ചൂട് കൂടുന്നു; രോഗങ്ങളും വർധിക്കുന്നു; അതീവ ജാഗ്രത വേണമെന്ന് മുന്നറിയിപ്പ്

ദിനംപ്രതി ചൂട് കൂടി വരികയാണ്. താപനില ഉയരുന്നതോടെ രോഗങ്ങളുടെ നിരക്കും വർധിക്കുന്നതായി കണക്കുകൾ പറയുന്നു. ഇന്ന് ചൂടിന് കാരണം എൽനിനോ പ്രതിഭാസമാണ്. ഈ ചൂട് ശക്തമാകുന്ന സാഹചര്യത്തിൽ ഡെങ്കിപ്പനി, (Dengue)മലേറിയ തുടങ്ങിയ കൊതുകുജന്യ രോഗങ്ങൾ ഉൾപ്പെടെയുള്ള ആരോഗ്യപ്രശ്നങ്ങളിൽ ജാഗ്രത വേണമെന്നാണ് ലോകാരോഗ്യസംഘടനയുടെ പുതിയ മുന്നറിയിപ്പ്. രോഗസാധ്യതയിൽ ഇന്ത്യ വളരെ ഉയർന്ന അപകടസാധ്യതാ വിഭാഗത്തിലാണെന്നാണ് സംഘടന മുന്നറിയിപ്പ് നൽകുന്നത്.

kerala heat wave : സംസ്ഥാനത്ത് ചൂട് കനക്കുന്നു; തൊഴിലാളികൾക്ക് സൂര്യാഘാതമേറ്റു
സംസ്ഥാനത്ത് താപനില കൂടുന്നു. പാലക്കാട് സാധാരണയേക്കാൾ 4.7 ഡിഗ്രി സെൽഷ്യസ് അധികം താപനില രേഖപ്പെടുത്തിയപ്പോൾ കോട്ടയത്ത് 4.2 ഡിഗ്രി സെൽഷ്യസ് അധികം ചൂട്
https://metbeatnews.com/palakkad-kottayam-temperatures-spike-sunstroke-cases-reported

കൊതുകുജന്യ രോഗങ്ങൾ കൂടുന്നു

ദക്ഷിണേഷ്യയിലുടനീളമുള്ള മാറി മാറിവരുന്ന കാലാവസ്ഥാ വ്യതിയാനവും കടുത്ത ചൂടും പെട്ടെന്നുള്ള ഒറ്റപ്പെട്ട മഴയും കൊതുകുജന്യ രോഗങ്ങളുടെ വ്യാപനത്തിന് കാരണമാകുന്നുവെന്നാണ് വിലയിരുത്തൽ. പ്രത്യേകിച്ച് ഡെങ്കിപ്പനി പകർത്തുന്ന ഈഡിസ് ഈജിപ്‌തി കൊതുകിനുള്ളിൽ വൈറസ് വളരുന്ന വേഗം ഉയർന്ന താപനിലയിൽ കൂടാം. അസ്ഥിരമായ മഴയും വെള്ളക്കെട്ടുകളും കൊതുകുകളുടെ പ്രജനനത്തിനും ഇടയാക്കും.

വെള്ളം കെട്ടികിടക്കുന്നത് ഒഴിവാക്കുക

നഗരങ്ങളിലെ ഓടകൾ, നിർമാണ സ്ഥലങ്ങൾ, എയർ കൂളറുകൾ, വീടുകളിലെ ജലസംഭരണികൾ തുടങ്ങിയ ഇടങ്ങളിൽ വെള്ളം കെട്ടിക്കിടക്കുന്നത് കൊതുകുകൾ പെറ്റുപെരുകാൻ കാരണമാകാം. ഇതോടെ ഡെങ്കിപ്പനി ഉൾപ്പെടെയുള്ള കൊതുകുജന്യ രോഗങ്ങളുടെ സാധ്യതയും ഉയരും.

തുലാവർഷത്തിൽ മഴയില്ല

തുലാവർഷ മാസത്തിൽ മഴ മാറി നിൽക്കുന്നത് പല പ്രശ്നങ്ങൾക്കും കാരണമാകുന്നു. അസാധാരണമായ ചൂടും വരണ്ട കാലാവസ്ഥയും തുടരുന്നത് സൂര്യാഘാതത്തിനും നിർജ്ജലീകരണത്തിനും സാധ്യത വർധിപ്പിക്കും. ഹൃദ്രോഗം, ശ്വാസകോശ സംബന്ധമായ രോഗങ്ങൾ, വൃക്കരോഗങ്ങൾ തുടങ്ങിയ ഗുരുതര ആരോഗ്യപ്രശ്നങ്ങളിലേക്കും കടുത്ത ചൂട് നയിക്കാമെന്നാണ് മുന്നറിയിപ്പ്.

