ആളും ആരവവുമില്ല, മാധവ് ഗാഡ്ഗിലിനെ അവസാനമായി യാത്രയാക്കാൻ എത്തിയത് 50 ഓളം പേർ മാത്രം

പ്രകൃതിയെയും മനുഷ്യനെയും വേർതിരിച്ചു കാണുന്ന വികസന സങ്കൽപ്പങ്ങളെ ശാസ്ത്രീയ ബലത്തോടെയും നൈതിക ഉറപ്പോടെയും ചോദ്യം ചെയ്ത മാധവ് ഗാഡ്ഗിൽ പരിസ്ഥിതി സംരക്ഷണം ഒരു വൈകാരിക വിഷയമല്ല, മറിച്ച് അതിജീവനത്തിന്റെ അനിവാര്യതയാണെന്ന് സമൂഹത്തെ ബോധ്യപ്പെടുത്തി ഈ ഭൂമിയോട് യാത്ര പറഞ്ഞ് താൻ ജീവനു തുല്യം സ്നേഹിച്ച പ്രകൃതിയുടെ മണ്ണിൽ അന്ത്യവിശ്രമം കൊണ്ടിരിക്കുന്നു. പുണെ നവിപേടിലുള്ള ശ്മശാനത്തിലേക്ക് പ്രഫ. മാധവ് ഗാഡ്ഗിൽ മണ്ണിനോടു യാത്രപറയുന്ന നിമിഷങ്ങൾക്ക് സാക്ഷിയാവാൻ വെറും 50 പേർ മാത്രമാണ് എത്തിയത്. കൊടിവച്ച കാറുകളിൽ ആരും അദ്ദേഹത്തെ കാണാൻ വന്നില്ല. രാഷ്ട്രീയക്കാരുടെ തിരക്കില്ല. പത്മഭൂഷൻ ജേതാവിന് അന്ത്യയാത്ര ചൊല്ലാൻ, ഉപചാരമർപ്പിക്കാൻ ഒരു മന്ത്രിപോലുമെത്തിയിരുന്നില്ല. വളരെക്കുറച്ചു മനുഷ്യ സ്നേഹികളുടെ ഇടയിൽ, വെറും മണ്ണിൽ വെള്ളപുതച്ച് സമാധാനത്തോടെ ആ മനുഷ്യൻ ഈ ഭൂമിയിൽ ലയിച്ചു ചേർന്നു.

പരിസ്ഥിതി സംരക്ഷണം ഒരു ആഡംബരമല്ല

പശ്ചിമഘട്ട സംരക്ഷണവുമായി ബന്ധപ്പെട്ട ഗാഡ്ഗിൽ കമ്മിറ്റി റിപ്പോർട്ട് ഉൾപ്പെടെ, അദ്ദേഹത്തിന്റെ നിലപാടുകൾ രാജ്യവ്യാപകമായ ചർച്ചകൾക്കും വിവാദങ്ങൾക്കും കാരണമായി. എങ്കിലും അധികാരകേന്ദ്രങ്ങളെ ഭയപ്പെടാതെ സത്യം തുറന്നു പറയാനുള്ള ധൈര്യമാണ് അദ്ദേഹത്തെ വേറിട്ട ശാസ്ത്രജ്ഞനാക്കി മാറ്റിയത്. പ്രകൃതിയെ സംരക്ഷിക്കാതെ മനുഷ്യന്റെ ഭാവിയെ രക്ഷിക്കാനാവില്ലെന്ന ഉറച്ച നിലപാടിൽ നിന്ന് അദ്ദേഹം ഒരിക്കലും പിന്മാറിയില്ല. മനുഷ്യനും പ്രകൃതിയും തമ്മിലുള്ള സഹവർത്തിത്വമാണ് യഥാർത്ഥ പുരോഗതിയെന്ന സന്ദേശം തന്റെ ജീവിതത്തിലൂടെ അദ്ദേഹം അടയാളപ്പെടുത്തി. പരിസ്ഥിതി സംരക്ഷണം ഒരു ആഡംബരമല്ല; അത് മനുഷ്യാവകാശവും ഭാവി തലമുറയോടുള്ള കടപ്പാടുമാണെന്ന ബോധമാണ് മാധവ് ഗാഡ്ഗിൽ നമ്മൾക്ക് വിട്ടുനൽകിയത്.

English Summary : His stances, including the Gadgil Committee report on the conservation of the Western Ghats, sparked nationwide debates and controversies.