ഒമാനിൽ രണ്ടു മലയാളി യുവാക്കളെ മരിച്ച നിലയിൽ കണ്ടെത്തി. കോഴിക്കോട് സ്വദേശി മുഹമ്മദ് ജനീഷ് ബാബു (28), മലപ്പുറം സ്വദേശി ശരത് (29) എന്നിവരാണ് മരിച്ചത്. റൂവി ഹംരിയയിലെ കെട്ടിടത്തിൽ വ്യാഴാഴ്ചയാണ് ജനീഷ് ബാബുവിനെ മരിച്ച നിലയിൽ കണ്ടെത്തിയത്. ശരത്തിനെ ശനിയാഴ്ച റൂവിയിലും മരിച്ച നിലയിൽ കണ്ടെത്തുകയായിരുന്നു.

കോഴിക്കോട് കല്ലായി ചക്കുംകടവ് സ്വദേശിയായ ജനീഷ് ബാബു, മബേലയിലെ ചോക്‌ലേറ്റ് കമ്പനിയിലെ ജോലി അവസാനിപ്പിച്ച് നാല് മാസം മുൻപ് നാട്ടിലേക്ക് മടങ്ങിയിരുന്നു. അടുത്തിടെ താൽക്കാലിക വീസയിൽ തിരിച്ചെത്തി വാദി കബീറിൽ താമസിച്ച് വരികയായിരുന്ന അദ്ദേഹം പുതിയ ജോലിക്കായുള്ള ശ്രമത്തിലായിരുന്നു.

ഓഗസ്റ്റ് 31-ന് മുറി ഒഴിഞ്ഞ് ഇറങ്ങിയ ജനീഷിനെ പിന്നീട് ഹംരിയയിൽ മരിച്ച നിലയിൽ കണ്ടെത്തുകയായിരുന്നു. പാസ്‌പോർട്ട് ലഭ്യമല്ലാതിരുന്നതിനാൽ റോയൽ ഒമാൻ പോലീസ് മൃതദേഹം തിരിച്ചറിയാനാകാതെ മോർച്ചറിയിൽ സൂക്ഷിച്ചിരിക്കുകയായിരുന്നു.
പെരിന്തൽമണ്ണ കുന്നക്കാവ് സ്വദേശിയായ ശരത്തിന്റെ മരണാനന്തര നടപടികൾക്കായി സാമൂഹിക പ്രവർത്തകർ പൊലീസുമായി ബന്ധപ്പെട്ടപ്പോഴാണ് ജനീഷ് ബാബുവിന്റെ മരണത്തെക്കുറിച്ചുള്ള വിവരവും പുറത്തുവരുന്നത്.

തുടർന്ന് നടത്തിയ അന്വേഷണത്തിൽ, ജനീഷിന്റെ പഴയ ജോലിസ്ഥലം വഴി വിവരങ്ങൾ ശേഖരിച്ചാണ് മൃതദേഹം തിരിച്ചറിഞ്ഞത്. ജനീഷ് ബാബു: ഹാജറ മൻസിലിൽ മുഹമ്മദ് ജാഫർ- ഫാത്തിമാബി ദമ്പതികളുടെ മകനാണ്. ശരത്: കാദർതൊടി ഹൗസിൽ ഗോവിന്ദൻ–പത്മിനി ദമ്പതികളുടെ മകനാണ്.

English Summary : Two young men from Kerala were found dead in Oman in separate incidents. Muhammed Janeesh Babu (28): A native of Chakkumkadavu, Kozhikode. He was found dead in a building at Hamriya, Ruwi. Sharath (29): A native of Perinthalmanna, Malappuram. He was found dead in Ruwi