തുലാദി വിഷുവം വരെ സുഹൈല്‍ നക്ഷത്രം ഉദിക്കും, ഗള്‍ഫില്‍ ചൂട് കുറയും, കേരളത്തില്‍ മഴ കൂടുമോ
യു.എ.ഇ ഉള്‍പ്പെടെ ഗള്‍ഫ് രാജ്യങ്ങളില്‍ ഇത്തവണ കടുത്ത ചൂടായിരുന്നു. 10 ദിവസം കൊണ്ട് ഈ ചൂട് കുറഞ്ഞു തുടങ്ങുമെന്നാണ് പ്രവചനം. ഓഗസ്റ്റ് 24 ഓടെ സുഹൈല്‍ നക്ഷത്രം (Canopus Star) ഉദിക്കുന്നതോടെയാണിത്. ഇന്ത്യയിലെ കാലവര്‍ഷവുമായും സുഹൈല്‍ നക്ഷത്രത്തിന് ബന്ധമുണ്ട്. കാലവര്‍ഷം തെക്കോട്ട് ഷിഫ്റ്റ് ആകുന്നത് കേരളത്തില്‍ മഴ കൂട്ടാന്‍ ഇടയാക്കും.
ഉത്തരാര്‍ധ ഗോളത്തില്‍ ഋതുമാറ്റത്തിന്റെ ലക്ഷണമാണ് സുഹൈല്‍ നക്ഷത്രത്തിന്റെ ഉദയം. നിലവില്‍ ഭൂമിയുടെ ഉത്തരാര്‍ധ ഗോളത്തില്‍ വേനല്‍ക്കാലമാണ്. കേരളവും മറ്റു ഇന്ത്യന്‍ സംസ്ഥാനങ്ങളും ഗള്‍ഫ് രാജ്യങ്ങളും ഉത്തരാര്‍ധ ഗോളത്തിലാണ്. കേരളത്തില്‍ ആദ്യം കാലവര്‍ഷം എത്തിയതോടെയാണ് വേനല്‍മാറി മഴ ലഭിച്ചത്.
കേരളത്തിനു മുകളില്‍ കാലവര്‍ഷക്കാറ്റ് മേഘങ്ങളെ പന്തല്‍പോലെ മറയ്ക്കുന്നു. ജൂണില്‍ കേരളത്തില്‍ മഴ ആയിരുന്നെങ്കിലും ഉത്തരേന്ത്യയില്‍ കൊടുംചൂടായിരുന്നു. 100 ലേറെ പേര്‍ ഉഷ്ണത്തില്‍ മരിച്ചു. ഇതിനു കാരണം അപ്പോള്‍ കാലവര്‍ഷക്കാറ്റ് അവിടെ എത്തിയിരുന്നില്ല എന്നതാണ്.
കാലവര്‍ഷം ഉത്തരേന്ത്യയില്‍ എത്തിയപ്പോള്‍ അവിടെയും മഴ ലഭിച്ചു, ചൂടു കുറഞ്ഞു. കാരണം മേഘങ്ങള്‍ അവിടെ പന്തലിട്ടു. മ്യാന്‍മറിലും ബംഗ്ലാദേശിലും ശ്രീലങ്കയിലുമെല്ലാം മണ്‍സൂണ്‍ സീസണ്‍ ആയതിനാലാണ് ചൂട് വലിയ തോതില്‍ അനുഭവപ്പെടാത്തത്. എന്നാല്‍ കാലവര്‍ഷ മേഘങ്ങള്‍ എത്താത്ത ഗള്‍ഫില്‍ കൊടുംചൂട് തുടരുകയാണ്.
