ഉത്തരേന്ത്യയിലെ ന്യൂനമര്‍ദം ദുര്‍ബലമായതോടെ കാലവര്‍ഷത്തിന്റെ വിടവാങ്ങല്‍ വേഗത്തിലായി. ഇന്ന് കാലവര്‍ഷം വിടവാങ്ങല്‍ ഉത്തരേന്ത്യ പിന്നിട്ട് മഹാരാഷ്ട്രയിലെത്തി. സര്‍പോള്‍, റാഞ്ചി, റായ്പൂര്‍, ബ്രഹ്മപുരി, പര്‍ഭാനി, ബരാമതി, ഹര്‍നായ് എന്നിവിടങ്ങളിലൂടെയാണ് കാലവര്‍ഷം വിടവാങ്ങല്‍ രേഖ കടന്നു പോകുന്നത്.

മഹാരാഷ്ട്രയില്‍ കൂടുതല്‍ മേഖലകളിലേക്ക്

വരും ദിവസങ്ങളില്‍ മഹാരാഷ്ട്രയിലെ കൂടുതല്‍ പ്രദേശങ്ങളിലും ഛത്തീസ്ഗഡിലും തെലങ്കാനയുടെയും കര്‍ണാടകയിലെയും പ്രദേശങ്ങളിലും കാലവര്‍ഷം വിടവാങ്ങാന്‍ അനുകൂല അന്തരീക്ഷസ്ഥിതായാണുള്ളത്.

കാലവര്‍ഷം വിടവാങ്ങല്‍ വേഗത്തിലാകും, തുലാവര്‍ഷം നേരത്തെ എത്തിയേക്കും
Withdrawal of Southwest Monsoon and Approaching Northeast Monsoon
https://metbeatnews.com/withdrawal-of-southwest-monsoon-and-approaching-northeast-monsoon

മൂന്നു ദിവസത്തിനകം കര്‍ണാടക, പിന്നെ കേരളം

അടുത്ത 3 ദിവസത്തിനകം കാലവര്‍ഷം വിടവാങ്ങല്‍ കര്‍ണാടകയിലെത്തും. തുടര്‍ന്ന് കേരളവും തമിഴ്‌നാടും പെട്ടെന്നാകും വിടവാങ്ങുക. ഇതോടെ കാലവര്‍ഷം രാജ്യത്തു നിന്ന് പൂര്‍ണമായി വിടവാങ്ങിയതായി പ്രഖ്യാപിക്കും. ഒക്ടോബര്‍ 1 മുതല്‍ കാലവര്‍ഷക്കാറ്റ് ദുര്‍ബലമാകുകയും ദക്ഷിണേന്ത്യയില്‍ വടക്കുകിഴക്കന്‍ കാറ്റ് വീശുകയും ചെയ്യുന്നുണ്ടെങ്കിലും കേന്ദ്ര കാലാവസ്ഥാ വകുപ്പ് കാലവര്‍ഷം വിടവാങ്ങിയതായി പ്രഖ്യാപിച്ചിട്ടില്ല.

എതിര്‍ച്ചുഴലി ശക്തം, വേഗത്തില്‍ വിടവാങ്ങും

ഉത്തരേന്ത്യയിലെ ന്യൂനമര്‍ദം ദുര്‍ബലമായാല്‍ വേഗത്തില്‍ കാലവര്‍ഷം വിടവാങ്ങുന്നത് പുരോഗമിക്കുമെന്ന് നേരത്തെ മെറ്റ്ബീറ്റ് ന്യൂസ് റിപ്പോര്‍ട്ടു ചെയ്തിരുന്നു. ഇതിനു പ്രധാന കാരണം ഉത്തരേന്ത്യയില്‍ രൂപപ്പെട്ട എതിര്‍ച്ചുഴലി (anti cyclone) ആണ്.

നിലവില്‍ കാലവര്‍ഷക്കാറ്റിനെ ഇന്ത്യയ്ക്കു മുകളില്‍ നിന്ന് തുടച്ചു നീക്കുന്ന എതിര്‍ച്ചുഴലി സ്ഥിതി ചെയ്യുന്നത് വടക്കന്‍ ഗുജറാത്ത് മേഖലയില്‍ നിന്നാണ്. തെക്കു പടിഞ്ഞാറന്‍ രാജസ്ഥാനോടു ചേര്‍ന്നാണ് എതിര്‍ച്ചുഴലി സ്ഥിതി ചെയ്യുന്നത്.

ഇത് അന്തരീക്ഷത്തിന്റെ താഴ്ന്ന ഉയരത്തിലെ മണ്‍സൂണ്‍ ഈര്‍പ്പമുള്ള കാറ്റിനെ ഒരു ഫാന്‍ പോലെ അടിച്ചകറ്റും. വരണ്ട വടക്കന്‍ കാറ്റിനെ ഇവിടേക്ക് എത്തിക്കുകയും ചെയ്യും. വടക്കേ ഇന്ത്യയില്‍ വേഗത്തില്‍ കാലവര്‍ഷം വിടവാങ്ങാന്‍ സഹായിക്കുന്നത് ഈ എതിര്‍ച്ചുഴലിയാണ്.

English Summary : Anticyclone over Gujarat Accelerates Southwest Monsoon Withdrawal Towards Maharashtra, Karnataka, and Kerala.