മഴ വർധിപ്പിക്കൽ ഗവേഷണത്തിന് 30 ലക്ഷം ഡോളർ; പുതിയ പദ്ധതിയുമായി യുഎഇ

മഴ വർധിപ്പിക്കാനുള്ള നൂതന സാങ്കേതികവിദ്യകൾ വികസിപ്പിക്കുന്നതിനായി വൻ ഗവേഷണ പദ്ധതിയുമായി യുഎഇ. യുഎഇ റിസർച്ച് പ്രോഗ്രാം ഫോർ റെയിൻ എൻഹാൻസ്‌മെന്റ് സയൻസിന്റെ ഏഴാം ഘട്ടത്തിലേക്ക് 30 ലക്ഷം യുഎസ് ഡോളറിന്റെ ധനസഹായമാണ് പ്രഖ്യാപിച്ചിരിക്കുന്നത്. നാഷണൽ സെന്റർ ഓഫ് മെറ്റീരിയോളജിയുടെ (NCM) നേതൃത്വത്തിലാണ് പദ്ധതി നടപ്പാക്കുന്നത്.

ധനസഹായം

പരമാവധി അഞ്ച് ഗവേഷണ പദ്ധതികൾക്കായാണ് തുക അനുവദിക്കുക. ഒന്ന് മുതൽ മൂന്ന് വർഷം വരെ ദൈർഘ്യമുള്ള പദ്ധതികൾക്ക് ധനസഹായം ലഭിക്കും. ഒരു വർഷത്തെ ഗവേഷണത്തിന് അഞ്ച് ലക്ഷം ഡോളർ വരെയും രണ്ട് വർഷത്തേക്ക് 10 ലക്ഷം ഡോളർ വരെയും മൂന്ന് വർഷത്തെ പദ്ധതിക്ക് 15 ലക്ഷം ഡോളർ വരെയുമാണ് അനുവദിക്കുക.

അഞ്ച് മേഖലകളിലാണ് പുതിയ ഘട്ടത്തിൽ ഗവേഷണം കേന്ദ്രീകരിക്കുന്നത്. മഴ വർധിപ്പിക്കാൻ ഉപയോഗിക്കുന്ന വിത്തിടൽ വസ്തുക്കളുടെ കാര്യക്ഷമത മെച്ചപ്പെടുത്തുക, പുതിയ മേഘരൂപീകരണ സംവിധാനങ്ങൾ വികസിപ്പിക്കുക, സ്വയം നിയന്ത്രിത ആളില്ലാ വിമാനങ്ങൾ ഉപയോഗപ്പെടുത്തുക, പ്രാദേശിക കാലാവസ്ഥാ ഇടപെടലുകൾ പഠിക്കുക, നൂതന കാലാവസ്ഥാ മാതൃകകളും സോഫ്റ്റ്‌വെയറും ഡാറ്റാ സംവിധാനങ്ങളും വികസിപ്പിക്കുക എന്നിവയാണിവ.

ആളില്ലാ വിമാനങ്ങൾ

പരമ്പരാഗത ക്ലൗഡ് സീഡിങ് രീതികൾക്കപ്പുറം മഴ ലഭ്യത വർധിപ്പിക്കാനുള്ള പുതിയ മാർഗങ്ങൾ കണ്ടെത്തുന്നതിനും ഗവേഷണം നടത്തും. അന്തരീക്ഷത്തിലെ ജലത്തുള്ളികളുടെയും ഐസ് കണങ്ങളുടെയും രൂപീകരണം പ്രോത്സാഹിപ്പിക്കുന്ന സാങ്കേതികവിദ്യകൾ ഇതിൽ ഉൾപ്പെടും. മേഘങ്ങളെ തിരിച്ചറിയാനും മഴ വർധിപ്പിക്കുന്നതിനുള്ള വസ്തുക്കൾ കൃത്യമായി എത്തിക്കാനും ആളില്ലാ വിമാനങ്ങൾ ഉപയോഗിക്കുന്നതും പഠനവിധേയമാക്കും.

