തുലാവര്‍ഷം അരികെ, തമിഴ്‌നാട് തീരത്ത് അന്തരീക്ഷച്ചുഴി, ഇന്നു മുതല്‍ മഴ, മിന്നല്‍, കാറ്റ്

തമിഴ്‌നാട് തീരത്തിനോട് ചേര്‍ന്ന് ബംഗാള്‍ ഉള്‍ക്കടലില്‍ രൂപപ്പെട്ട അന്തരീക്ഷച്ചുഴിയും (Upper Air Circulation- UAC) തുലാവര്‍ഷം എത്തുന്നതിനു മുന്‍പുള്ള അസ്ഥിര അന്തരീക്ഷസ്ഥിതിയും മൂലം കേരളത്തിലും തമിഴ്‌നാട്ടിലും ഇന്നു മുതല്‍ 18 വരെ ശക്തമായ മഴയ്ക്ക് സാധ്യത. മഴക്കൊപ്പം ഇടിമിന്നലും കാറ്റും പ്രതീക്ഷിക്കണം. മഴയും ഇടിമിന്നലും കാറ്റുമുള്ളപ്പോള്‍ ജാഗ്രത പാലിക്കാം.

കിഴക്കന്‍ മേഖലകളിലെ അരുവികളിലും തോടുകളിലും ഉച്ചയ്ക്കു ശേഷം മലവെള്ളപ്പാച്ചിലിനും സാധ്യത. ഉയരങ്ങളില്‍ ജോലി ചെയ്യുന്നവര്‍ ഇടിമിന്നലുണ്ടാകുമ്പോള്‍ ഇടിമിന്നല്‍ ജാഗ്രതാ നിര്‍ദേശം പാലിക്കണം.

കാലവര്‍ഷം വിടവാങ്ങല്‍ മഹാരാഷ്ട്രയിലെത്തി

കാലവര്‍ഷം വിടവാങ്ങല്‍ ഉത്തരേന്ത്യയില്‍ അതിവേഗം പുരോഗമിക്കുകയാണ്. അടുത്ത ദിവസങ്ങളില്‍ കര്‍ണാടക ഉള്‍പ്പെടെയുള്ള സംസ്ഥാനങ്ങളിലെത്തും. നിലവില്‍ വരാണസി, ജബല്‍പൂര്‍, അകോല, അഹല്യാനഗര്‍, അലിബാഗ് വരെ കാലവര്‍ഷത്തിന്റെ വിടവാങ്ങല്‍ രേഖ എത്തിയിട്ടുണ്ട്. മഹാരാഷ്ട്രയുടെ കൂടുതല്‍ പ്രദേശങ്ങള്‍, മധ്യപ്രദേശ്, ഉത്തര്‍പ്രദേശ്, ബിഹാര്‍, ജാര്‍ഖണ്ഡ് പൂര്‍ണമായി എന്നിവിടങ്ങളില്‍ കാലവര്‍ഷം വിടവാങ്ങാന്‍ അനുകൂല അന്തരീക്ഷമാണുള്ളത്.

8 ജില്ലകളിൽ ഇന്ന് മഞ്ഞ അലർട്ട്

കേരളത്തില്‍ ഇന്ന് തെക്കന്‍ ജില്ലകളിലും മധ്യ കേരളത്തിലും രാത്രി ഇടിയോടെ മഴ ലഭിക്കും. വടക്കന്‍ കേരളത്തിലും ഒറ്റപ്പെട്ട മഴ സാധ്യതയുണ്ട്. തൃശൂർ മുതൽ തെക്കോട്ടുള്ള ജില്ലകളിൽ ഇന്ന് കാലാവസ്ഥാ വകുപ്പ് മഞ്ഞ അലർട്ട് (Yellow alert) നൽകിയിട്ടുണ്ട്.

തുലാവര്‍ഷം എത്തുന്നതിനു മുന്‍പുള്ള അന്തരീക്ഷ പരിവര്‍ത്തന ഘട്ടം

തെക്കുപടിഞ്ഞാറന്‍ മണ്‍സൂണ്‍ എന്ന കാലവര്‍ഷം വിടവാങ്ങി വടക്കു കിഴക്കന്‍ മണ്‍സൂണ്‍ എന്ന തുലാവര്‍ഷം എത്തുന്നതിനു മുന്‍പുള്ള അന്തരീക്ഷ പരിവര്‍ത്തന ഘട്ടം (Transition period) ആണിത്. രണ്ടു ദിവസത്തിനകം കാറ്റിന്റെ ഗതി കിഴക്കന്‍ കാറ്റോ തെക്കുകിഴക്കന്‍ കാറ്റോ ആയി മാറും. മാനദണ്ഡങ്ങള്‍ പൂര്‍ത്തിയാകുന്നതോടെ കാലാവസ്ഥാ വകുപ്പ് വടക്കു കിഴക്കന്‍ മണ്‍സൂണ്‍ എത്തിയതായി ഈ മാസം 20 നകം പ്രഖ്യാപിക്കുമെന്നാണ് കരുതുന്നത്.

Live Lightning Radar Link

Photo : Arun KC