ആന്ന് ആ ചെക്ക്‌പോസ്റ്റില്‍ അവസാനമായി സംഭവിച്ചത്...

അന്ന് രാവിലെ ഗിറോങ്ങിലെ ആകാശത്തില്‍ മഴയുടെ സൂചന പോലുമില്ലായിരുന്നു. പ്രസന്നമായ കാലാവസ്ഥയുള്ള ദിനം. നേപ്പാള്‍ - ടിബറ്റ് അതിര്‍ത്തിയിലെ താഴ്‌വരയില്‍ നേരം വെളുത്തു വന്നതേയുണ്ടായിരുന്നുള്ളൂ. കൈലാസ യാത്ര കഴിഞ്ഞു മടങ്ങുന്നവരും പുതിയ യാത്രയ്ക്കായി പുറപ്പെട്ട തീര്‍ത്ഥാടകരും ചരക്കുലോറികളുടെ നിരയും കൊണ്ട് റസുവഗധി(Rasuwagadhi)യിലെയും തിമൂറെയിലെയും ചെറുപാതകള്‍ നിറഞ്ഞിരുന്നു. നേപ്പാളില്‍ നിന്ന് ചൈനയിലേക്ക് കടക്കുന്ന ഘട്ടേ ഖോല ബസാറില്‍ മനുഷ്യരുടെ വലിയൊരു തിരക്കുതന്നെ രൂപപ്പെട്ടിരുന്നു.

പ്രളയത്തിന് തൊട്ടു മുൻപുള്ള സിസിടിവി ദൃശ്യം

അതിര്‍ത്തിയിലെ ആ പ്രഭാതം ഇന്ത്യന്‍ തീര്‍ത്ഥാടകരില്‍ പലര്‍ക്കും ഒരു സാധാരണ ദിവസത്തെപ്പോലെയായിരുന്നു തുടക്കം. അതിര്‍ത്തി തുറക്കുന്നതും കാത്തുനില്‍ക്കുമ്പോള്‍ അവര്‍ ഹിമാലയന്‍ നിരകളുടെ ഭംഗി മൊബൈലില്‍ പകര്‍ത്തി നാട്ടിലുള്ള ബന്ധുക്കള്‍ക്ക് വീഡിയോ കോളുകളും ഇന്‍സ്റ്റാഗ്രാം റീല്‍സുകളും അയച്ചു നല്‍കിക്കൊണ്ടിരുന്നു.

ഞങ്ങള്‍ ചൈനയിലേക്ക് കടക്കാന്‍ കാത്തുനില്‍ക്കുകയാണ്

കൊല്‍ക്കത്ത സ്വദേശിയായ സുഭ്രശ്രീ ചക്രബര്‍ത്തി രാവിലെ 7:57ന് നേപ്പാള്‍ ഇമിഗ്രേഷന്‍ ക്ലിയറന്‍സ് ലഭിച്ച പാസ്‌പോര്‍ട്ടിന്റെ ചിത്രം ഭര്‍ത്താവ് സുദീപ്‌തോ ബട്ടാചാര്യയ്ക്ക് അയച്ചു നല്‍കി. 8:03ന് 'ഞങ്ങള്‍ ചൈനയിലേക്ക് കടക്കാന്‍ കാത്തുനില്‍ക്കുകയാണ്' എന്നൊരു സന്ദേശം കൂടി അവരയച്ചു. അതിനുശേഷം ആ ഫോണില്‍ നിന്നൊരു സന്ദേശവും വന്നില്ല.

സമയം രാവിലെ 8:35:03. റസുവഗധി ഇമിഗ്രേഷന്‍ ഓഫീസിലെ കമ്പ്യൂട്ടര്‍ സ്‌ക്രീനില്‍ അവസാനത്തെ എന്‍ട്രിയും രേഖപ്പെടുത്തപ്പെട്ടു. നേപ്പാളില്‍ നിന്ന് ടിബറ്റിലേക്ക് കടക്കാന്‍ 89 പേര്‍ അന്ന് അനുമതി വാങ്ങിയിറങ്ങിയിരുന്നു. അതില്‍ 32 ഇന്ത്യക്കാരും 12 ചൈനക്കാരും 9 അമേരിക്കക്കാരും ബ്രിട്ടന്‍, കാനഡ, ഓസ്‌ട്രേലിയ, ഇറ്റലി തുടങ്ങിയ രാജ്യങ്ങളിലെ പൗരന്മാരും ഉള്‍പ്പെട്ടിരുന്നു. ഓഫീസിലെ മുതിര്‍ന്ന ഉദ്യോഗസ്ഥനായ ടികാ റാം പൊഖാറെല്‍ അന്ന് കാഠ്മണ്ഡുവില്‍ പരീക്ഷ എഴുതാന്‍ പോയതുകൊണ്ട് മാത്രം രക്ഷപ്പെട്ടതായിരുന്നു.

