ഇന്ന് കേരളത്തിൽ ഏഴ് ജില്ലകളിൽ മഞ്ഞ അലർട്ട് ; ഈ സംസ്ഥാനങ്ങളിൽ ശക്തമായ മഴയ്ക്ക് സാധ്യത

കേരളത്തിൽ ഇന്ന് ചില ജില്ലകളിൽ മഴയ്ക്ക് സാധ്യത. ഒക്ടോബർ 26, 27 തീയതികളിൽ കേരളത്തിലും മാഹിയിലും ലക്ഷദ്വീപിലും വ്യാപകമായി മഴ ലഭിക്കുമെന്നാണ് മുന്നറിയിപ്പ്. ഇന്ന് ഏഴ് ജില്ലകളിൽ മഞ്ഞ അലർട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് മഞ്ഞ അലർട്ട്.

ഒറ്റപ്പെട്ടയിടങ്ങളിൽ ശക്തമായ മഴയ്ക്കുള്ള സാധ്യതയാണ് ഈ ജില്ലകളിൽ പ്രവചിച്ചിരിക്കുന്നത്.

കേരളത്തിൽ അതിശക്തമായ മഴയ്ക്ക് സാധ്യത

ഒക്ടോബർ 26ന് കേരളത്തിലും തമിഴ്നാട്ടിലും ഒറ്റപ്പെട്ടയിടങ്ങളിൽ അതിശക്തമായ മഴ ലഭിച്ചേക്കും. കേരളത്തിലും മാഹിയിലും ലക്ഷദ്വീപിലും 26, 27 തീയതികളിൽ വ്യാപക മഴയ്ക്കാണ് സാധ്യത. തമിഴ്നാട്, പുതുച്ചേരി, കാരയ്ക്കൽ മേഖലകളിലും ഇന്ന് വ്യാപക മഴ ലഭിച്ചേക്കും.

ഇടിമിന്നലും ശക്തമായ കാറ്റും

മഴയ്ക്കൊപ്പം കേരളത്തിലും മാഹിയിലും ലക്ഷദ്വീപിലും ഇന്ന് ശക്തമായ വേഗത്തിൽ കാറ്റ് വീശാൻ സാധ്യതയുണ്ട്. ചിലയിടങ്ങളിൽ കാറ്റിന്റെ വേഗം മണിക്കൂറിൽ 50 കിലോമീറ്റർ വരെയാകാം.

തമിഴ്നാട്, പുതുച്ചേരി, കാരയ്ക്കൽ മേഖലകളിൽ ഒക്ടോബർ 26, 27 തീയതികളിൽ ഇടിമിന്നലോടുകൂടിയ മഴയ്ക്കും മണിക്കൂറിൽ 40 മുതൽ 50 കിലോമീറ്റർ വരെ വേഗത്തിൽ കാറ്റിനും സാധ്യതയുണ്ട്. തീരദേശ ആന്ധ്രപ്രദേശിൽ 26, 29 തീയതികളിലും തെലങ്കാനയിൽ 28നും സമാന കാലാവസ്ഥയ്ക്ക് സാധ്യതയുണ്ട്. റായലസീമയിൽ 26 മുതൽ 28 വരെ ഇടിമിന്നലിനും സാധ്യതയുണ്ട്.

Kerala Weather : ബംഗാൾ ഉൾക്കടലിൽ ‘അർണബ്’ചുഴലിക്കാറ്റ് ; 28ന് ആന്ധ്രാ തീരം തൊടും, നാളെ മഴ കുറയും
ബംഗാൾ ഉൾക്കടലിൽ രൂപപ്പെട്ട ന്യൂനമർദം ശക്തിപ്രാപിച്ച് ‘അർണബ്’ (Arnab) ചുഴലിക്കാറ്റായി മാറി.
https://metbeatnews.com/severe-cyclone-arnab-threatens-andhra-pradesh-landfall-timeline-weather-updates

ആന്ധ്രയിലും തെലങ്കാനയിലും അതിതീവ്ര മഴ

തീരദേശ ആന്ധ്രപ്രദേശിലും യാനത്തിലും ഒക്ടോബർ 27, 28 തീയതികളിൽ ഒറ്റപ്പെട്ടയിടങ്ങളിൽ അതിതീവ്ര മഴയ്ക്ക് സാധ്യതയുണ്ട്. തെലങ്കാനയിൽ 28നും അതിതീവ്ര മഴ മുന്നറിയിപ്പുണ്ട്. ഈ മേഖലകളിൽ മണിക്കൂറിൽ 70 മുതൽ 80 കിലോമീറ്റർ വരെ വേഗത്തിലും ചിലപ്പോൾ 90 കിലോമീറ്റർ വരെ വേഗത്തിലും കാറ്റ് വീശാനും സാധ്യതയുണ്ട്.

ഒക്ടോബർ 27 മുതൽ 31 വരെ കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിൽ ഒറ്റപ്പെട്ടയിടങ്ങളിൽ മഴ തുടരാനാണ് സാധ്യത. തീരദേശ കർണാടകയിൽ 27 മുതൽ 31 വരെയും വടക്കൻ ഉൾനാടൻ കർണാടകയിൽ 29 മുതൽ 31 വരെയും മഴ ലഭിച്ചേക്കും.

മഴയും ഇടിമിന്നലും ശക്തമായ കാറ്റും ഉണ്ടാകുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് മുന്നറിയിപ്പുണ്ട്

English Summary : The India Meteorological Department (IMD) has issued a yellow alert for seven southern districts in Kerala—Thiruvananthapuram, Kollam, Pathanamthitta, Alappuzha, Kottayam, Idukki, and Ernakulam—forecasting isolated heavy rainfall, thunderstorms, and strong gusty winds. Widespread rainfall is expected across Kerala, Mahe, and Lakshadweep on October 26 and 27.