Menu

Kerala

ന്യൂനമർദം കന്യാകുമാരി കടലിൽ: മഴ എന്നു മുതൽ കുറയും?

ഇന്നലെ ശ്രീലങ്കയിൽ കരകയറിയിറങ്ങിയ തീവ്രന്യൂനമർദം ഇന്ന് രാവിലെ വീണ്ടും മാന്നാർ കടലിടുക്കിലെത്തി. വെൽ മാർക്ഡ് ലോ പ്രഷർ ആയി രാവിലെ ശക്തി കുറഞ്ഞ സിസ്റ്റം വൈകിട്ടോടെ വീണ്ടും ശക്തി കുറഞ്ഞ് ന്യൂനമർദമായി മാറിയിട്ടുണ്ട്. ന്യൂനമർദം ഇപ്പോൾ കന്യാകുമാരി കടലിലാണ് സ്ഥിതി ചെയ്യുന്നത്. നാളെയോടെ ന്യൂനമർദം വീണ്ടും ദുർബലപ്പെട്ട് ഇല്ലാതാകാനാണ് സാധ്യത.

നാളെ മുതൽ മഴ കുറയും
തെക്കൻ കേരളത്തിൽ കഴിഞ്ഞ രണ്ടു ദിവസമായി ഇടവിട്ട് പെയ്യുന്ന മഴ നാളെയോടെ കുറയും. ന്യൂനമർദം ദുർബലമായി അറബിക്കടലിലേക്ക് നീങ്ങിയാലും ഈർപ്പുമുള്ള കിഴക്കൻ കാറ്റ് ബംഗാൾ ഉൾക്കടലിൽ നിന്ന് കേരളത്തിലെത്തും. അടുത്ത 12 മണിക്കൂറിൽ തെക്കൻ കേരളം, തെക്കൻ തമിഴ്‌നാട്, പുതുച്ചേരി എന്നിവിടങ്ങളിൽ ഒറ്റപ്പെട്ട ശക്തമായ മഴ സാധ്യത നിലനിൽക്കുന്നു.

കടലിൽ കാറ്റ് തുടരും
മാന്നാർ കടലിടുക്കിൽ നാളെവരെ മണിക്കൂറിൽ 55 കി.മിഉം കന്യാകുമാരി കടലിലും തെക്കൻ തമിഴ്‌നാട് തീരത്തും മണിക്കൂറിൽ 50-55 കി.മി വേഗത്തിലും കാറ്റ് നാളെ വരെ തുടരുന്നതിനാൽ മത്സ്യത്തൊഴിലാളികൾ കാലാവസ്ഥാ വകുപ്പ് നൽകുന്ന മുന്നറിയിപ്പ് പാലിച്ചേ കടലിൽ പോകാവൂ. ചെറു വള്ളങ്ങൾക്ക് ഈ കാലാവസ്ഥ അനുകൂലമാകാൻ ഇടയില്ല.

ന്യൂനമർദ്ദം തീവ്രമായി : ശ്രീലങ്കയിൽ കരകയറും ; ശക്തമായ മഴ സാധ്യത

ബംഗാൾ ഉൾക്കടലിന്റെ തെക്കുകിഴക്കൻ മേഖലയിൽ രൂപപ്പെട്ട ന്യൂനമർദം ശക്തിപ്പെട്ട് തീവ്ര ന്യൂനമർദം (Depression) ആയി. ഈ സിസ്റ്റം പടിഞ്ഞാറ് വടക്കുപടിഞ്ഞാറ് ദിശയിൽ നീങ്ങുകയാണ്. നാളെയോടെ തെക്കുപടിഞ്ഞാറ് ബംഗാൾ ഉൾക്കടലിൽ എത്തും. കഴിഞ്ഞ 6 മണിക്കൂറിൽ കിലോമീറ്റർ13 കി.മി വേഗതയിലാണ് സിസ്റ്റം സഞ്ചരിക്കുന്നത്. ശ്രീലങ്കയിലെ ട്രിങ്കോമാലിയിൽ നിന്ന് 530 കി.മി ഉം കാരൈക്കലിൽ നിന്ന് 750 കി.മി ഉം അകലെയാണ് തീവ്രന്യൂനമർദം സ്ഥിതി ചെയ്യുന്നത്.

