ഉത്തരാഖണ്ഡിൽ മിന്നൽ പ്രളയം; തുരങ്കത്തിൽ തൊഴിലാളികൾ കുടുങ്ങി

ഉത്തരാഖണ്ഡിലെ ചമോലിയിൽ മിന്നൽ പ്രളയത്തെ തുടർന്ന് നിർമാണത്തിലിരുന്ന തുരങ്കത്തിൽ നിരവധി തൊഴിലാളികൾ കുടുങ്ങി. പീപ്പൽകോട്ടിയിലെ തെഹ്‌രി ഹൈഡ്രോ ഡെവലപ്‌മെന്റ് കോർപ്പറേഷൻ ലിമിറ്റഡിന്റെ (THDC) ജലവൈദ്യുത പദ്ധതി പ്രദേശത്താണ് അപകടമുണ്ടായത്.

കഴിഞ്ഞ ദിവസം വൈകിട്ട് ആറരയോടെയാണ് തുരങ്കത്തിലേക്ക് വലിയ തോതിൽ വെള്ളവും ചളിയും അവശിഷ്ടങ്ങളും ഇരച്ചുകയറിയത്. ഈ സമയത്ത് നിരവധി തൊഴിലാളികൾ തുരങ്കത്തിനുള്ളിൽ ജോലി ചെയ്യുകയായിരുന്നു. ഇവരാണ് അപകടത്തിൽ കുടുങ്ങിയത്.

A sudden surge of water swept away a valley bridge and several nearby vehicles as water and debris rushed through Tamakh village in Niti Valley, Chamoli district, near Joshimath, Uttarakhand, India.#uttarakhand #india #flood pic.twitter.com/ikVQ931ToR
— Tomson (@TomsonWoo) August 10, 2026

16 തൊഴിലാളികളെ രക്ഷപ്പെടുത്തി

രക്ഷാപ്രവർത്തകർ ഇതുവരെ 16 തൊഴിലാളികളെ സുരക്ഷിതമായി പുറത്തെത്തിച്ചു. ഇവരെ ഗോപേശ്വറിലെ ജില്ലാ ആശുപത്രിയിലേക്ക് മാറ്റിയതായി ചമോലി ജില്ലാ മജിസ്ട്രേറ്റ് ഗൗരവ് കുമാർ അറിയിച്ചു. നിരവധി തൊഴിലാളികൾ ഇപ്പോഴും തുരങ്കത്തിനുള്ളിൽ കുടുങ്ങിക്കിടക്കുന്നതായാണ് വിവരം.

രക്ഷാപ്രവർത്തനം ഊർജിതം

തുരങ്കത്തിനുള്ളിൽ വെള്ളവും ചളിയും നിറഞ്ഞുനിൽക്കുകയാണ്. എസ്‌ഡിആർഎഫ് (SDRF), എൻഡിആർഎഫ് (NDRF) സംഘങ്ങളെയും പ്രദേശത്ത് വിന്യസിച്ചിട്ടുണ്ട്. കുടുങ്ങിക്കിടക്കുന്ന തൊഴിലാളികളെ രക്ഷപ്പെടുത്തുന്നതിനൊപ്പം പദ്ധതി പ്രദേശത്തെ മറ്റ് തൊഴിലാളികളെ സുരക്ഷിത സ്ഥാനങ്ങളിലേക്ക് മാറ്റാനുള്ള നടപടികളും പുരോഗമിക്കുകയാണ്. ജില്ലാ ഭരണകൂടവും ദുരന്തനിവാരണ സംഘങ്ങളും പദ്ധതി അധികൃതരുമായി ഏകോപിച്ചാണ് പ്രവർത്തിക്കുന്നത്.

രക്ഷാപ്രവർത്തനം വേഗത്തിലാക്കാൻ നിർദേശം

സംഭവത്തിൽ ഉത്തരാഖണ്ഡ് മുഖ്യമന്ത്രി പുഷ്കർ സിങ് ധാമി ആശങ്ക രേഖപ്പെടുത്തി. രക്ഷാപ്രവർത്തനം വേഗത്തിലാക്കാൻ ഉദ്യോഗസ്ഥർക്ക് നിർദേശം നൽകിയതായി മുഖ്യമന്ത്രി അറിയിച്ചു. ജില്ലാ ഭരണകൂടവും ബന്ധപ്പെട്ട എല്ലാ വകുപ്പുകളും ഏജൻസികളും ഏകോപിച്ച് പ്രവർത്തിച്ച് തുരങ്കത്തിൽ കുടുങ്ങിയവരെ എത്രയും വേഗം രക്ഷപ്പെടുത്തണമെന്നും അദ്ദേഹം നിർദേശിച്ചു.

English Summary : A sudden flash flood triggered by heavy rainfall caused massive amounts of water, slush, and debris to surge into an under-construction hydroelectric project tunnel in Pipalkoti, Chamoli district, trapping several workers inside. The incident occurred around 6:30 PM at a site managed by the Tehri Hydro Development Corporation Limited (THDC).