തമിഴ്നാട്ടിലും കേരളത്തിൻ്റെ കിഴക്കൻമേഖലകളിലും ഇന്നും ഒറ്റപ്പെട്ട മഴ സാധ്യത. ഇടിയോടുകൂടിയാണ് മഴ ലഭിച്ചേക്കുക. തമിഴ്നാടിന് മുകളിൽ വടക്കു തെക്ക് ന്യൂനമർദ്ദ പാത്തി രൂപപ്പെട്ട സാഹചര്യത്തിൽ കാറ്റിൻ്റെ അസ്ഥിരത ഉണ്ടാവുകയും ഇത് ഇടിയോടുകൂടി മഴക്ക് കാരണമാവുകയും ചെയ്യും.

തെക്കൻ തമിഴ്നാട്ടിലും മധ്യ തമിഴ്നാട്ടിലും ഇന്നും ഇടിയോടെ മഴ സാധ്യത. തെക്കൻ കേരളത്തിലെ കിഴക്കൻ അതിർത്തി ജില്ലകളിൽ ഇതിൻ്റെ ഭാഗമായി ഇന്ന് വൈകിട്ടും രാത്രിയിലും മഴ ലഭിച്ചേക്കും. വടക്കാൻ തമിഴ്നാട്ടിലും ഒറ്റപ്പെട്ട പ്രദേശങ്ങളിൽ മഴ ലഭിക്കും. തമിഴ്നാട്ടിൽ പെയ്യുന്ന മഴ ശക്തമായിരിക്കും.

എന്നാൽ കേരളത്തിൽ ശക്തമല്ലാത്ത ഇടത്തരം മഴ പ്രതീക്ഷിച്ചാൽ മതിയാകും. തമിഴ്നാട്ടിലെ സേലം, ദിണ്ഡുഗൽ, നാമക്കൽ എന്നിവിടങ്ങളിൽ രാത്രിയിലും വൈകിട്ടും ഇടിയോടുകൂടി ശക്തമായ മഴ സാധ്യത. ചെന്നൈ ഉൾപ്പെടെയുള്ള തീരദേശങ്ങളിൽ ഇടിയില്ലാതെ നേരിയ മഴയും ലഭിച്ചേക്കും.

കേരളത്തിൽ വയനാട്, ഇടുക്കി, പത്തനംതിട്ട, കൊല്ലം ജില്ലകളിലാണ് മഴ സാധ്യത. മറ്റു ജില്ലകളിൽ വരണ്ട കാലാവസ്ഥ തുടരും. കേരളത്തിലും രാത്രിയിലും വൈകിട്ടും ആണ് മഴ പ്രതീക്ഷിക്കേണ്ടത്. കേരളത്തിൽ പകൽ ചൂട് കൂടും. നേരിട്ട് കൊള്ളുന്നവർ ധാരാളം വെള്ളം കുടിക്കണം. സൂര്യാഘാതത്തിന് സാധ്യതയില്ലെങ്കിലും നിർജലീകരണം ഉണ്ടാകും.

English Summary: weather 10/09/25 : Rain likely in Kerala and Tamil Nadu today

See latest forecast on metbeat.com

Metbeat News