കിണർവെള്ളം അമീബിക് മസ്തിഷ്കജ്വരത്തിന് സാധ്യതയെന്ന് പഠനം

സംസ്ഥാനത്ത് അമീബിക് മസ്‌തിഷ്‌ക ജ്വരം ബാധിച്ച് മരിക്കുന്നവരുടെ എണ്ണം വർദ്ധിക്കുന്നുണ്ട്. പ്രധാനമായും ക്ലോറിനേഷൻ ചെയ്യാത്ത കിണർവെള്ളം ഉപയോഗിക്കുമ്പോഴാണ് അമീബിക് മസ്തിഷ്കജ്വരത്തിനുള്ള അപകടസാധ്യത വർദ്ധിക്കുന്നതെന്നാണ് പഠനം. എല്ലാ ആവശ്യങ്ങൾക്കും നമ്മൾ ഉപയോഗിക്കുന്നത് കിണർവെള്ളമാണ്. കുളിക്കാനും മുഖം കഴുകാനും തുടങ്ങി വീട്ടാവശ്യങ്ങൾക്ക് വരെ കിണർവെള്ളം ഉപയോഗിക്കുന്നു. ക്ലോറിനേഷൻ ചെയ്യാത്ത ഈ കിണർവെള്ളം ഉപയോഗിക്കുന്നവരിൽ അമീബിക് മസ്തിഷ്കജ്വരം (AME) ബാധിക്കാനുള്ള സാധ്യത 2.9 മടങ്ങ് കൂടുതലാണെന്നാണ് ഐസിഎംആറും ആരോഗ്യവകുപ്പും നടത്തിയ പഠനത്തിൽ പറയുന്നത്.

സംസ്ഥാനത്ത് ഇതുവരെ റിപ്പോർട്ട് ചെയ്തത് 159 അമീബിക് മസ്തിഷ്‌കജ്വര കേസുകൾ

രോഗബാധിതരിൽ പകുതിയും ഗ്രാമപ്രദേശങ്ങളിൽ ഉള്ളവരായിരുന്നു. ഇവർക്ക് രോഗം ബാധിച്ചത് മൺസൂൺ കാലത്തും അതിന് ശേഷമുള്ള സമയത്തുമാണ്. ഈ സമയത്താണ് കേസുകൾ കൂടുതലായി റിപ്പോർട്ട് ചെയ്തത്. 2025 ജനുവരി 1 മുതൽ നവംബർ 11 വരെ സംസ്ഥാനത്ത് റിപ്പോർട്ട് ചെയ്ത 159 അമീബിക് മസ്തിഷ്കജ്വര കേസുകളാണ് പഠനത്തിനായി പരിശോധിച്ചത്. ആർടിപിസിആർ പരിശോധനയിലൂടെ സ്ഥിരീകരിച്ച കേസുകളിൽ ഭൂരിഭാഗവും അകാന്തമീബ വിഭാഗത്തിൽപ്പെട്ട അമീബ മൂലമാണെന്നും കണ്ടെത്തി.

ഉറവിടം കിണർ മാത്രമല്ല

കുളങ്ങൾ, തടാകങ്ങൾ, പുഴകൾ, തോടുകൾ, കനാലുകൾ തുടങ്ങിയ ജലാശയങ്ങളിലെ ഉപയോഗവും അമീബികിന് പ്രധാന അപകടസാധ്യതയായി പഠനം ചൂണ്ടിക്കാട്ടുന്നുണ്ട്. ഇത്തരം ജലാശയങ്ങളിൽ അമീബിക് മസ്തിഷ്കജ്വര സാധ്യത 4.7 മടങ്ങ് കൂടുതലാണെന്നാണ് കണ്ടെത്തൽ.

ജലാശയങ്ങളിൽ നീന്തുന്നതിനിടയിലോ കുളിക്കുമ്പോഴോ വെള്ളം മൂക്കിനുള്ളിലേക്ക് കയറുന്നത് രോഗസാധ്യത വർധിക്കാൻ കാരണമാകുന്നതായി പഠനം പറയുന്നു. മാത്രമല്ല ശരീരത്തിൽ മുറിവുകളോ മറ്റ് വ്രണങ്ങളോ ഉള്ളവർ കുളത്തിലോ മറ്റ് ജലാശയങ്ങളിലോ ഇറങ്ങുമ്പോൾ പ്രത്യേക ജാഗ്രത പാലിക്കണമെന്ന് നിർദ്ദേശമുണ്ട്. അതേസമയം മുറിവുകൾ ഇത്തരം വെള്ളത്തിൽ കഴുകിയവരിലും രോഗബാധ റിപ്പോർട്ട് ചെയ്തിട്ടുണ്ട്.

പരിക്ക് അപകടമാവുന്നു

മുഖത്ത്, താടിയെല്ലിന് പരിക്കേറ്റവർ, മൂക്കിൽ ശസ്ത്രക്രിയ നടത്തിയവർ എന്നിവർ കുളത്തിലോ മറ്റ് ജലാശയങ്ങളിലോ ഇറങ്ങുന്നത് അപകടസാധ്യത ഉണ്ടാക്കാം.

ക്ലോറിനേറ്റ് നിർബന്ധം

വീടുകളിലെ കിണറുകൾ പതിവായി ക്ലോറിനേറ്റ് ചെയ്ത് പരിപാലിക്കുന്നത് അമീബിക് മസ്തിഷ്കജ്വരം തടയുന്നതിൽ പ്രധാനമാണെന്ന് ഗവേഷകർ പറയുന്നു. പ്രത്യേകിച്ച് കുളിക്കാനും മുഖവും മുടിയും കഴുകാനും ഉപയോഗിക്കുന്ന കിണർവെള്ളം ക്ലോറിനേറ്റ് ചെയ്യുന്നത് വളരെ പ്രധാനമാണെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.

English Summary : A joint study conducted by the Indian Council of Medical Research (ICMR) and the Kerala Health Department warns that using unchlorinated well water significantly increases the risk of Amoebic Meningoencephalitis (AME).