ഓഗസ്റ്റ് 2 ന് പൂർണ ഇരുട്ട്: ആകാശത്ത് ഈ പ്രതിഭാസം എപ്പോൾ നടക്കും? അറിയാം
ആകാശത്ത് ഒരു അപൂർവ പ്രതിഭാസം 2027 ഓഗസ്റ്റ് 2ന് നടക്കും. ഏകദേശം 6 മിനിറ്റോളം നീണ്ടുനിൽക്കുന്ന ഈ സൂര്യഗ്രഹണം ഗ്രേറ്റ് നോർത്ത് ആഫ്രിക്കൻ എക്ലിപ്‌സ് എന്നാണ് വിശേഷിപ്പിക്കുന്നത്. യൂറോപ്, ആഫ്രിക്ക, മിഡിൽ ഈസ്റ്റ് എന്നിവിടങ്ങളിലൂടെ കടന്നുപോകുന്ന ഈ ഗ്രഹണപാത മൊറോക്കോ, ഈജിപ്ത്, സൗദി അറേബ്യ തുടങ്ങിയ രാജ്യങ്ങളിൽ പൂർണ ഇരുട്ട് പരത്തുമെന്നാണ് പറയുന്നത്. അതേസമയം ഇന്ത്യയിൽ ഈ പൂർണ ഗ്രഹണം ദൃശ്യമാകില്ല, ഭാഗിക സൂര്യഗ്രഹണത്തിന് ഇന്ത്യ സാക്ഷ്യം വഹിക്കും.
ലോകത്തെ നിമിഷങ്ങളോളം നിശ്ചലമാക്കുന്ന അവസ്ഥയായിരിക്കും ഈ സൂര്യഗ്രഹണത്തിൽ ഉണ്ടാവുക. ഏതാനും മിനിറ്റുകൾ മാത്രം ദൈർഘ്യമുള്ള ഈ കാഴ്ചയിൽ, ചന്ദ്രൻ സൂര്യനെ പൂർണ്ണമായും മറയ്ക്കുമ്പോൾ പക്ഷികൾ നിശബ്ദമാകുന്നു, വായു തണുക്കുന്നു, ആകാശം സന്ധ്യാസമയത്തേത് പോലെ ഇരുണ്ട് വരുകയും ചെയ്യും. സൂര്യന്റെ പ്രകാശമുള്ള കൊറോണ ഒരു നേർത്ത പ്രകാശവലയം പോലെ കാണപ്പെടും. സാധാരണ നിലയിൽ അദൃശ്യമായ ബാഹ്യ അന്തരീക്ഷം ഒരു പ്രകാശ വലയമായി മാറുകയാണ് ഏതാനും മിനിറ്റുകൾ നേരം.
എപ്പോഴാണ് പൂർണ സൂര്യഗ്രഹണം സംഭവിക്കുക?
ചന്ദ്രൻ ഭൂമിക്കും സൂര്യനുമിടയിൽ നേരിട്ട് കടന്നുപോകുമ്പോൾ, അത് സൂര്യന്റെ ഉപരിതലത്തിൽ ഒരു നിഴൽ വീഴ്ത്തും. ഭൂമിയിൽ നിന്ന് നോക്കുമ്പോൾ സൂര്യനെ ചന്ദ്രൻ പൂർണ്ണമായി മറച്ചതായി തോന്നുകയും ചെയ്യും. ഈ ആകാശഗോളങ്ങളുടെ നൃത്തമാണ് പൂർണ്ണ സൂര്യഗ്രഹണത്തിലേക്ക് നയിക്കുക.
ഈ ഗ്രഹണം നടക്കുന്നത് എപ്പോഴാണ്?
2027 ഓഗസ്റ്റ് 2-ന് ആണ് ലോകം അത്തരമൊരു അസാധാരണ സംഭവത്തിന് സാക്ഷ്യം വഹിക്കുക. ഇത് ഒരു സാധാരണ ഗ്രഹണമല്ല. ഇതിന് വിശേഷിപ്പിക്കുന്നത് “ഗ്രേറ്റ് നോർത്ത് ആഫ്രിക്കൻ എക്ലിപ്‌സ്” എന്നാണ്. ഏകദേശം ആറ് മിനിറ്റോളം ഇത് നീണ്ടുനിൽക്കുമെന്നതിനാൽ, ആധുനിക കാലത്തെ ഏറ്റവും ദൈർഘ്യമേറിയ സൂര്യഗ്രഹണങ്ങളിൽ ഒന്നായി ഇത് മാറുകയും ചെയ്യും. ദശലക്ഷക്കണക്കിന് ആളുകൾ ചന്ദ്രന്റെ നിഴലിന് കീഴിലായിരിക്കും, പകൽ സമയത്ത് പൂർണ ഇരുട്ട് അനുഭവപ്പെടും.