മലനിരകളില്‍ ഒരു നിശബ്ദ ദുരന്തത്തിന് തുടക്കമായി

8:20ന് അയാള്‍ സഹപ്രവര്‍ത്തകനെ വിളിച്ചപ്പോള്‍ 'ഇന്ന് അതിര്‍ത്തിയില്‍ പതിവില്ലാത്ത തിരക്കാണ്, അറുന്നൂറോളം ആളുകള്‍ അങ്ങോട്ടു മിങ്ങോട്ടും കടക്കാന്‍ കാത്തുനില്‍ക്കുന്നുണ്ട്' എന്ന മറുപടിയാണ് ലഭിച്ചത്. ഇമിഗ്രേഷന്‍ കഴിഞ്ഞ് 1.5 കിലോമീറ്റര്‍ അകലെയുള്ള 'ഫ്രണ്ട്ഷിപ്പ് ബ്രിഡ്ജ്' ലക്ഷ്യമാക്കി നടന്നവര്‍ അല്ലെങ്കില്‍ വാഹനങ്ങള്‍ക്കായി കാത്തുനിന്നവര്‍, തൊട്ടടുത്ത മിനിറ്റുകളില്‍ തങ്ങളെ കാത്തിരുന്ന മഹാദുരന്തത്തെ കുറിച്ച് അറിഞ്ഞിരുന്നില്ല. കൃത്യം 8:37 ന് മലനിരകളില്‍ ഒരു നിശബ്ദ ദുരന്തത്തിന് തുടക്കമായി.

ഹിമാലയത്തിലെ ഒരു ഹിമാനിയുടെ ഭാഗം തകര്‍ന്നു വീണതിനെത്തുടര്‍ന്ന് കുന്നിറങ്ങി വന്നത് വെറുമൊരു പ്രളയജലമായിരുന്നില്ല; മണ്ണും ഭീമന്‍ പാറക്കല്ലുകളും മഞ്ഞും ചെളിയും കലര്‍ന്ന ഒരഗ്‌നിപര്‍വ്വത സ്‌ഫോടനം പോലെയുള്ള പ്രളയപ്രവാഹമായിരുന്നു.

സിസിടിവി ക്യാമറയില്‍ ആ ഭയാനക ദൃശ്യം പതിഞ്ഞു

ചൈനയിലെ ഗിറോങ് ഭാഗത്തുള്ള സിസിടിവി ക്യാമറയില്‍ പ്രാദേശിക സമയം 10:59:53ന് (നേപ്പാള്‍ സമയം 8:44) ആ ഭയാനക ദൃശ്യം പതിഞ്ഞു. കെട്ടിടങ്ങള്‍ക്ക് പിന്നില്‍ നിന്ന് ഒരു കറുത്ത ആകാശം പോലെ ഉയര്‍ന്നുവന്ന പ്രളയം, വെറും 7 മിനിറ്റുകൊണ്ട് മലമുകളില്‍ നിന്ന് ഒഴുകിയെത്തി താഴ്‌വരയെ വിഴുങ്ങി. സെക്കന്‍ഡുകള്‍ മാത്രം ദൈര്‍ഘ്യമുള്ള ആ ദൃശ്യത്തില്‍, പ്രാണരക്ഷാര്‍ത്ഥം ഓടുന്ന മനുഷ്യരും വലിയ കെട്ടിടങ്ങളും പാലങ്ങളും ഒലിച്ചുപോകുന്നതും കാണാമായിരുന്നു.

Newly released @vantortech satellite images confirm the complete destruction of the Rasuwagadhi border crossing (also known as Gyirong Port) between Nepal and Tibet.📍28.2794,85.3778 https://t.co/spJPbOariA pic.twitter.com/PnX3a5p18w
— OSGINT (@posted_news) August 28, 2026

നദീതീരത്തുനിന്ന് 100 മീറ്ററോളം ഉയരത്തിലായിരുന്നു ഇമിഗ്രേഷന്‍ ഓഫീസ് സ്ഥിതി ചെയ്തിരുന്നത്. എന്നാല്‍ പ്രളയജലം അതിലും ഉയരത്തില്‍ രാക്ഷസത്തിരമാലകളായി ഉയര്‍ന്നുവന്നു. അവിടെയുണ്ടായിരുന്ന 60ഓളം വീടുകളും ഹോട്ടലുകളും ചരക്കുലോറികളും നാല് ജലവൈദ്യുത പദ്ധതി ഓഫീസുകളും നിമിഷങ്ങള്‍ക്കകം ഇല്ലാതായി.

