Menu

കാലാവസ്ഥ വകുപ്പ്

ഡ്രോണുകൾ ഉപയോഗിച്ചുള്ള കാലാവസ്ഥാ പ്രവചനത്തിന് IMD

ലോകത്ത് ആദ്യമായി ഡ്രോണുകൾ ഉപയോഗിച്ച് കാലാവസ്ഥാ പ്രവചനത്തിന് ആവശ്യമായ ഡാറ്റ ശേഖരിക്കാൻ കേന്ദ്ര കാലാവസ്ഥാ വകുപ്പ്. കാലാവസ്ഥാ ബലൂണുകൾ എന്നറിയപ്പെടുന്ന റേഡിയോ സോണ്ടുകൾക്ക് പകരം സെൻസറുകൾ ഘടിപ്പിച്ച പ്രത്യേക ഡ്രോണുകൾ ഉപയോഗിക്കാനാണ് ഐ.എം.ഡി പദ്ധതിയിടുന്നത്. പരീക്ഷണം വിജയിച്ചാൽ ദിവസം 100 ലേറെ റേഡിയോസോണ്ടുകൾ ഉപയോഗശൂന്യമാകുന്നത് തടയാനാകും. ഇന്ത്യയാണ് ലോകത്ത് ആദ്യമായി അന്തരീക്ഷസ്ഥിതി പഠനത്തിനും നിരീക്ഷണത്തിനും ഡ്രോൺ ഉപയോഗിക്കാനുള്ള പദ്ധതിയെ കുറിച്ച് പഠിക്കുന്നത്. ഭൗമശാസ്ത്ര മന്ത്രാലയം സെക്രട്ടറി എം. രവിചന്ദ്രൻ ആണ് പരമ്പരാഗത കാലാവസ്ഥാ ബലൂണുകൾക്ക് പകരം കാലാവസ്ഥാ വിവരം തേടാൻ ഡ്രോണുകളെ ഉപയോഗിക്കുമെന്ന് അറിയിച്ചത്. ഇതിനായി സെൻസറുകൾ ഘടിപ്പിച്ച ഡ്രോണുകൾ ഉപയോഗിക്കാനാണ് പദ്ധതി.

എന്താണ് റേഡിയോ സോണ്ടുകൾ
അന്തരീക്ഷത്തിലെ മർദം, താപനില, കാറ്റിന്റെ ദിശ, വേഗത എന്നിവ കണ്ടെത്താൻ സെൻസറുകൾ ഘടിപ്പിച്ച ഹൈഡ്രജൺ നിറച്ച ബലൂണുകളെയാണ് കാലാവസ്ഥാ ബലൂൺ അഥവാ റേഡിയോസോണ്ടുകൾ എന്നു വിളിക്കുന്നത്. ഇവ ശേഖരിക്കുന്ന വിവരങ്ങൾ റേഡിയോ തരംഗമായി ഭൂമിയിലെ സ്‌റ്റേഷനുകളിലേക്ക് അയക്കും. ഭൗമോപരിതലത്തിൽ നിന്ന് 12 കി.മി ഉയരത്തിൽ വരെ കാലാവസ്ഥാ ബലൂണുകൾ പറത്തിയാണ് വിവരം ശേഖരിക്കുന്നത്. ഈ വിവരങ്ങളാണ് ഗണിതശാസ്ത്ര കാലാവസ്ഥാ പ്രവചന മാതൃകകളിൽ (എൻ.ഡബ്ല്യു.പി) നിന്ന് കാലാവസ്ഥാ പ്രവചനമായി മാറുന്നത്.