അപൂർവമായ ബഹിരാകാശ വിന്യാസം കാരണമാണ് ഈ ഗ്രഹണത്തിന് ഇത്രയധികം പ്രത്യേകത വരുന്നത്. ഭൂമി അഫീലിയനിൽ, അതായത് സൂര്യനിൽ നിന്ന് ഏറ്റവും അകന്ന സ്ഥാനത്തായിരിക്കും ഇത്. സൂര്യനെ ആകാശത്ത് അല്പം ചെറുതായി കാണാൻ സാധിക്കും. അതേസമയം, ചന്ദ്രൻ പെരിജീയിൽ, അതായത് ഭൂമിയോട് ഏറ്റവും അടുത്തായിരിക്കും. അതിനാൽ ചന്ദ്രന് വലുതായി കാണാൻ ഇടയാക്കും. ഈ സംയോജനം സൂര്യനെ സാധാരണയേക്കാൾ കൂടുതൽ നേരം ചന്ദ്രന് മറയ്ക്കാൻ പറ്റും.
2025 ഓഗസ്റ്റ് 2-ന് സൂര്യഗ്രഹണം ഉണ്ടോ എന്ന ചർച്ച സജീവം
സമീപ വർഷങ്ങളിൽ ജ്യോതിശാസ്ത്രപരമായ സംഭവങ്ങളിൽ പൊതുജനങ്ങളുടെ ആകാംഷ വർധിച്ചതോടെ, ആഗസ്റ്റ് 2, 2025-ൽ സൂര്യഗ്രഹണം ഉണ്ടോ എന്ന ചോദ്യം സോഷ്യൽ മീഡിയയിലും ആകാശ നിരീക്ഷകർക്കിടയിലും സജീവ ചർച്ചാവിഷയമായി മാറി. 2025 ആഗസ്റ്റ് 2-ന് സൂര്യഗ്രഹണം ഉണ്ടാകില്ലെന്ന് ജ്യോതിശാസ്ത്രജ്ഞർ സ്ഥിരീകരിച്ചിട്ടുണ്ട്.
ഈ ആശയക്കുഴപ്പം തെറ്റിദ്ധരിക്കപ്പെട്ട ജ്യോതിശാസ്ത്ര കലണ്ടറുകളിൽ നിന്നോ, തെറ്റായി ലേബൽ ചെയ്ത ഓൺലൈൻ ഇൻഫോഗ്രാഫിക്സിൽ നിന്നോ, അല്ലെങ്കിൽ വർഷം തെറ്റിപ്പോയ ചില തെറ്റിദ്ധരിപ്പിക്കുന്ന സോഷ്യൽ മീഡിയ പോസ്റ്റുകളിൽ നിന്നോ ഉണ്ടായതാകാം എന്നാണ് വിദഗ്ധർ പറയുന്നത്. 2025 ഓഗസ്റ്റ് 2-ന് ഭൂമിയിൽ നിന്ന് ദൃശ്യമാകുന്ന ഒരു സൂര്യഗ്രഹണവും ഇല്ലെന്ന് ബഹിരാകാശ ഏജൻസികൾ ഉൾപ്പെടെയുള്ള ജ്യോതിശാസ്ത്രജ്ഞരുടെ സ്ഥിരീകരണം.
എവിടെ നിന്ന് ഇത് കാണാൻ കഴിയും?
ഈ ഗ്രഹണം യൂറോപ്പ്, ആഫ്രിക്ക, മിഡിൽ ഈസ്റ്റ് എന്നിവിടങ്ങളിലെ ചില ഭാഗങ്ങളിലൂടെയാണ് കടന്നുപോകുന്നത്. ഏകദേശം ആറ് മിനിറ്റോളം പല നഗരങ്ങളെയും പൂർണ്ണ ഇരുട്ടിലാഴ്ത്തുകയും ചെയ്യും. സ്പെയ്സ് അനുസരിച്ച്, 2114 വരെ ഭൂമിയുടെ കരപ്രദേശത്ത് നിന്നും ദൃശ്യമാകുന്ന ഏറ്റവും ദൈർഘ്യമേറിയ സൂര്യഗ്രഹണമാണ് ഇത്.
