Menu

National

ഉത്തരേന്ത്യയിൽ മഴക്കെടുതി, മിന്നൽ : 36 മരണം

കാലവർഷം വിടവാങ്ങാൻ ഏതാനും ദിവസങ്ങൾ ശേഷിക്കെ ഉത്തരേന്ത്യയിൽ ശക്തമായ മഴയിലും ഇടിമിന്നലിലും കഴിഞ്ഞ 48 മണിക്കൂറിൽ 36 പേർ മരിച്ചു. ഉത്തർപ്രദേശിലും ഡൽഹിയിലുമാണ് ഇടിമിന്നൽ ഉണ്ടായത്. ഉത്തർപ്രദേശിൽ മാത്രം 26 പേർ മരിച്ചു. കനത്ത മഴയിലും ഇടിമിന്നലിലും കെട്ടിടം തകർന്നുമാണ് മിക്കവരും മരിച്ചത്. 12 പേരുടെ മരണം ഇടിമിന്നലേറ്റാണ്.
അടുത്ത 2 ദിവസം കൂടി മേഖലയിൽ കനത്ത മഴ തുടരാൻ സാധ്യതയുണ്ടെന്ന് മെറ്റ്ബീറ്റ് വെതർ മീറ്റിയറോളജിസ്റ്റ് പറഞ്ഞു. യു.പിയിൽ മഴയിൽ വീട് തകർന്നും മരണം റിപ്പോർട്ട് ചെയ്തു. 24 പേരുടെ മരണം ഇത്തരത്തിലുള്ളതാണെന്ന് റിലീഫ് കമ്മീഷണർ രൺവീർ പ്രസാദ് പറഞ്ഞു. പ്രയാഗ് രാജിൽ സുഹൃത്തിന്റെ വീടിന്റെ മേൽക്കൂരയിൽ നിൽക്കുകയായിരുന്ന മുഹമ്മദ് ഉസ്മാൻ (15) മിന്നലേറ്റ് മരിച്ചു. സുഹൃത്ത് അസ്നാന് ഗുരുതരമായി പരുക്കേറ്റു. വന നശീകരണം, മലിനീകരണം, കാലാവസ്ഥ വ്യതിയാനം, ആഗോള താപനം എന്നിവയാണ് ഇടിമിന്നൽ കൂടാൻ കാരണമെന്റ് സെന്റർ ഫോർ സയൻസ് ആൻഡ് എൻവിയോൺമെന്റ് ഡയരക്ടർ ജനറൽ സുനിത നരെയൻ, ലൈറ്റ്നിംഗ് റെസിലിയന്റ് ഇന്ത്യ കാംപയിൻ ഓർഗനൈസർ കേണൽ സഞ് ജയ് ശ്രീവാസ്തവ പറഞ്ഞു.

മുംബൈയ്ക്ക് സമീപം കടലെടുത്തത് 55 ഹെക്ടർ

പ്രവചനങ്ങൾ പോലെ മുംബൈ നഗരത്തെ ഭാവിയിൽ കടലെടുക്കുമോ എന്ന ആശങ്കയ്ക്ക് ആക്കം കൂട്ടുകയാണ് സമീപത്തെ തീരദേശ ജില്ലയായ റായ്ഗഡിലെ സ്ഥിതി. റായ്ഗഡിലെ ദേവ്ഘറിലുള്ള 55 ഹെക്ടർ തീരം 30 വർഷത്തിനിടെ കടലെടുത്തെന്ന് പുണെ സൃഷ്ടി കൺസർവേഷൻ ഫൗണ്ടേഷൻ (എസ്‌സിഎഫ്) പഠനത്തിൽ കണ്ടെത്തി. മണൽത്തിട്ടകൾ, കണ്ടൽക്കാടുകൾ, ചതുപ്പുനിലങ്ങൾ എന്നിവ ഉൾപ്പെടുന്ന പ്രദേശം 1990 നും 2022 നും ഇടയിലാണ് കടൽ വിഴുങ്ങിയത്.
മഹാരാഷ്ട്രയുടെ പല ഭാഗങ്ങളിലും തീരപ്രദേശങ്ങൾക്കു മാറ്റം സംഭവിച്ചു കൊണ്ടിരിക്കുകയാണെന്നും കാലാവസ്ഥാ വ്യതിയാനവുമായി ബന്ധപ്പെട്ട് സമുദ്രനിരപ്പ് ഉയരുന്നത് സ്ഥിതി കൂടുതൽ വഷളാക്കുമെന്നും പഠനം ചൂണ്ടിക്കാട്ടുന്നു. പല തീരപ്രദേശങ്ങളിലും ഉപ്പുവെള്ളം കയറുന്നതു കാരണം കൃഷിഭൂമിയിലും കണ്ടൽക്കാടുകൾ വളരുന്നു. ചിലയിടങ്ങളിൽ വലിയ മണ്ണിടിച്ചിലിനു കാരണമാകുന്നു.
തീരപരിപാലന നയം കാര്യക്ഷമമാക്കുക, കടൽഭിത്തികളുടെ ഫലശേഷി അവലോകനം ചെയ്യുക, കടലിടുക്കുകളിൽ ആഴം നിലനിർത്തുന്നതിന് ശാസ്ത്രീയ മാർഗങ്ങൾ സ്വീകരിക്കുക, കാലാവസ്ഥാ മാറ്റങ്ങളെ നേരിടാൻ പൊതുജന പങ്കാളിത്തത്തോടെ പദ്ധതികളും ബോധവൽക്കരണ പരിപാടികളും സംഘടിപ്പിക്കുക തുടങ്ങിയ പരിഹാരമാർഗങ്ങൾ പഠനം നിർദേശിക്കുന്നു.

