ഇന്ന് ലോക നാളികേര ദിനം; തെങ്ങിന്റെ മഹത്വം ഓർമിപ്പിക്കുന്ന ദിനം

തെങ്ങ് എന്ന് ഓമനപേരിൽ വിളിക്കുന്ന കൽപവൃക്ഷത്തിൻ്റെ പ്രാധാന്യം ഓർമ്മിപ്പിക്കുന്ന ദിനമാണ് ഇന്ന്. അതെ സെപ്റ്റംബർ 2, ലോക നാളികേര ദിനമായി ആചരിക്കുന്നു. മനുഷ്യൻ്റെ ഭക്ഷണക്രമത്തിൽ നിന്നും ഒഴിച്ചു കൂടാൻ പറ്റാത്ത ഒന്നാണ് തേങ്ങ. ഇതിൻ്റെ ഓരോഭാഗവും വ്യത്യസ്‌തകാര്യങ്ങൾക്കു വേണ്ടി ഉപയോഗിക്കുന്നു. ഭക്ഷണം മുതൽ വ്യാവസായിക ഉൽപ്പന്നങ്ങൾക്കു വരെ ഈ കല്പവൃക്ഷം ഉപയോഗപെടുന്നു. തെങ്ങിന്റെ മഹത്വം ലോകത്തിന് മുന്നിൽ തുറന്നു കാട്ടുന്നതാണ് ഈ ദിനത്തിന്റെ ലക്ഷ്യം.

തേങ്ങ, വെളിച്ചെണ്ണ, കരിക്കിൻവെള്ളം, തേങ്ങാപ്പാൽ, ചകിരി, കൊപ്ര, ചിരട്ട, തുടങ്ങി തേങ്ങയുടെ ഓരോ ഭാഗവും വിവിധ ആവശ്യങ്ങൾക്ക് ഉപയോഗിക്കാം. ഭക്ഷ്യവസ്തുവെന്നതിലുപരി കൃഷി, വ്യവസായം, സൗന്ദര്യവർധക ഉൽപ്പന്നങ്ങൾ, പരിസ്ഥിതി സംരക്ഷണം തുടങ്ങി നിരവധി മേഖലകളിലും നാളികേരത്തിന് വലിയ പ്രാധാന്യമുണ്ട്.

അടുക്കളയിൽ നിന്ന് അരങ്ങത്തേക്ക്

അടുക്കളയിൽ നിന്ന് തുടങ്ങി സ്വീകരണ മുറികളിൽ വരെ നാളികേരം തിളങ്ങി നിൽക്കുന്നു. കർഷക കുടുംബങ്ങളുടെ പ്രധാന വരുമാന മാർഗവും നാളികേര കൃഷിയാണ്. ഇന്ന് വെളിച്ചെണ്ണയ്ക്കും, ചിരട്ടയ്ക്കും വരെ പൊന്നും വില നൽകണം. എത്രവില കൂട്ടിയാലും ഭക്ഷണത്തിൽ നിന്ന് ഒഴിവാക്കാൻ പറ്റാത്ത ഒന്നാണ് വെളിച്ചെണ്ണ. അതുപോലെ ഹോട്ടലുകളിലും വീടുകളിലും അടുപ്പ് പുകയുന്നതിൽ ഏറെ പങ്കു വഹിക്കുന്നത് ചകിരി, ചിരട്ട എന്നിവയാണ്. അതുകൊണ്ട് തന്നെ ഇവയ്ക്കും ഡിമാൻ്റ് കൂടും.

‘തെങ്ങിന്റെ ഓരോ ഭാഗവും പ്രയോജനപ്രദം’ എന്ന ആശയം ഓർമ്മിപ്പിക്കുന്ന ലോക നാളികേര ദിനം, നാളികേര കൃഷിയുടെ സംരക്ഷണത്തിന്റെയും കർഷകരുടെ ക്ഷേമത്തിന്റെയും പ്രാധാന്യവും ഉയർത്തിക്കാട്ടുന്ന ഒന്നാണ്. തെങ്ങിൽ കയറുന്ന തൊഴിലാളി മുതൽ അടുക്കളയിൽ അടുപ്പു കൂട്ടുന്ന സ്ത്രീക്കു വരെ ഈ ദിനം ഒരു ഓർമപ്പെടുത്തലാണ്. എണ്ണിയാലൊതുങ്ങാത്ത ഏറെ ഗുണങ്ങളുള്ള ഒരൽഭുത വൃക്ഷമാണ് തെങ്ങ്.

English Summary : World Coconut Day (September 2) highlights the immense agricultural, economic, and industrial significance of the coconut tree—traditionally venerated as Kalpavriksha (the "Tree of Life"). From daily culinary staples to global trade, every component of the coconut palm provides essential value: