Menu

Weatherman

വൃശ്ചികം പിറന്നു, തണുപ്പെത്തും എവിടെ നിന്ന് എങ്ങനെ എന്നറിയാം?

ഉത്തരേന്ത്യയിൽ ശൈത്യകാലം ആരംഭിച്ചതിനു പിന്നാലെ കേരളത്തിലും തണുപ്പെത്തുന്നു. ഡൽഹിയിൽ ഈ സീണലിൽ ഏറ്റവും കുറഞ്ഞ താപനിലയായ 10 ഡിഗ്രി സെൽഷ്യസ് ഇന്നലെ രേഖപ്പെടുത്തി. ഗുരുഗ്രാമിൽ 9.4 ഡിഗ്രിയായിരുന്നു ഇന്നത്തെ താപനില. ഡൽഹി സഫ്ദർജംഗിൽ 11.3 ഡിഗ്രിയും താപനില രേഖപ്പെടുത്തി. അടുത്ത ഏതാനും ദിവസം തണുപ്പ് കൂടാനാണ് സാധ്യത. വടക്കുപടിഞ്ഞാറൻ ഇന്ത്യയിലാണ് ഏറ്റവും കുറവ് താപനില പ്രതീക്ഷിക്കുന്നത്.

തണുപ്പിന് കാരണം പശ്ചിമവാതം
പശ്ചിമവാതം എന്നറിയപ്പെടുന്ന വെസ്റ്റേൺ ഡിസ്റ്റർബൻസാണ് ഇന്ത്യയിൽ തണുപ്പിന് കാരണം. മധ്യധരണ്യാഴിയിൽ നിന്ന് കിഴക്കോട്ടുള്ള ശീതകാറ്റിന്റെ പ്രവാഹമാണിത്. തുർക്കി, അഫ്ഗാനിസ്ഥാൻ, പാകിസ്താൻ വഴി വടക്കുപടിഞ്ഞാറൻ ഇന്ത്യ വഴിയാണ് ഇത് ഇന്ത്യയിലെ വിവിധ സംസ്ഥാനങ്ങളിലെത്തുന്നത്. ഹിമാലയത്തിൽ തട്ടി ഇത് മധ്യ ഇന്ത്യയിലേക്കും തെക്കേ ഇന്ത്യയിലേക്കും എത്തുന്നു. നിലവിൽ കിഴക്കൻ ദിശയിലാണ് പശ്ചിമവാതത്തിന്റെ ഒഴുക്ക്. പഞ്ചാബ്, ഹരിയാന, ഡൽഹി, രാജസ്ഥാൻ മേഖലകളിൽ ഇപ്പോൾ സമാന്യം നല്ല തണുപ്പ് അനുഭവപ്പെടുന്നുണ്ട്. ിവിടെ ഇനിയും താപനില താഴും.

തെക്കോട്ടും തണുപ്പെത്തും, കേരളത്തിലും
രണ്ടു ദിവസത്തിനു ശേഷം വടക്കൻ സംസ്ഥാനങ്ങളിൽ നിന്ന് പശ്ചിമവാതത്തിന്റെ ഒഴുക്ക് തെക്കേ ഇന്ത്യയിലേക്കും നീളുമെന്ന് ഞങ്ങളുടെ വെതർമാൻ പറയുന്നു. മഹാരാഷ്ട്രവഴി ശൈത്യം കർണാടകയിലേക്കും തുടർന്ന് വടക്കൻ കേരളത്തിലേക്കും എത്തും. നിലവിൽ ബംഗാൾ ഉൾക്കടലിലെ ന്യൂനമർദത്തെ തുടർന്ന് കിഴക്കൻ കാറ്റ് ദുർബലമായതും പടിഞ്ഞാറൻ കാറ്റ് ദുർബലമായതുമായ സാഹചര്യം ശൈത്യക്കാറ്റിനെ കേരളത്തിൽ എത്തിക്കാനുള്ള അന്തരീക്ഷസ്ഥിതി അനുകൂലമാണ്. എന്നാൽ ബുധനാഴ്ചക്ക് ശേഷം വീണ്ടും കിഴക്കൻ കാറ്റ് എത്തുന്നതോടെ മഴ തിരെകെയെത്തുകയും തണുപ്പ് കുറയുകയും ചെയ്യും.

