യുഎഇയിൽ എൽ നിനോ മാർച്ച് വരെ തുടരും; താപനിലയിലും മഴയിലും വലിയ മാറ്റങ്ങൾക്ക് സാധ്യത

യുഎഇയിൽ എൽ നിനോ പ്രതിഭാസത്തിന്റെ സ്വാധീനം 2027 മാർച്ച് വരെ തുടരും. ഇതിന് 96 ശതമാനം സാധ്യതയുണ്ടെന്നാണ് ദേശീയ കാലാവസ്ഥാ കേന്ദ്രം (NCM) മുന്നറിയിപ്പ് നൽകുന്നത്. പ്രതിഭാസത്തിന്റെ ഭാഗമായി രാജ്യത്തെ താപനിലയിലും മഴയുടെ അളവിലും സാധാരണ നിലയിൽനിന്ന് വ്യത്യാസങ്ങളുണ്ടാകാമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ. ഒക്ടോബർ, നവംബർ മാസങ്ങളിൽ എൽ നിനോ ഏറ്റവും ശക്തമാകാൻ സാധ്യതയുണ്ടെന്നും മുന്നറിയിപ്പുണ്ട്.

യുഎഇയിൽ മഴയ്ക്ക് അനുകൂല സാഹചര്യമുണ്ടാകാം

എൽ നിനോയുടെ സ്വാധീനം യുഎഇയിൽ മഴയ്ക്ക് അനുകൂലമായ സാഹചര്യം സൃഷ്ടിച്ചേക്കാമെന്ന് എൻസിഎം നേരത്തേ വ്യക്തമാക്കിയിരുന്നു. അന്തരീക്ഷത്തിലെ ഈർപ്പം വർധിക്കുന്നതും മഴയ്ക്കുള്ള സാധ്യത ഉയർത്തുന്നതും ഇതിന്റെ ഭാഗമായി ഉണ്ടായേക്കാം. പ്രത്യേകിച്ച് ഒക്ടോബർ, നവംബർ മാസങ്ങളിൽ പ്രതിഭാസത്തിന്റെ സ്വാധീനം കൂടുതൽ പ്രകടമാകാമെന്നാണ് എൻസിഎം കാലാവസ്ഥാ വിദഗ്ധൻ അഹമ്മദ് ഹബീബിന്റെ വിലയിരുത്തൽ.

UAE Weather : ന്യൂനമർദം ശക്തിപ്രാപിക്കുന്നു; യുഎഇയിൽ അഞ്ചുദിവസം മഴയ്ക്ക് സാധ്യത
യുഎഇയിലുടനീളം അടുത്ത അഞ്ച് ദിവസങ്ങളിൽ മഴയ്ക്ക് സാധ്യതയുണ്ടെന്ന് നാഷണൽ സെന്റർ ഓഫ് മെറ്റീരിയോളജി (NCM) കാലാവസ്ഥാ നിരീക്ഷകൻ ഡോ. അഹമ്മദ് ഹബീബ്.
https://metbeatnews.com/5-day-rain-strong-winds-hail-forecasted-by-ncm

എന്നാൽ എൽ നിനോ പ്രതിഭാസം നിലനിൽക്കുന്നു എന്നതുകൊണ്ടുമാത്രം യുഎഇയിൽ അതിശക്തമായ മഴയോ കൊടുങ്കാറ്റോ വെള്ളപ്പൊക്കമോ ഉണ്ടാകുമെന്ന് ഉറപ്പിക്കാനാകില്ല. പ്രാദേശിക കാലാവസ്ഥാ സംവിധാനങ്ങൾ, സീസണൽ മാറ്റങ്ങൾ, മഴയ്ക്ക് അനുകൂലമായ മറ്റ് ഘടകങ്ങൾ എന്നിവയെ ആശ്രയിച്ചായിരിക്കും മഴയുടെ അളവും തീവ്രതയും.

വൈറൽ മുന്നറിയിപ്പുകൾക്കെതിരെ ജാഗ്രത

എൽ നിനോയുടെ പേരിൽ യുഎഇയിൽ അതിശക്തമായ മഴയും വെള്ളപ്പൊക്കവും ഉണ്ടാകുമെന്ന് മുന്നറിയിപ്പ് നൽകുന്ന സമൂഹമാധ്യമ പോസ്റ്റുകൾക്കെതിരെയും ദേശീയ കാലാവസ്ഥാ കേന്ദ്രം രംഗത്തെത്തിയിരുന്നു. ഇത്തരം പ്രചാരണങ്ങളെ അടിസ്ഥാനമാക്കി ആശങ്കപ്പെടരുതെന്നും കാലാവസ്ഥാ മുന്നറിയിപ്പുകൾക്കും ഔദ്യോഗിക അറിയിപ്പുകൾക്കുമായി അംഗീകൃത സ്രോതസ്സുകളെ മാത്രം ആശ്രയിക്കണമെന്നും അധികൃതർ നിർദേശിച്ചു.

സാധാരണയായി രണ്ട് മുതൽ ഏഴ് വർഷത്തിലൊരിക്കലാണ് എൽ നിനോ പ്രതിഭാസം സംഭവിക്കുന്നത്. പൊതുവെ ഒമ്പത് മുതൽ 12 മാസം വരെ നീണ്ടുനിൽക്കുമെങ്കിലും അതിന്റെ തീവ്രതയിലും ദൈർഘ്യത്തിലും വ്യത്യാസങ്ങളുണ്ടാകാം. അതിനാൽ, യുഎഇയിൽ എൽ നിനോയുടെ സ്വാധീനഫലമായി മഴയുടെ സാധ്യത വർധിച്ചേക്കാമെങ്കിലും വരാനിരിക്കുന്ന കാലാവസ്ഥയെക്കുറിച്ചുള്ള കൃത്യമായ ചിത്രം ലഭിക്കാൻ കാത്തിരിക്കണം.

English Summary : The UAE's National Center of Meteorology (NCM) has warned that El Niño conditions are expected to persist until March 2027, with a 96% probability, bringing potential shifts in temperature and increased chances of rainfall—particularly peaking in October and November. While heightened humidity may favor more rain, authorities emphasize that severe storms or floods are not automatically guaranteed, as local weather patterns and seasonal factors also play a critical role.