കാലവര്‍ഷക്കാറ്റ് ദുര്‍ബലമായതിനെ തുടര്‍ന്ന് തമിഴ്‌നാട്ടിലും കേരളത്തിന്റെ കിഴക്കന്‍ മേഖലയിലും നാളെ (ചൊവ്വ) മുതല്‍ ഇടിയോടെ മഴ സാധ്യത. ഇന്ന് ഇടുക്കി ജില്ലയുടെ ചില ഭാഗങ്ങളിലും തെക്കുപടിഞ്ഞാറന്‍ തമിഴ്‌നാട്ടിലും ഇടിയോടെ മഴ ലഭിച്ചു.

കേരളത്തില്‍ വ്യാപകമായി മഴ സാധ്യതയില്ലെങ്കിലും തമിഴ്‌നാട്ടില്‍ നാളെ മഴ ലഭിക്കും. മധ്യ, തെക്കന്‍ തമിഴ്‌നാട്ടിലാണ് ഇടിയോടെ മഴ ലഭിക്കുക. കഴിഞ്ഞ ദിവസം കോയമ്പത്തൂരില്‍ മഴ ലഭിച്ചിരുന്നു.

കേരളത്തില്‍ മഴ വ്യാപകമായി ലഭിക്കാന്‍ സഹായിക്കുന്ന അന്തരീക്ഷ ഘടകങ്ങള്‍ നിലവിലില്ല. മഴ വിട്ടു നിന്ന് വെയില്‍ തെളിഞ്ഞതോടെ കേരളത്തില്‍ പകല്‍ താപനിലയിലും വര്‍ധനവുണ്ടായി. വെയിലിന് നല്ല ചൂട് അനുഭവപ്പെടുന്നുണ്ട്.

പകലും രാത്രിയും ചൂടു കൂടുന്നു

രാത്രി താപനിലയിലും വര്‍ധനവു രേഖപ്പെടുത്താന്‍ തുടങ്ങിയിട്ടുണ്ട്. തീരദേശങ്ങളിലാണ് രാത്രി താപനിലയില്‍ വര്‍ധനവുള്ളത്. പകല്‍ താപനിലയില്‍ വര്‍ധനവ് കൂടുതലും തെക്കന്‍ കേരളത്തിലാണ്.

അതിനിടെ, കേരളത്തിലും തമിഴ്‌നാട്ടിലും മാഹിയിലും തീരദേശ ആന്ധാപ്രദേശിലും നാളെയും മറ്റന്നാളും ഇടിയോടെ മഴ ലഭിക്കുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി.

നാളെ ആറു ജില്ലകളില്‍ മഞ്ഞ അലര്‍ട്ട്

ചൊവ്വാഴ്ച തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളിലാണ് മഞ്ഞ അലര്‍ട്ട്. ബുധനാഴ്ച പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളിലും മഞ്ഞ അലര്‍ട്ട് പ്രഖ്യാപിച്ചിട്ടുണ്ട്. ഇടിയോടെ മഴക്കൊപ്പം മണിക്കൂറില്‍ 40 കി.മി വരെ വേഗത്തിലുള്ള കാറ്റിനും സാധ്യതയുണ്ടെന്നാണ് കാലാവസ്ഥാ വകുപ്പിന്റെ പ്രവചനം.

Metbeat News

English Summary: Thunderstorms are coming to Tamil Nadu, rain is also likely in eastern Kerala