കാലാവസ്ഥാ പ്രവചന മാതൃകകൾ കൂടുതൽ കൃത്യതയോടു കൂടി

ഭൂമിയുടെ ഉപരിതലത്തിലെ മാറ്റങ്ങൾ, അന്തരീക്ഷത്തിലെ ഈർപ്പം, എയറോസോളുകൾ, സൂര്യപ്രകാശത്തിന്റെ പ്രാദേശിക സ്വാധീനം എന്നിവയെക്കുറിച്ചും പഠനം നടത്തും. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള സാങ്കേതികവിദ്യകൾ പ്രയോജനപ്പെടുത്തി കാലാവസ്ഥാ പ്രവചന മാതൃകകൾ കൂടുതൽ കൃത്യതയുള്ളതാക്കാനും ലക്ഷ്യമിടുന്നു.

ജലസുരക്ഷ ഉറപ്പാക്കുന്നതിനും ജലക്ഷാമം നേരിടുന്നതിനും ശാസ്ത്രീയ ഗവേഷണവും രാജ്യാന്തര സഹകരണവും അനിവാര്യമാണെന്ന് ലോക കാലാവസ്ഥാ സംഘടനയുടെ പ്രസിഡന്റും NCM ചെയർമാനുമായ ഡോ. അബ്ദുല്ല അൽ മന്ദൂസ് പറഞ്ഞു. മുൻ ഘട്ടങ്ങളിലെ ഗവേഷണ നേട്ടങ്ങൾ കൂടുതൽ പ്രായോഗികമായ സാങ്കേതികവിദ്യകളിലേക്ക് എത്തിക്കുകയാണ് പുതിയ പദ്ധതിയുടെ ലക്ഷ്യം.

രണ്ട് ഘട്ടങ്ങളിലായി പദ്ധതികൾ

സർവകലാശാലകൾ, വ്യവസായ സ്ഥാപനങ്ങൾ, സർക്കാർ ഏജൻസികൾ എന്നിവയുടെ സഹകരണത്തോടെയുള്ള ഗവേഷണങ്ങൾക്കാണ് പ്രത്യേക പരിഗണന. യുഎഇയിലെ ഗവേഷകർക്കൊപ്പം രാജ്യാന്തര ഗവേഷക സംഘങ്ങൾക്കും പദ്ധതിയിൽ പങ്കാളികളാകാം. ശാസ്ത്രീയ മികവ്, നൂതന ആശയങ്ങൾ, ഗവേഷക സംഘത്തിന്റെ പ്രവർത്തന മികവ്, പ്രായോഗിക സാധ്യതകൾ, സാമ്പത്തിക ചെലവ് എന്നിവ വിലയിരുത്തി രണ്ട് ഘട്ടങ്ങളിലായാണ് പദ്ധതികൾ തിരഞ്ഞെടുക്കുക.

കഴിഞ്ഞ ആറ് ഘട്ടങ്ങളിലായി 17 ഗവേഷണ പദ്ധതികൾക്കാണ് യുഎഇ ഈ പദ്ധതിയിലൂടെ ധനസഹായം നൽകിയത്. മഴ വർധിപ്പിക്കുന്നതിനുള്ള സാങ്കേതികവിദ്യകൾ കൂടുതൽ വികസിപ്പിച്ച് രാജ്യത്തിന്റെ ജലസുരക്ഷ ശക്തിപ്പെടുത്തുന്നതിനൊപ്പം ആഗോളതലത്തിൽ ഈ രംഗത്തെ ഗവേഷണ സഹകരണം വിപുലീകരിക്കാനും പുതിയ ഘട്ടത്തിലൂടെ ലക്ഷ്യമിടുന്നു.

English Summary : The $3 million grant pool will support up to five proposals spanning 1 to 3 years. Funding caps are structured at $500,000 for a 1-year project, $1 million for 2 years, and up to $1.5 million for a 3-year research initiative.