ശൈത്യകാല അവധി, സ്‌കൂളുകൾ അടച്ചു

യുഎഇയിൽ ശൈത്യകാല അവധിക്കായി പ്രാദേശിക, വിദേശ സിലബസ് സ്കൂളുകൾ അടച്ചു. ദുബായിലെ ഇന്ത്യൻ സ്കൂളുകൾ 12നും അബുദാബായിലേത് 19നുമാണ് അടയ്ക്കുന്നത്. ജനുവരി 5ന് സ്‌കൂളുകൾ തുറക്കും. ഇതനുസരിച്ച് ഭൂരിഭാഗം വിദ്യാർഥികൾക്കും ഒരു മാസം അവധി ലഭിക്കും. എന്നാൽ ഇന്ത്യൻ സ്‌കൂളുകളിലെ കുട്ടികൾക്ക് ഒരു മാസം അവധി തികച്ചും കിട്ടില്ല. അവർക്ക് 2 മുതൽ 3 ആഴ്ച വരെ മാത്രമേ അവധി ലഭിക്കൂ.

നാട്ടിലേക്ക് പോകാനൊരുങ്ങുന്നവർക്ക് ടിക്കറ്റ് നിരക്ക് വൻ തിരിച്ചടി

ഒരു മാസം അവധി ലഭിച്ചതോടെ പ്രവാസി കുടുംബങ്ങളിൽ പലരും നാട്ടിലേക്കും വിനോദയാത്രയ്ക്കായി വിദേശത്തേക്കും പോകാനുള്ള ഒരുക്കത്തിലാണ്. ഇതിനിടയിൽ വന്ന ഇൻഡിഗൊ വിമാന പ്രതിസന്ധിയും വർധിച്ച നിരക്കുംമൂലം പല കുടുംബങ്ങൾക്കും അവധിക്ക് നാട്ടിലേക്ക് പോകാനായിട്ടില്ല.

ഹാജർ നില കർശനമാക്കിയതും അബുദാബി, ദുബായ് എമിറേറ്റുകളിലെ ഇന്ത്യൻ സ്കൂൾ വിദ്യാർഥികൾക്ക് കുറഞ്ഞ അവധി മാത്രമുള്ളതും നാട്ടിൽ പോകുന്നതിനു തടസ്സമായി. അതേ സമയം ഷാർജ, അജ്മാൻ, ഉമ്മുൽഖുവൈൻ, റാസൽഖൈമ, ഫുജൈറ എമിറേറ്റുകളിലെ ഇന്ത്യൻ സ്കൂളുകൾക്ക് ഒരു മാസംഅവധി ലഭിച്ചിട്ടുണ്ട്. അതേസമയം യു എ ഇ 2026 മുതൽ അവധി ഏകീകരിക്കാൻ ഇന്ത്യൻ സ്കൂളുകൾക്ക് വിദ്യാഭ്യാസ മന്ത്രാലയം കർശന നിർദേശം നൽകിയിരുന്നു. ഇതനുസരിച്ച് പ്രവൃത്തി ദിനങ്ങൾ പുനഃക്രമീകരിക്കാനാണ് ഉത്തരവ്.

English Summary : Discover how the recent Indigo flight crisis and strict attendance rules are affecting expatriate families' holiday plans to India and abroad.