വടക്കുകിഴക്കൻ ഇന്ത്യയിൽ പുകമഞ്ഞ്
ഒഡിഷ, അസം, മേഘാലയ, നാഗാലാന്റ്, മണിപ്പൂർ, മിസോറം, ത്രിപുര എന്നീ സംസ്ഥാനങ്ങളിലും അടുത്ത നാലു ദിവസം താപനില താഴുകയും പുകമഞ്ഞ് അനുഭവപ്പെടുകയും ചെയ്യും.

Weatherman's Note: അസാനി; മഴ സാധ്യത, സ്വഭാവം, എപ്പോൾ വരെ ?

അസാനി ചുഴലിക്കാറ്റ് ആന്ധ്ര പ്രദേശ് തീരത്തേക്ക് കൂടുതൽ അടുത്തതോടെ കേരളത്തിലും സ്വാധീനം തുടരുകയാണ്. ഇന്നത്തെ metbeat വെതറിലെ പോസ്റ്റുകൾ വായിച്ചിട്ടുണ്ടാകും എന്ന് കരുതുന്നു. ഇന്നലെ രാത്രിയും ഇന്ന് പകലും ലഭിച്ചതു പോലുള്ള മഴ ഇന്ന് രാത്രിയും എല്ലാ ജില്ലകളിലും പ്രതീക്ഷിക്കാം. അസാനി തീവ്ര ചുഴലിയിൽ നിന്ന് ദുർബലമായാൽ കേരളത്തിൽ കൂടുതൽ മഴ ലഭിക്കും. ഇപ്പോൾ ഇതോടൊപ്പമുള്ള ഉപഗ്രഹ ചിത്രത്തിൽ എറണാകുളം മുതൽ തെക്കോട്ടുള്ള ജില്ലകളിൽ മേഘ സാന്നിധ്യം ഉണ്ട്. ഇവ പുൾ എഫക്ട് വഴി എത്തിയ മേഘങ്ങളാണ്. പൊതുവെ സാന്ദ്രത കുറഞ്ഞ ലോ ക്ലൗസുകൾ. കേരളം ഉൾപ്പെടുന്ന പ്രദേശം ഇപ്പോൾ മർദ്ദം കുറഞ്ഞ നിലയിലാണ്. അതിനാൽ മേഘം എത്താം. മഴ പെയ്യാം. കാറ്റിന് അസ്ഥിരതയുണ്ട്. അതിനാൽ മഴ പൊടുന്നനെ പെയ്യുകയും ബ്രേക്കിട്ട പോലെ നിൽക്കുന്നതും ചിലയിടങ്ങളിൽ കാണാം. രാത്രി വൈകിയും പുലർച്ചെയും രാവിലെയും ആണ് കൂടുതൽ മഴ സാധ്യത. ഇടിമിന്നൽ പ്രതീക്ഷിക്കാം. നാളെത്തോടെ അസാനി സാന്നിധ്യം കേരളത്തിൽ കുറഞ്ഞു തുടങ്ങുമെങ്കിലും ഒറ്റപ്പെട്ട മഴ ലഭിക്കും. നാളെ വരെ എന്തായാലും കേരള, ലക്ഷദ്വീപ് തീരത്ത് കടലിൽ പോകരുത്. തുടർന്നും കാലാവസ്ഥ വകുപ്പ് മുന്നറിയിപ്പ് പാലിക്കണം. കടൽ പ്രക്ഷുബ്ധമാകുകയും കാറ്റ് പെട്ടെന്ന് 50 കി.മീ എത്തുകയും ചെയ്യും.

