ദിവസങ്ങളായി തുടരുന്ന കനത്ത മഴയെത്തുടര്‍ന്ന് തായ്‌ലാന്റ് തലസ്ഥാനമായ ബാങ്കോക്കില്‍ രൂക്ഷമായ പ്രളയം. പതിനായിരക്കണക്കിന് വീടുകളും റോഡുകളും വെള്ളത്തിനടിയിലായതോടെ ആയിരക്കണക്കിന് ആളുകളാണ് ഞായറാഴ്ച ദുരിതാശ്വാസ ക്യാമ്പുകളിലെത്തിയത്.

ബാങ്കോക്ക് മെട്രോപൊളിറ്റന്‍ അഡ്മിനിസ്‌ട്രേഷന്റെ (BMA) കണക്കനുസരിച്ച് ഏകദേശം 4,900 ആളുകളെ സുരക്ഷിത താവളങ്ങളിലേക്ക് മാറ്റിപ്പാര്‍പ്പിച്ചു. പ്രളയം കാരണം 52,000 ത്തോളം കുടുംബങ്ങളെ ദുരിതം ബാധിച്ചതിനെത്തുടര്‍ന്ന് തലസ്ഥാനത്തുടനീളം ദുരന്ത നിവാരണ അടിയന്തരാവസ്ഥ പ്രഖ്യാപിച്ചിട്ടുണ്ട്.

#BREAKING: 🇹🇭 Bangkok declared a disaster zone after nearly 300mm of rain flooded all 50 districts. Stay home as canals overflow#BangkokFloods #Thailand

pic.twitter.com/Y7DIIzms2c pic.twitter.com/J00ZwDxFJa
— Twilight (@TwilightDewy) September 26, 2026

വ്യാഴാഴ്ച മുതല്‍ ഞായറാഴ്ച വരെയുള്ള ദിവസങ്ങളില്‍ നഗരത്തിന്റെ ചില ഭാഗങ്ങളില്‍ 330 മില്ലിമീറ്ററിലധികം (13 ഇഞ്ച്) മഴ രേഖപ്പെടുത്തിയതായി കാലാവസ്ഥാ നിരീക്ഷണ കേന്ദ്രം അറിയിച്ചു. തായ്‌ലാന്റില്‍ സെപ്റ്റംബര്‍ മാസം സാധാരണയായി ശക്തമായ മഴ ലഭിക്കാറുണ്ടെങ്കിലും, ഇത്തവണത്തെ പ്രളയം മുന്‍വര്‍ഷങ്ങളേക്കാള്‍ ഭീകരമാണെന്നാണ് പ്രദേശവാസികള്‍ പറയുന്നത്.

'ഏകദേശം 30 മണിക്കൂറോളമാണ് ഞങ്ങളുടെ വീട് വെള്ളത്തിനടിയിലായിരുന്നത്. 2011ലെ പ്രളയത്തേക്കാള്‍ ഉയര്‍ന്ന ജലനിരപ്പാണ് ഇത്തവണ അനുഭവപ്പെട്ടത്,' നഗരപ്രാന്തത്തിലുള്ള പ്രേംപ്രചാകോണ്‍ കനാലിന് സമീപം താമസിക്കുന്ന കോസിന്‍ നില്‍സെറ്റ് (44) പറഞ്ഞു. എന്നാല്‍ കുടിവെള്ളവും വൈദ്യുതി ബന്ധവും തടസ്സപ്പെടാതിരുന്നത് വലിയ ആശ്വാസമായെന്നും അദ്ദേഹം കൂട്ടിച്ചേര്‍ത്തു.

The Bangkok sea 🌊 just broke into a city in Thailand and it’s such a natural disaster hitting the entire city pic.twitter.com/Dc5QJQJAr4
— LifelyP (@LifelyPhil) September 27, 2026

2011 ല്‍ തായ്‌ലാന്റിലുണ്ടായ അതിരൂക്ഷമായ വെള്ളപ്പൊക്കത്തില്‍ 500 ലധികം ആളുകള്‍ക്ക് ജീവന്‍ നഷ്ടപ്പെടുകയും ലക്ഷക്കണക്കിന് വീടുകള്‍ തകരുകയും ചെയ്തിരുന്നു.

ബാങ്കോക്കിന്റെ കിഴക്കന്‍ മേഖലകളില്‍ മുട്ടൊപ്പം വെള്ളത്തിലൂടെയാണ് ആളുകള്‍ അവശ്യസാധനങ്ങളുമായി സഞ്ചരിക്കുന്നത്. നഗരത്തിലെ കനാലുകളില്‍ ജലനിരപ്പ് ഇപ്പോഴും ഉയര്‍ന്ന നിലയിലാണെന്നും വെള്ളം കെട്ടിക്കിടക്കുന്നത് ഒഴിവാക്കാന്‍ ഡ്രെയിനേജ് സംവിധാനങ്ങളിലെ തടസ്സം നീക്കിയിട്ടുണ്ടെന്നും അധികൃതര്‍ അറിയിച്ചു.

ഞായറാഴ്ചയും ബാങ്കോക്കിലും സമീപ പ്രദേശങ്ങളിലും ശക്തമായ മഴയ്ക്ക് സാധ്യതയുണ്ടെന്നും തിങ്കളാഴ്ചയോടെ മഴയുടെ ശക്തി കുറയുമെന്നുമാണ് കാലാവസ്ഥാ പ്രവചനം. ഫോസില്‍ ഇന്ധനങ്ങളുടെ അമിതോപയോഗം മൂലമുണ്ടാകുന്ന ആഗോളതാപനമാണ് ഇത്തരത്തിലുള്ള തീവ്ര കാലാവസ്ഥാ വ്യതിയാനങ്ങള്‍ക്ക് കാരണമെന്ന് ശാസ്ത്രജ്ഞര്‍ മുന്നറിയിപ്പ് നല്‍കുന്നു.

നിരവധി പ്രധാന റോഡുകള്‍ ഇപ്പോഴും വെള്ളത്തിനടിയിലായതിനാല്‍ അടിയന്തര സാഹചര്യങ്ങളിലല്ലാതെ ജനങ്ങള്‍ പുറത്തിറങ്ങരുതെന്ന് ബാങ്കോക്ക് ഗവര്‍ണര്‍ ചാഡ്ചാര്‍ട്ട് സിറ്റിപണ്ട് നിര്‍ദ്ദേശിച്ചു.