55 ലൊക്കേഷനുകളിൽ ഇപ്പോൾ റേഡിയോ സോണ്ടുകൾ

കേന്ദ്ര കാലാവസ്ഥാ വകുപ്പിന് (ഐ.എം.ഡി) രാജ്യത്തെ 550 പ്രദേശത്തെ വെതർ സ്റ്റേഷനുകളിൽ നിന്ന് ലഭിക്കുന്ന ഡാറ്റയോടൊപ്പം 55 ലൊക്കേഷനുകളിലെ അന്തരീക്ഷത്തിലുള്ള കാലാവസ്ഥാ ബലൂണുകളിലെ ഡാറ്റയും ലഭിക്കുന്നുണ്ട്. വിജയകരമാണെന്നു തെളിഞ്ഞാൽ പ്രതിദിനം 100 ലേറെ റേഡിയോ സോണ്ടുകൾ ഇത്തരത്തിൽ ഉപയോഗശൂന്യമാകുന്നതും തടയാനാകും. സാധാരണ റേഡിയോ സോണ്ടുകളുള്ള ബലൂണുകൾ എവിടെയെങ്കിലും തകർന്നു വീഴുകയാണ് പതിവ്. ഇതിനു പകരം ഡ്രോണുകളെ ഉപയോഗിക്കാനാണ് ഐ.എം.ഡി ഉദ്ദേശിക്കുന്നത്. ഭൗമോപരിതലത്തിൽ നിന്ന് 5 കി.മി വരെ ഉയരത്തിൽ ഡ്രോണുകൾ ഉപയോഗിച്ച് വിവരം ശേഖരിക്കാനാകുമെന്നാണ് ഐ.എം.ഡി കരുതുന്നത്. കാലാവസ്ഥാ നിരീക്ഷണത്തിന് റേഡിയോ സോണ്ടുകളേക്കാൾ ഡ്രോണുകളെ ഉപയോഗിക്കുന്നത് സാമ്പത്തികമായി ലാഭകരമാണ്. എളുപ്പത്തിൽ ഉപയോഗിക്കാം, അന്തരീക്ഷത്തിന്റെ വിവിധ ഉയരങ്ങളിലെ ഡാറ്റ ഒരേ ഡ്രോൺ ഉപയോഗിച്ച് സ്വീകരിക്കാം എന്നിങ്ങനെയുള്ള ഗുണങ്ങളുമുണ്ട്.
40 മിനുട്ട് പറന്നാൽ ഡ്രോണിന് അന്തരീക്ഷത്തിലെ ഡാറ്റ ശേഖരിക്കാനാകുമെന്നും റേഡിയോ സോണ്ടുകൾക്ക് രണ്ടു മണിക്കൂറേ ഡാറ്റ ശേഖരിക്കാനാകൂവെന്നും ഐ.എം.ഡി പറയുന്നു.

