ഭൂമിയിൽ ശുദ്ധജലം കുറവാണോ? ഞെട്ടിക്കുന്ന വിവരങ്ങൾ വെളിപ്പെടുത്തി നാസ
2014 മെയ് മുതൽ ഭൂമിയിലെ മൊത്തം ശുദ്ധജലത്തിൻ്റെ അളവ് പെട്ടെന്ന് കുറഞ്ഞുവെന്നും അന്നുമുതൽ അത് താഴ്ന്ന നിലയിലാണെന്നുമുള്ള തെളിവുകൾ കണ്ടെത്തി ശാസ്ത്രജ്ഞർ . നാസ-ജർമ്മൻ ഉപഗ്രഹങ്ങളിൽ നിന്നുള്ള നിരീക്ഷണങ്ങൾ ഉപയോഗിച്ച് ഒരു അന്താരാഷ്ട്ര ശാസ്ത്രജ്ഞരുടെ സംഘമാണ് ജനങ്ങൾക്ക് ആശങ്കയുണ്ടാക്കുന്ന വിവരം പുറത്തുവിട്ടത്.
ഭൂമിയുടെ ഭൂഖണ്ഡങ്ങൾ തുടർച്ചയായി വരണ്ട ഘട്ടത്തിലേക്ക് പ്രവേശിച്ചതായി ഈ മാറ്റം സൂചിപ്പിക്കുമെന്ന് ഗവേഷകർ അഭിപ്രായപ്പെട്ടു.
“2015 മുതൽ 2023 വരെ, സാറ്റലൈറ്റ് അളവുകൾ കാണിക്കുന്നത് കരയിൽ സംഭരിച്ചിരിക്കുന്ന ശുദ്ധജലത്തിൻ്റെ ശരാശരി അളവ് (അതിൽ തടാകങ്ങളും നദികളും പോലുള്ള ദ്രാവക ഉപരിതല ജലവും കൂടാതെ ഭൂഗർഭ ജലാശയങ്ങളിലെ വെള്ളവും ഉൾപ്പെടുന്നു ) ശരാശരി നിലയേക്കാൾ 290 ക്യുബിക് മൈൽ (1,200 ക്യുബിക് കിലോമീറ്റർ) കുറവായിരുന്നു. 2002 മുതൽ 2014 വരെ,” മേരിലാൻഡിലെ ഗ്രീൻബെൽറ്റിലുള്ള നാസയുടെ ഗോദാർഡ് സ്പേസ് ഫ്ലൈറ്റ് സെൻ്ററിലെ പഠന രചയിതാക്കളിൽ ഒരാളും ജലശാസ്ത്രജ്ഞനുമായ മാത്യു റോഡെൽ പറഞ്ഞു.
നാസയുടെ പഠനമനുസരിച്ച്, വരൾച്ചയുടെ കാലത്ത്, ജലസേചന കൃഷിയുടെ ആധുനിക വ്യാപനത്തോടൊപ്പം, കൃഷിയിടങ്ങളും നഗരങ്ങളും ഭൂഗർഭജലത്തെ കൂടുതൽ ആശ്രയിക്കേണ്ടതായി വരും, ഇത് ഭൂഗർഭ ജലലഭ്യത കുറയുന്നതിന് കാരണമാകും. ശുദ്ധജല ലഭ്യത കുറയുന്നു. ലഭ്യമായ ജലത്തിൻ്റെ കുറവ് കർഷകരെയും സമൂഹങ്ങളെയും സമ്മർദ്ദത്തിലാക്കുന്നു. ഇത് ക്ഷാമം, സംഘർഷങ്ങൾ, ദാരിദ്ര്യം, തുടങ്ങിയവയ്ക്ക് കാരണമാകും. കൂടാതെ ആളുകൾ മലിനമായ ജലസ്രോതസ്സുകളിലേക്ക് തിരിയുമ്പോൾ രോഗസാധ്യത വർദ്ധിക്കുക തുടങ്ങിയ പ്രശ്നങ്ങളിലേക്കും കടക്കും. 2024 ൽ പ്രസിദ്ധീകരിച്ച ജല സമ്മർദ്ദത്തെക്കുറിച്ചുള്ള യുഎൻ റിപ്പോർട്ട് ഉദ്ധരിച്ച് ആണ് നാസ ഇക്കാര്യം പറയുന്നത്.