കേരളത്തില്‍ മണ്‍സൂണ്‍ ബ്രേക്ക് ഇത്തവണ ഉണ്ടായിട്ടില്ല. ബ്രേക്ക് ഉണ്ടാകുമ്പോള്‍ കുറച്ചു ദിവസം പൊള്ളുന്ന ചൂട് അനുഭവപ്പെടുന്നത് കേരളത്തിനു മുകളില്‍ ഗള്‍ഫിലെ പോലെ വേനലായതിനാലാണ്. കാലവര്‍ഷക്കാറ്റ് ദുര്‍ബലമാകുമ്പോഴാണ് കേരളത്തില്‍ കര്‍ക്കിടകത്തില്‍ കുറച്ചു ദിവസം ആനത്തോല്‍ ഉണക്കുന്ന എന്ന് പഴമക്കാര്‍ പറയുന്ന വെയില്‍ (മണ്‍സൂണ്‍ ബ്രേക്ക്) ഉണ്ടാകുന്നത്.
ഉത്തരാര്‍ധ ഗോളത്തിലെ വേനല്‍
ഏതായാലും ഉത്തരാര്‍ധ ഗോളത്തിലെ വേനല്‍ക്കാലം ജൂണ്‍ മുതല്‍ ഓഗസ്റ്റ് വരെയാണ്. (കേരളത്തിലും മറ്റു ഇന്ത്യന്‍ സംസ്ഥാനങ്ങളിലും യഥാര്‍ഥത്തില്‍ വേനലാണെങ്കിലും മണ്‍സൂണ്‍ ഉള്ളതിനാല്‍ അനുഭവപ്പെടുന്നില്ലെന്ന് മാത്രം). ഭൂമിയുടെ ചരിവും സൂര്യനില്‍ നിന്നുള്ള അകലവും ഈ മാസങ്ങളില്‍ അടുത്തുവരുന്നതാണ് വേനല്‍ കനക്കാന്‍ കാരണം. ഒരു വര്‍ഷം കൊണ്ട് ഭൂമി സൂര്യനെ പരിക്രമണം ചെയ്യുമ്പോള്‍ ഈ മാസങ്ങളിലാണ് സൂര്യനോട് ഏറ്റവും അടുത്ത് കടന്നുപോകുന്നത്.
ഗള്‍ഫിലെ വേനല്‍ക്കാലം
ജൂലൈയിലും ഓഗസ്റ്റിലുമാണ് ഗള്‍ഫിലും മറ്റു അറബ് രാജ്യങ്ങളിലും വേനല്‍ ശക്തമാകുന്നത്. ജോര്‍ദാന്‍, ഈജിപ്ത്, ഖത്തര്‍, യു.എ.ഇ എന്നിവിടങ്ങളിലാണ് ഇത്തവണ റെക്കോര്‍ഡ് ചൂട് തിരുത്തപ്പെട്ട ലൊക്കേഷനുകള്‍.
എന്താണ് സുഹൈല്‍ നക്ഷത്രം ( Canopus Star)
സുഹൈല്‍ നക്ഷത്രം ദക്ഷിണ ആകാശഗോളത്തിലെ ഒരു നക്ഷത്ര സമൂഹമായ കാനിസ് മേജറിലെ (Canis Major) രണ്ടാമത്തെ വലിയ നക്ഷത്രമാണിത്. ഏറ്റവും തിളക്കമുള്ള നക്ഷത്രം സിറിയസ് ആണ്. Canopus Star എന്നാണ് സുഹൈല്‍ നക്ഷത്രം അറിയപ്പെടുന്നത്. രാത്രി ആകാശത്ത് തിളക്കമുള്ള നക്ഷത്രമായി സുഹൈലിനെ കാണാം. ഭൂമിയില്‍ നിന്ന് 310 പ്രകാശവര്‍ഷം അകലെയാണ് ഇത് സ്ഥിതി ചെയ്യുന്നത്. 27 ദശലക്ഷം വര്‍ഷം പഴക്കമുള്ളതാണ് Canis Major ഈ നക്ഷത്രസമൂഹം.
രണ്ടാം നൂറ്റാണ്ടില്‍ ടോളമിയുടെ 48 നക്ഷത്ര രാശികളില്‍ ഇത് ഉള്‍പ്പെടുത്തിയിട്ടുണ്ട്. വലിയ നായ എന്നാണ് കാനിസ് മേജര്‍ എന്ന പദത്തിന്റെ ലാറ്റിന്‍ അര്‍ഥം. ഈ നക്ഷത്ര സമൂഹത്തെ കൂട്ടിയോജിപ്പിച്ചാല്‍ ഒരു നായ നില്‍ക്കുന്ന രൂപമാണ് ലഭിക്കുക. ക്ഷീരപഥവും കാനിസ് മേജറിലൂടെയാണ് കടന്നുപോകുന്നത്.