ശ്രീലങ്കയിലും, തമിഴ്‌നാട്ടിലും കേരളത്തിലും മഴ സാധ്യത

നിലവിൽ തിരുവനന്തപുരത്തിന് സമാന്തരമായി കിഴക്ക് ബംഗാൾ ഉൾക്കടലിലാണ് സിസ്റ്റം സ്ഥിതി ചെയ്യുന്നത്. ഇന്നു മുതൽ തീവ്ര ന്യൂനമർദം ശ്രീലങ്കയിൽ ശക്തമായ മഴ നൽകും. നാളെ (ചൊവ്വ) ശ്രീലങ്കയിൽ മഴ ശക്തിപ്പെടും. തമിഴ്‌നാട്ടിലും നാളെ ഒറ്റപ്പെട്ട ശക്തമായതോ, ഇടത്തരം മഴക്കോ സാധ്യതയുണ്ട്. ന്യൂനമർദം ഫെബ്രുവരി ഒന്നിന് ബുധനാഴ്ച ശ്രീലങ്കയിൽ കരകയറും. ഉച്ചയ്ക്ക് ശേഷമാണ് ശ്രീലങ്കയിൽ സിസ്റ്റം കരകയറുക. തുടർന്ന് തെക്കൻ തമിഴ്‌നാട്ടിലും കേരളത്തിന്റെ തെക്കൻ മേഖലയിലും മധ്യ കേരളത്തിലും ഒറ്റപ്പെട്ട മഴ പ്രതീക്ഷിക്കാം. കേരളത്തിൽ വടക്കൻ ജില്ലകളിൽ വരെ ഇന്ന് ഈർപ്പമുള്ള കാറ്റ് എത്തിത്തുടങ്ങിയിട്ടുണ്ട്. ഇത് അനുകൂല അന്തരീക്ഷസ്ഥിതിയുള്ള മേഖലകളിൽ മേഘരൂപീകരണത്തിന് കാരണമാകും. അതിനാൽ നാളെ മുതൽ തന്നെ കേരളത്തിൽ മഴ പലയിടങ്ങളിലായി ലഭിച്ചു തുടങ്ങുമെന്നാണ് ഞങ്ങളുടെ വെതർമാൻ പറയുന്നത്. പരക്കെ മഴ സാധ്യതയില്ല. അനുകൂല അന്തരീക്ഷസ്ഥിതിയുണ്ടാകുന്ന മേഖലകളിൽ പ്രത്യേകിച്ച് കൊല്ലം, തിരുവനന്തപുരം, കോട്ടയം, പത്തനംതിട്ട, ഇടുക്കി, പാലക്കാട്, എറണാകുളം ജില്ലകളുടെ കിഴക്കൻ മേഖലകളിലാണ് മഴ പ്രതീക്ഷിക്കുന്നത്.

ബംഗാൾ ഉൾക്കടലിലെ ന്യൂനമർദം നാളെ ശക്തിപെട്ടേക്കും

ബംഗാൾ ഉൾക്കടലിൽ രൂപപ്പെട്ട ചക്രവാതച്ചുഴി ന്യൂനമർദമായി മാറി. ഈ വർഷത്തെ ആദ്യ ന്യൂനമർദമാണിത്. തെക്കുകിഴക്കൻ ബംഗാൾ ഉൾക്കടലിൽ ഭൂമധ്യരേഖയോട് ചേർന്നാണ് ന്യൂനമർദം രൂപ്പപെട്ടത്. നാളെയോടെ ഇത് വീണ്ടും ശക്തിപ്പെട്ട് വെൽമാർക്ഡ് ലോ പ്രഷറായി മാറിയേക്കും.
ഈ സിസ്റ്റം പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് ശ്രീലങ്കയ്ക്ക് സമീപത്തേക്ക് എത്തുമെന്ന് ശ്രീലങ്കൻ കാലാവാസ്ഥാ വകുപ്പ് പറഞ്ഞു. അടുത്ത മൂന്നു ദിവസത്തിനകം ഇത് തെക്കുപടിഞ്ഞാറൻ ബംഗാൾ ഉൾക്കടലിൽ ശ്രീലങ്കക്ക് സമീപമെത്തും.

പരിവർത്തന കാലം
ബംഗാൾ ഉൾക്കടലിൽ തുലാവർഷം വിടവാങ്ങിയ ശേഷമുള്ള അന്തരീക്ഷ പരിവർത്തന കാലമാണിത്. ഇന്ത്യൻ മഹാസമുദ്രത്തിൽ എം.ജെ.ഒ (മാഡൻ ജൂലിയൻ ഓസിലേഷൻ) ആക്ടീവ് ഫേസിലാണ്. ആഗോള മഴപ്പാത്തി എന്നാണ് ഇത് അറിയപ്പെടുന്നത്. ഇതിനാൽ ന്യൂനമർദം നാളെ ശക്തിപെട്ടേക്കും.

