കഴിഞ്ഞ ദിവസം വടക്കന്‍ ആന്ധ്രാതീരത്ത് കരകയറിയ ന്യൂനമര്‍ദം നാളെ ദുര്‍ബലമായേക്കും. ഇതോടെ തെക്കുപടിഞ്ഞാറന്‍ മണ്‍സൂണ്‍ (കാലവര്‍ഷം) വേഗത്തില്‍ വിടവാങ്ങാന്‍ സാധ്യതയേറി. നിലവില്‍ ഉത്തര്‍പ്രദേശിലെ ഫത്തേഹ്പൂരിനും (50 കി.മി) ഫര്‍സാത് ഗഞ്ചിനും (30 കി.മി) അടുത്താണ് തീവ്രന്യൂനമര്‍ദമായി സ്ഥിതി ചെയ്യുന്നത്.

24 മണിക്കൂറിൽ ന്യൂനമർദം ദുർബലമാകും

അടുത്ത 24 മണിക്കൂറില്‍ ഈ സിസ്റ്റം സാധാരണ ന്യൂനമര്‍ദത്തിലേക്ക് ശക്തി കുറയും. നേരത്തെയുള്ള അനുമാന പ്രകാരം ഫെബ്രുവരി 29 വരെ ഈ സിസ്റ്റം തുടരുമെന്നാണ് പ്രതീക്ഷിച്ചിരുന്നത്.

ന്യൂനമര്‍ദം നിലനില്‍ക്കുന്നതിനാണ് കാലവര്‍ഷം വിടവാങ്ങല്‍ പുരോഗമിക്കുന്നത് വൈകുന്നത്. നിലവില്‍ ഉത്തര്‍പ്രദേശിലും ഡല്‍ഹിയിലും മഴ ലഭിക്കുന്നുണ്ട്. ന്യൂനമര്‍ദമാണ് ഈ മേഖലയില്‍ കാലവര്‍ഷത്തെ സജീവമാക്കി നിര്‍ത്തുന്നത്.

സിസ്റ്റം ദുര്‍ബലമാകുന്നതോടെ കാലവര്‍ഷം വിടവാങ്ങല്‍ ഈ മാസം അവസാനത്തോടെ ദക്ഷിണേന്ത്യയിലേക്ക് പ്രവേശിക്കാനാണ് സാധ്യത.

കാറ്റ് ദിശ മാറും ഒക്ടോബർ 1 മുതൽ

ഒക്ടോബര്‍ 1 മുതല്‍ ദക്ഷിണേന്ത്യയിലും കാറ്റിന്റെ ഗതിയില്‍ മാറ്റം വിവിധ അന്താരാഷ്ട്ര കാലാവസ്ഥാ മോഡലുകള്‍ സൂചിപ്പിക്കുന്നുണ്ട്. ഒക്ടോബര്‍ ഒന്നു മുതല്‍ തന്നെ കാലവര്‍ഷക്കാറ്റു പിന്‍വാങ്ങുന്ന രീതിയിലുള്ള മാറ്റമാണ് ദൃശ്യമാകുന്നത്.

ഒക്ടോബർ 2 ന് കാറ്റിന്റെ ദിശ മാറിയ നിലയിൽ. ECMWF മോഡൽ പ്രകാരം

എന്നാല്‍ ഒക്ടോബര്‍ ആദ്യവാരത്തോടെയേ കാലവര്‍ഷം വിടവാങ്ങല്‍ പ്രഖ്യാപിക്കാന്‍ കഴിയൂ എന്നാണ് കരുതുന്നത്. ഒക്ടോബര്‍ 1 ന് ശേഷം ഇടിയോടെ മഴ ദക്ഷിണേന്ത്യയില്‍ സജീവമാകും. കാറ്റിന്റെ ഗതി വടക്കുകിഴക്കന്‍ ദിശയില്‍ നിന്നാകുകയും ചെയ്‌തേക്കും.