കാലാവസ്ഥയില്‍ എന്തു സംഭവിക്കും
സുഹൈല്‍ നക്ഷത്രം ഉദിച്ചാല്‍ കാലാവസ്ഥാ മാറ്റമുണ്ടാകുമെന്നാണ് അറേബ്യന്‍ കാലാവസ്ഥാ നിരീക്ഷകരും പറയുന്നത്. ഋതുമാറ്റത്തിന് ഭൂമിയുടെയും സൂര്യന്റെയും സ്ഥാനമാറ്റം കാരണമാകുന്നുണ്ട്. ഭൂമിയില്‍ നിന്ന് നോക്കുന്നയാള്‍ക്ക് ഭൂമിയു കറങ്ങി എവിടെയെത്തി എന്ന് അറിയാനുള്ള വഴി സൂര്യന്റെയോ മറ്റു നക്ഷത്രങ്ങളുടെയോ സ്ഥാനം എവിടെ എന്ന് നിരീക്ഷിക്കുക മാത്രമാണ് വഴി. ഉദാഹരണത്തിന് ബസില്‍ പോകുന്നയാള്‍ സ്ഥലം എത്തിയോ എന്നറിയാന്‍ ബസിന്റെ വിന്‍ഡോ ഷട്ടര്‍ തുറന്ന് നോക്കുന്നതുപോലെ. മറ്റു നക്ഷത്ര സമൂഹങ്ങളുടെ സാന്നിധ്യം കാണുന്നത് അഥവാ നക്ഷത്രം ഉദിക്കുന്നത് ഭൂമിയിലുള്ള നാം അവിടെ കറങ്ങി എത്തുന്നത് കൊണ്ടാണ്.
ഭൂമി സൂര്യനില്‍ നിന്ന് അകലം മാറുന്നത് അനുസരിച്ചാണ് ഭൂമിയിലെ ഋതുക്കള്‍ (സീസണ്‍) മാറുന്നത്. സോളാര്‍ റേഡിയേഷനാണ് നമ്മുടെ കാലാവസ്ഥയെ നിര്‍ണയിക്കുന്ന പ്രധാന ഘടകങ്ങളിലൊന്ന്. ഭൂമിയുടെ സാങ്കല്‍പിക അച്ചുതണ്ടിലെ 23.5 ഡിഗ്രി ചെരിവാണ് ഭൂമിയില്‍ കാലാവസ്ഥയുണ്ടാക്കുന്നതും.
തുലാദി വിഷുവം വരെ സുഹൈല്‍ കാണാം
സുഹൈല്‍ നക്ഷത്രം ഓഗസ്റ്റ് 24ന് ഉദിക്കും. സെപ്റ്റംബര്‍ 23 ന് തുലാദി വിഷുവം (Autumnal Equinox) വരെ ഇത് ആകാശത്ത് ദൃശ്യമാകും. ഈ സമയം സൂര്യപ്രകാശം നേരിട്ട് ഭൂമധ്യരേഖാ പ്രദേശത്ത് പതിക്കുന്ന സമയമാണല്ലോ. കഴിഞ്ഞ മാര്‍ച്ചിലെ മഹാ വിഷുവത്തെ കുറിച്ചുള്ള പോസ്റ്റ് വായിച്ചാല്‍ കൂടുതല്‍ വ്യക്തമാകും. വിഷുവം നടക്കുമ്പോള്‍ ഉത്തര, ദക്ഷിണ അര്‍ധ ഗോളങ്ങളില്‍ സൂര്യപ്രകാശം തുല്യ അളവിലാണ് ലഭിക്കുക. ഓഗസ്റ്റ് 24 മുതല്‍ സുഹൈല്‍ നക്ഷത്രം ഉദിക്കുമെന്ന് എമിറേറ്റ്‌സ് അസ്‌ട്രോണമിക്കല്‍ സൊസൈറ്റി ചെയര്‍മാന്‍ ഇബ്രാഹീം അല്‍ ജര്‍വാന്‍ പറഞ്ഞു.