ഫെബ്രുവരി ആദ്യവാരം കേരളത്തിലും മഴ
കഴിഞ്ഞ ഏതാനും ദിവസം മുൻപത്തെ മഴ വിടവാങ്ങുന്ന പോസ്റ്റിലും വിഡിയോയിലും സൂചിപ്പിച്ച അടുത്തയാഴ്ചയിലെ മഴയാണിത്. ശ്രീലങ്കക്ക് സമീപം ചക്രവാതച്ചുഴിക്ക് സാധ്യതയുണ്ടെന്നായിരുന്നു അന്ന് മെറ്റ്ബീറ്റ് വെതർ പ്രവചിച്ചത്. എന്നാൽ കൂടുതൽ ശക്തിപ്പെട്ട നിലയിലാകും ഇത് ശ്രീലങ്കക്ക് സമീപമെത്തുക. അടുത്ത ബുധനാഴ്ചക്ക് ശേഷം കേരളത്തിൽ വീണ്ടും മഴക്ക് ഇത് കാരണമാകും. തെക്കൻ കേരളത്തിലും മധ്യ കേരളത്തിലുമാണ് ഇപ്പോഴത്തെ നിരീക്ഷണം അനുസരിച്ച് മഴക്ക് സാധ്യത. തമിഴ്‌നാട്ടിലും ഈ സിസ്റ്റം മഴ നൽകും. ഒറ്റപ്പെട്ട മഴ ഈ മാസം 30 മുതൽ തന്നെ കേരളത്തിന്റെ തെക്കൻ മേഖലയിലും തെക്കൻ തമിഴ്‌നാട്ടിലും പ്രതീക്ഷിക്കാം.

കേരളത്തിൽ നാളെയും മഴ സാധ്യത

കേരളത്തിൽ ഇന്നലെയും ഇന്നുമായി ലഭിച്ച മഴ നാളെ മുതൽ കുറഞ്ഞു തുടങ്ങും. വ്യാഴാഴ്ചയോടെ വീണ്ടും മഴ രഹിതമായ കാലാവസ്ഥ തിരികെയെത്താനാണ് സാധ്യതയെന്ന് മെറ്റ്ബീറ്റ് വെതർ നിരീക്ഷകർ പറഞ്ഞു.

ചൊവ്വാഴ്ച മുതൽ കേരളത്തിൽ മഴക്ക് സാധ്യതയുണ്ടെന്ന് മെറ്റ്ബീറ്റ് വെതർ ഒരാഴ്ചയായി റിപ്പോർട്ട് ചെയ്തിരുന്നു. ഇന്ന് രാവിലെ സംസ്ഥാനത്ത് വിവിധ ഭാഗങ്ങളിൽ മഴയുണ്ടായി. തെക്കൻ കേരളത്തിലാണ് കൂടുതൽ മഴ റിപ്പോർട്ട് ചെയ്തത്. മധ്യ കേരളത്തിലും വടക്കൻ ജില്ലകളിലും ഉച്ചയ്ക്ക് ശേഷം പലയിടത്തായി മഴ ലഭിച്ചു. കിഴക്കൻ മേഖലയിൽ ശക്തമായ മഴയും തീരദേശത്ത് ഇടത്തരം മഴയുമാണ് റിപ്പോർട്ട് ചെയ്തത്.

നാളെയും മഴ സാധ്യത
മാഡൻ ജൂലിയൻ ഓസിലേഷൻ (MJO) എന്ന ആഗോള മഴപ്പാത്തി ഇന്ത്യൻ മഹാസമുദ്രത്തിൽ നിലകൊള്ളുന്നതും മഡഗാസ്‌കറിനു സമീപത്തെ ചുഴലിക്കാറ്റുമാണ് കേരളത്തിൽ മഴക്ക് കാരണം. തമിഴ്‌നാടിനും കേരളത്തിനും കുറുകെ സഞ്ചരിക്കുന്ന ഈർപ്പമുള്ള കാറ്റ് മേഘരൂപീകരണത്തിന് ഇടയാക്കുന്നു. കേരളത്തിലും തമിഴ്‌നാട്ടിലും മഴ നൽകുകയും ചെയ്തു. ഈ സാഹചര്യം നാളെയും തുടരുമെന്നും കേരളത്തിൽ നാളെ (ബുധൻ) യും മഴ സാധ്യതയുണ്ടെന്നാണ് മെറ്റ്ബീറ്റ് വെതറിന്റെ നിരീക്ഷണം. തുടർന്ന് മഴ പടിഞ്ഞാറേക്ക് അറബിക്കടലിലേക്ക് മാറും. കേരളത്തിൽ വരണ്ട കാലാവസ്ഥയിലേക്കും മാറ്റം വരും.

അടുത്തയാഴ്ച മഴ വീണ്ടും തിരികെയെത്തും
നാളത്തോടെ ദുർബലമാകുന്ന മഴ അടുത്തയാഴ്ചയോടെ വീണ്ടും തിരികെയെത്തുമെന്നാണ് മെറ്റ്ബീറ്റ് നിരീക്ഷിക്കുന്നത്. എം.ജെ.ഒ സാന്നിധ്യം തുടരുന്നതിനാൽ ബംഗാൾ ഉൾക്കടലിൽ ചക്രവാതച്ചുഴി രൂപംകൊള്ളാനും ഇത് തെക്കൻ തമിഴ്‌നാട്ടിലും തെക്കൻ കേരളത്തിലും മഴ നൽകാനും സാധ്യതയുണ്ടെന്ന് ഞങ്ങളുടെ നിരീക്ഷകർ പറയുന്നു. ഈ മാസം 29 നും 31 നും ഇടിലാണ് മഴ സാധ്യത. ശ്രീലങ്കയോട് ചേർന്നാണ് ചക്രവാതച്ചുഴി രൂപം കൊള്ളാൻ സാധ്യതയുള്ളത്. തമിഴ്‌നാട്ടിലും തീരദേശ ആന്ധ്രയിലും ഈ സിസ്റ്റം മഴ നൽകുമെന്നാണ് പ്രതീക്ഷിക്കുന്നത്.