ആകാശം നോക്കിയിരിക്കേണ്ട, പോസ്റ്റ് വായിച്ചോളൂ

കൊപ്ര, കൊട്ടത്തേങ്ങ, അണ്ടി (കശുവണ്ടി ), റബർ, കുരുമുളക്, മഞ്ഞൾ തുടങ്ങിയവ ഉണക്കാനുള്ളവർക്ക് ഇന്ന് നല്ല കാലാവസ്ഥ ആയിരുന്നിരിക്കണം. അടുത്ത ദിവസങ്ങളിലും ഇവർക്ക് നല്ല കാലാവസ്ഥയായിരിക്കും. അല്ലാത്തവർക്ക് ഫാൻ ഫുൾ സ്പീഡിൽ ഇട്ടാലും ഫാൻ ഇട്ടോ എന്ന് സംശയിക്കും. എത്ര തവണ കുളിച്ചാലും വെള്ളം തീരുമെന്നല്ലാതെ പ്രത്യേകിച്ച് തണുപ്പ് കിട്ടുമെന്ന പ്രതീക്ഷ വേണ്ട. അകത്തും പുറത്തും ഏതാണ്ട് ഒരേ ചൂട്. ഹ്യുമിഡിറ്റി കൂടുതൽ. വിയർത്തൊഴുകാൻ പ്രത്യേകിച്ച് അധ്വാനമുള്ള ജോലികൾ ഒന്നും ചെയ്യേണ്ട. നേരത്തെ പറഞ്ഞിരുന്നു ഉത്തരേന്ത്യയിലെ ഉഷ്ണക്കാറ്റ് കേരളത്തിലെത്തുമെന്ന്. അവിടെയും ചൂട്, ഇവിടെയും ചൂട്. ഇനി എല്ലാവർക്കും അറിയേണ്ടത് ഒരു തുള്ളി മഴയെങ്കിലും കിട്ടുമോ എന്നാണ്. കുറച്ച് മുൻപ് എറണാകുളം, കോട്ടയം ജില്ലയിലായി ഒരു മേഘക്കൂട്ടം ഉണ്ടായിരുന്നു. കാറ്റ് വിചാരിച്ചിരുന്നേൽ തകർത്തു പെയ്യുമായിരുന്നു. കോട്ടയത്തോ, പത്തനംതിട്ടയിലോ ഒന്നോ രണ്ടോ മഴ വൈകിട്ട് ലഭിച്ചിരിക്കണം. അതും ഏതാനും കിലോമീറ്റർ ചുറ്റളവിൽ മാത്രം. കേരളത്തിന് മുകളിൽ മഴ പ്രതീക്ഷ നിലവിൽ കുറവാണ്. എങ്കിലും കോഴിക്കോട്, മലപ്പുറം ജില്ലകളുടെ പടിഞ്ഞാറും കിഴക്കുമായി പുലർച്ചെ , രാവിലെ നേരിയ മഴ സാധ്യത. നാളെ (വ്യാഴം) ഇന്നത്തെക്കാൾ അൽപം ചൂടിന് കുറവ് പ്രതീക്ഷിക്കുന്നുണ്ട്. ഈ കാലാവസ്ഥ നമ്മൾ പ്രതീക്ഷിച്ചത് തന്നെയാണ്. അടുത്ത മാസത്തെ സൂചനകൾ ഇപ്പോഴത്തെ ചൂട് നൽകുന്നുണ്ട്. കാലവർഷത്തിന്റെ ഒരുക്കങ്ങൾ തുടങ്ങുന്നു എന്ന് വേണമെങ്കിൽ പറയാം. കാലാവസ്ഥ വിദഗ്ധരുടെ അഭിപ്രായം പരിഗണിച്ച് മഴക്കാല മുന്നൊരുക്ക പ്രവർത്തനങ്ങൾ നിർവഹിച്ചാൽ പദ്ധതി ചെലവ് വെള്ളത്തിലാകില്ല. പ്രീ മൺസൂൺ ടെസ്റ്റ് ഡോസുകൾ അടുത്ത മാസം നാം കരുതിയിരിക്കണം. പോസ്റ്റുകൾ എടുത്തു വച്ചാൽ അപ്പോൾ വീണ്ടും വായിക്കാം വലയിരുത്താം. ഇന്ന് ഇനി മഴ കിട്ടുന്നവർക്ക് ലോട്ടറി പരീക്ഷിക്കാം.
#weathermankerala