2050 ന് അകം ദക്ഷിണ മുംബൈയുടെ വലിയൊരു ഭാഗം കടലെടുത്തേക്കാമെന്ന് പഠനങ്ങളുടെ അടിസ്ഥാനത്തിൽ കഴിഞ്ഞ വർഷം നഗരസഭാ കമ്മിഷണർ ഇഖ്ബാൽ സിങ് ഛാഹൽ മുന്നറിയിപ്പ് നൽകിയിരുന്നു. സെക്രട്ടേറിയറ്റും നരിമാൻ പോയിന്റും കഫെ പരേഡുമൊക്കെ കടൽ വിഴുങ്ങാമെന്നും 25-30 വർഷം എന്നത് ഏറെ അകലെയല്ലെന്നും ആയിരുന്നു ഓർമപ്പെടുത്തൽ. അടിക്കടി വരുന്ന ചുഴലിക്കാറ്റുകൾ, അമിത മഴ എന്നിവയൊക്കെ ജാഗ്രതയോടെ കാണണമെന്നും ചൂണ്ടിക്കാട്ടി. കാലാവസ്ഥാ വ്യതിയാനത്തെ നേരിടാൻ പ്രത്യേക കർമപദ്ധതി ഇല്ലെങ്കിൽ പ്രത്യാഘാതം രൂക്ഷമാകുമെന്നാണ് ഓരോ പഠനവും ഓർമിപ്പിക്കുന്നത്.

ന്യൂനമർദം: യുപിയിൽ കനത്ത മഴ; മതിലിടിഞ്ഞ് 12 മരണം

ഉത്തർപ്രദേശിൽ മതിലിടിഞ്ഞ് രണ്ടിടങ്ങളിലായി 12 മരണം. ലഖ്‌നൗവിൽ ഒമ്പതു പേരും ഉന്നാവോയിൽ മൂന്നു പേരുമാണ് മരിച്ചത്.
കഴിഞ്ഞദിവസം ബംഗാൾ ഉൾക്കടലിൽ നിന്ന് കരകയറിയ ന്യൂനമർദ്ദം വെൽ മാർക്ഡ് ലോ പ്രഷറായി (WML) ഉത്തർപ്രദേശിനു മുകളിൽ തുടരുകയാണ്. മധ്യ പടിഞ്ഞാറൻ അറബിക്കടലിൽ നിന്നുള്ള ന്യൂനമർദ്ദ പാത്തി (Trough) ന്യൂനമർദ്ദത്തിലേക്ക് ബന്ധപ്പെട്ടിരിക്കുന്നു. അതിനാൽ ഈ മേഖലയിൽ മഴ ശക്തമായി പെയ്യുകയാണ്. ഉത്തർപ്രദേശിലെ ഖോര്പൂർ വഴി കാലവർഷ പാത്തി (Monsoon Trough) സഞ്ചരിക്കുന്ന സാഹചര്യവും നിലനിൽക്കുന്നതിനാൽ കൂടുതൽ മഴ ഉത്തർപ്രദേശിൽ ഡൽഹിയിലും ലഭിക്കുമെന്നാണ് നിരീക്ഷണം.
ലഖ്‌നൗവിലെ ദിൽകുഷയിലാണ് മതിലിടിഞ്ഞത്. ഇവിടെ ഒമ്പതുപേർ മരിച്ചു. ഒരാൾക്ക് പരുക്കേറ്റിട്ടുണ്ട്. മരിച്ചവരിൽ കുട്ടികളും സത്രീകളും ഉൾപെടുന്നു.
ഉന്നാവോയിൽ വീടിന്റെ മേൽക്കൂര തകർന്നു ചുമരും ഇടിഞ്ഞു വീണു. ഇവിടെ രണ്ടു കുട്ടികൾ ഉൾപെടെ മൂന്നു പേരാണ് മരിച്ചത്. ഒരാളെ പരുക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവങ്ങളിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. നടുക്കം പ്രകടിപ്പിച്ചു. മരിച്ചവരുടെ ബന്ധുക്കൾക്ക് 4 ലക്ഷം രൂപ നഷ്ടപരിഹാരം പ്രഖ്യാപിച്ചു.

