മലവെള്ളപ്പാച്ചിലിൽ കാണാതായ സജിതയുടെ മൃതദേഹം കണ്ടെത്തി

മലപ്പുറം കോട്ടപ്പുഴയിൽ മലവെള്ളപ്പാച്ചിലിൽ കാണാതായ ടി.കെ. ഉന്നതിയിലെ സജിതയുടെ മൃതദേഹം കണ്ടെത്തി. ഇതോടെ അപകടത്തിൽ കാണാതായ മുഴുവൻ പേരുടെയും മൃതദേഹങ്ങൾ കണ്ടെത്തിയതായി അധികൃതർ സ്ഥിരീകരിച്ചു.

അഞ്ച് പേരുടെ മൃതദേഹങ്ങൾ നേരത്തെ കണ്ടെത്തിയിരുന്നു. സജിതയുടെ മൃതദേഹം കൂടി കണ്ടെത്തിയതോടെ പ്രദേശത്ത് നടത്തിവന്ന തിരച്ചിൽ അവസാനിപ്പിച്ചു. വണ്ടൂർ സ്വദേശി കുപ്പനത്ത് സജാദ് (23), കരുവാരകുണ്ട് തരിശ് സ്വദേശി സ്രാമ്പിക്കൽ റഹീം (30) കോട്ടക്കൽ എടരിക്കോട് സ്വദേശി മങ്ങാടൻ ഹമീദിന്റെ മകൻ അനസ് യാസീൻ (25), തിരൂർ സ്വദേശി പരന്നപറമ്പൻ മുഹമ്മദ് കുട്ടി (65), കുറ്റിപ്പുറം സ്വദേശി റഹീം എന്നിവരുടെ മൃതദേഹങ്ങൾ കണ്ടെത്തിയിരുന്നു

മലവെള്ളപ്പാച്ചിലിൽ ആറ് പേരാണ് മരിച്ചത്. മൃതദേഹങ്ങൾ കണ്ടെത്തുന്നതിനായി ഫയർഫോഴ്സ്, എൻഡിആർഎഫ്, പൊലീസ്, വിവിധ സന്നദ്ധസംഘടനകൾ, നാട്ടുകാർ എന്നിവരുടെ നേതൃത്വത്തിൽ വ്യാപക തിരച്ചിലാണ് നടത്തിയത്.

ദുരന്തമുഖത്ത് നിന്ന് ഒഴുക്കിൽപ്പെട്ട മൂന്ന് പേരെ രക്ഷപ്പെടുത്തിയിരുന്നു.
അപകടസമയത്ത് പുഴയോരത്ത് മഴയുണ്ടായിരുന്നില്ല. എന്നാൽ വനമേഖലയിൽ ശക്തമായ മഴ പെയ്തതിനെ തുടർന്ന് പുഴയിലെ ജലനിരപ്പും ഒഴുക്കും പെട്ടെന്ന് ഉയർന്നതാണ് മലവെള്ളപ്പാച്ചിലിന് കാരണമായതെന്ന് അധികൃതർ വ്യക്തമാക്കി.

English Summary : The body of Sajitha, the final missing victim of the devastating flash floods in Kottappuzha, Malappuram, has been recovered. With this discovery, authorities have officially confirmed the conclusion of the search operations, bringing the total death toll from the tragedy to six.