തമിഴ്നാട്ടിൽ തിങ്കളാഴ്ച വരെ കനത്ത മഴ; മഴക്കെടുതിയിൽ മരണം രണ്ടായി, ബസിന് മുകളിലേക്ക് മണ്ണും മരങ്ങളും ഇടിഞ്ഞുവീണു, കേരള തീരത്തും ജാഗ്രത

തമിഴ്നാട്ടിൽ തിങ്കളാഴ്ച വരെ കനത്ത മഴ തുടരുമെന്ന് മുന്നറിയിപ്പ്. മഴക്കെടുതിയിൽ മരിച്ചവരുടെ എണ്ണം രണ്ടായി. കാഞ്ചീപുരത്ത് വീടിന്റെ ഭിത്തി തകർന്ന് മൂന്ന് പേർക്ക് പരിക്കേറ്റു. കൊടൈക്കനാലിൽ മലവെള്ളപ്പാച്ചിലുണ്ടായതും കോയമ്പത്തൂരിൽ റോഡുകളിൽ വെള്ളക്കെട്ട് രൂപപ്പെട്ടതും ജനജീവിതത്തെ ബാധിച്ചു.

മഴ ശക്തമായതോടെ തമിഴ്നാട്ടിലെ മലയോര മേഖലകളിൽ ജാഗ്രതാ നിർദേശം നൽകി. നീലഗിരി ജില്ലയിലെ ആറ് താലൂക്കുകളിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു. തുടർച്ചയായ മഴയെ തുടർന്ന് മലയോര മേഖലകളിൽ അപകടസാധ്യത വർധിച്ച സാഹചര്യത്തിൽ ജാഗ്രത പാലിക്കണമെന്ന് നിർദേശമുണ്ട്.

വിനോദസഞ്ചാരികൾ കുടുങ്ങി, ബസിന് മുകളിലേക്ക് മണ്ണും മരങ്ങളും ഇടിഞ്ഞുവീണു

തമിഴ്‌നാടിന്റെ വടക്കൻ ജില്ലകളിലും മലയോര മേഖലകളിലും കനത്ത മഴ തുടരുന്നു. മഴയെ തുടർന്ന് ഊട്ടി–മേട്ടുപ്പാളയം റോഡിലും കൊടൈക്കനാൽ മേഖലയിലും വൻ മണ്ണിടിച്ചിലുണ്ടായി. ഊട്ടി–മേട്ടുപ്പാളയം പാതയിലെ ബൂർളിയാറിന് സമീപം നിർത്തിയിട്ടിരുന്ന ബസിന് മുകളിലേക്ക് മണ്ണും മരങ്ങളും ഇടിഞ്ഞുവീണു. എന്നാൽ ബസിലുണ്ടായിരുന്ന ഡ്രൈവറും കണ്ടക്ടറും ഉൾപ്പെടെയുള്ള ജീവനക്കാരെയും യാത്രക്കാരെയും സുരക്ഷിതമായി രക്ഷപ്പെടുത്തിയതിനാൽ വൻ ദുരന്തം ഒഴിവായി.

Kodaikanal Landslide : ന്യൂനമർദ്ദങ്ങൾ ശക്തിപ്രാപിക്കുന്നു; തമിഴ്നാട്ടിൽ അതിശക്തമായ മഴ, കൊടൈക്കനാലിൽ മണ്ണിടിച്ചിൽ
തമിഴ്നാട്ടിൽ അതിശക്തമായ മഴയിൽ കൊടൈക്കനാലിലും മേട്ടുപ്പാളയം–ഊട്ടി പാതയിലും മണ്ണിടിച്ചിൽ.
https://metbeatnews.com/landslides-block-ooty-and-kodaikanal-routes-ban-on-tourists-issued

മണ്ണിടിച്ചിലിനെ തുടർന്ന് കോയമ്പത്തൂർ–നീലഗിരി ജില്ലകളെ ബന്ധിപ്പിക്കുന്ന റോഡുകളിലും കൊടൈക്കനാലിലേക്കുള്ള പ്രധാന പാതകളിലും ഗതാഗതം പൂർണമായി തടസ്സപ്പെട്ടു. വാരാന്ത്യ അവധി ആഘോഷിക്കാനായി എത്തിയ നൂറുകണക്കിന് വിനോദസഞ്ചാരികൾ ഊട്ടിയിലും കൊടൈക്കനാലിലും കുടുങ്ങിക്കിടക്കുകയാണ്.

മഴ ശക്തമായി തുടരുന്ന സാഹചര്യത്തിൽ മലയോര മേഖലകളിലെ വിനോദസഞ്ചാരത്തിന് അധികൃതർ താൽക്കാലിക വിലക്കേർപ്പെടുത്തി. സംസ്ഥാനത്തെ പത്ത് ജില്ലകളിൽ കാലാവസ്ഥാ നിരീക്ഷണ കേന്ദ്രം ശക്തമായ മഴ മുന്നറിയിപ്പും നൽകിയിട്ടുണ്ട്.

Image Credit: meteoblue

തുടർച്ചയായ മഴയിൽ കൂടുതൽ പ്രദേശങ്ങളിൽ മണ്ണിടിച്ചിലിന് സാധ്യതയുള്ളതിനാൽ മലയോര മേഖലകളിൽ താമസിക്കുന്നവരും യാത്രക്കാരും അതീവ ജാഗ്രത പാലിക്കണമെന്ന് പ്രാദേശിക ഭരണകൂടം നിർദേശിച്ചു. അപകടസാധ്യതയുള്ള റോഡുകളിലൂടെയുള്ള യാത്ര ഒഴിവാക്കണമെന്നും അധികൃതർ മുന്നറിയിപ്പ് നൽകി.

കേരളം തീരത്തും ജാഗ്രത

അതേസമയം, കേരള തീരത്തിന് സമീപമുള്ള അറബിക്കടലിലെ കാറ്റിന്റെ ഗതിയിലും വേഗത്തിലും മാറ്റങ്ങൾ സംഭവിക്കുന്നു. കോഴിക്കോട്, കൊച്ചി, തിരുവനന്തപുരം തുടങ്ങിയ തീരദേശ നഗരങ്ങൾ ഉൾപ്പെടുന്ന മേഖലയിൽ ജാഗ്രതാ നിർദ്ദേശം നൽകിയിട്ടുണ്ട്. മംഗളൂരു, ബെംഗളൂരു, മൈസൂരു, സേലം, തിരുച്ചിറപ്പള്ളി, മധുര, പുതുച്ചേരി, ചെന്നൈ തുടങ്ങിയ പ്രദേശങ്ങളിലെയും കാറ്റിന്റെ ഗതിയിൽ നിർണായക മാറ്റമാണ് ഉള്ളത്.

മത്സ്യത്തൊഴിലാളികൾ കടലിൽ പോകുന്നതുമായി ബന്ധപ്പെട്ട നിർദേശങ്ങൾക്കും തീരദേശവാസികൾക്കുള്ള ജാഗ്രതാ നിർദേശങ്ങൾക്കും കാലാവസ്ഥാ വകുപ്പിന്റെയും ബന്ധപ്പെട്ട അധികൃതരുടെയും ഔദ്യോഗിക അറിയിപ്പുകൾ പിന്തുടരേണ്ടതാണ്.

English Summary : Severe downpours will continue across Tamil Nadu until Monday, causing widespread disruption.