കർഷകർക്ക് ഒറ്റത്തവണയായി 12 ബില്യൺ ഡോളർ നൽകുമെന്ന് ട്രംപ് ഭരണകൂടം

ട്രംപ് ഭരണകൂടം കർഷകർക്ക് 12 ബില്യൺ ഡോളർ (ഏകദേശം 1 ലക്ഷം കോടി രൂപ) ഒറ്റത്തവണ സഹായധനം പ്രഖ്യാപിച്ചു. ഈ വർഷം ഏർപ്പെടുത്തിയ അധിക താരിഫുകൾ കാരണം പ്രതിസന്ധിയിലായ കർഷകരെ, പ്രത്യേകിച്ച് സോയാബീൻ, ധാന്യം എന്നിവ കൃഷി ചെയ്യുന്നവരെയാണ് ഇത് പ്രധാനമായും ലക്ഷ്യമിടുന്നത്. വൈറ്റ്‌ഹൗസിൽ നടന്ന യോഗത്തിലാണ് 'ഫാം ബ്രിഡ്ജ് അസിസ്റ്റൻസ് പ്രോഗ്രാം' എന്ന പേരിലുള്ള ഈ പദ്ധതി പ്രഖ്യാപിച്ചത്.

താരിഫുകളിലൂടെ ലഭിക്കുന്ന വരുമാനത്തിന്റെ ഒരു ചെറിയ ഭാഗമാണ് സഹായമായി നൽകുന്നതെന്ന് പ്രസിഡന്റ് ട്രംപ് പറഞ്ഞു. "നമ്മുടെ കർഷകരെ നമ്മൾ സ്നേഹിക്കുന്നുവെന്നും അദ്ദേഹം കൂട്ടിച്ചേർത്തു.

ട്രംപിന്റെ പുതിയ സാമ്പത്തിക നയങ്ങൾ (നികുതിയിളവുകൾ, താരിഫുകൾ) പൂർണ്ണമായി പ്രാബല്യത്തിൽ വരുന്നതുവരെ കർഷകർക്ക് താങ്ങാവുക എന്നതാണ് പദ്ധതിയുടെ ലക്ഷ്യം.

പണം കണ്ടെത്തുന്നത് യു.എസ്.ഡി.എയുടെ കമ്മോഡിറ്റി ക്രെഡിറ്റ് കോർപ്പറേഷനിൽ നിന്നും

മുൻ ഭരണകൂടത്തിന്റെ പാളിച്ചകൾക്കും ഇപ്പോഴത്തെ വിജയകരമായ നയങ്ങൾക്കും ഇടയിലെ വിടവ് നികത്താൻ ഈ സഹായം കർഷകരെ പിന്തുണയ്ക്കുമെന്ന് വൈറ്റ്‌ഹൗസ് വക്താവ് അന്ന കെല്ലി പറഞ്ഞു.
യു.എസ്.ഡി.എയുടെ (USDA) കമ്മോഡിറ്റി ക്രെഡിറ്റ് കോർപ്പറേഷനിൽ (CCC) നിന്നാണ് ഇതിനായുള്ള പണം കണ്ടെത്തുന്നത്.

അതേസമയം വിലക്കയറ്റം പരിഹരിക്കുന്നതിന്റെ ഭാഗമായി, ട്രാക്ടറുകൾ പോലുള്ള വലിയ യന്ത്രങ്ങൾക്കുള്ള ചില പാരിസ്ഥിതിക നിയന്ത്രണങ്ങൾ നീക്കം ചെയ്യുമെന്ന് ട്രംപ് അറിയിച്ചിട്ടുണ്ട്.
താരിഫുകൾ കാരണം കർഷകരുടെ ചെലവുകൾ വർധിക്കുകയും യന്ത്രസാമഗ്രികളുടെ നിർമ്മാതാക്കൾക്ക് വലിയ സാമ്പത്തിക നഷ്ടം ഉണ്ടാകുകയും ചെയ്ത സാഹചര്യത്തിലാണ് ഈ പ്രഖ്യാപനം.

English Summary : White House spokesperson Ann Kelly highlights USDA's support for farmers, bridging gaps between past failures and current successful policies