ഭൂമിയിലെ ശുദ്ധജലനിരപ്പ്: പെട്ടെന്നുള്ള ഇടിവ് എന്തുകൊണ്ട്?
ജർമ്മൻ എയ്‌റോസ്‌പേസ് സെൻ്റർ, ജർമ്മൻ റിസർച്ച് സെൻ്റർ ഫോർ ജിയോസയൻസസ്, നാസ എന്നിവ നടത്തുന്ന ഗ്രാവിറ്റി റിക്കവറി ആൻ്റ് ക്ലൈമറ്റ് എക്‌സ്പിരിമെൻ്റ് (ഗ്രേസ്) ഉപഗ്രഹങ്ങളിൽ നിന്നുള്ള നിരീക്ഷണങ്ങൾ ഉപയോഗിച്ചാണ് ഗവേഷകരുടെ സംഘം ഈ പെട്ടെന്നുള്ള, ആഗോള ശുദ്ധജല കുറവ് തിരിച്ചറിഞ്ഞത്.
GRACE ഉപഗ്രഹങ്ങൾ പ്രതിമാസ സ്കെയിലുകളിൽ ഭൂമിയുടെ ഗുരുത്വാകർഷണത്തിലെ ഏറ്റക്കുറച്ചിലുകൾ അളക്കുന്നു. ഇത് ഭൂമിയിലും താഴെയുമുള്ള ജലത്തിൻ്റെ പിണ്ഡത്തിലെ മാറ്റങ്ങൾ വെളിപ്പെടുത്തുന്നു.
ആഗോളതാപനം അതിന് കാരണമാകുന്നുണ്ടോ?
ആഗോളതാപനം അന്തരീക്ഷത്തെ കൂടുതൽ ജലബാഷ്പത്തെ പിടിച്ചുനിർത്തുന്നതിലേക്ക് നയിക്കുന്നു. ഇത് കൂടുതൽ തീവ്രമായ മഴയ്ക്ക് കാരണമാകുമെന്ന് നാസ ഗൊദാർഡ് കാലാവസ്ഥാ നിരീക്ഷകൻ മൈക്കൽ ബോസിലോവിച്ച് പറഞ്ഞു. മൊത്തം വാർഷിക മഴയുടെയും മഞ്ഞുവീഴ്ചയുടെയും അളവ് മാറില്ലെങ്കിലും, തീവ്രമായ മഴ ലഭിക്കാൻ കാരണമാവുന്നു. മഴ പെയ്യുമ്പോൾ ഭൂമിക്ക് ആഗിരണം ചെയ്യാൻ കഴിയുന്ന ജലത്തിൻ്റെ അളവ് ഇത് കുറയുന്നു. ആഗോളതലത്തിൽ, 2014-2016 എൽ നിനോ മുതൽ ശുദ്ധജലനിരപ്പ് സ്ഥിരമായി താഴ്ന്ന നിലയിലാണ്. അതേസമയം കൂടുതൽ ജലം ജലബാഷ്പമായി അന്തരീക്ഷത്തിൽ കുടുങ്ങിക്കിടക്കുന്നു. “ചൂടാകുന്ന താപനില, ഉപരിതലത്തിൽ നിന്ന് അന്തരീക്ഷത്തിലേക്കുള്ള ജലത്തിൻ്റെ ബാഷ്പീകരണവും അന്തരീക്ഷത്തിൻ്റെ ജലം നിലനിർത്താനുള്ള ശേഷിയും വർദ്ധിപ്പിക്കുന്നു, വരൾച്ചയുടെ ആവൃത്തിയും തീവ്രതയും വർദ്ധിപ്പിക്കുന്നുവെന്നും ശാസ്ത്രജ്ഞർ അഭിപ്രായപ്പെടുന്നു.
