Menu

Kozhikode

SAPACC ദേശീയ കാലാവസ്ഥാ സമ്മേളന വിളംബരവുമായി യുവജന സൈക്കിൾ യാത്ര

സൗത്ത് ഏഷ്യൻ പീപ്പിൾസ് കമ്മിറ്റി ഓൺ ക്ലൈമറ്റ് ക്രൈസിസ് (SAPACC) കാലാവസ്ഥ വ്യതിയാനവുമായി ബന്ധപ്പെട്ട് കോഴിക്കോട് ഡിസംബർ 15 മുതൽ 18 വരെ സംഘടിപ്പിക്കുന്ന ദേശീയ കാലാവസ്ഥാ സമ്മേളനത്തിന്റെ വിളംബരവുമായി കാപ്പാട് കടപ്പുറത്തുനിന്നും കോഴിക്കോട് ബീച്ച്ലേക്ക് വിവിധ സൈക്കിൾ ക്‌ളബ്ബുകളുടെയും യുവജനങ്ങളുടെയും നേതൃത്വത്തിൽ സൈക്കിൾ യാത്ര സംഘടിപ്പിച്ചു. പ്രമുഖ സൈക്കിൾ യാത്രികനും പ്രചാരകനുമായ ഹരി പാമ്പൂർ യാത്രക്ക് നേതൃത്വം നൽകി.

കാപ്പാട് ബീച്ചിൽ നടന്ന ലളിതമായ റാലി ഫ്ലാഗ് ഓഫിനു സാമൂഹ്യ പ്രവർത്തകനും കലാവസ്ഥാ സമ്മേളനം പ്രചരണ കമ്മിറ്റി കൺവീനറുമായ ശരത് ചേലൂർ സ്വാഗതം പറഞ്ഞു. കാപ്പാട് കടപ്പുറത്ത് സൈക്കിൾ ഉപയോഗിച്ചു കൊണ്ട് ഉപജീവനം നടത്തുന്ന മരയ്ക്കാർ SAPACC ദേശീയ കാലാവസ്ഥ സമ്മേളനം വിളംബര സൈക്കിൾ യാത്ര ഫ്ലാഗ് ഓഫ്‌ ചെയ്തു. NAPM സംസ്ഥാന കൺവീനറും കാലാവസ്ഥ സമ്മേളനം പ്രോഗ്രാം കമ്മിറ്റി കൺവീനറുമായ വിജയരാഘവൻ ചേലിയ അദ്ധ്യക്ഷത വഹിച്ചു. അദ്ധ്യാപികയും ദേശീയ കാലാവസ്ഥ സമ്മേളനത്തിന്റെ മുഖ്യ സംഘാടകരിൽ ഒരാളുമായ ഡോ സ്മിത പി കുമാർ ആമുഖഭാഷണം നടത്തി.

കാപ്പാട് ബീച്ച് പരിസരത്തു നിന്നും രാവിലെ 07 മണിയോടെ ആരംഭിച്ച റാലി കാപ്പാട് അങ്ങാടി, വികാസ് നഗർ, കാട്ടിലപീടിക, എലത്തൂർ, പാവങ്ങാട്, വെസ്റ്റ്ഹിൽ, നടക്കാവ്, മാവൂർ റോഡ്, മാനാഞ്ചിറ, സി.എച്ച് ഓവർബ്രിഡ്ജ് എന്നീ കേന്ദ്രങ്ങളിലൂടെ സഞ്ചരിച്ചു 11 മണിയോടെ കോഴിക്കോട് ബീച്ചിൽ അവസാനിച്ചു. കോരപ്പുഴ സെന്ററിൽ പോയിൽക്കാവ് ഹയർ സെക്കണ്ടറി സ്കൂളിലെ എൻ എസ് എസ് അംഗങ്ങൾ റാലിയെ സ്വീകരിച്ചു. എൻ എസ് എസ് ക്ലസ്റ്റർ കോർഡിനേറ്റർ കെ പി അനിൽകുമാർ, മുൻ പി എസ് സി അംഗം ടി ടി ഇസ്മായിൽ, എൻ എസ് എസ് വളന്റിയർമാർ എന്നിവർ റാലിക്ക് അഭിവാദ്യങ്ങൾ അർപ്പിച്ചു സംസാരിച്ചു.