ബംഗളൂരു പ്രളയം: പെയ്തത് 42 വർഷത്തെ ഏറ്റവും കൂടുതൽ മഴ

ബംഗളൂരുവിൽ കഴിഞ്ഞ 48 മണിക്കൂറിൽ പെയ്തത് 42 വർഷത്തെ ഏറ്റവും ശക്തമായ മഴ. ഈമാസം 1 നും 5 നും ഇടയിൽ 150 ശതമാനം അധികമഴയാണ് പെയ്തത്. ചില മേഖലകളിൽ മഴയുടെ തോത് 310 ശതമാനം വരെ കൂടുതലായി. ബംഗളൂരുവിൽ കനത്ത മഴ ഇന്നും തുടർന്നു. 164 തടാകങ്ങൾ കവിഞ്ഞ് ഒഴുകുകയാണ്. നിരവധി വിമാന സർവിസുകളും വൈകി.
ശതകോടീശ്വരൻമാർ താമസിക്കുന്ന റെസിഡൻഷ്യൽ ഏരിയയിൽ വെള്ളം കയറിയതോടെ നിരവധി ആഡംബര വാഹനങ്ങൾ വെള്ളത്തിലായി. ബംഗളൂരുവിലെ ഏറ്റവും എക്‌സ്‌ക്ലൂസീവ് ഗേറ്റഡ് കമ്മ്യൂണിറ്റിയിലാണ് വെള്ളം കയറിയിരിക്കുന്നത്.
വിപ്രോ ചെയർമാൻ റിഷാദ് പ്രേംജി, ബ്രിട്ടാനിയ സി.ഇ.ഒ വരുൺ ബെറി, ബിഗ് ബാസ്‌ക്കറ്റ് സഹസ്ഥാപകൻ അഭിനയ് ചൗധരി, പേജ് ഇൻഡസ്ട്രീസ് (ജോക്കി) എം.ഡി അശോക് ജെനോമൽ, ബൈജൂസ് സ്ഥാപകൻ ബൈജു രവീന്ദ്രൻ എന്നിവരടക്കമുള്ളവരുടെ വീടുകളാണ് ഇവിടെ ഉള്ളത്. കാർ പോർച്ചിലെ ഇവരുടെ കോടിക്കണക്കിന് രൂപ വില വരുന്ന വാഹനങ്ങൾ വെള്ളം കയറിയ നിലയിലാണ്.

താമസക്കാരെ കഴിഞ്ഞ ദിവസം ബോട്ടിലെത്തിയാണ് രക്ഷപ്പെടുത്തിയത്. ഞായറാഴ്ച രാത്രി പെയ്ത തോരാത്ത മഴയിൽ നഗരത്തിലെയും രാജ്യത്തെയും സമ്പന്നരുടെ കോടിക്കണക്കിന് രൂപ വില വരുന്ന വീടുകൾ വൈദ്യുതി പോലും വിച്ഛേദിക്കപ്പെട്ട് വെള്ളത്തിനടിയിലായി. എപ്‌സിലോണും സമീപത്തെ ഗേറ്റഡ് കമ്മ്യൂണിറ്റികളും യുദ്ധക്കളം പോലെയാണ്.

