ഗൾഫിൽ വീണ്ടും യുദ്ധഭീതി: ഇറാൻ ദ്വീപിൽ യു.എസ് ആക്രമണം; എണ്ണവില കുതിക്കുന്നു

ദുബായ്/വാഷിംഗ്ടൺ: പശ്ചിമേഷ്യയെ വീണ്ടും യുദ്ധക്കളമാക്കി ഇറാന്റെ തന്ത്രപ്രധാന ദ്വീപായ ലാറകിൽ വൻ ആക്രമണം നടത്തി യു.എസ് സൈന്യം. ഇതോടെ ഗൾഫ് മേഖലയിൽ യുദ്ധഭീതിയും ആഗോളതലത്തിൽ സാമ്പത്തിക ആശങ്കയും വീണ്ടും ശക്തമായി.

ഇറാന്റെ റോക്കറ്റ് ലോഞ്ചറുകൾ സ്ഥിതി ചെയ്യുന്ന ലാറക് ദ്വീപിൽ യു.എസ് സൈന്യം രാത്രിയിലാണ് കനത്ത ആക്രമണം നടത്തിയത്. ആക്രമണത്തിൽ ഇറാന്റെ സൈനികരും സാധാരണക്കാരുമടക്കം നിരവധി പേർ കൊല്ലപ്പെട്ടതായി ഇറാൻ സ്ഥിരീകരിച്ചു. ഇതിന് കടുത്ത പ്രതികാരം ചെയ്യുമെന്നും മേഖലയിൽ യു.എസിനെ സഹായിക്കുന്ന സൈനിക താവളങ്ങളെയും സാമ്പത്തിക കേന്ദ്രങ്ങളെയും ആക്രമിക്കുമെന്നും ഇറാൻ മുന്നറിയിപ്പ് നൽകി.

തിരിച്ചടിച്ച് ഇറാൻ യുഎസ്

ആക്രമണത്തിന് പിന്നാലെ ജോർദാനിലെ യുഎസ് താവളങ്ങൾക്ക് നേരെ ഇറാൻ ആക്രമണം നടത്തി. കിംഗ് ഹുസൈൻ, അൽ അസ്‌റഖ് വ്യോമ താവളങ്ങൾക്ക് നേരെയാണ് മിസൈൽ ആക്രമണം നടത്തിയത്. ഇറാനിയൻ മാധ്യമങ്ങൾ ഇക്കാര്യം റിപ്പോർട്ട് ചെയ്തു. നാശനഷ്ടങ്ങളെ കുറിച്ച് അറിവായിട്ടില്ല.

അതേസമയം, ഖത്തറിലെയും ജോർദാനിലെയും യു.എസ് സേനാതാവളങ്ങൾക്ക് നേരെ ആക്രമണം നടത്തിയതായി ഇറാന്റെ ഇസ്ലാമിക് റവല്യൂഷനറി ഗാർഡ് (ഐ.ആർ.ജി.സി) അവകാശപ്പെട്ടെങ്കിലും ഖത്തർ ഇത് സ്ഥിരീകരിച്ചിട്ടില്ല.

എന്തുകൊണ്ട് ലാറക് ദ്വീപ്?

ഇറാൻ സമ്പദ്‌വ്യവസ്ഥയുടെയും എണ്ണ കയറ്റുമതിയുടെയും നട്ടെല്ലാണ് ലാറക് ദ്വീപ്. ഹോർമുസ് കടലിടുക്കിലെ കപ്പൽ ഗതാഗതം ത തടസ്സപ്പെടുത്തി കപ്പലുകളെ ലാറക് ദ്വീപ് വഴിയുള്ള 'ടോൾ പാത'യിലേക്ക് തിരിച്ചുവിടാൻ ഇറാൻ ശ്രമിച്ചിരുന്നു.

ഹോർമുസിൽ കപ്പലുകൾക്ക് നേരെ ആക്രമണം നടത്താൻ സജ്ജമാക്കിയിരുന്ന റോക്കറ്റ് കേന്ദ്രങ്ങളാണ് തകർത്തതെന്ന് യു.എസ് സെൻട്രൽ കമാൻഡ് വക്താവ് ക്യാപ്റ്റൻ ടിം ഹോക്കിൻസ് അറിയിച്ചു. കപ്പൽ ഗതാഗതം സുരക്ഷിതമാക്കാനാണ് ഈ നടപടിയെന്നും യു.എസ് വ്യക്തമാക്കി. എന്നാൽ ഹോർമുസിന്റെ നിയന്ത്രണം ഇപ്പോഴും തങ്ങൾക്കാണെന്നാണ് ഇറാന്റെ വാദം.