ഇതോടെ തുലാവര്‍ഷം പ്രഖ്യാപിക്കുന്നതിനുള്ള മാനദണ്ഡങ്ങള്‍ പൂര്‍ത്തിയാകാനാണ് സാധ്യത. ഒക്ടോബര്‍ 1 ന് ശേഷം ഏതു സമയവും തുലാവര്‍ഷം എത്തിയതായ പ്രഖ്യാപനം കാലാവസ്ഥാ വകുപ്പ് നടത്തിയേക്കും.

തുലാവർഷം മാനദണ്ഡങ്ങൾ

ഇന്ത്യന്‍ കാലാവസ്ഥാ വകുപ്പിന്റെ (IMD) മാനദണ്ഡങ്ങള്‍ അനുസരിച്ച്, ദക്ഷിണേന്ത്യന്‍ പെനിന്‍സുലയില്‍ (തമിഴ്‌നാട്, പുതുച്ചേരി, ആന്ധ്രാപ്രദേശിന്റെ തീരപ്രദേശം, രായലസീമ, കേരളം, തെക്കന്‍ കര്‍ണാടക ഉള്‍നാടുകള്‍) വടക്കുകിഴക്കന്‍ മണ്‍സൂണ്‍ (തുലാവര്‍ഷം) എത്തിയത് ഔദ്യോഗികമായി സ്ഥിരീകരിക്കുന്നത് താഴെ പറയുന്ന പ്രധാന ഘടകങ്ങള്‍ തൃപ്തികരമാകുമ്പോഴാണ്.

തെക്കുപടിഞ്ഞാറന്‍ മണ്‍സൂണിന്റെ പൂര്‍ണ്ണമായ പിന്മാറ്റം

ഇന്ത്യയില്‍ നിന്ന്, പ്രത്യേകിച്ച് ഉത്തരേന്ത്യയില്‍ നിന്നും ഉപദ്വീപ് പ്രദേശങ്ങളില്‍ നിന്നും തെക്കുപടിഞ്ഞാറന്‍ മണ്‍സൂണ്‍ (ഇടവപ്പാതി) പൂര്‍ണ്ണമായി പിന്‍വാങ്ങിയിരിക്കണം.

കാറ്റിന്റെ ദിശയിലുള്ള മാറ്റം

കാറ്റിന്റെ ദിശ മാറി തെക്കുകിഴക്ക് / വടക്കുകിഴക്ക് ദിശയില്‍ നിന്ന് (Northeasterly / Easterly winds) താഴ്ന്ന അന്തരീക്ഷ തലങ്ങളില്‍ സ്ഥിരമായി വീശാന്‍ തുടങ്ങണം.

തീരദേശത്തെ മഴയുടെ ലഭ്യത

തമിഴ്‌നാട്, പുതുച്ചേരി, തെക്കന്‍ ആന്ധ്രാപ്രദേശ് തീരങ്ങളില്‍ വടക്കുകിഴക്കന്‍ കാറ്റിന്റെ ഫലമായി വ്യാപകമായ മഴ ലഭിച്ചു തുടങ്ങണം.

തുടര്‍ച്ചയായ മഴയുടെ അളവ്

പ്രധാന മഴമാപിനി കേന്ദ്രങ്ങളില്‍ (Rain gauge stations) തുടര്‍ച്ചയായി ഒന്നുരണ്ടു ദിവസങ്ങളില്‍ മഴ രേഖപ്പെടുത്തണം.

സാധാരണയായി ഒക്ടോബര്‍ പകുതിയോടെയാണ് (ഒക്ടോബര്‍ 15നും 20നും ഇടയില്‍) വടക്കുകിഴക്കന്‍ മണ്‍സൂണിന്റെ വരവ് സ്ഥിരീകരിക്കാറുള്ളത്.

English Summary : Withdrawal of Southwest Monsoon and Approaching Northeast Monsoon.