ജീവനുംകൊണ്ട് ഓടാന്‍ ഒരു സെക്കന്‍ഡ് പോലും പ്രകൃതി സമയം തന്നില്ല

മുന്‍വര്‍ഷത്തെ വെള്ളപ്പൊക്കത്തിന്റെ ഓര്‍മ്മയില്‍, പ്രളയം വന്നാല്‍ കുന്നിന്‍ ചെരുവിലേക്ക് ഓടിക്കയറണമെന്ന് ഇമിഗ്രേഷന്‍ ജീവനക്കാര്‍ തമ്മില്‍ സംസാരിക്കാറുണ്ടായിരുന്നു. എന്നാല്‍ ജീവനുംകൊണ്ട് ഓടാന്‍ ഒരു സെക്കന്‍ഡ് പോലും പ്രകൃതി അന്ന് അവര്‍ക്ക് നല്‍കിയില്ല. ഇമിഗ്രേഷന്‍ ഓഫീസിലെ നാല് ജീവനക്കാര്‍ പ്രളയത്തില്‍ ഒലിച്ചുപോയി. ഓഫീസറുടെ മൃതദേഹം പിന്നീട് താഴെ നദിയില്‍ നിന്ന് കണ്ടെത്തിയെങ്കിലും അവസാന എന്‍ട്രി രേഖപ്പെടുത്തിയ വനിതാ ഉദ്യോഗസ്ഥയെ ഇനിയും കണ്ടെത്താനായിട്ടില്ല.

ഒരൊറ്റ പ്രഭാതം കൊണ്ട് എല്ലാം തകര്‍ന്നടിഞ്ഞു

നേപ്പാളിനെയും ചൈനയെയും ബന്ധിപ്പിച്ചിരുന്ന ചരിത്രപ്രസിദ്ധമായ ഫ്രണ്ട്ഷിപ്പ് പാലവും അതിര്‍ത്തി ഗ്രാമങ്ങളും മാപ്പില്‍ നിന്ന് തന്നെ തുടച്ചുനീക്കപ്പെട്ടു. കാഠ്മണ്ഡുവും ചൈനയുമായുള്ള വ്യാപാരത്തിന്റെ മൂന്നിലൊന്നും നടന്നിരുന്ന, പ്രതിദിനം 70ഓളം ചരക്കുലോറികള്‍ കടന്നുപോയിരുന്ന സുപ്രധാന പാതയാണ് ഒരൊറ്റ പ്രഭാതം കൊണ്ട് ത തകര്‍ന്നടിഞ്ഞത്.

ഓഗസ്റ്റ് 28ന് പ്രദേശത്തെത്തിയ ചൈനീസ് രക്ഷാസേനാംഗങ്ങള്‍ കണ്ടത് ശ്മശാനമൂകതയായിരുന്നു. 'കണ്ണെത്താദൂരത്തോളം അവശിഷ്ടങ്ങള്‍ മാത്രം,' എന്നവര്‍ സാക്ഷ്യപ്പെടുത്തി. പ്രളയത്തില്‍ 2,500ഓളം ആളുകള്‍ അകപ്പെട്ടിട്ടുണ്ടാകാമെന്നാണ് ടികാ റാം ഭയപ്പെടുന്നത്. തന്റെ 40ലധികം അടുത്ത കൂട്ടുകാരെയാണ് അയാള്‍ക്ക് ഒറ്റദിവസം കൊണ്ട് നഷ്ടപ്പെട്ടത്. ഈശോ ഫൗണ്ടേഷന്റെ 77 തീര്‍ത്ഥാടകരും 275ലധികം ഇന്ത്യക്കാരും ഉള്‍പ്പെടെ നൂറുകണക്കിന് മനുഷ്യരുടെ ജീവനാണ് ആ ഏതാനും മിനിറ്റുകള്‍ക്കുള്ളില്‍ പ്രകൃതി കവര്‍ന്നെടുത്തത്. ഹിമാലയന്‍ ചുരങ്ങളില്‍ ഇപ്പോഴും ആ മനുഷ്യരുടെ ശേഷിപ്പുകള്‍ക്കായുള്ള തിരച്ചില്‍ തുടരുകയാണ്.

English Summary : The narrative provides a chilling account of a devastating, sudden glacial outburst flood (GLOF) that wiped out the Rasuwagadhi-Girong border area connecting Nepal and Tibet (China).