എപ്‌സിലോണിലെ ഒരു വില്ലയ്ക്ക് ശരാശരി 10 കോടി രൂപയാണ് വില. പ്ലോട്ടിന്റെ വലുപ്പമനുസരിച്ച്, വില 2030 കോടി രൂപ വരെ കൂടും. ഒരു ഏക്കർ പ്ലോട്ടിന് പ്രത്യക്ഷത്തിൽ 80 കോടി രൂപ വരും. സോഷ്യൽ മീഡിയയിൽ പ്രചരിക്കുന്ന വീഡിയോയിൽ, വെള്ളം മൂടി കിടക്കുന്ന അത്യാഡംബര ജർമൻ, ഇറ്റാലിയൻ കാറുകൾ കാണാം.
ബി.എം.ഡബ്ലു, ലക്‌സസ്, ബെന്റ്‌ലി കാറുകളാണ് ദൃശ്യങ്ങളിലുള്ളത്. ചില ആഡംബര വീടുകളുടെ മുറിക്കുള്ളിലെ കട്ടിലിന്റെ പകുതിയോളം വരെ വെള്ളം കയറിയ ദൃശ്യങ്ങളും പുറത്ത് വന്നിരുന്നു. വെള്ളം കയറിയ കാറുകളെല്ലാം 65 ലക്ഷം മുതൽ രണ്ടര കോടിവരെ വിലയുള്ളതാണ്. വാഹനങ്ങളുടെ നഷ്ടം കണക്കാക്കണമെങ്കിൽ വിശദമായ പരിശോധന വേണ്ടിവരും.
എഞ്ചിൻ ബേ ഏരിയയിൽ വെള്ളം കയറിയാൽ വാഹനത്തെ ഗുരുതരമായി ബാധിക്കും. ഇത് തുരുമ്പെടുക്കുന്ന പ്രശ്‌നങ്ങൾക്കും കാരണമാകും. കഴിഞ്ഞ ദിവസമാണ് അൺഅക്കാഡമി സി.ഇ.ഒ ഗൗരവ് മുഞ്ജലിനെയും കുടുംബത്തെയും ട്രാക്ടറിൽ രക്ഷപ്പെടുത്തുന്ന വീഡിയോ സോഷ്യൽ മീഡിയയിൽ പ്രചരിച്ചത്. കുടുംബത്തെയും എന്റെ വളർത്തുമൃഗങ്ങളെയും ഒരു ട്രാക്ടറിൽ ഒഴിപ്പിച്ചു. കാര്യങ്ങൾ മോശമാണ്. ദയവായി ശ്രദ്ധിക്കുക, എന്ന് ഗൗരവ് മുഞ്ജൽ ട്വീറ്റ് ചെയ്തിരുന്നു. ആർക്കെങ്കിലും എന്തെങ്കിലും സഹായം ആവശ്യമുണ്ടെങ്കിൽ തന്നെ അറിയിക്കണം എന്നും അദ്ദേഹം ആളുകളോട് ആവശ്യപ്പെട്ടു. സഹായിക്കാൻ ഞാൻ പരമാവധി ശ്രമിക്കും, അദ്ദേഹം കൂട്ടിച്ചേർത്തു.

യു.പി യിൽ പ്രളയം: മൃതദേഹം ദഹിപ്പിക്കുന്നത് ടെറസിൽ

കനത്ത മഴയെ തുടർന്ന് ഉത്തർപ്രദേശിലും പ്രളയം രൂക്ഷമായി. വരാണസി, പ്രയാഗ്‌രാജ് എന്നിവിടങ്ങളിലാണ് പ്രളയം. വരാണസിയിലെ ഹരിശ്ചന്ദ്ര, മണികാർണിക ഘട്ട് എന്നിവിടങ്ങളിൽ വെള്ളംകയറി. ഗംഗ, വരുണ നദികൾ കരകവിഞ്ഞതിനെ തുടർന്നാണിത്. ഇവിടങ്ങളിൽ ശ്മശാനങ്ങളിൽ വെള്ളം കയറിയതിനെ തുടർന്ന് മൃതദേഹം ദഹിപ്പിക്കാൻ പോലും കഴിയുന്നില്ല. ടെറസിൽ വച്ചാണ് മൃതദേഹം ദഹിപ്പിക്കൽ നടക്കുന്നത്. സംസ്‌കാര ചടങ്ങുകൾക്കായി നീണ്ട നിരയാണിവിടെ.

