ജൂണ്‍ 9 മുതല്‍ ട്രോളിങ് നിരോധനം, 52 ദിവസത്തേക്ക് നിയന്ത്രണം

കേരളത്തില്‍ ജൂണ്‍ 9 അര്‍ധരാത്രി മുതല്‍ ജൂലൈ 31 വരെ 52 ദിവസത്തേക്കു ട്രോളിങ് നിരോധനം ഏര്‍പ്പെടുത്തി. കടല്‍വിഭവങ്ങളുടെ പ്രജനന കാലയളവില്‍ മത്സ്യസമ്പത്ത് സംരക്ഷിക്കുന്നതിനായി ഏര്‍പ്പെടുത്തുന്ന നിരോധനം ഫലപ്രദമായി നടപ്പാക്കാന്‍ വിപുലമായ ക്രമീകരണങ്ങളാണ് ഫിഷറീസ് വകുപ്പും ബന്ധപ്പെട്ട മറ്റു വകുപ്പുകളും ഒരുക്കിയിരിക്കുന്നത്. നിരോധനം പ്രാബല്യത്തില്‍ വരുന്നതോടെ, ഇന്‍ബോര്‍ഡ് വള്ളങ്ങള്‍ക്കൊപ്പമുള്ള കാരിയര്‍ വള്ളങ്ങള്‍ ഉള്‍പ്പെടെയുള്ള ട്രോള്‍ ബോട്ടുകള്‍ക്ക് കടലില്‍ പോകുന്നതിന് കര്‍ശന വിലക്കുണ്ടാകും.

എന്നാല്‍, പരമ്പരാഗത മത്സ്യത്തൊഴിലാളികള്‍ക്ക് വിലക്ക് ബാധകമല്ല. നിരോധനം തുടങ്ങുന്നതോടെ പ്രധാന ഫിഷിങ് ഹാര്‍ബറുകളുടെയും ലാന്‍ഡിങ് സെന്ററുകളുടെയും പ്രവര്‍ത്തനം സ്തംഭിക്കും. ഇതര സംസ്ഥാന ബോട്ടുകള്‍ 9 ന് മുന്‍പായി കേരളതീരം വിട്ടുപോകണമെന്ന് ഫിഷറീസ് വകുപ്പ് നിര്‍ദേശിച്ചിട്ടുണ്ട്.

ട്രോളിങ് നിരോധന കാലയളവില്‍ പരമ്പരാഗത മത്സ്യത്തൊഴിലാളികളുടെ സുരക്ഷ ഉറപ്പാക്കാന്‍ ഫിഷറീസ് വകുപ്പ് പ്രത്യേക കണ്‍ട്രോള്‍ റൂമുകള്‍ തുറക്കും. അടിയന്തര സാഹചര്യങ്ങള്‍ നേരിടാന്‍ ലൈഫ് ഗാര്‍ഡ്, പ്രത്യേക ബോട്ടുകള്‍ എന്നിവ സജ്ജമാക്കിയിട്ടുണ്ട്.മത്സ്യബന്ധനം നിലയ്ക്കുന്നതു മൂലം പ്രതിസന്ധിയിലാകുന്ന മത്സ്യത്തൊഴിലാളികള്‍ക്കും അനുബന്ധ തൊഴിലാളികള്‍ക്കും ഈ കാലയളവില്‍ സൗജന്യ റേഷനടക്കമുള്ള സഹായം ഏ!ര്‍പ്പെടുത്തും. നിയമലംഘനം നടത്തുന്ന ബോട്ടുകള്‍ക്കെതിരെ കടുത്ത പിഴയും ലൈസന്‍സ് റദ്ദാക്കല്‍ ഉള്‍പ്പെടെയുള്ള നിയമനടപടികളും സ്വീകരിക്കുമെന്ന് അധികൃതര്‍ മുന്നറിയിപ്പ് നല്‍കി.

PHOTO Coutresy - Mathrubhumi

English summary : rawling Ban in Kerala from June 9: Restrictions for 52 Days. A 52-day trawling ban will be implemented in Kerala from the midnight of June 9 to July 31 to protect marine life during its breeding season.