ആഗോള സാമ്പത്തിക മേഖലയിൽ കരിനിഴൽ

പശ്ചിമേഷ്യൻ സംഘർഷം കടുത്തതോടെ അന്താരാഷ്ട്ര വിപണിയിൽ അസംസ്കൃത എണ്ണവില വീണ്ടും കുതിച്ചുയർന്നു:

ബ്രെന്റ് ക്രൂഡ് (Brent Crude): 1.82% വർധിച്ച് ബാരലിന് $89.70 ലെത്തി.
ഡബ്ല്യു.ടി.ഐ ക്രൂഡ് (WTI Crude): 1.68% വർധിച്ച് ബാരലിന് $84.80 ആയി.

എണ്ണവിലയിലെ ഈ വർധനവ് ആഗോളതലത്തിൽ വീണ്ടും പണപ്പെരുപ്പത്തിന് കാരണമാകുമെന്ന ആശങ്ക ശക്തമാണ്. പണപ്പെരുപ്പം നിയന്ത്രിക്കാൻ പലിശനിരക്കുകൾ ഉയർത്തേണ്ടി വരുമെന്ന് യു.എസ് ഫെഡറൽ റിസർവ് ചെയർമാൻ കെവിൻ വാർഷ് നേരത്തെ സൂചിപ്പിച്ചിരുന്നു.

ഇന്ത്യയെ എങ്ങനെ ബാധിക്കും?

പണപ്പെരുപ്പം: എണ്ണവില വർധനവ് ഇന്ത്യയിൽ പണപ്പെരുപ്പം കൂട്ടാനും രൂപയുടെ മൂല്യത്തിലും ഓഹരി വിപണിയിലും സമ്മർദമുണ്ടാക്കാനും സാധ്യതയുണ്ട്.
ജി.ഡി.പി കണക്കുകൾ: നടപ്പുവർഷത്തെ (2026-27) ഒന്നാം പാദ ജി.ഡി.പി കണക്കുകൾ കേന്ദ്രസർക്കാർ ഇന്ന് പുറത്തുവിടും. പശ്ചിമേഷ്യൻ പ്രതിസന്ധി നിലനിൽക്കുന്നുണ്ടെങ്കിലും 7 ശതമാനത്തിലേറെ വളർച്ച നേടി ഇന്ത്യ ലോകത്തെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥയായി തുടരുമെന്നാണ് വിലയിരുത്തൽ.

നയതന്ത്ര നീക്കങ്ങൾ

മോദി - പെസെഷ്കിയാൻ കൂടിക്കാഴ്ച: കിർഗിസ്ഥാനിൽ നടക്കുന്ന ഷാങ്ഹായ് സഹകരണ ഓർഗനൈസേഷൻ (SCO) ഉച്ചകോടിക്കിടെ ഇന്ത്യൻ പ്രധാനമന്ത്രി നരേന്ദ്ര മോദിയും ഇറാൻ പ്രസിഡന്റ് മസൂദ് പെസെഷ്കിയാനും ഇന്ന് കൂടിക്കാഴ്ച നടത്തും.
യു.എസ് ഉപരോധ നീക്കം: ഇറാനുമായി വ്യാപാര ബന്ധം തുടരുന്ന ഇന്ത്യ, ചൈന തുടങ്ങിയ രാജ്യങ്ങൾക്കുമേൽ കൂടുതൽ ഉപരോധം ഏർപ്പെടുത്താൻ യു.എസ് ട്രഷറി സെക്രട്ടറി സ്കോട്ട് ബെസ്സന്റ് നീക്കം നടത്തുന്നതായാണ് വിവരം. G20 ഉച്ചകോടിയുടെ ഭാഗമായി ചൈനീസ് പ്രതിനിധികളുമായി യു.എസ് ചർച്ച നടത്തും.

English Summary : War Clouds Over the Gulf: US Strikes Iranian Island, Oil Prices Surge. Tensions in the Middle East have escalated following a heavy overnight US military strike on Iran’s strategic Larak Island, aiming to neutralize rocket launchers threatening ships in the Strait of Hormuz.