ഹാക്കത്തോൺ–2026 സംഘടിപ്പിച്ചു

സുവോളജിക്കൽ സർവേ ഓഫ് ഇന്ത്യയുടെ (ZSI) 111-ാമത് സ്ഥാപകദിനാഘോഷങ്ങളുടെ ഭാഗമായി കോഴിക്കോട് പ്രവർത്തിക്കുന്ന വെസ്റ്റേൺ ഘട്ട് റീജിയണൽ സെന്റർ (WGRC), 2026 ജൂൺ 1-ന് "കേരള, കർണാടക സംസ്ഥാനങ്ങളിലെ പരമ്പരാഗത ജൈവ വൈവിധ്യ അറിവുകൾ" എന്ന വിഷയത്തെ ആസ്പദമാക്കി ഹാക്കത്തോൺ–2026 സംഘടിപ്പിച്ചു.
കേന്ദ്രത്തിന്റെ ചുമതലക്കാരനും സയന്റിസ്റ്റ്–എഫുമായ ഡോ. വിശ്വനാഥ് ഡി. ഹെഗ്ഡെ പരിപാടിയിൽ അധ്യക്ഷത വഹിച്ചു.

സെൻട്രൽ മറൈൻ ഫിഷറീസ് റിസർച്ച് ഇൻസ്റ്റിറ്റ്യൂട്ടിന്റെ (CMFRI) മുൻ മേധാവിയും പ്രിൻസിപ്പൽ സയന്റിസ്റ്റുമായ ഡോ. പി. കെ. അശോകൻ, കോഴിക്കോട് ഒളവണ്ണയിലെ മലബാർ ബൊട്ടാണിക്കൽ ഗാർഡൻ ആൻഡ് ഇൻസ്റ്റിറ്റ്യൂട്ട് ഓഫ് പ്ലാന്റ് സയൻസസിന്റെ ഡയറക്ടർ ഡോ. എൻ. എസ്. പ്രദീപ്, കോഴിക്കോട് പേരാമ്പ്ര സി.കെ.ജി.എം. ഗവൺമെന്റ് കോളേജിലെ ഗണിതശാസ്ത്ര വിഭാഗം മേധാവി ഡോ. കെ. പി. പ്രിയദർശൻ, കേന്ദ്രത്തിലെ ശാസ്ത്രജ്ഞനായ ഡോ. മുഹമ്മദ് ജാഫർ പാലോട്ട് എന്നിവർ മുഖ്യ വിധികർത്താക്കളായി പങ്കെടുത്തു. കേന്ദ്രത്തിലെ ശാസ്ത്രജ്ഞരായ ഡോ. എൽ. ബിന്ദു, ഡോ. പി. ഗിരീഷ് കുമാർ, എന്നിവർ സംസാരിച്ചു.

കേരളത്തിലും കർണാടകയിലുമുള്ള വിവിധ വിദ്യാഭ്യാസ സ്ഥാപനങ്ങളെ പ്രതിനിധീകരിച്ച് മൂന്ന് അംഗങ്ങൾ വീതമുള്ള എട്ട് ടീമുകൾ ഹാക്കത്തോണിൽ പങ്കെടുത്തു. ഇരു സംസ്ഥാനങ്ങളിലെയും ജൈവവൈവിധ്യവുമായി ബന്ധപ്പെട്ട പരമ്പരാഗത അറിവുകളുടെ രേഖപ്പെടുത്തൽ, സംരക്ഷണം, പ്രചരണം എന്നിവ ലക്ഷ്യമിട്ട് നവീന ആശയങ്ങളും സാങ്കേതിക പരിഹാരങ്ങളും ടീമുകൾ അവതരിപ്പിച്ചു.
ഡോ. വി. ഡി. ഹെഗ്ഡെയുടെ അധ്യക്ഷതയിൽ അഞ്ചംഗ വിധിനിർണയ സമിതി അവതരണങ്ങൾ വിലയിരുത്തി.

ബെംഗളൂരുവിലെ ആർ. വി. കോളേജ് ഓഫ് എഞ്ചിനീയറിംഗിലെ യാഷ് സരോഗിയുടെ നേതൃത്വത്തിലുള്ള സംഘം അവതരിപ്പിച്ച “Arivu – The Knowledge That Talks Back” എന്ന പ്രോജക്ട് ഒന്നാം സമ്മാനം നേടി.
കേരള യൂണിവേഴ്സിറ്റി ഓഫ് ഫിഷറീസ് ആൻഡ് ഓഷ്യൻ സ്റ്റഡീസിന്റെ (KUFOS) ഡോ. സി. പി. ഷാജിയുടെ നേതൃത്വത്തിലുള്ള സംഘം അവതരിപ്പിച്ച “Traditional Knowledge on Freshwater Fish and Fisheries of Kerala” എന്ന പ്രോജക്ടിന് രണ്ടാം സമ്മാനം ലഭിച്ചു.
കോഴിക്കോട് ബാലുശ്ശേരി ഗവൺമെന്റ് ഹയർ സെക്കൻഡറി സ്കൂളിലെ അവനി ചന്ദ്രയുടെ നേതൃത്വത്തിലുള്ള സംഘം അവതരിപ്പിച്ച “Biowave – A Mobile App for Traditional Knowledge Associated with Biodiversity of Kerala” എന്ന പ്രോജക്ട് മൂന്നാം സമ്മാനം നേടി.

English Summary : The Western Ghats Regional Centre (WGRC) of the Zoological Survey of India (ZSI) hosted Hackathon–2026 in Kozhikode on June 1, 2026, marking ZSI's 111th Foundation Day. Centered around "Traditional Biodiversity Knowledge of Kerala and Karnataka," the event challenged student teams to create modern tech solutions for documenting and preserving indigenous ecological data.