കൃഷിയോഗ്യമല്ലെന്ന് കരുതിയ ഭൂമിയിൽ കുങ്കുമപ്പൂക്കാലം; മഞ്ഞുമലകൾക്കിടയിൽ അദ്ഭുതകാഴ്ച്ച

കൃഷിക്ക് അനുയോജ്യമല്ലെന്ന് കരുതിയിരുന്ന തരിശുഭൂമിയിൽ ലോകത്തിലെ ഏറ്റവും വിലയേറിയ സുഗന്ധവ്യഞ്ജനങ്ങളിലൊന്നായ കുങ്കുമപ്പൂവ് വിരിയിച്ച് ശ്രദ്ധ നേടുകയാണ് ലഡാക്ക്. മഞ്ഞുമലകളുടെ നാടായ ലഡാക്കിലെ തണുത്ത മരുഭൂമിയിൽ ആണ് പ്രതീക്ഷയുടെ പുതിയ പൂക്കൾ വിരിഞ്ഞത്. പരീക്ഷണാടിസ്ഥാനത്തിൽ ആരംഭിച്ച കൃഷിയിൽ കിഴങ്ങുകൾ നട്ട് വെറും 30 ദിവസത്തിനുള്ളിൽ തന്നെ ആദ്യ പൂക്കൾ വിരിഞ്ഞു. രണ്ടുമാസത്തിനുള്ളിൽ വിളവെടുപ്പ് പ്രതീക്ഷിച്ചിരുന്ന അധികൃതരെയും ഈ നേട്ടം അത്ഭുതപ്പെടുത്തി.

Saffron Blooms in Barren Ladakh DC - Image

നട്ടത് 90,000 ഇറാനിയൻ കുങ്കുമപ്പൂ കിഴങ്ങുകൾ

ലേയിലെ സ്‌പിതുക് ഫാർകയിൽ ഏകദേശം 4,000 ചതുരശ്രമീറ്റർ സ്ഥലത്താണ് കുങ്കുമപ്പൂ കൃഷി പരീക്ഷണം നടത്തുന്നത്. ലഡാക്ക് ലെഫ്റ്റനന്റ് ഗവർണർ വി.കെ. സക്‌സേനയുടെ നേതൃത്വത്തിൽ ആരംഭിച്ച പദ്ധതിയുടെ ഭാഗമായി ഒക്ടോബർ ഒന്നിന് 800 കിലോഗ്രാം ഭാരമുള്ള ഏകദേശം 90,000 ഇറാനിയൻ കുങ്കുമപ്പൂ കിഴങ്ങുകളാണ് ഇവിടെ നട്ടത്.

നാല് ദിവസത്തിനിടെ ഏകദേശം 22 ഗ്രാം കുങ്കുമപ്പൂവ് ശേഖരിച്ചതായി അധികൃതർ അറിയിച്ചു. സാധാരണയായി പ്രതിദിനം 20 മുതൽ 25 വരെ പൂക്കളാണ് വിരിഞ്ഞിരുന്നത്. എന്നാൽ കഴിഞ്ഞ ഞായറാഴ്ച മാത്രം 72 പൂക്കൾ വിരിഞ്ഞു. പരീക്ഷണം ആരംഭിച്ചതിന് ശേഷമുള്ള ഏറ്റവും ഉയർന്ന ഏകദിന കണക്കാണിത്.

പ്രതികൂല കാലാവസ്ഥയിലും ഉയർന്ന വിപണിമൂല്യമുള്ള വിളകൾ കൃഷി ചെയ്യാനാകുമെന്ന പ്രതീക്ഷയാണ് ഈ പരീക്ഷണം നൽകുന്നതെന്ന് വി.കെ. സക്‌സേന വ്യക്തമാക്കി. വാണിജ്യാടിസ്ഥാനത്തിൽ കുങ്കുമപ്പൂ കൃഷി വ്യാപിപ്പിക്കാനായാൽ കർഷകർക്കും പ്രാദേശിക സംരംഭകർക്കും പുതിയ വരുമാനമാർഗങ്ങൾ തുറക്കാനാകുമെന്നാണ് വിലയിരുത്തൽ.

