താപനില മൈനസ് ഒന്ന്: 10 വർഷത്തിനിടയിൽ ആദ്യമായി ഫെബ്രുവരിയിൽ മൂന്നാറിൽ തണുപ്പ്
ഫെബ്രുവരി പകുതിയാകാറായിട്ടും മൂന്നാറിൽ കുളിരിന് യാതൊരു മാറ്റവും ഇല്ല. താപനില മൈനസ് ഒന്നിലെത്തിയെന്ന് റിപ്പോർട്ട്. ചെണ്ടുവര എസ്‌റ്റേറ്റിലാണ് ഇന്നലെ രാവിലെ താപനില മൈനസ് ഒന്ന് രേഖപ്പെടുത്തിയിട്ടുള്ളത്. വെള്ളിയാഴ്ച രാവിലെ ചെണ്ടുവരയിൽ പൂജ്യം ഡിഗ്രിയായിരുന്നു താപനില രേഖപ്പെടുത്തിയത്. ലക്ഷ്മി, സൈലന്റ്‌വാലി എന്നിവിടങ്ങളിൽ രണ്ടും ദേവികുളത്ത് ഒന്നും ഉപാസി, നല്ലതണ്ണി, മൂന്നാർ ടൗൺ, സെവൻമല എന്നിവിടങ്ങളിൽ 3 ഡിഗ്രി സെൽഷ്യസുമായിരുന്നു ഇന്നലെ രാവിലെ താപനില രേഖപ്പെടുത്തിയത്.
കഴിഞ്ഞ 27 നും ചെണ്ടുവരയിൽ താപനില പൂജ്യം രേഖപ്പെടുത്തിയിട്ടുണ്ടായിരുന്നു. കഴിഞ്ഞ 10 വർഷത്തിനിടയിൽ ആദ്യമായാണ് ഫെബ്രുവരി രണ്ടാം വാരത്തിൽ താപനില മൈനസ് ഒന്ന് രേഖപ്പെടുത്തിയതെന്ന് കാലാവസ്ഥ വിദഗ്‌ധർ പറയുന്നു. താപനില മൈനസ് ഒന്നിലെത്തിയതിനെ തുടർന്ന് ചെണ്ടുവര എസ്റ്റേറ്റിലെ പുൽമേടുകളിൽ ഇന്നലെ രാവിലെ മഞ്ഞു പുതഞ്ഞു കിടക്കുകയായിരുന്നു. രാത്രിയിലും പുലർച്ചെയും കഴിഞ്ഞ ഒരാഴ്ചയായി മൂന്നാർ മേഖലയിൽ തണുപ്പ് ശക്തമായി തുടരുകയാണ്.
