിന് ഗിഗാബൈറ്റ് ഡാറ്റ ഒരുമിച്ച് കൂട്ടി വ്യത്യസ്തമായ മാനദണ്ഡങ്ങള്‍ അനുസരിച്ച് ആവശ്യമുള്ളത് സ്വീകരിക്കുക എന്നത് ആണ് , സാധാരണക്കാരന്റെ ഭാഷയില്‍ പറഞ്ഞാല്‍ നെല്ലും പതിരും വേര്‍തിരിക്കല്‍ ! ഇങ്ങിനെ ഉണ്ടാക്കി എടുക്കുന്ന ഡാറ്റയാണ് പിന്നീട് ന്യൂമറിക്കല്‍ മോഡലുകള്‍ അഥവാ കാലാവസ്ഥ നിഗമന (പ്രവചന) സിസ്റ്റത്തിലേക്ക് പോകുന്നത്.
ഈ ന്യൂമറിക്കല്‍ മോഡലുകള്‍ ആകട്ടെ ഭൂമിയുടെ ചലന നിയമങ്ങളും ഈ ശാസ്ത്ര ശാഖയുടെ ചരിത്രത്തില്‍ അനവധി നിരവധി ശാസ്ത്ര പ്രതിഭകള്‍ നടത്തിയ ഗവേഷണ നിരീക്ഷണ പരീക്ഷണങ്ങളിലൂടെ ഉരുത്തിരിഞ്ഞു വന്ന, കടലിലെ ചൂടും അന്തരീക്ഷ മര്‍ദ്ദവും നീരാവിയും മല നിരകളും അന്തരീക്ഷത്തില്‍ തൂങ്ങി കിടക്കുന്ന ചെറു കണികകളും അവയുമായി മേഘങ്ങള്‍ ഉണ്ടാകുന്നതിനും മേഘങ്ങള്‍ ഘനീഭവിക്കുന്നതിലുമൊക്കെയുള്ള, അനവധി നിരവധി സൂക്തവാക്യങ്ങളും അടങ്ങിയതും ആണ് !
ഒരു സ്ഥലത്ത് അടിക്കുന്ന കാറ്റ്, മഴ, അന്തരീക്ഷ ഊഷ്മാവ്, അന്തരീക്ഷ മര്‍ദ്ദം എന്നിവയുടെ തോത് ആ സ്ഥലത്ത് മാത്രം നടക്കുന്ന അന്തരീക്ഷ കടല്‍ പ്രതിഭാസങ്ങളുടെ അനന്തരഫലമായി മാത്രം അല്ല, ഭൗമ പ്രതലത്തില്‍ ആകെ, അന്തരീക്ഷത്തിലും കടലിലും ഒന്നടങ്കം നടക്കുന്ന സമയ കാല വ്യത്യാസങ്ങള്‍ ഉള്ള അനവധി നിരവധി പ്രതിഭാസങ്ങളുടെ ആകെ തുകയാണ് !
അത് കൊണ്ട് തന്നെ ഈ മോഡലുകള്‍ ഭൗമ അന്തരീക്ഷം മൊത്തമായി ഉള്‍പ്പെടുത്തി വേണം computation നടത്താന്‍ !
ഒരു സാധാരണ ഡെസ്‌ക്ടോപ്പ് കംപ്യൂട്ടറിനേക്കാള്‍ ആയിരം മടങ്ങ് അല്ലെങ്കില്‍ കൂടുതല്‍ ശക്തിയുള്ള ( പ്രോസസ്സിംഗ് സ്പീഡ്, storage etc) ഹൈപര്‍ഫോര്‍മിങ് സൂപ്പര്‍ കമ്പ്യൂട്ടറുകള്‍ ഉപയോഗിച്ച് മാത്രമേ, കാലാവസ്ഥ വിവരം ആവശ്യമായ മണിക്കൂറുകള്‍ക്ക് മുന്‍പ് ഇത് ലഭ്യമാകുന്ന തരത്തില്‍ ഈ computation ചെയ്യാന്‍ കഴിയുകയുള്ളൂ !
നമ്മുടെ രാജ്യത്ത് കാലാവസ്ഥ പ്രവചനത്തിന് ഉപയോഗിക്കുന്ന ഇന്ന് നിലവിലുള്ള സൂപ്പര്‍ കമ്പ്യൂട്ടറുകള്‍ ലോകത്ത് ഏതു സ്ഥാപനത്തിനോടും കിടപിടിക്കുന്നതും പല വികസിത രാജ്യങ്ങളെ പോലും കവച്ചുവെക്കുന്നതും ആണ് !