കേരളത്തിൽ ഒറ്റപ്പെട്ട മഴക്ക് സാധ്യത, എവിടെ എന്നറിയാം

25 ദിവസത്തോളമായി തുടരുന്ന വരണ്ട കാലാവസ്ഥയ്ക്ക് ശേഷം കേരളത്തിൽ വീണ്ടും ഒറ്റപ്പെട്ട മഴക്ക് സാധ്യത. 2023 ജനുവരി 24 ന് ശേഷം നാലു ദിവസത്തേക്കാണ് മഴ സാധ്യത. ഇക്കാര്യം കഴിഞ്ഞ ദിവസങ്ങളിൽ മെറ്റ്ബീറ്റ് വെതർ സൂചിപ്പിച്ചിരുന്നു. തെക്കൻ കേരളത്തിനാണ് കൂടുതൽ മഴ സാധ്യത. ഒറ്റപ്പെട്ട മഴ മധ്യ കേരളത്തിലും വടക്കൻ ജില്ലകളുടെ കിഴക്കൻ മലയോരത്തും സാധ്യതയുണ്ടെന്ന് ഞങ്ങളുടെ നിരീക്ഷകർ പറയുന്നു.

മഴക്ക് കാരണം എന്ത്

മഡഗാസ്‌കറിനു സമീപം കഴിഞ്ഞ ദിവസമുണ്ടായ ചുഴലിക്കാറ്റും തുടർന്നുള്ള അന്തരീക്ഷസ്ഥിതിയുമാണ് കേരളത്തിൽ മഴ നൽകുക. തെക്കൻ തമിഴ്‌നാട്ടിലും തെക്കൻ കേരളത്തിലും മഴക്ക് അനുകൂല സാഹചര്യം ഒരുക്കാൻ ഈ സിസ്റ്റത്തിനു കഴിയും. ഒപ്പം ബംഗാൾ ഉൾക്കടലിലും കാറ്റിന്റെ സർക്കുലേഷനുകൾ രൂപപ്പെടുന്നുണ്ട്. ഇത് ശ്രീലങ്ക ഉൾപ്പെടെ മഴ നൽകും. ഇന്നു മുതൽ തെക്കൻ കേരളത്തിന്റെ ആകാശത്ത് മാറ്റങ്ങൾ കണ്ടു തുടങ്ങുമെന്ന് ഞ്ങ്ങളുടെ വെതർമാൻ പറയുന്നു. ബംഗാൾ ഉൾക്കടലിൽ നിന്ന് ഈർപ്പമുള്ള കാറ്റ് കേരളത്തിൽ പ്രവേശിക്കാൻ തുടങ്ങിയിട്ടുണ്ട്. ഇവ അടുത്ത ദിവസം മേഘരൂപീകരണത്തിന് ഇടയാക്കും. തുടർന്ന് മഴ ലഭിക്കുകയും ചെയ്യും. പരക്കെ മഴക്ക് സാധ്യതയില്ലെങ്കിലും ചിലയിടങ്ങളിൽ ഇടത്തരമോ ശക്തമോ ആയ മഴ ലഭിച്ചേക്കും. തണുപ്പിനും കുറവുണ്ടാകും.

ഇക്കുറി തുലാമഴയിൽ 3 ശതമാനവും കാലവർഷത്തിൽ 14 ശതമാനവും മഴക്കുറവുണ്ടായിരുന്നെങ്കിൽ ശീതകാല മഴയിൽ ഇതുവരെ 100 ശതമാനം കുറവാണ് രേഖപ്പെടുത്തിയിരിക്കുന്നത്. കേന്ദ്ര അന്തരീക്ഷ ശാസ്ത്ര കേന്ദ്രത്തിന്റെ കണക്കുപ്രകാരം ജനുവരി ഒന്നു മുതൽ ഇന്നലെ വരെ ലഭിക്കേണ്ട ശരാശരി മഴ 5.4 മി.മീ ആണ്. എന്നാൽ ഈ കാലയളവിൽ സംസ്ഥാനത്തെ ഒരു ജില്ലയിലും ചാറ്റൽ മഴ പോലും ലഭിച്ചിട്ടില്ല.