രമണ, കാശിപുരം, മാരുതി നഗർ, സാംനെ ഘട്ട്, നഗവ തുടങ്ങിയ പ്രദേശങ്ങളിൽ വെള്ളം കയറി. അസിഘട്ട്, നമോഘട്ട് എന്നിവിടങ്ങളെയും പ്രളയം ബാധിച്ചു.

ഗംഗ കരകവിഞ്ഞു
വെള്ളിയാഴ്ച രാവിലെ എട്ടു മണിയ്ക്കുള്ള കണക്കനുസരിച്ച് ഗംഗാ നദിയിലെ ജലനിരപ്പ് വരാണസിയിൽ 70.26 മീറ്ററായി ഉയർന്നു. 71.26 മീറ്ററാണ് അപകട നില. ഇന്നലെ 70.86 മീറ്ററാണ് ഗംഗയിലെ ജലനിരപ്പ്. ഗംഗ കരകവിഞ്ഞതോടെ വരുണ നദിയും എതിർദിശയിൽ ഒഴുക്ക് തുടങ്ങി. ഇതാണ് ജനവാസ മേഖലകളെ വെള്ളത്തിനടിയിലാക്കിയത്. വരാണസാ പാർലമെന്റ് അംഗമായ പ്രധാനമന്ത്രി നരേന്ദ്രമോദി ജില്ലാ മജിസ്‌ട്രേറ്റ് കൗശൽ രാജ് ശർമയെയും കമ്മിഷണർ ദീപക് അഗർവാളിനെയും വിളിച്ച് ദുരിതാശ്വാസ പ്രവർത്തനങ്ങൾ വിലയിരുത്തി.

ഹിമാചലിലും ഉത്താരാഖണ്ഡിലും മേഘ വിസ്ഫോടനം ; മഴക്കെടുതിയിൽ 26 മരണം

ഉത്തരേന്ത്യയിലെ അഞ്ച് സംസ്ഥാനങ്ങളിലുണ്ടായ മഴക്കെടുതികളിൽ 26 മരണം. ഹിമാചൽ പ്രദേശിൽ പതിനഞ്ചും, ഉത്തരാഖണ്ഡിലും, ഒഡീഷയിൽ നാലും, ജമ്മു കശ്മീരിൽ രണ്ട് പേരും ജാർഖണ്ഡിലും ഒരാളും മരിച്ചതായാണ് വിവരം. ഹിമാചലിലെ കാൻഗ്ര ജില്ലയിൽ ചക്കി നദിക്ക് കുറുകെയുള്ള റെയിൽപാളം പൂർണമായി തകർന്നു. ഉത്തരേന്ത്യൻ സംസ്ഥാനങ്ങളിൽ അടുത്ത മൂന്ന് ദിവസം കൂടി മഴ തുടരും എന്നാണ് കാലാവസ്ഥാ നിരീക്ഷകരുടെ പ്രവചനം.