ഇനി ഇന്ത്യന്‍ കാലാവസ്ഥ നിഗമനത്തിന്റെ (പ്രവചനത്തിന്റെ) സങ്കീര്‍ണ്ണത ആകട്ടെ കാലാവസ്ഥ ശാസ്ത്ര മേഖലയില്‍ ലോകത്തെമ്പാടുമുള്ള ഏറ്റവും മികച്ചത് എന്ന് പറയപ്പെടുന്ന യൂണിവേഴ്‌സിറ്റികളിലെയും ശാസ്ത്ര ഗവേഷണ സ്ഥാപനങ്ങളിലെയും പ്രതിഭകളായ ശാസ്ത്രജ്ഞരെ പോലും വിഷമം പിടിപ്പിക്കുന്ന ഒരു ശാസ്ത്ര സമസ്യയാണ് !
തികച്ചും വ്യത്യസ്തമായ സ്വഭാവ സവിശേഷതകള്‍ ഉള്ള രണ്ടു കടലുകള്‍ ഇരു വശങ്ങളിലും, ഇന്ത്യന്‍ മഹാ സമുദ്രം താഴെയും, ഹിമാലയ പര്‍വ്വതം മുകളിലും, ഇതൊന്നും കൂടാതെ ശാന്ത സമുദ്രത്തില്‍ ആഞ്ഞടിക്കുന്ന ചുഴലിക്കാറ്റിന്റെ അവശിഷ്ടങ്ങള്‍ പലപ്പോഴായി ബംഗാള്‍ ഉള്‍ക്കടലില്‍ പതിക്കുമ്പോ ഉണ്ടാകുന്ന സങ്കീര്‍ണ്ണത വേറെയും !
ഒരു ദിവസത്തെ കാലാവസ്ഥ നിലവില്‍ ഉള്ള അവസ്ഥ (അഥവാ initial condition) എന്നത് കാലാവസ്ഥ പ്രവചനത്തില്‍ ഏറ്റവും നിര്‍ണായകമാണ് ! ഇതിന് നാം ആശ്രയിക്കുന്ന ഡാറ്റ ഇന്ത്യന്‍ ഉപഭൂഖണ്ഡത്തില്‍ ഇനിയും ധാരാളം മുന്നോട്ട് പോകാന്‍ ഉണ്ട് , റഡാര്‍ ഡാറ്റകള്‍ കൂടി ഉള്‍പ്പെടുത്തിയുള്ള initial condition ഉണ്ടാക്കുക എന്നതാണ് പുതുതായി വരാനിരിക്കുന്ന ഒരു മാറ്റം !
നിരവധി ശാസ്ത്ര പ്രതിഭകള്‍ , മാസ്റ്റര്‍ ഡിഗ്രി ചെയ്യുന്ന കുട്ടികള്‍ മുതല്‍ വളരെ പ്രഗല്‍ഭരായ ശാസ്ത്ര പ്രതിഭകള്‍ വരെ കഠിന പ്രയത്‌നം തന്നെ ഈ മേഖലയില്‍ നടത്തുന്നുണ്ട് !
സാധാരണ ജനങ്ങളുടെ ജീവനും സ്വത്തും ജീവിത ഉപാധിയും സംരക്ഷിക്കുക എന്ന മഹനീയ ലക്ഷം തന്നെയാണ് അവരുടെ മുന്നില്‍ !
ഒരു കാലാവസ്ഥ പ്രവചനം തെറ്റുമ്പോള്‍ ശെരിയായ കാലാവസ്ഥ നിഗമനങ്ങള്‍ ഇത്രയും സങ്കീര്‍ണ്ണമായ ഒരു പ്രക്രിയയിലൂടെ ആണ് തങ്ങള്‍ക്ക് മുന്നില്‍ എത്തുന്നത് എന്ന് മനസ്സിലാക്കാനുള്ള വിവരും വിവേകവും ഉണ്ടാകണം !
എന്താണ് ശാസ്ത്രം, എന്താണ് കാലാവസ്ഥ പ്രവചനം എന്താണ് ഇന്ത്യന്‍ കാലാവസ്ഥ ലോക കാലാവസ്ഥാ ഭൂപടത്തില്‍ ഇത്രയും സങ്കീര്‍ണ്ണമായ ഒരു സമസ്യ ആക്കുന്നത് എന്നൊന്നും ലവലേശം വിവരം ഇല്ലാത്ത കുറെ ആളുകള്‍ ഉണ്ട് ! അവര്‍ക്ക് ഇതൊന്നും തന്നെ, ഈ എഴുത്തും വാക്കുകളും ഒരു പ്രയോജനവും ചെയ്യുകയില്ല ! പക്ഷേ വിവേകമുള്ള ധാരാളം ആളുകള്‍ക്ക് ഇതൊക്കെ ഒന്ന് മനസ്സിലാക്കാന്‍ കഴിയും എന്നാണ് പ്രതീക്ഷ !