ശീതകാല മഴ കേരളത്തിൽ 100 % കുറവ്

ജനുവരി ഒന്നു മുതൽ 18 വരെ കേരളത്തിൽ മഴക്കുറവ് 100 ശതമാനം. ജനുവരി മുതൽ ഫെബ്രുവരി അവസാനം വരെ കേരളത്തിൽ ശൈത്യകാല മഴയുടെ സീസണാണ്. ഈ സീണസിൽ ജനുവരി ഒന്നു മുതൽ ഇന്നു വരെ കേരളത്തിൽ ലഭിക്കേണ്ടത് 5.1 എം.എം മഴയാണ്. എന്നാൽ സംസ്ഥാനത്തെവിടെയും മഴ റിപ്പോർട്ട് ചെയ്തില്ല. എന്നാൽ ലക്ഷദ്വീപിൽ മഴ റിപ്പോർട്ട് ചെയ്തു. ലക്ഷദ്വീപിൽ 89 ശതമാനമാണ് മഴക്കുറവ്. 10 എം.എം മഴ ലഭിക്കേണ്ടതിനു പകരം ദ്വീപിൽ 1.1 എം.എം മഴ രേഖപ്പെടുത്തി.

കേരളത്തിൽ ഇതുവരെ മഴ രേഖപ്പെടുത്തിയിട്ടില്ലെങ്കിലും
ഈ മാസം അവസാനം ഒറ്റപ്പെട്ട മഴക്ക് സാധ്യതയുണ്ടെന്നാണ് മെറ്റ്ബീറ്റ് വെതറിന്റെ നിരീക്ഷണം. ഇപ്പോഴത്തെ 100 ശതമാനം മഴക്കുറവ് നികത്താനും സാധ്യതയുണ്ട്.

മൂന്നാറിൽ ഇന്നും മൈനസ് ഡിഗ്രി; സഞ്ചാരികളുടെ ഒഴുക്ക് തുടരുന്നു

മൂന്നാറിൽ അതിശൈത്യവും മഞ്ഞുവീഴ്ചയും രണ്ടാംദിവസവും തുടരുകയാണ്. തേയിലത്തോട്ടങ്ങളിൽ മഞ്ഞുവീഴ്ച വ്യാപകമാണ്. കന്നിമലയിൽ താപനില മൈനസ് മൂന്നുഡിഗ്രി സെൽഷ്യസ് രേഖപ്പെടുത്തി. ഈ വർഷത്തെ ഏറ്റവും കുറഞ്ഞ താപനിലയാണിത്.

മുൻവർഷങ്ങളെ അപേക്ഷിച്ച് ഡിസംബറിൽ മൂന്നാറിൽ സ്വാഭാവികമായുള്ള തണുപ്പ് അനുഭവപ്പെട്ടിരുന്നില്ല. പകരം ജനുവരി പകുതിയോടടുത്തപ്പോഴാണ് ഇത്തരത്തിൽ കടുത്ത ശൈത്യം രേഖപ്പെടുത്തുന്നത്.

ദേവികുളം ഫാക്ടറി ഡിവിഷൻ, ഒ.ഡി.കെ., ലാക്കാട് എന്നിവിടങ്ങളിൽ ബുധനാഴ്ച രാവിലെ മൈനസ് രണ്ടു ഡിഗ്രി സെൽഷ്യസാണ് രേഖപ്പെടുത്തിയത്. ചെണ്ടുവര, പെരിയവര എന്നിവിടങ്ങളിൽ മൈനസ് ഒന്നും.

പാമ്പാടുംചോല നാഷണൽ പാർക്കിൽ ചൊവ്വാഴ്ച രാത്രി മൈനസ് ഒരു ഡിഗ്രി രേഖപ്പെടുത്തി. ബുധനാഴ്ച പുലർച്ചെ മൈനസ് 2.4 ഡിഗ്രിയായി.

അത്യപൂർവമായ കാലാവസ്ഥ കാരണം കൊണ്ടുതന്നെ മൂന്നാറിലേക്കും സമീപ പ്രദേശങ്ങളിലേക്കും സഞ്ചാരികളുടെ പ്രവാഹമാണ്. കൂടുതലും നോർത്തിന്ത്യൻ സഞ്ചാരികളാണ് മൂന്നാറിന്റെ കുളിരിലേക്ക് താമസത്തിനായി എത്തിയിരിക്കുന്നത്. മലയാളികളും ഏറെ എത്തുന്നുണ്ട്.
രാവിലെ മഞ്ഞുമൂടിയ നിലയിൽ കാണപ്പെട്ട പുൽമേടുകൾ സന്ദർശിക്കുവാൻ നിരവധി സഞ്ചാരികളാണ് എത്തുന്നത്. അതിശൈത്യം എത്തിയതോടെ തെയില തോട്ടങ്ങൾ നേർത്ത മഞ്ഞ് മൂടി വെളുത്ത നിറത്തിലാണ് കാണപ്പെട്ടത്. വരും ദിവസങ്ങളിൽ തണുപ്പ് ശക്തമാകുമെന്നാണ് കരുതുന്നത്.

