Menu

ദുബൈ മഴ

ജനുവരിയിലെ തണുപ്പിനിടെ മഴയില്‍ കുളിച്ച് യു.എ.ഇ

അഷറഫ് ചേരാപുരം
ദുബൈ: തണുപ്പിന്റെ കരിമ്പടത്തിനുള്ളില്‍ മഴയുടെ തുടിമുട്ടല്‍. യു.എ.ഇയിലെ മിക്ക സ്ഥലങ്ങളിലും ശനിയാഴ്ച രാവിലെ മുതല്‍ കനത്ത മഴ ലഭിച്ചു. ഈ വര്‍ഷം ലഭിച്ചതില്‍ ഏറ്റവും ശക്തമായ മഴയാണ് ദുബൈ, അബൂദബി, ഷാര്‍ജ എമിറേറ്റുകളില്‍ ലഭിച്ചതെന്ന് കാലാവസ്ഥാ വിഭാഗം. ഫുജൈറ, റാസല്‍ഖൈമ, അജ്മാന്‍, ഉമ്മുല്‍ഖുവൈന്‍ എന്നിവിടങ്ങളിലെ തീരപ്രദേശങ്ങളിലും മലയോരങ്ങളിലും ശക്തമായ മഴയാണ് ലഭിച്ചതെന്നും റിപ്പോര്‍ട്ടുണ്ട്. പലയിടങ്ങളിലും ശക്തമായ ഇടിമിന്നലും അനുഭവപ്പെട്ടു. മഴ ശക്തമായതോടെ വിവിധ സ്ഥലങ്ങളില്‍ റോഡുകളിലടക്കം വെള്ളം നിറഞ്ഞു.

ഞായറാഴ്ചയും വെള്ളക്കെട്ടുകള്‍ രാജ്യത്തിന്റെ വിവിധ ഭാഗങ്ങളില്‍ കാഴ്ചയായി. വാദികളും താഴ്ന്ന പ്രദേശങ്ങളും വെള്ളത്തില്‍ മുങ്ങിയ സാഹചര്യത്തില്‍ സാഹസിക യാത്രക്ക് മുതിരരുതെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്.

ദുബൈയില്‍ പെയ്ത കനത്ത മഴയുടെ ദൃശ്യങ്ങള്‍ പലരും സമൂഹ മാധ്യമങ്ങളില്‍ പങ്കുവച്ചു. ബര്‍ദുബൈ, ദേര, ജുമൈറ, അല്‍ഖൂസ്, ജബല്‍ അലി, ഇന്റര്‍നാഷനല്‍ സിറ്റി, ഗ്ലോബല്‍ വില്ലേജ്, സിലിക്കണ്‍ ഒയാസിസ് എന്നിവിടങ്ങളിലും കനത്ത മഴയാണ് ലഭിച്ചത്. വെള്ളം കെട്ടിനില്‍ക്കുന്നത് ഒഴിവാക്കാന്‍ നടപടി തുടങ്ങിയിട്ടുണ്ട്.

കനത്ത മഴയിൽ യു.എ.ഇ ; നാളെയും മേഘാവൃതം

യു.എ.ഇയുടെ വിവിധ ഭാഗങ്ങളിൽ ഇന്ന് കനത്ത മഴ രേഖപ്പെടുത്തി. ദുബൈയിലും ഷാർജയിലും രാവിലെ മുതൽ ശക്തമായ മഴയും മിന്നലും കാറ്റുമുണ്ടായി.
ഇന്നും മേഘാവൃതമായ അന്തരീക്ഷം തുടരുമെന്ന് നാഷനൽ സെന്റർ ഓഫ് മീറ്റിയോറളജി അറിയിച്ചു. പൊടിക്കാറ്റിനും 50 കി.മി വരെ വേഗതയിലുള്ള കാറ്റിനും സാധ്യതയുണ്ട്.

മഴ ചൂടു കുറച്ചു
മഴയെ തുടർന്ന് ദുബൈയിലെ താപനിലയും കുറഞ്ഞു. ഇന്ന് ഉച്ചയ്ക്ക് 1.35 ന് ദുബൈയിൽ 21 ഡിഗ്രി സെൽഷ്യസാണ് രേഖപ്പെടുത്തിയത്. രാജ്യവ്യാപകമായി നാലു മുതൽ ആറു ഡിഗ്രിവരെ താപനില കുറഞ്ഞു. പടിഞ്ഞാറൻ തീരദേശത്തും അബൂദബിയിലും കാലാവസ്ഥാ വകുപ്പ് യെല്ലോ അലർട്ട് നൽകി. ശക്തമായ കാറ്റും മേഘങ്ങളും കാരണമാണ് മഞ്ഞ അലർട്ട് നൽകിയത്.

മഴയുള്ളതിനാൽ വാഹനങ്ങൾ ജാഗ്രതയോടെ ഓടിക്കണമെന്ന് കാലാവസ്ഥാ വകുപ്പും ആഭ്യന്തര മന്ത്രാലയവും മുന്നറിയിപ്പ് നൽകി.
ഷാർജയിലും ശക്തമായ മഴയുണ്ടായി. മോശം കാലാവസ്ഥയെ തുടർന്ന് ഷാർജയിലെ പാർക്കുകൾ അടയ്ക്കാൻ മുനിസിപ്പാലിറ്റി നിർദേശം നൽകി. അജ്മാനിൽ ബസ് ഗതാഗതം നിർത്തിവച്ചു. അജ്മാൻ ട്രാൻസ്‌പോർട് അതോറിറ്റിയാണ് ഇക്കാര്യം അറിയിച്ചത്.

ചിത്രം കടപ്പാട്: മജ്ഞുഷ രാധാകൃഷ്ണൻ, ഗൾഫ് ന്യൂസ്