കോഴിക്കോട് കടപ്പുറത്ത് വെച്ച് സമ്മേളന സംഘാടക സമിതി അംഗങ്ങൾ തൽഹത്ത് വെള്ളയലിൻ്റെ നേതൃത്വത്തിൽ സൈക്കിൾ യാത്രികരെ സ്വീകരിച്ചു. കാപ്പാട് ബീച്ച് റൈഡേർസ് പ്രവർത്തകരായ ഷഫീർ എം.പി, സുധീഷ് കുമാർ, ആൽവിൻ പി, സത്യജിത്ത് എലത്തൂർ തുടങ്ങിയവരും വിവിധ സൈക്കിൾ ക്‌ളബ്ബ് സംഘാടകരും കോഴിക്കോട് ബീച്ചിൽ നടന്ന സമാപന സമ്മേളനത്തിൽ സംസാരിച്ചു. ദേശീയ സമ്മേളനം സംഘാടക സമിതി അംഗങ്ങളായ തൽഹത്ത് വെള്ളയിൽ, വിജയരാഘവൻ ചേലിയ, ഡോ. സ്മിത പി കുമാർ, ശരത് ചേലൂർ എന്നിവരും ഹരി പാമ്പൂരിന്റെ നേതൃത്വത്തിലുള്ള സൈക്കിൾ ക്ലബ് അംഗങ്ങളും പരിപാടികൾക്ക് നേതൃത്വം നൽകി.

അത് ചുഴലിക്കാറ്റല്ല; നീർച്ചുഴി സ്തംഭം

കോഴിക്കോട് വെള്ളയിൽ ഹാർബറിന് സമീപം ഇന്ന് രാവിലെയുണ്ടായ നീർച്ചുഴി സ്തംഭം (water spout) മൂലം മൂന്നു വള്ളങ്ങൾക്ക് നാശനഷ്ടം. രാവിലെ പത്തോടെയാണ് സംഭവം. ഏതാനും നിമിഷമാണ് നീർച്ചുഴി സ്തംഭം ഉണ്ടായത്. ഹാർബറിൽ നിർത്തിയിട്ടിരുന്ന ബോട്ടുകളുടെ മേൽക്കൂരയാണ് കാറ്റിൽ പറന്നുപോയത്. മൂന്നു ലക്ഷം രൂപയുടെ നാശനഷ്ടം കണക്കാക്കുന്നു. ഇന്നലെയും ഇത്തരത്തിൽ ശക്തമായ കാറ്റുണ്ടായിരുന്നുവെന്ന് മത്സ്യത്തൊഴിലാളികൾ പറഞ്ഞു.

എന്താണ് നീർച്ചുഴി സ്തംഭം (water spout)
മേഘവും കാറ്റും കലർന്ന വായു സ്തംഭത്തെയാണ് നീർച്ചുഴി സ്തംഭം എന്നു വിളിക്കുന്നത്. സാധാരണ ടൊർണാഡോകളെ പോലെ തന്നെയാണ് ഇവ. പക്ഷേ നീർച്ചുഴി സ്തംഭത്തിന് ടൊർണാഡോയെ അപേക്ഷിച്ച് ശക്തി കുറവായിരിക്കും. കേരളത്തിൽ പലപ്പോഴായി ഇത് റിപ്പോർട്ട് ചെയ്യാറുണ്ട്. കായലിലും കടലിലും നീർച്ചുഴി സ്തംഭം കഴിഞ്ഞ വർഷവും കേരളത്തിൽ റിപ്പോർട്ട് ചെയ്യപ്പെട്ടിട്ടുണ്ട്. 100 മൈൽ വരെ നീർച്ചുഴി സ്തംഭത്തിനുള്ളിലെ കാറ്റിന് വേഗതയുണ്ടാകാറുണ്ട്.

എങ്ങനെ രൂപപ്പെടുന്നു?
തടാകത്തിലോ മറ്റോ ജലോപരിതലത്തോട് ചേർന്നു കിടക്കുന്ന തണുത്ത കാറ്റും മുകളിലെ ചൂടുള്ള വായുവും തമ്മിൽ കലരുമ്പോഴാണ് സാധാരണ നീർച്ചുഴി സ്തംഭം ഉണ്ടാകുക. 10 മുതൽ 15 നോട്ടിക്കൽ മൈൽ വേഗത്തിൽ വരെ കാറ്റ് പെട്ടെന്ന് വേഗത കൂടും. ടൊർണാഡോ സാധാരണ കരയിൽ ഉണ്ടാകുമ്പോൾ ശക്തി കുറഞ്ഞ നീർച്ചുഴി സ്തംഭം കടലിൽ ഉണ്ടാകുന്നുവെന്ന് മാത്രം. കോഴിക്കോട് കടലിലുണ്ടായ നീർച്ചുഴി സ്തംഭം ശക്തികൂടിയതും ഈർപ്പസാന്നിധ്യം കുറഞ്ഞതുമാണെന്നാണ് ഞങ്ങളുടെ ഓഷ്യനോഗ്രാഫറുടെ നിഗമനം.