ശക്തമായ കാറ്റിൽ മരം വീണ് രണ്ട് തോട്ടം തൊഴിലാളികൾക്ക് ദാരുണാന്ത്യം

മാങ്കുളത്ത് ശക്തമായ കാറ്റിൽ മരം വീണ് രണ്ട് തോട്ടം തൊഴിലാളികൾക്ക് ദാരുണാന്ത്യം. ഞായറാഴ്ച ഉച്ചയൂണും കഴിഞ്ഞ് ഏലത്തോട്ടത്തിലെ വലിയ മരച്ചുവട്ടിൽ വിശ്രമിക്കുന്നതിനിടെയായിരുന്നു ശക്തമായ കാറ്റിൽ മരം ദേഹത്തേക്ക് മറിഞ്ഞുവീണ് ചില്ലിയമ്മയും വീരലക്ഷ്മിയും മരിച്ചത്. മാങ്കുളത്താണ് നാടിനെ നടുക്കിയ ദുരന്തം നടന്നത്.

15 സഹപ്രവർത്തകർക്കൊപ്പമാണ് ഇരുവരും ഉച്ചഭക്ഷണം കഴിച്ചത്. ജോലി പുനരാരംഭിക്കുന്നതിനുമുമ്പ് മരച്ചുവട്ടിൽ വിശ്രമിക്കുകയായിരുന്നു ഇവർ. അപകടസമയത്ത് ശക്തമായ മഴയുണ്ടായിരുന്നില്ലെങ്കിലും കാറ്റ് വീശിയിരുന്നതായാണ് വിവരം. 100 ഇഞ്ചിലധികം വലുപ്പമുള്ള കൂറ്റൻ മരമാണ് തൊഴിലാളികളുടെ ദേഹത്തേക്ക് മറിഞ്ഞുവീണത്. ഇരുവരും സംഭവസ്ഥലത്തുതന്നെ മരിച്ചു.

Body of Missing Army Soldier : ചാലിയാറിൽ വീണ് കാണാതായ സൈനികന്റെ മൃതദേഹം കണ്ടെത്തി
ഊർക്കടവ് റെഗുലേറ്റർ കം ബ്രിഡ്ജിന് സമീപം ചാലിയാറിൽ വീണ് കാണാതായ സൈനികൻ സുധീഷിന്റെ മൃതദേഹം കണ്ടെത്തി.
https://metbeatnews.com/body-of-missing-army-soldier-recovered-from-chaliyar-river-near-oorkadavu

മൃതദേഹങ്ങൾ ചുമന്നെത്തിച്ചത് തുണിമഞ്ചലിൽ

അപകടം നടന്നിട്ടും വിവരം പുറംലോകത്തെത്താൻ വൈകി. ആംബുലൻസും പോലീസും സ്ഥലത്തെത്താൻ ഒരു മണിക്കൂറോളം വേണ്ടിവന്നു. വാഹനമെത്തുന്ന വഴിയിലേക്ക് മൃതദേഹങ്ങൾ എത്തിക്കാൻ സഹപ്രവർത്തകർ തുണികൊണ്ട് മഞ്ചൽ ഒരുക്കി ചുമന്നുകൊണ്ടുപോയി.

അപകടത്തിനുശേഷം ചില്ലിയമ്മയുടെ ഭർത്താവ് പെത്തണ്ണൻ അരമണിക്കൂറോളം ഭാര്യയുടെ മൃതദേഹത്തിനരികിൽ കാവലിരുന്നുവെന്നാണ് വിവരം. സമീപത്തുതന്നെ വീരലക്ഷ്മിയുടെ മൃതദേഹവും കിടന്നിരുന്നു. ദിവസക്കൂലി കൊണ്ട് കുടുംബത്തിന്റെ പട്ടിണി മാറ്റിയിരുന്ന ഇവരുടെ അപ്രതീക്ഷിത വിയോഗം ഉറ്റവർക്ക് താങ്ങാനാവാത്ത ദുരന്തമായി.

മൂന്ന് വർഷത്തിനിടെ മരംവീണ് ആറു മരണം

ദേവികുളം താലൂക്കിലെ വിവിധ ഏലത്തോട്ടങ്ങളിൽ കഴിഞ്ഞ മൂന്ന് വർഷത്തിനിടെ മരംവീണ് ആറുപേർ മരിച്ചതായാണ് കണക്ക്. പല എസ്റ്റേറ്റുകളിലും കാലപ്പഴക്കംചെന്നതും ഉണങ്ങിയതുമായ നിരവധി മരങ്ങൾ ഇപ്പോഴും അപകടഭീഷണിയുയർത്തി നിൽക്കുന്നുണ്ട്.

വനംവകുപ്പിന്റെ അനുമതി ലഭിക്കാത്തതിനാൽ ഇത്തരം മരങ്ങൾ മുറിച്ചുനീക്കാൻ എസ്റ്റേറ്റ് ഉടമകൾക്ക് കഴിയുന്നില്ലെന്നാണ് പറയുന്നത്. ഞായറാഴ്ച രാവിലെ മുതൽ ദേവികുളം താലൂക്കിന്റെ വിവിധ ഭാഗങ്ങളിൽ ചെറിയ തോതിൽ മഴയുണ്ടായിരുന്നെങ്കിലും മാങ്കുളത്ത് അപകടസമയത്ത് മഴയുണ്ടായിരുന്നില്ല. ശക്തമായ കാറ്റാണ് വീശിയിരുന്നത്.

തോട്ടം തൊഴിലാളികളുടെ സുരക്ഷ ഉറപ്പാക്കുന്നതിൽ വീഴ്ചയുണ്ടായിട്ടുണ്ടോയെന്ന കാര്യത്തിൽ അധികൃതർ അന്വേഷണം ആരംഭിച്ചിട്ടുണ്ട്. അപകടഭീഷണിയുയർത്തുന്ന മരങ്ങൾ നീക്കംചെയ്യുന്നതിലെ തടസ്സങ്ങളും തൊഴിലാളികൾക്ക് മതിയായ സുരക്ഷ ഉറപ്പാക്കേണ്ടതിന്റെ ആവശ്യകതയും വീണ്ടും ചർച്ചയാകുകയാണ്.

English Summary : In a heartbreaking incident at Mankulam in Devikulam Taluk, two female plantation workers—Chilliyamma and Veeralakshmi—lost their lives after a massive tree collapsed on them during heavy winds while they were resting after lunch.