ഹിമാചൽ പ്രദേശിലും ഉത്തരാഖണ്ഡിലും ഇന്ന് പുലർച്ചെയോടെ മേഘവിസ്‌ഫോടനമുണ്ടായതാണ് പ്രളയ തീവ്രത കൂട്ടിയത്. നദികൾ കരകവിഞ്ഞൊഴുകിയതിന് പിന്നാലെ ജനവാസ മേഖലകൾ ഉൾപ്പടെ നിരവധി പ്രദേശങ്ങൾ വെള്ളത്തിനടിയിലായി. തമസ, സോങ്ങ്, ചക്കി നദികളിൽ നിന്ന് ജലം കുത്തിയൊഴുകി വന്നതോടെ നിരവധി പാലങ്ങളും റോഡുകളും തകർന്നു.കാൻഗ്ര ജില്ലയിലെ ചക്കി നദിക്ക് മുകളിലൂടെയുള്ള റെയിൽപ്പാലം പൂർണമായി തകർന്നു .
ഹിമാചലിലെ മണ്ടിയിൽ വലിയ മണ്ണിടിച്ചിൽ ഉണ്ടായതായി ജില്ലാ കലക്ടർ അറിയിച്ചു. .കാൻഗ്ര,ചമ്പ,മണ്ഡി, കുളു, ഷിംല, സിർമോർ, സോളൻ, ഹമിർപൂർ, ഉന, ബിലാസ്പൂർ ജില്ലകളിൽ അടുത്ത രണ്ട് ദിവസം കനത്ത മഴ തുടരും. ഉത്തരാഖണ്ഡിലുണ്ടായ മേഘവിസ്‌ഫോടനത്തിന് പിന്നാലെ വെള്ളം കയറി സാർഖേത് ഗ്രാമം ഒറ്റപ്പെട്ടു. ഇവിടെ ഉണ്ടായിരുന്ന മുഴുവൻ പേരെയും സുരക്ഷിത സ്ഥാനത്തേക്ക് മാറ്റിയതായി അധികൃതർ അറിയിച്ചു.
രണ്ടിടങ്ങളിലും ദുരന്തനിവാരണസേനയുടെ നേതൃത്വത്തിൽ രക്ഷാപ്രവർത്തനങ്ങൾ തുടരുകയാണ്. ജമ്മു കശ്മീരിലെ ഉദ്ദംപൂരിൽ വീടിന് മുകളിലേക്ക് മണ്ണിടിഞ്ഞാണ് മൂന്ന് വയസ്സുകാരിയും, രണ്ട് മാസം പ്രായമായ കുഞ്ഞും മരിച്ചത്. ഒഡീഷയിൽ മതിലിടിഞ്ഞ് വീണ് രണ്ട് കുട്ടികളടക്കം നാല് പേർ മരിച്ചു. ജാർഖണ്ഡിലും മതിലിടിഞ്ഞ് ഒരു സ്ത്രീ മരിച്ചു. മഴ കനത്തതോടെ ജാർഖണ്ഡിലേക്കുള്ള രണ്ട് വിമാന സർവ്വീസുകൾ റദ്ദാക്കി. ഉത്തർപ്രദേശിലെ പ്രയാഗ് രാജിൽ തുടർച്ചയായി പെയ്ത മഴയിൽ താഴ്‌നന് പ്രദേശങ്ങൾ വെള്ളത്തിനടിയിലായി. ഗംഗാ യമുനാ നദികളിലും അപകടമാം വിധം ജലനിരപ്പ് ഉയർന്നു.

ബംഗാൾ ഉൾക്കടലിലെ ന്യൂനമർദ്ദം നാളെ തീവ്രമാകും; കേരളത്തിൽ ചിലയിടത്ത് മഴ സാധ്യത

ബംഗാൾ ഉൾക്കടലിന്റെ വടക്ക് കിഴക്കൻ മേഖലയിൽ ഇന്ന് രാവിലെ രൂപപ്പെട്ട ന്യൂനമർദ്ദം നാളെ തീവ്ര ന്യൂനമർദ്ദമായി (Depression) മാറും. മ്യാൻമർ, ബംഗ്ലാദേശ് തീരത്തോട് ചേർന്ന് ഇന്ന് രാവിലെയാണ് ന്യൂനമർദ്ദം രൂപപ്പെട്ടത്. വൈകിട്ടോടെ ഇത് ശക്തിപ്പെട്ടു വെൽ മാർക്ക്ഡ്
ലോ പ്രഷർ (WML)ആയി മാറി. നാളെ രാവിലെ ഇത് തീവ്ര ന്യൂനമർദ്ദം ആകും എന്നാണ് പ്രതീക്ഷിക്കുന്നത്. തുടർന്ന് വടക്ക് പടിഞ്ഞാറ് ദിശയിൽ സഞ്ചരിക്കുന്ന ന്യൂനമർദ്ദം അടുത്ത ദിവസങ്ങളിൽ ഒഡീഷ തീരത്തേക്ക് എത്തിച്ചേക്കും. ഈ സിസ്റ്റം കേരളത്തെ പ്രതികൂലമായി ബാധിക്കാൻ ഇടയില്ല എന്നാണ് മെറ്റ്ബീറ്റ് വെതറിന്റെ നിരീക്ഷണം. വടക്കൻ ഒഡീഷയിലും ബംഗാൾ മേഖലയിലും ന്യൂനമർദ്ദം കനത്ത മഴ നൽകും . തെക്ക്, മധ്യ കേരളത്തിൽ നാളെ മുതൽ വൈകിട്ട് കിഴക്കൻ മേഖലകളിൽ ഇടിയോടെ മഴക്ക് സാധ്യത.