കാലവർഷം ഇന്ന് കേരളത്തിൽ എത്തിയെന്ന് ഐ.എം.ഡി

കേരളത്തിൽ തെക്കു പടിഞ്ഞാറൻ മൺസൂൺ (കാലവർഷം) ഇന്ന് എത്തിയെന്ന് കേന്ദ്ര കാലാവസ്ഥാ വകുപ്പ് (ഐ.എം.ഡി ) സ്ഥിരീകരിച്ചു. കഴിഞ്ഞദിവസം രണ്ടുമൂന്നു ദിവസത്തിനുള്ളിൽ കേരളത്തിൽ കാലവർഷം എത്തുമെന്നായിരുന്നു കാലാവസ്ഥാ വകുപ്പിന്റെ നിരീക്ഷണം. ഇന്ന് ഉച്ചയ്ക്ക് 12 മണിയോടെയാണ് കാലവർഷം കേരളത്തിൽ എത്തിയകാര്യം കാലാവസ്ഥ വകുപ്പ് ഔദ്യോഗികമായി സ്ഥിരീകരിച്ചത്. സാധാരണ കേരളത്തിന്റെ തെക്കൻ മേഖലകളിൽ ആണ് ആദ്യം കാലവർഷം എത്തുന്നത്. തുടർന്ന് മധ്യ ,വടക്കൻ മേഖലകളിൽ 1-2 ദിവസം കൊണ്ട് പുരോഗമിക്കുകയാണ് പതിവ്. എന്നാൽ ഇത്തവണ തിരുവനന്തപുരം മുതൽ മലപ്പുറം വരെയുള്ള ജില്ലകളിൽ കാലവർഷം ആദ്യ ദിവസം തന്നെ പുരോഗമിച്ചു എന്നാണ് കാലാവസ്ഥാ വകുപ്പ് പറയുന്നത്. വടക്കൻ കേരളത്തിന്റെ മറ്റു ജില്ലകളിലേക്ക് കൂടി അടുത്ത ദിവസം കാലവർഷം എത്താൻ അനുകൂല സാഹചര്യം ആണെന്നാണ് ഐ.എം.ഡി നിഗമനം.
മെയ് 15 മുതൽ കേരളത്തിൽ പടിഞ്ഞാറൻ കാറ്റിന്റെ സ്വാധീനംമൂലം ശക്തമായ മഴ ലഭിച്ചിരുന്നു. കാലവർഷത്തിന് അനുകൂലമായ അന്തരീക്ഷ സാഹചര്യങ്ങളാണ് കഴിഞ്ഞ 15 മുതൽ സംസ്ഥാനത്ത് ഉണ്ടായിരുന്നത്. എന്നാൽ കാലവർഷമെത്തി എന്ന് സ്ഥിരീകരിക്കാൻ കാലാവസ്ഥാ വകുപ്പ് തയ്യാറാക്കിയ മാനദണ്ഡങ്ങൾ പാലിക്കാത്തതു കൊണ്ടാണ് കാലവർഷത്തിന് ഔദ്യോഗിക സ്ഥിരീകരണം വൈകിയത്. മാനദണ്ഡങ്ങളിൽ ചില കാര്യങ്ങൾ കഴിഞ്ഞ ദിവസങ്ങളിൽ ഒത്തു വന്നെങ്കിലും പൂർണമായി അത് പാലിക്കപ്പെടാത്ത സാഹചര്യമാണ് ഔദ്യോഗിക സ്ഥിരീകരണം വൈകാൻ ഇടയാക്കിയത്.
കേരളത്തിൽ കാലവർഷം എത്തിയതായി കേന്ദ്ര കാലാവസ്ഥ വകുപ്പ് പ്രഖ്യാപിക്കാനുള്ള മാനദണ്ഡങ്ങൾ
1 കാറ്റിന്റെ ദിശ

4.2 km ഉയരത്തിൽ വരെ പടിഞ്ഞാറൻ കാറ്റിന്റെ സാന്നിധ്യം. ( 0-10 N latitude നും 55E- 80 E longitude ഇടയിൽ )

2 കാറ്റിന്റെ വേഗത

750 മീറ്റർ ഉയരത്തിൽ കാറ്റിന്റെ വേഗത 27-37 km/ hr ( 5-10 N latitude നും 70E- 80 E longitude ഇടയിൽ ).

3 ഇൻസാറ്റ് ഉപഗ്രഹത്തിൽ നിന്ന് ലഭിക്കുന്ന Outgoing Longwave Radiation ( OLR ) 200 W/ m^2 താഴെ ആയിരിക്കണം ( 5-10 N latitude നും 70E- 75 E longitude ഇടയിൽ )
മുകളിലെ മൂന്നു മാനദണ്ഡങ്ങളും അതോടൊപ്പം
മെയ്‌ 10 ന് ശേഷം മിനിക്കോയ്‌, അമിനി, തിരുവനന്തപുരം, പുനലൂർ, കൊല്ലം, ആലപ്പുഴ, കോട്ടയം, കൊച്ചി, തൃശൂർ, കോഴിക്കോട്, തലശ്ശേരി, കണ്ണൂർ, കുടുലു, മംഗ്ളൂർ എന്നീ 14 സ്റ്റേഷനുകളിൽ ഏതെങ്കിലും 60% ( 8 സ്റ്റേഷൻ ) എങ്കിലും തുടർച്ചയായി രണ്ട് ദിവസം 2.5 mm അതിൽ കൂടുതലോ മഴ രേഖപെടുത്തിയാൽ രണ്ടാമത്തെ ദിവസം കാലവർഷം കേരളത്തിൽ എത്തിയതായി കേന്ദ്ര കാലാവസ്ഥ വകുപ്പ് പ്രഖ്യാപിക്കും.