‘ഹിം സരോവർ’ പദ്ധതി

കുങ്കുമപ്പൂ കൃഷി മാത്രമല്ല പദ്ധതിയുടെ ലക്ഷ്യം. തരിശും കൃഷിക്ക് അനുയോജ്യമല്ലാത്തതുമായിരുന്ന ഭൂമിയെ ‘ഹിം സരോവർ’ പദ്ധതിയുടെ ഭാഗമായി പുനരുജ്ജീവിപ്പിച്ച ശേഷമാണ് കൃഷി ആരംഭിച്ചത്.

പ്രതിവർഷം 100 മില്ലിമീറ്ററിൽ താഴെ മാത്രം മഴ ലഭിക്കുന്ന ലഡാക്കിൽ തരിശുഭൂമിയെ കൃഷിയോഗ്യമാക്കുക വലിയ വെല്ലുവിളിയാണ്. ഈ സാഹചര്യത്തിലാണ് കുങ്കുമപ്പൂവിന്റെ ആദ്യ വിളവ് പുതിയ പ്രതീക്ഷകൾക്ക് വഴിതുറക്കുന്നത്.

ഇന്ത്യയിലെ കുങ്കുമപ്പൂ കൃഷിയുടെ പ്രധാന കേന്ദ്രം ജമ്മു കശ്മീരാണ്. രാജ്യത്തെ ആകെ ഉൽപാദനത്തിന്റെ ഏകദേശം 90 ശതമാനവും ജമ്മു കശ്മീരിൽ നിന്നാണെന്നാണ് ലഡാക്ക് ഭരണകൂടത്തിന്റെ കണക്ക്. ഓരോ കുങ്കുമപ്പൂവിൽനിന്നും ലഭിക്കുന്നത് വെറും മൂന്ന് ചുവന്ന സ്റ്റിഗ്മകൾ മാത്രമാണ്. ഇവ കൈകൊണ്ട് ശ്രദ്ധാപൂർവം ശേഖരിച്ച് സംസ്‌കരിക്കണം. അതിനാൽ ഉയർന്ന വിപണിമൂല്യമുള്ള വിളയാണെങ്കിലും കുങ്കുമപ്പൂ കൃഷിക്ക് ഏറെ അധ്വാനം ആവശ്യമാണ്.

ലക്ഷ്യം, അധിക വരുമാനമാർഗങ്ങൾ സൃഷ്ടിക്കുക

ലഡാക്കിൽ കുങ്കുമപ്പൂ കൃഷി പരീക്ഷിക്കുന്നത് ഇതാദ്യമല്ല. 2025 മാർച്ചിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് ഇന്റഗ്രേറ്റീവ് മെഡിസിനിലെ (CSIR) ശാസ്ത്രജ്ഞർ രണ്ടുവർഷമായി ലഡാക്കിൽ കുങ്കുമപ്പൂ കൃഷിയിൽ പരീക്ഷണം നടത്തിവരുന്നതായി ഭരണകൂടം അറിയിച്ചിരുന്നു. ലേ, കാർഗിൽ മേഖലകളിൽ കൃഷിക്ക് അനുയോജ്യമായ സ്ഥലങ്ങളും അന്ന് പരിശോധിച്ചിരുന്നു.

കുങ്കുമപ്പൂവിന് പുറമെ ലിലിയം, ഗ്ലാഡിയോലസ് തുടങ്ങിയ ഉയർന്ന വിപണിമൂല്യമുള്ള പൂക്കളുടെ കൃഷിയിലും ലഡാക്ക് പരീക്ഷണം നടത്തുന്നുണ്ട്. കർഷകർക്കും സ്വയംസഹായ സംഘങ്ങൾക്കും പ്രാദേശിക സംരംഭകർക്കും അധിക വരുമാനമാർഗങ്ങൾ സൃഷ്ടിക്കുകയാണ് ലക്ഷ്യം. തണുത്ത മരുഭൂമിയിലെ തരിശുഭൂമിയിൽ വിരിഞ്ഞ കുങ്കുമപ്പൂക്കൾ ലഡാക്കിന്റെ കാർഷികമേഖലയ്ക്ക് പുതിയ സാധ്യതകളാണ് തുറന്നുനൽകുന്നത്.

English Summary : In a major breakthrough for cold-desert agriculture, Ladakh has successfully cultivated saffron—one of the world's most expensive spices—on land previously deemed uncultivable. Under the initiative led by Ladakh Lieutenant Governor V.K. Saxena, a trial project was launched in Spituk Pharka, Leh, spanning 4,000 square meters.