ബംഗാൾ ഉൾക്കടലിലെ ന്യൂനമർദ്ദം നാളെ തീവ്രമാകും

ബംഗാൾ ഉൾക്കടലിന്റെ വടക്കൻ മേഖലയിൽ രൂപപ്പെട്ട ന്യൂനമർദ്ദം ശക്തിപ്പെട്ട് വെൽ മാർക്ഡ് ലോപ്രഷർ (WML) ആയി. ഒഡീഷക്കും പശ്ചിമബംഗാൾ തീരത്തിനും ഇടയിലാണ് ന്യൂനമർദ്ദം ഇപ്പോൾ സ്ഥിതി ചെയ്യുന്നത്. തുടർന്ന് പടിഞ്ഞാറ് വടക്കുപടിഞ്ഞാറ് ദിശയിൽ സഞ്ചരിച്ച് അടുത്ത 24 മണിക്കൂറിനകം ന്യൂനമർദ്ദം തീവ്ര ന്യൂനമർദ്ദം അഥവാ ഡിപ്രഷൻ ആയി മാറും. ഈ സിസ്റ്റം കേരളത്തെ ബാധിക്കില്ല. ഒഡിഷയിൽ അടുത്ത ദിവസങ്ങളിൽ ശക്തമായ മഴ നൽകും.
അതേസമയം, അറബിക്കടലിന്റെ വടക്കുപടിഞ്ഞാറ് മേഖലയിൽ കഴിഞ്ഞദിവസം രൂപം കൊണ്ട തീവ്ര ന്യൂനമർദ്ദം (ഡിപ്രഷൻ ) ശക്തി കുറഞ്ഞ് WML ആയി. ഇത് അടുത്ത 24 മണിക്കൂറിൽ വീണ്ടും ശക്തികുറഞ്ഞ് ന്യൂനമർദ്ദം ആകും .

മഴക്ക് വേണ്ടി MLA യെ ചെളിയിൽ കുളിപ്പിച്ച് ആചാരം

രാജ്യത്ത് മിക്ക സംസ്ഥാനങ്ങളിലും കലവർഷം തകർത്തു പെയ്യുമ്പോൾ മഴ ഇല്ലാത്ത പ്രദേശങ്ങളുമുണ്ട്. മഴ ലഭിക്കാൻ പരമ്പരാഗത ആചാരങ്ങളും നടക്കുന്നു.
ഉത്തർപ്രദേശിലെ മഹാരാജ്‍ഗഞ്ചിലെ പിപ്രദേറയില്‍ മഴ പെയ്യാന്‍ എം.എല്‍.എയെ ചെളിയില്‍ കുളിപ്പിച്ച് ജനങ്ങള്‍. ബി.ജെ.പി എം.എൽ.എ ജയ് മംഗൾ കനോജിയയെയും മുനിസിപ്പൽ കൗൺസിൽ പ്രസിഡന്റ് കൃഷ്ണ ഗോപാൽ ജയ്‌സ്വാളിനെയുമാണ് ചെളിയില്‍ കുളിപ്പിച്ചത്. കാലവർഷം എത്തിയെങ്കിലും യു.പി യിൽ ചില ഭാഗങ്ങളിൽ ചൂട് തുടരുകയാണ്. മഴയും ലഭിക്കുന്നില്ല. മഴക്ക് വേണ്ടി ഇത്തരം ആചാരങ്ങളും വിശ്വാസങ്ങളും പലയിടത്തും നില നിൽക്കുന്നുണ്ട്.