കാലാവസ്ഥാ പരിവര്‍ത്തന കാലം
ചൂടില്‍ നിന്ന് ശൈത്യത്തിലേക്കുള്ള കാലാവസ്ഥാ പരിവര്‍ത്തന കാലം (Transitional weather ) തുടങ്ങുന്നത് ഓഗസ്റ്റ് 24 ഓടെയാണ്. ഇതിന് അറബികള്‍ ‘സുഫ്‌രിയ’ എന്നാണ് വിളിക്കുന്നത്. തീവ്രമായ ഉഷ്ണക്കാലത്തിന്റെയും തണുത്ത ശൈത്യകാലത്തിന്റെയും ഇടയിലുള്ള കാലയളവാണിത്.
ഓക്ടോബര്‍ പകുതിയോടെ കാലാവസ്ഥ സ്ഥിരമായ തണുപ്പിലേക്ക് എത്തും. ഈ കാലാവസ്ഥയെയാണ് അറബികള്‍ ‘വസം’ എന്നു വിളിക്കുന്നത്.
ശൈത്യകാലത്തിന് 100 ദിവസം
സുഹൈല്‍ നക്ഷത്രം ഉദിച്ച് 100 ദിവസം കഴിയുമ്പോഴാണ് ശൈത്യകാലം തുടങ്ങുക. എന്നാല്‍ ഓഗസ്റ്റ് 24 മുതല്‍ രാത്രി താപനിലയില്‍ കുറവ് അനുഭവപ്പെടും. പരമ്പരാഗത അറബി കലണ്ടറായ ദുറൂറില്‍ സുഹൈല്‍ നക്ഷത്രത്തെ പ്രതിപാദിക്കുന്നുണ്ട്. യമനിന്റെ നക്ഷത്രം എന്നും സുഹൈല്‍ അറിയപ്പെടാറുണ്ട്.
കേരളത്തില്‍ മഴ കനക്കുമോ?
സുഹൈല്‍ നക്ഷത്രം ഉദിക്കുന്നതോടെ ഇന്ത്യന്‍ മണ്‍സൂണിന്റെ വിടവാങ്ങല്‍ സൂചനയാണ് നല്‍കുക. ഉത്തരേന്ത്യയിലും മറ്റും (ഉയര്‍ന്ന അക്ഷാംശ രേഖാ പ്രദേശങ്ങളില്‍) നിന്ന് കാലവര്‍ഷം വിടവാങ്ങാനുള്ള തയാറെടുപ്പുകള്‍ നടത്തും. ഈ മേഖലയിലെ കാലവര്‍ഷക്കാറ്റിന്റെ ശക്തി ദുര്‍ബലമാകുകയും തെക്കന്‍ ഇന്ത്യയില്‍ കാലാവര്‍ഷം സജീമാകുകയും ചെയ്യും.
അറബികള്‍ ‘കൗസ്’ എന്നു വിളിക്കുന്ന ഈര്‍പ്പം കൂടിയ കാറ്റ് ഒമാനിലെ ഹജര്‍മലനിരകളില്‍ മഴ നല്‍കും. യു.എ.ഇ, ഒമാന്‍ രാജ്യങ്ങളുടെ കിഴക്കന്‍ പര്‍വത താഴ് വരകളില്‍ ഈ കാറ്റ് മഴ നല്‍കും. ഇന്ത്യയിലെ കാലാവര്‍ഷ കാറ്റിന് സമാനമായ കാറ്റാണിത്.
കാലാവസ്ഥ അപ്‌ഡേറ്റായിരിക്കാന്‍ താഴെ കൊടുത്ത ഞങ്ങളുടെ ഗ്രൂപ്പുകളില്‍ ചേരാം.
വാട്‌സ്ആപ്
ടെലഗ്രാം
വാട്‌സ്ആപ്പ് ചാനല്‍
Google News
Facebook Page
Weatherman Kerala Fb Pag
