മഴ കനക്കും; കേരളത്തിൽ ഇന്ന് ഏഴ് ജില്ലകളിൽ മഞ്ഞ അലർട്ട്

കേരളത്തിൽ ഇന്ന് (നവംബർ 8) വ്യാപക മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. തിരുവനന്തപുരം മുതൽ എറണാകുളം വരെയുള്ള ഏഴ് ജില്ലകളിൽ മഞ്ഞ അലർട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് മഞ്ഞ അലർട്ട്.
ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്.

കേരളത്തിലും മാഹിയിലും ലക്ഷദ്വീപിലും തമിഴ്‌നാട്, പുതുച്ചേരി, കാരയ്ക്കൽ മേഖലകളിലും ഇന്ന് പരക്കെ മഴ ലഭിക്കാൻ സാധ്യതയുണ്ട്. നവംബർ 9 മുതൽ 14 വരെ ഈ മേഖലകളിൽ ഒറ്റപ്പെട്ടതോ ചിതറിയതോ ആയ മഴയ്ക്കും സാധ്യതയുണ്ട്. നവംബർ 8 മുതൽ 10 വരെ കേരളത്തിലും മാഹിയിലും ഇടിമിന്നലോടുകൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർ വരെ വേഗത്തിൽ കാറ്റിനും സാധ്യതയുണ്ടെന്നും മുന്നറിയിപ്പുണ്ട്. നവംബർ 11, 12 തീയതികളിലും കേരളത്തിൽ ഒറ്റപ്പെട്ട ഇടിമിന്നലിന് സാധ്യതയുണ്ട്.

തമിഴ്‌നാട്, പുതുച്ചേരി, കാരയ്ക്കൽ മേഖലകളിൽ നവംബർ 8 മുതൽ 10 വരെ ഒറ്റപ്പെട്ട ശക്തമായ മഴയ്ക്കും കേരളത്തിലും മാഹിയിലും ഇന്ന് ശക്തമായ മഴയ്ക്കും സാധ്യതയുണ്ട്.

English Summary : The India Meteorological Department (IMD) has issued a yellow alert for seven districts in Kerala today, November 8, forecasting widespread and heavy rainfall.