മഴക്ക് വേണ്ടിയുള്ള ആചാരത്തിന്റെ ഭാഗമായി ഒരാളുടെമേൽ ചെളി വാരിയെറിയുകയോ ചെളിയിൽ കുളിപ്പിക്കുകയോ ചെയ്യുന്നതിലൂടെ മഴദേവനായ ഇന്ദ്രനെ പ്രീതിപ്പെടുത്താന്‍ കഴിയുമെന്നാണ് കിഴക്കൻ ഉത്തർപ്രദേശിലെ ഒരു വിഭാഗം ജനങ്ങളുടെ വിശ്വാസം. ഇപ്പോൾ ഇന്ദ്രൻ സന്തോഷവാനായിരിക്കുമെന്നും മഴ നല്‍കി അനുഗ്രഹിക്കുമെന്നും എം.എല്‍.എയെ ചെളിയില്‍ കുളിപ്പിച്ച സ്ത്രീകള്‍ പറഞ്ഞു.
കനത്ത ചൂടു കാരണം ജനങ്ങൾ കഷ്ടപ്പെടുകയാണെന്ന് എം.എല്‍.എ പറഞ്ഞു. വിളകള്‍ കരിഞ്ഞുപോവുകയാണ്. കൊടും വരള്‍ച്ചയാണ്. അതിനാലാണ് താന്‍ ചടങ്ങിൽ പങ്കെടുക്കാൻ സമ്മതിച്ചത്. ഇതൊരു പഴയ വിശ്വാസത്തെ അടിസ്ഥാനമാക്കിയുള്ള ആചാരമാണെന്നും എം.എല്‍.എ പ്രതികരിച്ചു. വാർത്താ ഏജൻസിയായ എ.എൻ. ഐ ആണ് വ്യത്യസ്തമായ ആചാരത്തിന്റെ വിഡിയോ പങ്കു വച്ചത്. ദേശീയ മാധ്യമങ്ങൾ വാർത്തയാക്കുകയും ചെയ്തു.

കാലവർഷം സജീവം: ഗുജറാത്തിലും പ്രളയം

ഗുജറാത്തില്‍ കനത്ത മഴയെ തുടര്‍ന്ന് പ്രളയം. ഈ മേഖലയിൽ രൂപപ്പെട്ട ന്യൂനമർദ്ദവും കാലവർഷ പാത്തി എന്ന മൺസൂൺ ട്രഫ് സജീവമായി നിലനിൽക്കുന്നതുമാണ് കനത്ത മഴക്കും പ്രളയത്തിനും ഇടയാക്കിയത്. പാക്കിസ്ഥാനിലെ കറാച്ചിയിലും പ്രണയസമാന സാഹചര്യം നിലനിൽക്കുകയാണ്.
66 ഗ്രാമങ്ങളിൽ വൈദ്യുതി തടസ്സപ്പെട്ടു. ഛോട്ടാഉദ്ദേപൂർ, നവ്സാരി, നൽസാദ് എന്നിവിടങ്ങളിൽ നിന്ന് 3200 പേരെ ഒഴിപ്പിച്ചു. ദോസ്വാദ അണക്കെട്ട് നിറഞ്ഞു കവിഞ്ഞു.

കഴിഞ്ഞ 24 മണിക്കൂറില്‍ മഴക്കെടുതിയില്‍ ഏഴ് പേര്‍ മരിച്ചു. ജൂണ്‍ 1 മുതലുള്ള കണക്കെടുത്താല്‍ മരണസംഖ്യ 63 ആയി. 9000 പേരെ മാറ്റിപ്പാര്‍പ്പിച്ചു. 468 പേരെ രക്ഷപ്പെടുത്തി. നവസാരിയിൽ വീടുകൾ വെള്ളത്തിനടിയിലാണ്. അടുത്ത അഞ്ചു ദിവസം പല ജില്ലകളിലും അതിതീവ്രമഴയ്ക്ക് സാധ്യതയുണ്ടെന്നാണ് കാലാവസ്ഥ മുന്നറിയിപ്പ്.
അഹമ്മദാബാദ് നഗരത്തിൽ ഞായറാഴ്ച രാത്രി 219 മില്ലിമീറ്റർ മഴ പെയ്തു. പല ജനവാസ മേഖലകളിലും വെള്ളം കെട്ടിനിൽക്കുകയാണ്. അടിപ്പാതകളിലും റോഡുകളിലും വെള്ളം കയറി. സാധ്യമായ എല്ലാ സഹായവും കേന്ദ്രം ചെയ്യുമെന്ന് പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും ഉറപ്പ് നല്‍കി.

സംസ്ഥാന ദുരന്ത നിവാരണ സേനയെയും ദേശീയ ദുരന്ത നിവാരണ സേനയെയും രക്ഷാപ്രവര്‍ത്തനത്തിനായി നിയോഗിച്ചു. അംബിക നദിയുടെ തീരത്ത് കുടുങ്ങിയ 16 പേരെ എയര്‍ ലിഫ്റ്റ് ചെയ്തു.