2022 ലെ തുലാവർഷം നാളെ വിടവാങ്ങും

2022 ലെ വടക്കുകിഴക്കൻ മൺസൂൺ (തുലാവർഷം) നാളെ (വ്യാഴം) കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിൽ നിന്ന് വിടവാങ്ങിയേക്കുമെന്ന് കേന്ദ്ര കാലാവസ്ഥാ വകുപ്പ്. തമിഴ്‌നാട്, പുതുച്ചേരി, കാരൈക്കൽ, കേരളം, മാഹി, തീരദേശ ആന്ധ്ര, യാനം, രായലസീമ. തെക്കു ഉൾനാടൻ കർണാടക എന്നീ മേഖലകളിലാണ് തുലാവർഷം ലഭിക്കുന്നത്. കാറ്റിന്റെ പാറ്റേണിൽ മാറ്റം വന്നതോടെ ഇവിടെ നിന്ന് തുലാവർഷം വിടവാങ്ങുമെന്നാണ് കരുതുന്നത്. കേന്ദ്ര കാലാവസ്ഥാ വകുപ്പാണ് കാലവർഷവും തുലാവർഷവും എത്തുന്നതും വിടവാങ്ങുന്നതും ഔദ്യോഗികമായി സ്ഥിരീകരിക്കുന്നത്.
തുലാവർഷത്തിന്റെ ഔദ്യോഗിക കണക്കെടുപ്പ് ഡിസംബർ 31 ന് അവസാനിച്ചിരുന്നു. 3 ശതമാനം മഴക്കുറവാണ് ഇത്തവണ കേരളത്തിലുണ്ടായത്.

ഒക്ടോബർ 1 മുതൽ ഡിസംബർ 31 വരെയുള്ള മഴയാണ് തുലാവർഷ കലണ്ടറിൽ ഉൾപ്പെടുത്തുന്നത്. ഇതു പ്രകാരം കേരളത്തിൽ 492 എം.എം മഴയാണ് ലഭിക്കേണ്ടത്. എന്നാൽ 476.1 എം.എം മഴയാണ് സംസ്ഥാനത്ത് ലഭിച്ചത്. മൂന്നു ശതമാനം മഴക്കുറവുണ്ടെങ്കിലും സാങ്കേതികമായി ഇത് സാധാരണ മഴയാണ്. ലക്ഷദ്വീപിൽ 10 ശതമാനം മഴക്കുറവുണ്ടെങ്കിലും സാധാരണ മഴ ലഭിച്ചു.

കണക്ക് കണക്കുന്നത് ഇങ്ങനെ

19 ശതമാനം മഴ കൂടുതലോ മഴ കുറവോ സാധാരണ മഴയും 20 മുതൽ 59 ശതമാനം വരെ മഴ കൂടുതൽ മഴ കൂടുതലായും 60 മുതൽ മുകളിലേക്കുള്ള ശതമാനം മഴ കൂടുതൽ വളരെ കൂടുതലുമായാണ് കണക്കാക്കുക. 20 മുതൽ 59 ശതമാനം കുറവ് മഴക്കുറവും 60 മുതൽ 99 ശതമാനം വരെ മഴക്കുറവ് വളരെ കുറവുമായാണ് കണക്കാക്കുക. 100 ശതമാനം മഴക്കുറവിനെ മഴയില്ലാതെയും കണക്കാക്കും.

2021 ൽ 109 % കൂടുതൽ ഇപ്പോൾ 3 % കുറവ്

2021 ൽ ന്യൂനമർദങ്ങൾ ശക്തമായതു കാരണം തുലാമഴയിൽ കേരളത്തിൽ 109 ശതമാനത്തിന്റെ വർധനവുണ്ടായിരുന്നു. അന്ന് കാലവർഷം (തെക്കുപടിഞ്ഞാറൻ മൺസൂൺ) 14 ശതമാനം കുറയുകയും ചെയ്തു. ഈ വർഷം കണ്ണൂരിലാണ് ഏറ്റവും കൂടുതൽ മഴ കുറഞ്ഞത്. 41 ശതമാനം മഴക്കുറവിലാണ് കണ്ണൂരുള്ളത്. തൃശൂർ 31 ശതമാനവും കാസർകോട് 21 ശതമാനവും മലപ്പുറം 25 ശതമാനവും പാലക്കാട് 22 ശതമാനവും മഴ കുറഞ്ഞു.

