മുല്ലപ്പെരിയാര്‍ ഡാം തുറന്നു; പെരിയാര്‍ തീരത്തുള്ളവര്‍ ജാഗ്രത പാലിക്കുക
ഇടുക്കി മുല്ലപ്പെരിയാർ ഡാം തുറന്നു. 13 ഷട്ടറുകള്‍ ആണ് തുറന്നത്. 10 സെ.മീ വീതമാണ് ഷട്ടര്‍ തുറന്നിട്ടുള്ളത്. സെക്കന്‍ഡില്‍ 250 ഘനയടി വെള്ളമാണ് ഒഴുക്കിവിടുക. ജലനിരപ്പ് റൂൾ കർവ് പരിധിയായ 136 അടിയിൽ എത്തിയതിനെ തുടര്‍ന്നാണ് ഡാം തുറന്നിട്ടുള്ളത്. ഇന്നലെ രാത്രി 10 മണിയോടെ തന്നെ ജലനിരപ്പ് 136 അടിയില്‍ എത്തിയിട്ടുണ്ടായിരുന്നു. രാത്രിയിൽ അണക്കെട്ട് തുറക്കരുതെന്ന് കോടതി ഉത്തരവ് ഉള്ളതിനാലും ഇടുക്കി ജില്ല ഭരണകൂടത്തിന്റെ നിർദ്ദേശം പരിഗണിച്ചുമാണ് ഉച്ചയ്ക്ക് 12 മണിക്ക് ഡാം തുറന്നത്. ഇന്ന് രാവിലെ ജലനിരപ്പ് 136.10 അടിയായി ഉയരുകയും ചെയ്തിട്ടുണ്ട്.
3,707 ഘനയടി വെളളമാണ് ഡാമിലേക്ക് ഒഴുകിയെത്തുന്നത്. തമിഴ്നാട് കൊണ്ടുപോകുന്നത് സെക്കന്‍റില്‍ 2,117 ഘനയടി വെള്ളമാണ്. ഷട്ടറുകള്‍ ഉയര്‍ത്തിയെങ്കിലും പെരിയാർ നദിയിൽ ജലനിരപ്പ് കുറവായതിനാൽ വീടുകളിലേക്ക് വെള്ളം കയറാൻ സാധ്യതയില്ല. ആശങ്ക വേണ്ടെന്ന് ജില്ലാ കലക്ടര്‍ അറിയിച്ചിട്ടുണ്ട്. എങ്കിലും പെരിയാർ തീരത്ത് താമസിക്കുന്നവര്‍ ജാഗ്രത പാലിക്കണമെന്ന് ജില്ലാ ഭരണകൂടം നിർദ്ദേശിച്ചിട്ടുണ്ട്.
Tag:Mullaperiyar dam opened; people on the banks of Periyar should be careful
