ഇനി വെള്ളത്തിലൂടെ പാഴ്‌സൽ വീട്ടുപടിക്കലെത്തും, കുട്ടനാട്ടുകാർക്ക് ആശ്വാസം

റോഡില്ലാതെ വെള്ളത്താൽ ചുറ്റപ്പെട്ടു കിടക്കുന്ന ആലപ്പുഴ(Alappuzha) ജില്ലയിലെ കുട്ടനാടു പോലുള്ള പ്രദേശങ്ങളിൽ പാഴ്‌സൽ സൗകര്യങ്ങൾ എത്തിക്കാൻ ഏറെ ബുദ്ധിമുട്ടിയിരുന്നു. എന്നാൽ ഇനി മുതൽ അത്തരം ബുദ്ധിമുട്ടുകൾ സഹിക്കേണ്ടി വരില്ല. ഇനി മുതൽ വെള്ളത്തിലൂടെ പാഴ്‌സൽ എത്തിക്കാൻ "വള്ളം എക്‌സ്പ്രസ്"("Vallam Express") സേവനവുമായി ഡിടിഡിസി എക്സ്പ്രസ് റെഡി. ചുണ്ടൻ വള്ളം കളിയിൽ നിന്ന് പ്രചോദനം ഉൾകൊണ്ടാണ് ഈ പാഴ്‌സൽ സേവനത്തിന് വള്ളം എക്സ്പ്രസ് എന്ന പേര് നൽകിയത്.

ലക്ഷ്യം, വീട്ടുപടിക്കൽ പാഴ്സൽ എത്തിക്കുക

റോഡില്ലെങ്കിലും തങ്ങളുടെ ആഗ്രഹപ്രകാരം വീട്ടുമുറ്റത്ത് പാഴ്‌സൽ എത്തിക്കുകയെന്ന നാട്ടുകാരുടെ വലിയൊരു ആഗ്രഹമാണ് ഇതോടെ സഫലമായത്. ജലപാതകളെ കുറിച്ചുള്ള തുഴച്ചിൽക്കാരുടെ പരിചയവും ഡിടിഡിസിയുടെ ഡെലിവറി ശ്യംഖലയും ഉപയോഗപ്പെടുത്തി ആവശ്യക്കാരൻ്റെ വീട്ടുപടിക്കൽ നേരിട്ട് പാഴ്സൽ എത്തിക്കുകയാണ് പ്രധാന ലക്ഷ്യം. ഈ ദൗത്യം ഏറ്റെടുക്കുക ഡിടിഡിസി (DTDC) ഡെലിവറി ജീവനക്കാരും പ്രാദേശിക തുഴച്ചിൽക്കാരുമാണ്.

14 ഗ്രാമങ്ങളിൽ സേവനം

കുട്ടനാട് ഉപജില്ലയിലെ 14 ഗ്രാമങ്ങളിലാണ് നിലവിൽ ഈ സേവനം ആരംഭിച്ചിരിക്കുന്നത്. ഇതൊരിക്കലും താല്കാലിക പദ്ധതിയല്ല. റോഡുമാർഗ്ഗം ലഭിക്കുന്നത് പോലെ തന്നെ ഇതും ഒരു ദീർഘകാല പദ്ധതിയാണെന്നാണ് കമ്പനി അറിയിച്ചത്. രണ്ട് ലക്ഷത്തോളം പേരിലേക്കാണ് ഈ സേവനം എത്തുക.

5000 ഡെലിവറികൾ

അടുത്ത വർഷം സേവനം വിപുലീകരിച്ച് 5000 ത്തിലധികം ഡെലിവറികൾ നത്താനാണ് ഡിടിഡിസിയുടെ ലക്ഷ്യം. സേവനത്തിൻ്റെ ഭാഗമായി ഇതിനോടകം എല്ലാവരേയും ആകർഷിപ്പിച്ച് "വള്ളം എക്സ്പ്രസ്" ബ്രാൻഡ് ഫിലിമും കമ്പനി പുറത്തിറക്കി കഴിഞ്ഞു. കാമ്പയിൻ്റെ ആശയം "റോഡുകൾ അവസാനിക്കുമ്പോൾ, ഞങ്ങൾ വെള്ളത്തിലൂടെ സഞ്ചരിക്കുന്നുവെന്നാണ്. ഏതായാലും ദീർഘദൂരം യാത്ര ചെയ്ത് അക്കരെയെത്തി പാഴ്‌സൽ സേവനം ആശ്രയിച്ചു കഴിയുന്നവർക്ക് ഏറെ സഹായകമാവുകയാണ് ഈ പുതിയ പദ്ധതി.

English Summary : DTDC Express has launched a waterway-based last-mile delivery initiative called "Vallam Express" to serve road-inaccessible regions in Alappuzha’s Kuttanad sub-district. Inspired by Kerala's famous Vallam Kali (snake boat race), this service pairs DTDC staff with local oarsmen to navigate backwater routes and bring parcels directly to residents' doorsteps.