ഫിലിപ്പൈന്‍സിലെ ബൗലോയ് ചുഴലിക്കാറ്റ്; 10 മരണം, 4 ലക്ഷം പേരെ മാറ്റിപാര്‍പ്പിച്ചു

കേരളത്തിലെ മഴയെ സ്വാധീനിക്കുന്ന ഫിലിപ്പൈന്‍സിലെ ബൗലോയ് ചുഴലിക്കാറ്റ് ശക്തിപ്പെട്ട് തീവ്ര ചുഴലിക്കാറ്റായി. ഇതുവരെ 10 പേര്‍ ചുഴലിക്കാറ്റിനെ തുടര്‍ന്ന് കൊല്ലപ്പെട്ടു. സെന്‍ട്രല്‍ ഫിലിപ്പൈന്‍സിലും തെക്കന്‍ ലുസോണിലുമാണ് മരണം റിപ്പോര്‍ട്ട് ചെയ്തത്.

2025 ല്‍ ഫിലിപ്പൈന്‍സിലുണ്ടാകുന്ന 15ാമത്തെ ചുഴലിക്കാറ്റാണിത്. നാലു ലക്ഷം പേരെ ഫിലിപ്പൈന്‍സില്‍ മാറ്റിപാര്‍പ്പിച്ചു. ഒരു വര്‍ഷം ശരാശരി 20 ചുഴലിക്കാറ്റുകളാണ് ഫിലിപ്പൈന്‍സിലുണ്ടാകുന്നത്.

കഴിഞ്ഞ ദിവസം റഗാസ ചുഴലിക്കാറ്റിന്റെ കെടുതികള്‍ അവസാനിക്കും മുന്‍പാണ് പുതിയ ചുഴലിക്കാറ്റ് ഫിലിപ്പൈന്‍സിലെത്തിയത്. റഗാസ ആദ്യം നാശം വിതച്ചത് ഫിലിപ്പൈന്‍സിലായിരുന്നു. പിന്നീട് തായ്‌വാനില്‍ കരകയറി. അവിടെ 14 പേരാണ് കൊല്ലപ്പെട്ടത്. ഫിലിപ്പൈന്‍സിലെ കിഴക്കന്‍ ബോകോളില്‍ മാത്രം 87,000 പേരെ മാറ്റിപാര്‍പ്പിച്ചു.

മധ്യ ഫിലിപ്പൈന്‍സിലെ കിഴക്കന്‍ സമാറിലാണ് ബൗലോയ് ചുഴലിക്കാറ്റ് കരകയറിയത്. മസ്‌ബേറ്റ് പ്രവിശ്യയില്‍ മൂന്നു പേര്‍ കൊല്ലപ്പെട്ടു. ഒരാള്‍ മരിച്ചത് കനത്ത കാറ്റില്‍ മരം വീണാണ്. മറ്റൊരാള്‍ മുങ്ങിമരിക്കുകയും മൂന്നാമത്തെയാള്‍ മതിലിടിഞ്ഞു വീണുമാണ് മരിച്ചത്. മധ്യ ഫിലിപ്പൈന്‍സില്‍ ഏഴു പേര്‍ പ്രളയത്തില്‍ മരിച്ചുവെന്ന് സിവില്‍ ഡിഫന്‍സ് അറിയിച്ചു.

വൈദ്യുതിയും വാര്‍ത്താവിനിമയ സംവിധാനങ്ങളും തടസ്സപ്പെട്ടിട്ടുണ്ട്. മസ്‌ബേറ്റ് ഗവര്‍ണര്‍ ഇവ പുനസ്ഥാപിക്കാനും ദുരിതാശ്വാസ പ്രവര്‍ത്തനങ്ങള്‍ക്കും കേന്ദ്ര സര്‍ക്കാരിന്റെ സഹായം തേടിയിട്ടുണ്ട്്. തെക്കന്‍ ലുസോണില്‍ കനത്ത മഴയും കാറ്റുമാണ് നാശനഷ്ടം വിതച്ചത്. ബൗലോയ് കരകയറുമ്പോള്‍ 110 കിലോമീറ്റര്‍ വേഗതയിലാണ് കാറ്റ് വീശിയത്. 135 കി.മി വരെ വേഗത വര്‍ധിച്ചു.

ബൗലോയ് ഇനി വിയറ്റ്‌നാമിലേക്ക് പോകും. സെപ്റ്റംബര്‍ 28 മുതല്‍ 30 വരെ വിയറ്റ്‌നാമില്‍ പ്രളയത്തിന് കാരണമാകുന്ന മഴ ലഭിക്കുമെന്നാണ് Department of Meteorology and Hydrology മുന്നറിയിപ്പ് നല്‍കി.