പൂർണ ഗ്രഹണത്തിന്റെ പാത അറ്റ്ലാന്റിക് സമുദ്രത്തിൽ ആരംഭിച്ച് തെക്കൻ സ്പെയിനിലൂടെയും ജിബ്രാൾട്ടറിലൂടെയും കടന്നുപോകുമെന്നാണ് ജ്യോതിശാസ്ത്രജ്ഞർ പറയുന്നത്. തുടർന്ന് വടക്കൻ ആഫ്രിക്കയിലേക്ക് നീങ്ങും, മൊറോക്കോ, അൾജീരിയ, ടുണീഷ്യ, ലിബിയ, ഈജിപ്ത് തുടങ്ങിയ രാജ്യങ്ങളിലൂടെയും കടന്നുപോകും. അവിടെ നിന്ന് ചെങ്കടലിലൂടെ കടന്ന് സൗദി അറേബ്യ, യെമൻ, സൊമാലിയയുടെ ചില ഭാഗങ്ങൾ എന്നിവിടങ്ങളിലേക്കാണ് പ്രവേശിക്കുക. ഈജിപ്തിലെ ലക്സറിൽ ആറ് മിനിറ്റിലധികം പൂർണ ഇരുട്ട് അനുഭവപ്പെടുമെന്നാണ് ശാസ്ത്രലോകം പ്രതീക്ഷിക്കുന്നത് .
ഇന്ത്യയിൽ ദൃശ്യമാകുമോ?
ഇന്ത്യയിൽ പൂർണ്ണ ഗ്രഹണം ദൃശ്യമാക്കില്ലെങ്കിലും , ഡൽഹി, മുംബൈ, ചെന്നൈ, കൊൽക്കത്ത, തിരുവനന്തപുരം ഉൾപ്പെടെ ഇന്ത്യയിലെ മിക്ക നഗരങ്ങളിലും ഭാഗിക സൂര്യഗ്രഹണം ദൃശ്യമാകും. ഇന്ത്യയിൽ ഏകദേശം വൈകുന്നേരം 3:34 പിഎം(ഐഎസ്ടി) മുതൽ 5:53 പിഎം(ഐഎസ്ടി) വരെയാണ് ഭാഗിക ഗ്രഹണം പ്രതീക്ഷിക്കുന്നത്. കാലാവസ്ഥ അനുകൂലമാണെങ്കിൽ, സൂര്യാസ്തമയം വരെ ഭാഗിക ഘട്ടം നീണ്ടുനിൽക്കുമെന്നും ജ്യോതിശാസ്ത്രജ്ഞർ പറയുന്നു.
നഗ്നനേത്രങ്ങൾ കൊണ്ട് നോക്കാൻ സാധിക്കുമോ?
സൂര്യഗ്രഹണം നഗ്നനേത്രങ്ങൾ കൊണ്ട് നോക്കുന്നത് കണ്ണിന് ഗുരുതരമായ കേടുപാടുകൾ വരുത്തും എന്നതിനാൽ ഗ്രഹണം കാണുമ്പോൾ എപ്പോഴും ഐഎസ്ഒ സർട്ടിഫിക്കേഷനുള്ള സോളാർ ഫിൽട്ടർ കണ്ണടകൾ ഉപയോഗിക്കുക. പിൻഹോൾ പ്രൊജക്ടറുകൾ പോലുള്ള പരോക്ഷ കാഴ്ചാരീതികളും സുരക്ഷിതമായിരിക്കും. സാധാരണ സൺഗ്ലാസുകളോ മറ്റ് ഫിൽട്ടറുകളോ ഒരു കാരണവശാലും ഉപയോഗിക്കരുത്. ടെലിസ്കോപ്പോ ബൈനോക്കുലറുകളോ ഉപയോഗിക്കുകയാണെങ്കിൽ അവയ്ക്ക് മുന്നിൽ പ്രത്യേകം സോളാർ ഫിൽട്ടറുകൾ ഘടിപ്പിക്കുക.
Tag: Discover the celestial event of total darkness on August 2. Learn when this rare phenomenon will occur in the sky and how to witness it.