കോട്ടയം (15%, എറണാകുളം (11%, ആലപ്പുഴ (2%), കാഴിക്കോട് (2%)തിരുവനന്തപുരം (0%), വയനാട് (18%) കൊല്ലം (14%)സാധാരണ മഴ ലഭിച്ചു.പത്തനംതിട്ടയിലും(37%) ഇടുക്കിയിലും (23%) കൂടുതൽ ലഭിച്ചു.
Photo : A Sanesh

കേരളത്തിൽ ശീതകാല മഴ കൂടാൻ സാധ്യത

ജനുവരി മുതൽ മാർച്ച് വരെയുള്ള മാസങ്ങളിൽ കേരളത്തിൽ കേരളം ഉൾപ്പെടെ ദക്ഷിണേന്ത്യയിൽ സാധാരണയിൽ കൂടുതൽ മഴ സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ പ്രവചനം. പസഫിക് സമുദ്രത്തിലെ ലാ നിന പ്രതിഭാസം മാർച്ച് വരെ തുടരുമെന്നും തുടർന്ന് നോർമലിലേക്ക് ദുർബലമാകുമെന്നും കാലാവസ്ഥാ വകുപ്പ് പറയുന്നു. ഇന്ത്യൻ മഹാസമുദ്രത്തിലെ താപനിലയുമായി ബന്ധപ്പെട്ട ഇന്ത്യൻ ഓഷ്യൻ ഡൈപോൾ (ഐ.ഒ.ഡി) നിലവിൽ ന്യൂട്രലിലാണ്. ഇതും അടുത്ത മൂന്നു മാസം ഇതേ അവസ്ഥയിൽ തുടരും.

വടക്കൻ കേരളത്തിൽ മഴ കൂടും
ജനുവരി, ഫെബ്രുവരി, മാർച്ച് മാസങ്ങളിൽ വടക്കൻ കേരളത്തിലും തെക്കൻ തീരദേശ കർണാടകയിലും മറ്റും സാധാരണയിൽ കൂടുതൽ മഴ പ്രതീക്ഷിക്കാം. കാസർകോട്, കണ്ണൂർ, വയനാട് ജില്ലകൾക്കാണ് കൂടുതൽ മഴ സാധ്യത. ക്ലൈമറ്റോളജിക്കൽ സാധ്യതാ പ്രവചനമാണിത്. ജനുവരിയിൽ കേരളത്തിൽ മിക്ക ജില്ലകളിലും സാധാരണയിൽ കൂടുതൽ മഴ സാധ്യതയുണ്ട്. കണ്ണൂർ, കോഴിക്കോട് ജില്ലകളിൽ സാധാരണ മഴ സാധ്യതയാണ്. ജനുവരിയിൽ ദക്ഷിണേന്ത്യയിൽ മഴ കൂടുതൽ കർണാടകയിലാണ്. തമിഴ്‌നാട്ടിലും സാധാരണയിൽ കൂടുതൽ മഴ ലഭിക്കും.

ജനുവരിയിൽ പകൽ താപനിലയിൽ കുറവ്
കേരളത്തിൽ മിക്ക ജില്ലകളിലും പകൽ താപനില സാധാരണയേക്കാൾ കുറവാകും അനുഭവപ്പെടുക. കോഴിക്കോട്, കണ്ണൂർ ജില്ലകളിൽ സാധാരണ തോതിലും ജനുവരിയിലെ താപനില അനുഭവപ്പെടും. രാത്രി താപനിലയിൽ തിരുവനന്തപുരം, കൊല്ലം ഒഴികെയുള്ള ജില്ലകളിൽ വർധനവുണ്ടാകും. കൊല്ലത്തും തിരുവനന്തപുരത്തും സാധാരണ രീതിയിലാകും രാത്രി താപനില.

കഴിഞ്ഞ വർഷം 109 % കൂടിയപ്പോൾ ഈ വർഷം തുലാമഴയിൽ 3 % കുറവ്, ഡാമുകളിലും സംഭരണം കുറവ്

വടക്കു കിഴക്കൻ മൺസൂൺ (തുലാവർഷം) ഔദ്യോഗിക മഴ കണക്കെടുപ്പ് ഇന്നലെ അവസാനിച്ചതോടെ കേരളത്തിൽ ലഭിച്ചത് സാധാരണ മഴ. ഒക്ടോബർ 1 മുതൽ ഡിസംബർ 31 വരെയുള്ള മഴയാണ് തുലാവർഷ കലണ്ടറിൽ ഉൾപ്പെടുത്തുന്നത്. ഇതു പ്രകാരം കേരളത്തിൽ 492 എം.എം മഴയാണ് ലഭിക്കേണ്ടത്. എന്നാൽ 476.1 എം.എം മഴയാണ് സംസ്ഥാനത്ത് ലഭിച്ചത്. മൂന്നു ശതമാനം മഴക്കുറവുണ്ടെങ്കിലും സാങ്കേതികമായി ഇത് സാധാരണ മഴയാണ്. ലക്ഷദ്വീപിൽ 10 ശതമാനം മഴക്കുറവുണ്ടെങ്കിലും സാധാരണ മഴ ലഭിച്ചു.

കണക്ക് കണക്കുന്നത് ഇങ്ങനെ

19 ശതമാനം മഴ കൂടുതലോ മഴ കുറവോ സാധാരണ മഴയും 20 മുതൽ 59 ശതമാനം വരെ മഴ കൂടുതൽ മഴ കൂടുതലായും 60 മുതൽ മുകളിലേക്കുള്ള ശതമാനം മഴ കൂടുതൽ വളരെ കൂടുതലുമായാണ് കണക്കാക്കുക. 20 മുതൽ 59 ശതമാനം കുറവ് മഴക്കുറവും 60 മുതൽ 99 ശതമാനം വരെ മഴക്കുറവ് വളരെ കുറവുമായാണ് കണക്കാക്കുക. 100 ശതമാനം മഴക്കുറവിനെ മഴയില്ലാതെയും കണക്കാക്കും.

