അടുക്കള തോട്ടത്തിൽ വളരെ എളുപ്പത്തിൽ ബീറ്റ് റൂട്ട് കൃഷി ചെയ്യാം; ഇക്കാര്യങ്ങൾ ശ്രദ്ധിക്കൂ

കേരളത്തിലെ തീൻ മേശയിൽ ബീറ്റ്റൂട്ടിൻ്റെ സ്ഥാനം വളരെ വലുതാണ്. നിരവധി ആരോഗ്യഗുണമുള്ള ഈ പച്ചക്കറി ശരീരത്തിലെ രക്തം വർദ്ധിപ്പിക്കാൻ ഏറെ പ്രധാനപ്പെട്ടതാണ്. ഇതിൽ അടങ്ങിയിരിക്കുന്ന അയേൺ വിളർച്ച തടയാൻ വളരെ സഹായകമാണ്. നമ്മൾ മലയാളികൾ ബീറ്റ്റൂട്ട്(Beetroot) പൊതുവെ തോരൻ, മെഴുക്കു വരട്ടി സലാഡ്,(salads) ജ്യൂസ് എന്നിവ ഉണ്ടാക്കാനാണ് ഉപയോഗിക്കുന്നത്.

അതുകൊണ്ട് തന്നെ മലയാളികൾ ബീറ്റ് റൂട്ടിനെ നിത്യജീവിതത്തിൽ നിന്ന് ഒഴിവാക്കാറുമില്ല. പക്ഷേ കേരളത്തിലെ അടുക്കളതോട്ടങ്ങളിൽ ബീറ്റ്റൂട്ട് പൊതുവെ കൃഷി ചെയ്യാറില്ല. എന്നാൽ ഇനി ആശങ്ക വേണ്ട. ചില കാര്യങ്ങൾ ശ്രദ്ധിച്ചാൽ ഈസിയായി ബീറ്റ് റൂട്ടും കൃഷി ചെയ്യാം. അൽപ്പം പരിചരണമുണ്ടെങ്കിൽ ബീറ്റ് റൂട്ട് കൃഷി ഗ്രോബാഗിൽ വളരെ എളുപ്പത്തിൽ വിളയിച്ചെടുക്കാം.

എവിടെ കൃഷിചെയ്യാം

നല്ല സൂര്യപ്രകാശവും ആവശ്യത്തിന് ഈർപ്പവും ലഭിക്കുന്ന സ്ഥലമായിരിക്കണം കൃഷിക്കു വേണ്ടി തിരഞ്ഞെടുക്കേണ്ടത്. ഇനി ഗ്രോബാഗിൽ എങ്ങനെ ബീറ്റ് റൂട്ട് നടാം എന്ന് നോക്കാം.

വെള്ളം കെട്ടിനിൽക്കാത്ത വിധത്തിൽ ഗ്രോബാഗിൽ മണ്ണ്, ചകിരി, ചാണകപ്പൊടി എന്നിവ ഒരേ അളവിൽ കലർത്തി മിശ്രിതം തയ്യാറാക്കി നിറയ്ക്കാം. അമ്ലത കൂടിയ മണ്ണാണെങ്കിൽ കുറച്ച് കുമ്മായം ചേർക്കുന്നത് നല്ലതായിരിക്കും.

വിത്തുകൾ പരിപാലിക്കേണ്ട രീതി

വിത്തുകൾ അഞ്ച് മണിക്കൂർ വെള്ളത്തിൽ കുതിർത്ത ശേഷം അര ഇഞ്ചോളം ആഴത്തിൽ പാകുക. ഈ വിത്ത് മുളയ്ക്കുന്നത് വരെ ഇല ഉപയോഗിച്ച് മൂടുന്നത് ഈർപ്പം നിലനിർത്താൻ സഹായിക്കും. ഗ്രോബാഗിലല്ലാതെ നിലത്താണ് വിത്ത് പാകുന്നതെങ്കിലും ഈ രീതിതന്നെ ഉപയോഗിക്കാം. ശേഷം അൽപ്പം മാത്രം വെള്ളം തളിക്കാം. വെള്ളം അധികമായാൽ കിഴങ്ങ് ചീഞ്ഞു പോകുവാനുള്ള സാധ്യത വളരെ കൂടുതലാണ്.

വിത്ത് മുളപൊട്ടിയ ശേഷം ഇക്കാര്യങ്ങൾ ശ്രദ്ധിക്കുക

വിത്ത് മുളയ്ക്കാൻ രണ്ടാഴ്ചയെങ്കിലും സമയമെടുക്കും. ശേഷം ജീവാമൃതം, പുളിപ്പിച്ച കടലപിണ്ണാക്ക്, ആട്ടിൻ കാഷ്‌ഠം എന്നീ ജൈവവളങ്ങൾ നൽകി ബീറ്റ് റൂട്ടിനെ പരിപാലിക്കാം. അതേസമയം ഗ്രോബാഗിൽ ഒന്നിലധികം തൈകൾ മുളച്ചാൽ അവ മാറ്റി നടണം. കാരണം തൈകൾ ഗ്രോബാഗിൽ കൂട്ടമായി വളരുന്നത് കിഴങ്ങിൻ്റെ വലുപ്പം കുറയ്ക്കും.

വളങ്ങൾ പ്രധാനം, എപ്പോൾ വിളവെടുക്കാം?

പൊട്ടാസ്യം അടങ്ങിയ വളങ്ങൾ നൽകുന്നത് ബീറ്റ്റൂട്ടിൻ്റെ മികച്ച വിളവിന് സഹായകമാകും. മുകളിൽ പറഞ്ഞ രീതികളിൽ മുന്നോട്ടു പോയാൽ ഏകദേശം മൂന്നൂ മാസത്തിനുള്ളിൽ തന്നെ ബീറ്റ്റൂട്ട് വിളവെടുക്കാനുള്ള പാകത്തിലാകും. ശരിയായ രീതിയിൽ പരിപാലിച്ചാൽ കുറഞ്ഞസ്ഥലത്തു തന്നെ മികച്ച രീതിയിൽ വിളവെടുക്കാം.

English Summary : Beetroot is a nutrient-dense superfood renowned for its high iron content, anti-anemic properties, and versatile culinary uses in everyday dishes, salads, and juices. While traditionally bought from markets, growing beetroots at home in grow bags or small backyard garden plots is straightforward with the right approach.