ഷാർജയിലെ സ്വർണ്ണ നിറമുള്ള ഈ ഗോതമ്പ് പാടം കണ്ടാൽ ഇന്ത്യ അസൂയപ്പെടും

ഇന്ത്യയിൽ മാത്രമല്ല കടൽ കടന്നു പോയാൽ അങ്ങ് ഷാർജയിലും കാണാം സ്വർണ്ണ നിറമുള്ള ഗോതമ്പ് പാടം. ഷാർജയുടെ അഭിമാന പദ്ധതിയാണ് മലീഹയിലെ ജൈവ ഗോതമ്പ് കൃഷി. ഇപ്പോഴിതാ ഈ ഗോതമ്പ് പാടം സന്ദർശിച്ചിരിക്കുകയാണ് സാൻസിബാർ പ്രഥമ വനിത മറിയം മ്വിനി. എമിറേറ്റിന്റെ സുസ്ഥിര ഉൽപാദന രീതികളും ഭക്ഷ്യസുരക്ഷ ഉറപ്പാക്കുന്നതിനായുള്ള പ്രവർത്തനങ്ങളും നേരിട്ടു മനസ്സിലാക്കാനായിരുന്നു ഈ സന്ദർശനം. ഫാമിലെ ആധുനിക സൗകര്യങ്ങളും ഉല്പ്പാദനക്ഷമത വർധിപ്പിക്കുന്നതിനായി നടപ്പിലാക്കുന്ന വികസന പരിപാടികളും അവർ വിലയിരുത്തി.

ഷാർജയ്ക്ക് അഭിനന്ദനം

കൃഷിയിടത്തിൻ്റെ പ്രവർത്തനങ്ങൾ നിയന്ത്രിക്കുന്ന കൺട്രോൾ റൂമിലായിരുന്നു ആദ്യ സന്ദർശനം. തുടർന്ന് ഉൽപാദനത്തിൻ്റെ ഗുണനിലവാരം ഉറപ്പുവരുത്തുന്ന ലാബോറട്ടറിയും നൂതന കൃഷിരീതികൾ പരീക്ഷിക്കുന്ന എക്സ്പിരിമെന്റൽ ഫാമും അവർ ചുറ്റിക്കണ്ടു. ജൈവകൃഷിയിലൂടെ വിഭവങ്ങൾ സംരക്ഷിക്കുന്നതിനും സുസ്ഥിരത ഉറപ്പാക്കുന്നതിനും ഷാർജ നടത്തുന്ന ഇടപെടലുകളെ അഭിനന്ദിച്ചു.

ഭക്ഷ്യ സ്വയംപര്യാപ്തത കൈവരിക്കുന്നതിനൊപ്പം പരിസ്‌ഥിതി സൗഹൃദപരമായ രീതികൾ എങ്ങനെ ഫലപ്രദമായി നടപ്പിലാക്കാമെന്നതിനെക്കുറിച്ചുള്ള വിശദമായ വിവരങ്ങൾ അധികൃതർ സംഘത്തിന് വിശദീകരിച്ചു നൽകി. ഉല്പ്പാദനക്ഷമത വർധിപ്പിക്കുന്നതിനുള്ള സാങ്കേതിക വിദ്യകളും സംഘം വിലയിരുത്തി.

English Summary : The first visit was to the control room, which manages the farm's operations. They then toured the laboratory, which ensures the quality of production, and the experimental farm, where innovative farming methods are tested.