2021 ൽ 109 % കൂടുതൽ ഇപ്പോൾ 3 % കുറവ്

2021 ൽ ന്യൂനമർദങ്ങൾ ശക്തമായതു കാരണം തുലാമഴയിൽ കേരളത്തിൽ 109 ശതമാനത്തിന്റെ വർധനവുണ്ടായിരുന്നു. അന്ന് കാലവർഷം (തെക്കുപടിഞ്ഞാറൻ മൺസൂൺ) 14 ശതമാനം കുറയുകയും ചെയ്തു. ഈ വർഷം കണ്ണൂരിലാണ് ഏറ്റവും കൂടുതൽ മഴ കുറഞ്ഞത്. 41 ശതമാനം മഴക്കുറവിലാണ് കണ്ണൂരുള്ളത്. തൃശൂർ 31 ശതമാനവും കാസർകോട് 21 ശതമാനവും മലപ്പുറം 25 ശതമാനവും പാലക്കാട് 22 ശതമാനവും മഴ കുറഞ്ഞു.

കോട്ടയം (15%, എറണാകുളം (11%, ആലപ്പുഴ (2%), കാഴിക്കോട് (-2%)തിരുവനന്തപുരം (0%), വയനാട് (-18%) കൊല്ലം (-14%)സാധാരണ മഴ ലഭിച്ചു.
പത്തനംതിട്ടയിലും(37%) ഇടുക്കിയിലും (23%) കൂടുതൽ ലഭിച്ചു.

ഡാമുകളിൽ 73 % വെള്ളമുണ്ട്

ശനിയാഴ്ച രാവിലെ ഏഴു മണിയിലെ കണക്കുപ്രകാരം 3027.47 ദശലക്ഷം യൂനിറ്റ് വൈദ്യുതി ഉൽപ്പാദിപ്പിക്കാനുള്ള വെള്ളം എല്ലാ സംഭരണികളിലുമായുണ്ട്. ആകെ സംഭരണശേഷിയുടെ 73 ശതമാനമാണിത്. മുൻ വർഷങ്ങളിൽ ഡിസംബർ 31ലെ ജലനിരപ്പ് ഇങ്ങനെയാണ്. 2021 (3722.811 ദശലക്ഷം യൂനിറ്റ്, 89%), 2020 (3457.169, 83%), 2019 (3155.802, 76%). 2018ൽ മഹാപ്രളയമായിരുന്നുവെങ്കിലും ഈ സമയം 2953.931 ദശലക്ഷം യൂനിറ്റിനുള്ള വെള്ളമേ ഉണ്ടായിരുന്നുള്ളൂ. ഡിസംബർ ഒന്നു മുതൽ 31 വരെ 273.965 ദശലക്ഷം യൂനിറ്റ് വൈദ്യുതിക്കുള്ള വെള്ളം അണക്കെട്ടുകളിലേക്ക് ഒഴുകിയെത്തുമെന്നാണ് കെ.എസ്.ഇ.ബി ലോഡ് ഡെസ്പാച്ച് സെന്റർ പ്രതീക്ഷിച്ചിരുന്നത്. എന്നാൽ ഇന്നലെവരെ എത്തിയത് 246.127 ദശലക്ഷം യൂനിറ്റിനുള്ള വെള്ളമാണ്. മഴമാറിയതോടെ സംസ്ഥാനത്തെ വൈദ്യുതി ഉപഭോഗം കൂടിയിട്ടുണ്ട്. കഴിഞ്ഞ മൂന്ന് ദിവസങ്ങളായി ശരാശരി ഉപഭോഗം 80 ദശലക്ഷം യൂനിറ്റാണ്. കരുതൽ സംഭരണത്തിന്റെ ഭാഗമായി ആഭ്യന്തര വൈദ്യുതി ഉൽപ്പാദനം കുറച്ചിട്ടുണ്ട്. ഇന്നലെ സംസ്ഥാനത്ത് ഉപയോഗിച്ച 79.0395 ദശലക്ഷം യൂനിറ്റ് വൈദ്യുതിയിൽ 20.9645 ദശലക്ഷം യൂനിറ്റ് മാത്രമായിരുന്നു ആഭ്യന്തര ജലവൈദ്യുതി ഉൽപ്പാദനം. 55.8862 ദശലക്ഷം യൂനിറ്റ് ദീർഘകാല കരാർ വൈദ്യുതിയും കേന്ദ്ര പൂളുമാണ്. 2.188 ദശലക്ഷം യൂനിറ്റ് പാരമ്പര്യേതര ഊർജവും.