ഡെങ്കിപ്പനി; ജാഗ്രത വേണം

ഇന്ന് ഡങ്കിപ്പനി പലയിടത്തും കൂടുതലായി കാണപ്പെടുന്നു. കൃത്യസമയത്ത് ചികിത്സ ലഭിച്ചില്ലെങ്കിൽ ജീവന് ഭീഷണിയാകാവുന്ന രോഗമാണ് ഡെങ്കിപ്പനി. രക്തത്തിലെ പ്ലേറ്റ്ലെറ്റ് കൗണ്ട് കുറയുന്നതിന് പുറമെ ഗുരുതരമായാൽ ഹൃദയത്തെയും രക്തസമ്മർദത്തെയും ബാധിക്കാം.

പെട്ടെന്നുണ്ടാകുന്ന ശക്തമായ പനി, കടുത്ത തലവേദന, കണ്ണുകൾക്ക് പിന്നിലെ വേദന, പേശികളിലും സന്ധികളിലും വേദന, നെഞ്ചിലും മുഖത്തും ചുവന്ന തടിപ്പുകൾ, ഓക്കാനം, ഛർദി എന്നിവയാണ് പ്രധാന ലക്ഷണങ്ങൾ. ഈഡിസ് കൊതുകുകളാണ് ഡെങ്കിപ്പനി പകർത്തുന്നത്. സാധാരണയായി പകൽ സമയത്താണ് ഈ കൊതുകുകൾ മനുഷ്യരെ കടിക്കുന്നത്. കൊതുകുകടിയിലൂടെ വൈറസ് ശരീരത്തിലെത്തിയാൽ സാധാരണയായി മൂന്ന് മുതൽ 14 ദിവസത്തിനുള്ളിൽ രോഗലക്ഷണങ്ങൾ പ്രകടമാകാം.

അപകടസൂചനകൾ ശ്രദ്ധിക്കുക

പനി കുറയുന്ന സമയത്ത് തുടർച്ചയായ ഛർദി, ശക്തമായ വയറുവേദന, ശരീരത്തിന്റെ ഏതെങ്കിലും ഭാഗത്തുനിന്നുള്ള രക്തസ്രാവം, പെട്ടെന്നുണ്ടാകുന്ന ശ്വാസംമുട്ടൽ, ശരീരം ചുവന്നുതടിക്കൽ, ശരീരം തണുത്ത് മരവിക്കുന്ന അവസ്ഥ, കടുത്ത തളർച്ച, രക്തസമ്മർദം താഴുന്ന അവസ്ഥ എന്നിവ ഉണ്ടായാൽ അടിയന്തരമായി വിദഗ്ധ ചികിത്സ തേടണം.
കുട്ടികളിൽ തുടർച്ചയായ കരച്ചിൽ ഉൾപ്പെടെയുള്ള അസാധാരണ ലക്ഷണങ്ങൾ ശ്രദ്ധയിൽപ്പെട്ടാലും വൈദ്യസഹായം തേടണം.

ചികിത്സയും പ്രതിരോധവും പ്രധാനം

ഡെങ്കിപ്പനി സംശയിക്കുന്നവർ സ്വയം ചികിത്സ നടത്താതെ എത്രയും വേഗം ഡോക്ടറുടെ സഹായം തേടണം. രോഗബാധിതർ പൂർണ വിശ്രമം എടുക്കുകയും ആവശ്യത്തിന് ദ്രാവകങ്ങൾ കഴിക്കുകയും വേണം. ഉപ്പിട്ട കഞ്ഞിവെള്ളം, കരിക്കിൻവെള്ളം, പഴച്ചാറുകൾ തുടങ്ങിയവ കഴിക്കുന്നത് ശരീരത്തിലെ ജലാംശം നിലനിർത്താൻ സഹായിക്കും.
പനി മാറിയാലും അടുത്ത മൂന്ന് നാല് ദിവസങ്ങൾ പ്രത്യേകം ശ്രദ്ധിക്കണം. രോഗി വിശ്രമിക്കുന്നതും ഉറങ്ങുന്നതും കൊതുകുവലയ്ക്കുള്ളിലായിരിക്കണം. വീടുകളിലും പരിസരങ്ങളിലും വെള്ളം കെട്ടിക്കിടക്കുന്നത് ഒഴിവാക്കുകയും കൊതുകുകളുടെ പ്രജനന കേന്ദ്രങ്ങൾ നശിപ്പിക്കുകയും ചെയ്യുന്നത് രോഗവ്യാപനം തടയാൻ നിർണായകമാണ്.

ചൂട് കൂടുന്ന സാഹചര്യത്തിൽ ഡെങ്കിപ്പനി ഉൾപ്പെടെയുള്ള രോഗങ്ങളെ ഭയക്കേണ്ടതില്ലെന്നും എന്നാൽ ലക്ഷണങ്ങൾ അവഗണിക്കാതെ തക്ക സമയത്ത് ചികിത്സ തേടണമെന്നും ആരോഗ്യവിദഗ്ധർ മുന്നറിയിപ്പ് നൽകുന്നു.

English Summary : Rising global temperatures driven by El Niño, combined with shifting rainfall patterns, are creating ideal conditions for mosquito breeding and the rapid spread of vector-borne diseases like Dengue and Malaria across South Asia.