സൗദി അറേബ്യയിൽ ഏഴ് മേഖലകളിൽ അതിശക്തമായ മഴയ്ക്ക് മുന്നറിയിപ്പ്; പ്രളയസാധ്യത

സൗദി അറേബ്യയിലെ ഏഴ് മേഖലകളിൽ ശക്തമായ ഇടിമിന്നലോടുകൂടിയ മഴയ്ക്കും മിന്നൽപ്രളയത്തിനും ശക്തമായ കാറ്റിനും മുന്നറിയിപ്പ്. ഒക്ടോബർ 21 ബുധനാഴ്ച വരെ രാജ്യത്തിന്റെ വിവിധ ഭാഗങ്ങളിൽ അസ്ഥിര കാലാവസ്ഥ തുടരുമെന്നാണ് ദേശീയ കാലാവസ്ഥാ കേന്ദ്രമായ നാഷണൽ സെന്റർ ഫോർ മെറ്റീരിയോളജി (NCM) അറിയിച്ചിരിക്കുന്നത്.

ആലിപ്പഴവർഷത്തിനും പൊടിയും മണലും ഉയർത്തുന്ന ശക്തമായ കാറ്റിനും സാധ്യതയുണ്ടെന്നും മുന്നറിയിപ്പിൽ പറയുന്നു. കാറ്റും പൊടിയും മഴയും കാരണം കാഴ്ചാപരിധി തീർത്തും കുറയാനും സാധ്യതയുണ്ട്.
മദീന, തബൂക്ക്, കിഴക്കൻ പ്രവിശ്യ എന്നിവയുടെ ചില ഭാഗങ്ങളിലും നേരിയതുമുതൽ മിതമായതുവരെയുള്ള മഴ ലഭിക്കുമെന്നാണ് പ്രവചനം.

UAE Weather : യുഎഇയിൽ മഴയ്ക്കും; മൂടൽമഞ്ഞിനും മുന്നറിയിപ്പ്, കാറ്റ് 50 കിലോമീറ്റർ വരെ
യുഎഇയിൽ ഇന്ന് ചില മേഖലകളിൽ മഴയ്ക്ക് സാധ്യതയെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM).
https://metbeatnews.com/rain-fog-alerts-and-50-kmh-winds-forecasted-by-ncm

താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണി

കാലാവസ്ഥാ മുന്നറിയിപ്പിന്റെ പശ്ചാത്തലത്തിൽ സൗദി സിവിൽ ഡിഫൻസ് ഡയറക്ടറേറ്റ് ജനങ്ങളോട് ജാഗ്രത പാലിക്കാൻ നിർദേശിച്ചു. താഴ്‌വരകൾ, വെള്ളമൊഴുകുന്ന ചാലുകൾ, മഴവെള്ളം കെട്ടിനിൽക്കാൻ സാധ്യതയുള്ള പ്രദേശങ്ങൾ എന്നിവിടങ്ങളിൽ നിന്ന് മാറിനിൽക്കണം. വെള്ളപ്പൊക്കമുണ്ടായ പ്രദേശങ്ങളിലൂടെ വാഹനമോടിക്കുകയോ ഒഴുക്കുള്ള വെള്ളത്തിൽ ഇറങ്ങുകയോ ചെയ്യരുതെന്നും അധികൃതർ മുന്നറിയിപ്പ് നൽകി.

ഔദ്യോഗിക മാധ്യമങ്ങളിലൂടെയും സാമൂഹികമാധ്യമങ്ങളിലൂടെയും പുറത്തുവിടുന്ന സുരക്ഷാ നിർദേശങ്ങൾ കർശനമായി പാലിക്കണമെന്നും താമസക്കാർക്കും സന്ദർശകർക്കും നിർദേശമുണ്ട്.

രാത്രിയിലും പുലർച്ചെയും മൂടൽമഞ്ഞിന് സാധ്യത

മക്ക, മദീന, കിഴക്കൻ പ്രവിശ്യ എന്നിവയുടെ തീരദേശ മേഖലകളിൽ രാത്രിയിലും പുലർച്ചെയും മൂടൽമഞ്ഞ് രൂപപ്പെടാൻ സാധ്യതയുണ്ടെന്നും NCM അറിയിച്ചു. മഴയും പൊടിക്കാറ്റും മൂലം കാഴ്ചാപരിധി കുറഞ്ഞ റോഡുകളിൽ മൂടൽമഞ്ഞ് കൂടി രൂപപ്പെടുന്നത് ഗതാഗതത്തെ ബാധിച്ചേക്കാം.

ചെങ്കടലിൽ കടൽക്ഷോഭത്തിനും സാധ്യത

ചെങ്കടലിന്റെ തെക്കൻ ഭാഗങ്ങളിൽ കടൽ സാഹചര്യം മോശമാകാനും സാധ്യതയുണ്ട്. ഇടിമിന്നലോടുകൂടിയ മഴയ്ക്കിടെ കാറ്റിന്റെ വേഗം മണിക്കൂറിൽ 50 കിലോമീറ്ററിലധികം ഉയർന്നേക്കാം. സാധാരണയായി അര മീറ്റർ മുതൽ ഒന്നര മീറ്റർ വരെയായിരിക്കും തിരമാലകളുടെ ഉയരം. ഇടിമേഘങ്ങൾ ശക്തമായ പ്രദേശങ്ങളിൽ തിരമാലകൾ രണ്ട് മീറ്ററിലധികം ഉയരാനും സാധ്യതയുണ്ട്.

ഇതോടെ ചെറുവള്ളങ്ങൾക്കും കടലിലെ മറ്റ് പ്രവർത്തനങ്ങൾക്കും അപകടസാധ്യത വർധിച്ചേക്കാം. അതേസമയം, അറേബ്യൻ ഗൾഫിൽ താരതമ്യേന ശാന്തമായ കടൽസ്ഥിതിയായിരിക്കും പ്രതീക്ഷിക്കുന്നത്. ഇവിടെ തിരമാലകൾ അര മീറ്റർ മുതൽ ഒരു മീറ്റർ വരെയാകുമെന്നാണ് പ്രവചനം.

രാജ്യത്തിന്റെ വിവിധ ഭാഗങ്ങളിൽ വരും ദിവസങ്ങളിലും ഇടിമിന്നലോടുകൂടിയ മഴ തുടരാൻ സാധ്യതയുള്ളതിനാൽ ഔദ്യോഗിക കാലാവസ്ഥാ മുന്നറിയിപ്പുകൾ ശ്രദ്ധിക്കണമെന്നും സുരക്ഷാ നിർദേശങ്ങൾ പാലിക്കണമെന്നും സിവിൽ ഡിഫൻസ് വീണ്ടും അഭ്യർഥിച്ചു.

English Summary : Saudi Arabia's National Center for Meteorology (NCM) has issued severe weather warnings for seven regions, forecasting heavy thunderstorms, flash floods, hail, and strong dust-raising winds through Wednesday, October 21.